Maʼatech, tumen maʼ tuláakal le religiónoʼob igualoʼoboʼ. Teʼ Bibliaoʼ yaan yaʼab ejemploʼob eʼesik maʼ tuláakal adoración ku kʼamik Diosiʼ. Yaan kaʼapʼéel clase adoración maʼatech u kʼamik, koʼox ilik máakalmáakoʼobiʼ.

1: U adorartaʼal maʼ jaajil diosoʼob

 Le Bibliaoʼ ku yaʼalikeʼ le maʼ jaajil diosoʼoboʼ maʼ tu páajtal u beetkoʼob mix baʼal (Jeremías 10:3-5; 16:19, 20). Jéeobaeʼ tu yaʼalaj tiʼ u kaajil Israel: «Maʼ unaj u yantaltech uláakʼ diosoʼobiʼ, chéen teen» (Éxodo 20:3, 23; 23:24). a Jéeobaeʼ «joʼopʼ u sen pʼuʼujul tu contra Israel» le ka káaj u adorarkoʼob yaanal diosoʼoboʼ (Números 25:3; Levítico 20:2; Jueces 2:13, 14).

 Dioseʼ maʼ kʼexpajak baʼax ku tuklik yoʼolal le adoración ku tsʼaʼabal tiʼ le uláakʼ ‹diosoʼoboʼ› (1 Corintios 8:5, 6; Gálatas 4:8). Letiʼeʼ ku yaʼalik tiʼ le máaxoʼob meyajtikoʼ maʼ u yantal mix baʼal u yiloʼob yéetel le religión maʼatech u kaʼansik u jaajiloʼ. Le Bibliaoʼ ku yaʼalik: «Jóokʼeneʼex ichiloʼob yéetel náachkuntabaʼextiʼob» (2 Corintios 6:14-17). Wa tuláakal le religiónoʼob ku natsʼkoʼon yiknal Diosoʼ, ¿baʼaxten túun ku yaʼalik le Biblia ka k-náachkuntba tiʼoboʼ?

2: U beetaʼal baʼax maʼ uts tu tʼaan Diosiʼ

 Jéeobaeʼ xuʼul u kʼamik le israelitaʼob le ka káaj u adorarkoʼob yaanal diosoʼoboʼ. Letiʼobeʼ káaj u beetkoʼob baʼaloʼob kʼaastak, hasta káaj u xaʼakʼbesikoʼob le jaajil religión yéetel le religiónoʼob maʼatech u kaʼanskoʼob u jaajiloʼ (Éxodo 32:8; Deuteronomio 12:2-4). Jesúseʼ tu yaʼaleʼ junpuliʼ maʼ maʼalob bix u adorarkoʼob Dios u nuuktakil le religiónoʼoboʼ. Letiʼobeʼ chéen kaʼapʼéel ichoʼob. Ku beetkoʼob bey u tsʼaamaj u yóol u adorartoʼob Dioseʼ, pero maʼ tu beetkoʼob «le baʼaxoʼob maas kʼaʼanaʼantak ku yaʼalik le Ley[oʼ]: u beetaʼal justicia, u chʼaʼabal óotsilil bey xan u chúukpajal u yóol máak» (Mateo 23:23).

 Teʼ kʼiinoʼobaʼ chéen junpʼéel religión ku natsʼkoʼon yiknal Dios, letiʼe ku kaʼansik le baʼaxoʼob ku yaʼalik le Bibliaoʼ (Juan 4:24; 17:17; 2 Timoteo 3:16, 17). Le religiónoʼob ku kaʼanskoʼob baʼaloʼob ku bin tu contra le Bibliaoʼ ku náachkuntik le máakoʼob tiʼ Diosoʼ. Yaʼab máakeʼ ku creerkeʼ teʼ Biblia jóoʼsaʼan u kaʼansajil le Trinidadoʼ, u yantal u pixan máak yéetel le infiernooʼ. Chéen baʼaleʼ le kaʼansajoʼobaʼ ku taal tiʼ le adoración ku tsʼaʼabal tiʼ le maʼ jaajil diosoʼoboʼ, le beetik mix baʼal u biilaloʼob tumen maʼ tiʼ Dios u taaloʼobiʼ (Marcos 7:7, 8).

 Jéeobaeʼ jach u pʼekmaj le máaxoʼob aʼalik adorartik Diosoʼ, pero ku beetkoʼob baʼaloʼob kʼaastak (Tito 1:16). Le religión ku natsʼik máak yiknal Diosoʼ maʼ tu kaʼansik le baʼaxoʼob suuk u beetik le máakoʼoboʼ, baʼaxeʼ ku yáantik máak utiaʼal ka u beet le baʼax uts tu tʼaan Diosoʼ. Le Bibliaoʼ ku yaʼalik: «Wa juntúul máak ku tuklik táan u adorartik Dios, chéen baʼaleʼ maʼ tu controlartik u yaakʼeʼ táan u tusik u puksiʼikʼal, yéetel chéen kunel le bix u adoraroʼ. Yaan junpʼéel religión limpio yéetel kʼamaʼan tumen Dios k-Taata. Le máaxoʼob yaantiʼob le adoración jeʼelaʼ unaj u beetkoʼob lelaʼ: unaj u kanáantkoʼob le paalaloʼob kimen u taataʼoboʼ bey xan le viudaʼob táan u muʼyajoʼoboʼ, yéetel unaj u náachkuntkubaʼob tiʼ le baʼaloʼob kʼaastak ku beetaʼal teʼ yóokʼol kaabaʼ» (Santiago 1:26, 27; nota).