Síijen yéetel líiʼsaʼaben tu joʼokajil Roma tuʼux yaʼab óotsilil ku yilaʼaliʼ. Jach yaj le kuxtal tin bisoʼ. Maʼ tin kʼaj óoltaj in maamaiʼ, tsʼoʼoleʼ maʼ maʼalob bix in biskinba kaʼach yéetel in taataiʼ. Desde tin paalil tin kanaj in defendertinba tin juunal.

Chéen 10 jaʼab yaanten ka káaj in wookol; 12 jaʼab yaanten ka tin yáax pʼataj in wotoch. Yaan horaeʼ anchaj in bin jóoʼsbil teʼ comandancia tumen in taataoʼ. Mantatsʼ táan in baʼateltʼaan yéetel le máakoʼoboʼ yéetel jach kʼaas in pʼuʼujul kaʼachi. Le ka tu tsʼáajten 14 jaʼabeʼ tin xúumpʼattaj in wotoch. Káaj in drogarkinba yéetel chéen teʼ calle kajaʼanenoʼ. Ken áakʼabchajkeʼ kin jupkinba wenel tiʼ jeʼel baʼalak cocheeʼ. Le táan u taal u sáastaloʼ kin líikʼil utiaʼal in kaxt tuʼux jeʼel in chan pʼoʼik in wicheʼ.

Jach tin kanaj ookol. Kin jáanpaytik u bulto le máakoʼoboʼ yéetel ken áakʼabchajkeʼ kin woklik najoʼob. Kʼaj óoltaʼaben tumen le pandilleroʼoboʼ ka tu yaʼaloʼobten wa jeʼel in nupkinba yéeteloʼobeʼ. Úuchik in máan yéeteloʼobeʼ «naʼak in categoría» tumen káaj tak in woklik bancoʼob. Tumen jach kʼaas in pʼuʼujuleʼ tak in wéet ookoloʼob ku yeʼeskoʼobten tsiikil. Mantatsʼ in wéet máan in tsʼoon; ken weenkeneʼ hasta kin taʼakik yáanal in kʼáanjoʼol. Kin loxkinba, kin drogarkinba, kin wookol, kin poochʼil, kin kʼebankúunskinba... sáamsamal bey in kuxtal kaʼachoʼ. Bey máanik le jaʼaboʼoboʼ: kin kʼaʼalal cárcel, kin kaʼa jóokʼol. Mantatsʼ táan in kaxtaʼal tumen le policíaoʼ.

Juntéenjeak ka jóokʼen teʼ carceloʼ, binen in xíimbalt juntúul in tía. Maʼ in wojel kaʼacheʼ in tía, in primo yéetel in primaeʼ u j-jaajkunajoʼob Jéeoba. Tu invitartenoʼob ka xiʼiken teʼ tuʼux ku muchʼkubaʼoboʼ. Binen yéeteloʼob utiaʼal in wilik baʼax ku beetaʼaliʼ. Ka kʼuchoʼon teʼ Najil Reinooʼ tin waʼalajeʼ naatsʼ  teʼ jool kin kutaloʼ, utiaʼal beyoʼ ka in wil máax ku yokol yéetel máax ku jóokʼol. Jeʼex suukileʼ in wéet máan in tsʼoon.

In bin teʼ muchʼtáambaloʼ tu kʼexaj in kuxtal. Kʼajaʼanten tin tuklaj: «¡Tiaʼanen tiʼ uláakʼ planetaeʼ!». Jach kiʼimak u yóol tuláakal le máaxoʼob yanoʼoboʼ yéetel maʼalob tu kʼamilenoʼob. Tak bejlaʼa kin kʼaʼajsikeʼ. ¡Tin wuʼuyinba bey náach yanilen tiʼ le Luʼumoʼ!

Káaj in xook yéetel u j-jaajkunajoʼob Jéeoba. Jeʼex u bin in kaanbaloʼ tin tsʼáaj cuenta yaʼab baʼaxoʼob kʼaʼabéet in kʼexik ichil in kuxtal. Kʼuch tin puksiʼikʼal le baʼax ku yaʼalik Proverbios 13:20: «Le máax ku máan yéetel máaxoʼob yaan u naʼatoʼobeʼ yaan u yantal u naʼat, pero le máax ku biskuba yéetel le j-maʼ naʼatoʼoboʼ yaan u bin kʼaasil tiʼ». Tin naʼateʼ kʼaʼabéet u xuʼulul in biskinba yéetel le pandilleroʼoboʼ. Maʼ chéen chʼaʼabil úuchik in beetkiʼ, baʼaleʼ béeychaj yéetel u yáantaj Jéeoba.

Xuʼul in éekʼkuntik in wíinklil. Kex maʼ chéen chʼaʼabileʼ tin pʼataj le chamal yéetel le drogasoʼ. Tin kʼosaj u tsoʼotsel in pool, tin luʼsaj le tuupoʼob in tsʼaamaj kaʼachoʼ yéetel xuʼul in poochʼil. Úuchik in beetik le baʼaloʼobaʼ tin tsʼáaj cuenta jeʼel u páajtal in controlartik in kuxtaleʼ.

Maʼ uts tin tʼaan in xook kaʼachiʼ, le oʼolal maʼ chéen chʼaʼabil úuchik u suuktal in xokik le Bibliaoʼ. Jujunpʼíitil káaj in yaabiltik Jéeoba. Baʼaleʼ ka máan kʼiineʼ joʼopʼ in chiʼichnaktal: joʼopʼ u taʼakal in pool tumen in conciencia. Kin tuklik kaʼacheʼ mix bikʼin kin perdonartaʼal tumen Jéeoba yoʼolal le baʼaxoʼob kʼaastak in beetmoʼ. Ken in wuʼuyinba beyoʼ kin xokik kaʼach teʼ Biblia bix perdonartaʼabik rey David tumen Jéeoba kex tu beetaj baʼaloʼob kʼaastak. Jach ku líiʼsik in wóol kaʼachi (2 Samuel 11:1–12:13).

Uláakʼ baʼax talamchajteneʼ letiʼe in kʼaʼaytaj tiʼ in vecinoʼoboʼ (Mateo 28:19, 20). Saajken in wil juntúul tiʼ le máaxoʼob in beetmaj loob tiʼoboʼ. Jujunpʼíitil úuchik u bin in saajkil, ka joʼopʼ in kʼaʼaytaj yéetel kiʼimak óolal. Joʼopʼ in tsikbaltik tiʼ le máakoʼoboʼ k-Taata yaan teʼ kaʼanoʼ jach ku saʼasik k-kʼebanoʼob.

Wa maʼ in kʼaj óoltik kaʼach Jéeobaeʼ bejlaʼa tsʼoʼok in muʼukleʼ. Le máaxoʼob yéetel kin biskinba kaʼachoʼ yaneʼ úuch kíimik yéetel yaneʼ tiaʼan carceleʼ. Teneʼ kiʼimak in wóol, yéetel yaan u biilal in kuxtal. Tsʼoʼok in kanik in weʼes kabal óolal, in wuʼuyik tʼaan yéetel maʼ in séeb tsʼíikil. Le modosaʼ tsʼoʼok u yáantken in bisinba maʼalob yéetel u maasil. Kiʼimak in wóol xan úuchik u tsʼoʼokol in beel yéetel juntúul utsul koʼolel ku kʼaabaʼtik Carmen. Tu kaʼatúulaloʼoneʼ k-áantik k-vecinoʼob utiaʼal ka kaanbalnakoʼob tiʼ le Bibliaoʼ.

¡Jaaj bakáan! Bejlaʼeʼ láayliʼ kin bin teʼ bancoʼoboʼ baʼaleʼ maʼ utiaʼal in wookoliʼ. Kin bin in beet limpieza, tumen tiʼ kin meyajiʼ.