Toʼon u testigoʼon Jéeobaeʼ k-capacitartaʼal utiaʼal k-beetik le meyaj tu kʼubéentaj Jesús tiʼ u discípuloʼoboʼ: k-predicartik yéetel k-kaʼansik le baʼaloʼob maʼalobtak ken u beet u Reino Diosoʼ (Mateo 24:14; 28:19, 20). Le capacitaciónaʼ ku tsʼaʼabaltoʼon tiʼ le reuniónoʼob ku yantaltoʼon cada semanaoʼ yéetel teʼ asambleaʼob ku yantaltoʼon cada añooʼ. Tsʼoʼoleʼ le máaxoʼob kʼubéentaʼantiʼob junpʼéel meyaj ichil le congregación wa ichil le organizaciónoʼ ku tsʼaʼabaltiʼob uláakʼ capacitaciónoʼob. Le capacitaciónoʼobaʼ chʼaʼanoʼob teʼ Bibliaoʼ.

Teʼ xookaʼ yaan k-ilik lelaʼ:

•  ¿Bix u capacitartaʼal u testigoʼob Jéeoba?

•  Ku tsʼaʼabal cursoʼob tiʼ u testigoʼob Jéeoba

•  ¿Tuʼux ku chʼaʼabal le kaʼansaj ku tsʼaʼabal teʼ capacitaciónoʼoboʼ?

•  ¿Ku cobrartaʼal wa le capacitación ku tsʼaʼabaltiʼoboʼ?

•  ¿Baʼax utsil ku jóoʼsik u testigoʼob Jéeoba yéetel le capacitaciónoʼobaʼ?

 Reuniónoʼob. U testigoʼob Jéeobaeʼ ku muchʼkubaoʼ kaʼatéen tiʼ junpʼéel semana bey mejen grupoʼob utiaʼal u adorarkoʼob Dios, le grupoʼobaʼ ku yaʼalaʼaltiʼob congregaciónoʼob. Le reuniónoʼobaʼ ku beetaʼal teʼ najoʼob tuʼux ku muchʼkuba u testigoʼob Jéeobaoʼ. Le yáax reuniónoʼ ku beetaʼal yáam semana yéetel le u kaʼapʼéeloʼ ku beetaʼal tu jóokʼbal le semanaoʼ. Jeʼel máaxak jeʼel u páajtal u bineʼ yéetel maʼatech u kʼáatal taakʼiniʼ.

•   Reunión ku beetaʼal yáam semana. Teʼ reuniónaʼ k-kaʼansaʼal k-tsikbal tu táan yaʼab máakoʼob, k-predicar, k-maas maʼalobkíint k-kaʼansaj yéetel k-xok. Ku máansaʼal xan discursoʼob, escenificaciónoʼob, videoʼob yéetel ku beetaʼal preguntaʼob jeʼel u páajtal u núukaʼal tumen le máaxoʼob muchʼukbaloʼoboʼ. Le baʼaxoʼob k-kanik teʼ reuniónoʼobaʼ ku yáantkoʼon k-usart maʼalob le Biblia kéen k-kaʼans le máakoʼob taak u kaanbaloʼoboʼ, ku yáantkoʼon xan k-maas muʼukʼaʼankúunt k-fe, k-yaabilaj tiʼ Dios bey xan tiʼ u maasil.

•   Reunión ku beetaʼal tu jóokʼbal semana. Le reuniónaʼ yaan kaʼa jaats tiʼ. Teʼ yáax jaatsoʼ ku máansaʼal junpʼéel discurso utiaʼal tuláakal máak, teʼ kaʼa jaatsoʼ ku xoʼokol le revista Le Máax ku Kananoʼ, a teʼeloʼ ku beetaʼal preguntaʼob jeʼel u páajtal u núukaʼal tumen le muchʼukbaloʼoboʼ. Le xookoʼob ku taasik le revistaaʼ ku tsolik jejeláas temaʼob yéetel principioʼob chʼaʼanoʼob teʼ Biblia jeʼel u yáantkoʼon k-bis junpʼéel kuxtal uts tu tʼaan Dioseʼ.

 Asambleaʼob. Le asambleaʼoboʼ nukuch reuniónoʼob ku beetaʼal óoxtéen tiʼ junpʼéel año tuʼux ku bin yaʼab congregaciónoʼobiʼ. Cada añoeʼ ku tsoʼolol junpʼéel tema chʼaʼabaʼan teʼ Bibliaoʼ, ku máansaʼal xan discursoʼob, escenificaciónoʼob, entrevistaʼob yéetel videoʼob. Le asambleaʼoboʼ, jeʼex le reuniónoʼoboʼ, ku yáantkoʼon k-maas kʼaj óolt le Bibliaoʼ yéetel k-maas maʼalobkíintik bix k-predicar. Jeʼel xan u páajtal u bin jeʼel máaxakeʼ tsʼoʼoleʼ maʼ tu máan kʼáatbil taakʼiniʼ.

 Jujuntúul tiʼ u testigoʼob Jéeobaeʼ ku invitartaʼaloʼob utiaʼal ka xiʼikoʼob tiʼ escuelaʼob wa cursoʼob utiaʼal u capacitartaʼaloʼob. ¿Máakalmáak le escuelaʼobaʼ? ¿Báan u biilaloʼob? ¿Jaypʼéel kʼiinoʼob ku xáantal yéetel máaxoʼob jeʼel u páajtal u bineʼ?

Escuela utiaʼal Precursoroʼob

•   Baʼax u biilal: Le escuelaaʼ ku meyaj utiaʼal u kaʼansaʼal jujuntúul Testigoʼob ku máanskoʼob yaʼab tiempo táan u predicaroʼob, tiʼ letiʼobeʼ ku yaʼalaʼaltiʼob precursoroʼob. b Ku kaʼansaʼaltiʼob u maas maʼalobkíint u kʼaʼaytajoʼob yéetel u kaʼansajoʼob. Teʼ escuelaaʼ ku tsoʼolol jejeláas temaʼob, ku máansaʼal escenificaciónoʼob yéetel discursoʼobiʼ.

•   Ku xáantal: Seis días.

•   Máaxoʼob ku táakpajloʼobiʼ: Teʼ xookaʼ ku bin le máaxoʼob tsʼoʼok u máan junpʼéel año káajak u beetik u precursoriloʼoboʼ. Tsʼoʼoleʼ ku kaʼa invitartaʼal xan le precursoroʼob tsʼoʼok u máan cinco años maʼ xiʼikoʼob teʼ escuelaaʼ.

Escuela utiaʼal Máaxoʼob Kʼaʼaytik le Reinooʼ

•   Baʼax u biilal: Le escuelaaʼ ku meyaj utiaʼal u capacitartaʼal le máaxoʼob jach maʼalob u beetik u precursoriloʼoboʼ. Ku yáantaʼaloʼob utiaʼal u maas maʼalobkíintik bix u predicaroʼob yéetel u kaʼansajoʼob. Tsʼoʼoleʼ ku maas xakʼaltikoʼob jujunpʼéel temaʼob tiʼ le Bibliaoʼ. Le kéen tsʼoʼokok le escuelaaʼ yaʼab tiʼ letiʼobeʼ ku túuxtaʼaloʼob tuʼux maas kʼaʼabéet áantaj utiaʼal u yúuchul kʼaʼaytaj.

•   Ku xáantal: Dos meses.

•   Máaxoʼob ku táakpajloʼobiʼ: Le precursoroʼob solicitarkoʼ, ku chupikoʼob le requisito’ob yéetel dispuestoʼob bin jeʼel tuʼuxak ka túuxtaʼakoʼobeʼ.

Escuela utiaʼal Ancianoʼob

•   Baʼax u biilal: U yáantik le máaxoʼob nuʼuktik le cogregacióno’ob, wa ancianoʼob c, utiaʼal ka u beetoʼob maʼalob le meyaj tsʼaʼantiʼoboʼ: u kanáantkoʼob yéetel u kaʼanskoʼob le máaxoʼob yanoʼob teʼ congregaciónoʼobo’. Teʼ escuelaaʼ ku yáantaʼaloʼob u maas muʼukʼaʼankúunt u yaabilajoʼob tiʼ Dios yéetel tiʼ le sukuʼunoʼoboʼ (1 Pedro 5:2, 3).

•   Ku xáantal: Cinco días.

•   Máaxoʼob ku táakpajloʼobiʼ: Le máaxoʼob maʼ úuch káajak u beetik u ancianoiloʼoboʼ. Ku kaʼa invitartaʼal xan le ancianoʼob tsʼoʼok u máan cinco años maʼ xiʼikoʼoboʼ.

Escuela utiaʼal Superintendenteʼob tiʼ Circuito yéetel u Yatanoʼob

•   Baʼax u biilal: Le escuelaaʼ ku meyaj utiaʼal u yáantik le superintendenteʼob tiʼ circuito d utiaʼal u kanáantkoʼob yéetel u tsʼáaikoʼob le áantaj kʼaʼabéet tiʼ le congregaciónoʼob ku xíimbaltikoʼoboʼ (1 Timoteo 5:17). Le escuelaaʼ ku yáantik xan le sukuʼunoʼob yéetel u yatanoʼob utiaʼal u maas naʼatkoʼob le baʼax ku yaʼalik Bibliaoʼ.

•   Ku xáantal: Junpʼéel mes.

•   Máaxoʼob ku táakpajloʼobiʼ: Teʼ escuelaaʼ ku bin le superintendenteʼob tiʼ circuito yéetel u yatanoʼob tsʼoʼok u año káajak u beetkoʼob le meyajoʼ. Cada 5 años ku kaʼa invitartaʼaloʼob.

Escuela utiaʼal u Meeyjil le Reinooʼ

•   Baʼax u biilal: U yáantaʼal le ancianoʼob yéetel le siervo ministerialoʼob e utiaʼal u beetkoʼob maas maʼalob le meyaj kʼubéentaʼantiʼoboʼ. Teʼ escuelaaʼ ku xakʼaltaʼal le baʼaxoʼob kʼaʼabéet tiʼ le múuchʼuliloʼoboʼ yéetel bix jeʼel u yáantaʼaloʼobeʼ (2 Timoteo 3:1). Lelaʼ ku beetaʼal cada wa jaypʼéel años.

•   Ku xáantal: U suukileʼ ku xáantal junpʼéel kʼiin pero jeʼel u xáantal u pʼíit maaseʼ.

•   Máaxoʼob ku táakpajloʼobiʼ: Superintendenteʼob tiʼ circuito, ancianoʼob yéetel siervo ministerialoʼob.

Escuela utiaʼal le máaxoʼob ku meyajoʼob Beteloʼ

•   Baʼax u biilal: U yáantik le máaxoʼob ku meyajoʼob Betel f utiaʼal u beetkoʼob maʼalob le meyaj tsʼaʼantiʼoboʼ, u muʼukʼaʼankúuntik u yaabilajoʼob tiʼ Dios yéetel tiʼ u yéet meyajoʼob.

•   Ku xáantal: Cinco días y medio.

•   Máaxoʼob ku táakpajloʼobiʼ: Le máaxoʼob túumben káajak u meyajoʼob Beteloʼ. Bey xan máaxoʼob ku meyajoʼob Betel tsʼoʼok 5 años maʼ kaʼa xiʼikoʼoboʼ.

Escuela Biblica tiʼ Galaad tiʼ le Wachtoweroʼ

•   U biilal: U yáantaʼal le máaxoʼob ku binoʼob utiaʼal u maas yaabiltikoʼob u Tʼaan Dios yéetel u tsʼáaikoʼob ichil u kuxtaloʼob le baʼaxoʼob ku kankoʼoboʼ (1 Tesalonicenses 2:13). Le xiiboʼob yéetel le koʼoleloʼob yiijchajaʼan u tuukuloʼob ku binoʼob teʼ escuelaaʼ ku tsʼaʼabal u beetoʼob u maasil meyajoʼob ichil u kaajal Jéeoba. Kéen tsʼoʼokok le xookoʼ maʼ xaaneʼ jeʼel u túuxtaʼaloʼob predicar táanxel tuʼuxeʼ wa mismo tu luʼumiloʼob. Wa maʼ xaaneʼ jeʼel u túuxtaʼaloʼob meyaj tiʼ junpʼéel u sucursal u testigoʼob Jéeobaeʼ.

•   Ku xáantal: Cinco meses.

•   Máaxoʼob ku táakpajloʼobiʼ: Jujuntúul testigoʼob ku meyajoʼob Betel ku beetik u misioneroiloʼob, u precursor especialiloʼob, bey xan jujuntúul superintendenteʼob tiʼ circuito yéetel u yatanoʼob. Letiʼe sucursal túuxtiktiʼob junpʼéel solicitud utiaʼal u binoʼoboʼ. Le escuelaaʼ ku beetaʼal teʼ Centro Educativo tiʼ le Wachtower yaan Patterson, Nueva Yorkoʼ.

Escuela utiaʼal Máaxoʼob yanoʼob ichil le Comités tiʼ Sucursal yéetel u Yatanoʼoboʼ

•   Baʼax u biilal: U kaʼansaʼal le máaxoʼob ku meyajoʼob teʼ Comitéʼob tiʼ Sucursal g utiaʼal ka u nuʼuktoʼob tubeel le meyaj ku beetaʼal teʼ sucursal tuʼux yanoʼoboʼ bey xan le meyajoʼob ku beetaʼal tu territorioil le sucursaloʼ.

•   Ku xáantal: Dos meses.

•   Máaxoʼob ku táakpajloʼobiʼ: Letiʼe central mundial invitartik jujuntúul máaxoʼob ku meyajoʼob teʼ Comitéʼob tiʼ Sucursal yéetel u yatanoʼob utiaʼal ka xiʼikoʼob teʼ xookoʼ. Le xookoʼ tiʼ ku yantal teʼ Centro Educativo tiʼ le Watchtower yaan Patterson, Nueva Yorkoʼ.

 Teʼ Biblia ku chʼaʼabal tuláakal le baʼax ku kaʼansaʼaloʼ. Toʼoneʼ k-creerkeʼ le Bibliaoʼ tiʼ Dios u taal yéetel le baʼaxoʼob ku kaʼansikoʼ jeʼel u yáantkoʼon utiaʼal ka xiʼiktoʼon utsil ichil k-kuxtaleʼ (2 Timoteo 3:16, 17).

 Maʼ, gratis u tsʼaʼabal. Tuláakal le xupoʼob ku yantaloʼ ku boʼotaʼal yéetel le donaciónoʼob ku tsʼaʼabaloʼ (2 Corintios 9:7).