Ken in kʼaʼajs in paalileʼ ku taal tin tuukul le bix jatsʼutsil kajliken kaʼach yéetel in taataʼob tiʼ junpʼéel chan naj tu noojolil Franciaoʼ. In taataeʼ tu beetajten junpʼéel columpio, tsʼoʼoleʼ jach uts tin tʼaan in máan in wáalkab teʼ jardinoʼ. Tu jaʼabil 1966, xíimbaltaʼaboʼon tumen u j-jaajkunajoʼob Jéeoba. Yaʼab u téenel xáanchaj táan u tsikbal in taata yéeteloʼob. Ka máan siete meseseʼ tu chʼaʼtuklaj u beetkuba j-Jaajkunajil. Maʼ úuch tiʼ leloʼ in maamaeʼ bey xan tu beetiloʼ. Tu kaʼatúulaloʼob tu líiʼsenoʼob yéetel yaabilaj.

Le maʼ úuch suunakoʼon España, le luʼum tuʼux síij in taataʼoboʼ, tiʼ káaj le talamiloʼoboʼ. Káaj u sen yaatal in kʼaboʼob bey xan u kaal in wookoʼob. Tu yáamil kaʼapʼéel jaʼabeʼ binoʼon tu yiknal yaʼab doctoroʼob. Tu tsʼookeʼ t-kaxtaj juntúul reumatólogo jach kʼaj óolaʼan; baʼaleʼ tu yaʼalajtoʼon: «Maʼ tu páajtal u beetaʼal mix baʼal». Ka joʼopʼ u yokʼol in maama. Chéen kʼajaʼanten u yaʼalaʼal «enfermedad crónica autoimmune» yéetel «poliartritis juvenil». * Kex chéen 10 jaʼab yaanteneʼ tin naʼataj maʼ maʼalob baʼax ku yúuchliʼ.

Le doctoroʼ tu túuxten tiʼ junpʼéel kúuchil tuʼux ku tsʼaʼabal tratamiento tiʼ mejen paalal. Le ka bisaʼaben yéetel le ka tin wilaj bix le kúuchiloʼ jach lúub in wóol. Yaʼab baʼax ku yaʼalal ka u beet máakiʼ. Le x-monjaʼoboʼ tu kʼosoʼob in pool, ka tu tsʼáajoʼob in búukint junpʼéel uniforme jach kʼaas. «¿Bix túun kin kuxtal teʼelaʼ?», tin tuklaj le táan in wokʼoloʼ.

In taataʼobeʼ tu kaʼansoʼobten in meyajt Jéeoba, le oʼolal maʼ táakpajen tiʼ le baʼaxoʼob ku beetik le catolicoʼob teʼ tuʼux yanenoʼ. Baʼaleʼ le x-monjaʼoboʼ maʼ chéen chʼaʼabil tu naʼatiloʼobiʼ. Tin kʼáat óoltaj tiʼ Jéeoba maʼ u pʼatken; maʼ xáanchaj ka joʼopʼ in wuʼuyik táan u kanáantken jeʼex u beetik juntúul taatatsil nojoch u yaabilajeʼ.

Chaʼab in xíimbaltaʼal tumen in taataʼob, kex chéen junsúutuk utiaʼal sabadoʼob. Letiʼobeʼ tu taasoʼobten libroʼob yéetel revistaʼob utiaʼal u líiʼskoʼob in wóol. U suukileʼ maʼ tu chaʼabal u yantal libroʼob tiʼ mejen paalal teʼeloʼ, baʼaleʼ le x-monjaʼoboʼ tu chaʼajoʼob u yantal in libroʼob yéetel in Biblia; sáamsamal  kin xokik. Kin tsikbaltik xan tiʼ uláakʼ mejen x-chʼúupalal yaan in kuxtal tiʼ junpʼéel Paraíso way Luʼum, tuʼux mix máak kun kʼojaʼantaleʼ (Apocalipsis 21:3, 4). Kex yaan hora ku lúubul in wóol tumen chéen tin juun yaneneʼ, jach kiʼimak in wóol tumen in fe yéetel in kʼub óolal tiʼ Jéeoba maas muʼukʼaʼanchaji.

Ka máan seis meseseʼ le doctoroʼoboʼ tu túuxtenoʼob tin wotoch. Kex seguernaj in kʼojaʼanileʼ kiʼimakchaj in wóol úuchik in suut tu yiknal in taataʼob. Maas kʼaschaj in baakeloʼob, ka maas muʼyajnajen. Ka tin chukaj in x-lóoʼbayanileʼ jach kʼojaʼanen. Kex beyoʼ okjaʼanajen le ka tu tsʼáajten 14 jaʼaboʼ. Tin chʼaʼtuklaj in meyajtik Jéeoba u maas maʼalobil ku páajtal. Baʼaleʼ yaan kʼiineʼ tin wuʼuyaj bey u tuʼubsmeneʼ. «¿Baʼaxten tiʼ teen ku yúuchul lelaʼ? —kin waʼalik tiʼ Dios—. Kin kʼáat óoltiktech ka a tsʼakeniʼ. ¿Maʼ wa ta wilik táan in muʼyaj?»

Jach yaj tin wilil u kʼiiniloʼob in x-lóoʼbayanil. Anchaj in naʼatikeʼ maʼ tin maʼalobtal. Tsʼoʼoleʼ ken in wil in amigoʼob toj u yóoloʼob yéetel kiʼimak u yóoloʼobeʼ jach ku lúubul in wóol kaʼachi. Kin wuʼuyik bey mix baʼal in biilaleʼ; pʼáat maʼ in kʼáat in bisinba yéetel mix máakiʼ. Kex beyoʼ in láakʼtsiloʼob yéetel in amigoʼobeʼ jach tu yáantenoʼob. Alicia, juntúul in jach maʼalob amigaeʼ —kex 20 jaʼab maas nojoch tiʼ teen—, tu yáanten in wileʼ kex kʼojaʼaneneʼ jeʼel u páajtal in beetik wa baʼax yoʼolal u maasil tu lugar in chʼíikil chéen tiʼ in kʼojaʼanileʼ.

Le yaanten 18 jaʼaboʼ maaschaj in kʼojaʼanil; tak chéen in bin muchʼtáambaleʼ jach ku beetik in sen kaʼanal. Baʼaleʼ tin wilaj u meyaj maʼalob le tiempo yaanten utiaʼal in jach xakʼalxoktik le Biblia tin wotochoʼ. U libroil Job yéetel Salmoseʼ tu yáanten in naʼateʼ Jéeobaeʼ maʼ mantatsʼ ku kanáantkoʼon tiʼ le baʼaxoʼob beetik k-muʼyajoʼ, baʼaxeʼ ku tsʼáaiktoʼon u muukʼil utiaʼal u chúukpajal k-óol bey xan utiaʼal maʼ k-náachtal tiʼ. Úuchik in sen orareʼ anchajten «le páajtalil ku píitmáan tiʼ u muukʼ wíinikoʼ» bey xan «u jeetsʼelil Dios ku táatsʼmáansik tuláakal tuukuloʼob» (2 Corintoiloʼob 4:7; Filiposiloʼob 4:6, 7).

Ka tu tsʼáajten 22 jaʼabeʼ tin naʼateʼ mix bikʼin kun páajtal in kaʼa xíimbal; yaan in pʼáatal tin silla de ruedas. Maʼ in kʼáat kaʼach ka ilaʼaken chéen bey juntúul kʼojaʼan koʼolel tu silla de ruedaseʼ. Baʼaleʼ tin tsʼáaj cuentaeʼ yéetel in silla de ruedaseʼ ku páajtal in beetik jujunpʼéel baʼaloʼob chéen tin juunal. Le baʼax tin tuklaj kʼaas kaʼachoʼ u jaajileʼ tu taasajten utsil. Isabel, juntúul in amigaeʼ, tu líiʼsaj in wóol utiaʼal ka kʼaʼaytajnaken 60 horaʼob tu yéetel tu yáamil junpʼéel mes.

Tu káajbaleʼ tin tukleʼ jach junpuliʼ maʼ tun páajtal. Baʼaleʼ yéetel u yáantaj Jéeoba, in láakʼtsiloʼob yéetel in amigoʼobeʼ páajchaj in kʼubik 60 horaʼob. Le mes jeʼeloʼ jach séeb máanik, yéetel tin tsʼáaj cuentaeʼ xuʼul in sajaktal yéetel in suʼlaktal. Le oʼolaleʼ tu jaʼabil 1996, káaj in beetik in precursora regularil: in kʼaʼaytaj 90 horaʼob cada mes. Jach maʼalob le baʼax tin chʼaʼtuklaj in beetkaʼ; tu maas natsʼen tiʼ Dios, yéetel tu tsʼáaj junpʼíit u muukʼ in wíinklil. In tsʼáaik in wóol kʼaʼaytajeʼ tu yáanten in tsikbaltik tiʼ yaʼab máakoʼob baʼax kin creertik bey xan in wáantkoʼob utiaʼal u beetkubaʼob u amigoʼob Dios.

Tu jaʼabil 2001, úuchten junpʼéel loob yéetel cocheeʼ ka káach in wookoʼob. Le chilikbalen tu camail le hospital jach táan in muʼyajoʼ tin kʼáat óoltaj tiʼ Jéeoba: «¡Jéeoba, beet uts maʼ a pʼatken!». Chéen ka tin wuʼuyaj u yaʼalaʼalten tumen juntúul koʼolel yaan naatsʼ tiʼ in cama: «¿U x-jaajkunajech Jéeoba wa?». Maʼ páajchaj in núukikiʼ, chéen tin chíinpoltaj. «¡In kʼaj óoleʼex! Suuk in xokik a revistaʼex», tu yaʼalaj le koʼoleloʼ. Leloʼ jach tu líiʼsaj in wóol. Kex jach yaj yanileneʼ páajchaj in nojbeʼenkúuntik Jéeoba. ¡Bukaʼaj maʼalobil!

Le ka chan maʼalobchajeneʼ, tin chʼaʼtuklaj in kʼaʼaytaj junpʼíit maas. In maamaeʼ tu máansen tiʼ in silla de ruedas tu salail le hospitaloʼ; tu kaʼapʼéelal in wook enyesado. Sáamsamal k-xíimbaltik jujuntúul kʼojaʼanoʼob, k-kʼáatik bix u beeloʼob yéetel k-pʼatiktiʼob wa baʼax revistail wa folletoil tiʼ le Biblia utiaʼal u xokoʼoboʼ. Jach kin kaʼanal kaʼachi, baʼaleʼ Jéeobaeʼ tu tsʼáajten muukʼ.

Teʼ tsʼook jaʼaboʼobaʼ tsʼoʼok u maastal in kʼojaʼanil; tsʼoʼoleʼ úuchik u kíimil in taataeʼ maas yaachaj in wóol. Kex beyoʼ kin kanáantik maʼ u jach lúubul in  wóol. Tak tuʼux ku páajtaleʼ, kin máansik súutukiloʼob yéetel in amigoʼob bey xan yéetel in láakʼtsiloʼob; leloʼ ku beetik u chan tuʼubulten junsúutuk in chiʼichnakiloʼob. Ken yanaken xan tin juunaleʼ kin xook, kin xakʼalxoktik le Bibliaoʼ wa kin kʼaʼaytaj tiʼ teléfono.

Tsʼoʼoleʼ kin náaysik in wóol yéetel mejen baʼaloʼob jeʼex le iikʼ ku piktik in wichoʼ wa u kiʼibokil le looloʼoboʼ. Le baʼaloʼobaʼ ku kʼaʼajsikten yaan baʼax oʼolal in tsʼáaik gracias tiʼ Dios. Uláakʼ baʼax jach ku yáantkeneʼ letiʼe in cheʼejoʼ. Juntéenjeak le táan in kʼaʼaytajoʼ, le máax túulchʼintik in silla de ruedasoʼ jáan waʼalaj tsʼíib. Chéen ka joʼopʼ u jalchajal in silla de ruedas, ka túun chocarnajen yéetel junpʼéel coche jelekbal teʼ bejoʼ. Tu kaʼatúulaloʼon jaʼakʼ k-óol, baʼaleʼ le ka t-ilaj mix baʼal maas úuchteneʼ joʼopʼ k-jajaʼcheʼej.

U jaajileʼ yaʼab baʼaxoʼob maʼ tu páajtal in beetik. Baʼaleʼ in wojel yaan u kʼuchul u kʼiinil in beetkoʼob. Yaʼab u téeneleʼ kin mutsʼik in wich yéetel kin tuklikeʼ táan in jeʼekʼabtik u ventanail le túumben luʼum u yaʼalmaj Dios u tsʼáaikoʼ (2 Pedro 3:13). Kin máansik tin tuukuleʼ toj in wóol, táan in xíimbal, yéetel jach kiʼimak in wóol in kuxtal teʼ túumben luʼumoʼ. Mantatsʼ kin kʼaʼajsik baʼax tu yaʼalaj rey David: «¡Yanaktech kʼub óolal tiʼ [Jéeoba]! ¡Yanaktech líikʼ óolal, maʼ u lúubul a wóol!» (Salmo 27:14). Kex tsʼoʼok u pʼáatal maas minaʼan u muukʼ in wíinklileʼ, Jéeobaeʼ tsʼoʼok u muʼukʼaʼankúuntik in wóol. Le oʼolaleʼ kex kʼojaʼaneneʼ yaan in muukʼ.