¿U destinarmoʼon wa Dios wa ku béeytal k-yéeyik baʼax ken k-beete?

PAX ICH

Baʼax ku yaʼalik le Bibliaoʼ

Dioseʼ jach uts t-éetel tumen ku chaʼik k-yéeyik baʼax ken k-beet yéetel k-kuxtal. Letiʼeʼ maʼ u destinarmoʼoniʼ. Koʼox ilik baʼax ku kaʼansik le Biblia tu yoʼolal leloʼ.

Dioseʼ tu beetaj wíinik jeʼel bix letiʼeʼ (Génesis 1:26). Toʼoneʼ maʼ beetaʼaboʼon jeʼex le baʼalcheʼoboʼ, baʼaxeʼ chíikaʼanoʼon tiʼ le Máax beetoʼonoʼ. ¿Baʼaxten bey k-aʼalikoʼ? Tumen toʼoneʼ ku béeytal k-eʼesik u jatsʼuts modosoʼob Dios, jeʼex le yaabilaj yéetel le justiciaoʼ. Tsʼoʼoleʼ jeʼex letiʼeʼ ku béeytal k-yéeyik baʼax ken k-beete.
Le bix kun bintoʼon ichil k-kuxtaloʼ ku depender tiʼ cada juntúul tiʼ toʼon. Dioseʼ ku invitarkoʼon ka k-uʼuy u tʼaan yéetel ka k-beet baʼax ku yaʼalik utiaʼal ka yanaktoʼon kuxtal (Deuteronomio 30:19, 20). Letiʼeʼ ku chaʼik k-yéeyik baʼax ken k-beete, maʼatech u obligarkoʼon, baʼaxeʼ ku yaʼaliktoʼon yéetel yaabilaj: «¡Bukaʼaj maʼalobil wa ka a beet u cuentail le baʼaxoʼob kin waʼalikoʼ! Beyoʼ le jeetsʼelil yaantechoʼ yaan u pʼáatal jeʼex junpʼéel ríoeʼ» (Isaías 48:18).
Maʼ destinado máak utiaʼal u bin kʼaasiltiʼiʼ. Wa u kʼáat máak ka xiʼik maʼalobiltiʼeʼ kʼaʼabéet u tsʼáaik u yóol meyaj. Le Bibliaoʼ ku yaʼalik: «Tuláakal baʼax tiaʼan ta kʼab a beetkeʼ, beet yéetel u jaajil a wóol» (Eclesiastés 9:10). Ku yaʼalik xan: «Le baʼax ku chʼaʼtuklik le máax sáakʼóoloʼ ku jóokʼol maʼalobil» (Proverbios 21:5).

Le u páajtalil k-yéeyik baʼax ken k-beetoʼ junpʼéel jatsʼuts regalo u tsʼaamajtoʼon Dios, le oʼolal ku páajtal k-chʼaʼtuklik k-yaabiltik yéetel ‹tuláakal k-puksiʼikʼal› (Mateo 22:37).

¿Maʼ wa túun Dios controlartik tuláakal baʼax ku yúuchliʼ?

Le Bibliaoʼ ku kaʼansikeʼ Dioseʼ «jach táaj yaan u poder» yéetel chéen letiʼ tsʼáaik u pʼiis u poder (Job 37:23; Isaías 40:26). Chéen baʼaleʼ tiʼ letiʼeʼ maʼatech u meyaj u poder utiaʼal u controlartik tuláakal baʼax ku yúuchul. Le Bibliaoʼ ku yaʼalikeʼ Dioseʼ maʼ séebaʼan u jáan xuʼulsik tiʼ le máaxoʼob beetik baʼaloʼob kʼaastakoʼ (Isaías 42:14). Bejlaʼeʼ láayliʼ bey xan u beetkoʼ, u chaʼamaj tiʼ cada máak ka u yéey baʼax ken u beete. Pero jach ku líiʼsik k-óol k-ojéeltik maʼ kun xáantaleʼ yaan u láaj xuʼulsik tiʼ le kʼasaʼan máakoʼoboʼ (Salmo 37:10, 11).