Jéeoba Dioseʼ u kʼáat ka k-tsikbalttiʼ sáamsamal baʼax chiʼichnakkúuntikoʼon (Lucas 18:1-7). Letiʼeʼ jeʼel u yuʼubik k-oracioneʼ tumen u yaabiltmoʼon. Wa k-Taata yaan teʼ kaʼan invitartikoʼon orareʼ, ¿máasaʼ maʼ tu páajtal k-aʼalik maʼeʼ? (Xok Filiposiloʼob 4:6.)

Oracioneʼ maʼ chéen u kʼáat u yaʼal u kʼáataʼal áantaj tiʼ Diosiʼ; ku yáantkoʼon utiaʼal k-natsʼikba tiʼ letiʼ (Salmo 8:3, 4). Wa mantatsʼ k-aʼalik tiʼ Dios bix k-uʼuyikbaeʼ jeʼel k-maas bisikba tu yéetel bey juntúul k-amigoeʼ. (Xok Santiago 4:8.)

Dioseʼ maʼ u kʼáat ka k-babal aʼal baʼax k-kanmaj de memoriaiʼ, mix ka k-aʼal baʼaloʼob talamtakiʼ. Utiaʼal k-orareʼ maʼ tsaaj xolokbaloʼon wa uláakʼ bixiʼ. Baʼax u kʼáat Jéeobaeʼ ka jóokʼok t-puksiʼikʼal le baʼax k-aʼalikoʼ (Mateo 6:7). Jeʼex Ana, juntúul israelita kuxlaj úuchjeakileʼ, tu chʼaʼchiʼitaj junpʼéel baʼal beetik u jach yaatal u yóol kaʼachi. Tsʼoʼoleʼ ka núukaʼab u oracioneʼ tu tsʼáaj xan nib óolal tiʼ Dios. (Xok 1 Samuel 1:10, 12, 13, 26, 27; 2:1.)

¡Bukaʼaj maʼalobil le oracionoʼ! Ku páajtal k-tsikbaltik tiʼ Dios baʼax ku yúuchultoʼon, k-kiʼikiʼtʼantik yéetel k-tsʼáaik nib óolal tiʼ. Wa k-orar sáamsamaleʼ k-eʼesik jatsʼuts k-ilik le siibal u tsʼaamajtoʼonoʼ (Xok Salmo 145:14-16.)