Tu añoil 2017, 12 u túulal u testigoʼob Jéeoba káaj u viajaroʼob tiʼ barco desde teʼ Costa de los Mosquitos Nicaraguaoʼ (kʼaj óolaʼan xan bey Mosquitiaeʼ). U kʼaabaʼ le barco tu biso’obo’ Sturi Yamni. Juntúul tiʼ le Testigoʼoboʼ tu yaʼalaj: «Toʼoneʼ táan k-bin kaʼach xíimbalt u jaats Testigoʼob utiaʼal k-líiʼsik u yóoloʼob yéetel utiaʼal k-áantkoʼob u tsikbaltoʼob le baʼaxoʼob maʼalobtak ken u beet u Reino Dioso’».

 Le 12 Testigoʼobaʼ lukʼoʼob desde Laguna de Perlaseʼ ka tu kʼáatmáansoʼob le Río Grande de Matagalpa utiaʼal u kʼuchloʼob tak tu kaajil La Cruz de Río Grande. Óoliʼ 200 kilómetros viajarnajoʼob. U kʼaabaʼ le barcooʼ tiaʼan kaʼach ichil le idioma misquitooʼ yéetel u kʼáat u yaʼal «maʼalob noticiaʼob». Mix juntéen tu tukloʼob wa yaan u kiʼimaktal u yóol le máaxoʼob kajaʼanoʼob teʼ tu jáal le río tak chéen yéetel u yilkoʼob u kʼaabaʼ le barcooʼ. Le viajeoʼ 12 horas tu bisajtiʼob, tsʼoʼoleʼ chéen juntéen jeʼeloʼob utiaʼal u weenloʼob. Le ka kʼuchoʼob teʼ kaajoʼ táan kaʼach u páaʼtaʼaloʼob tumen le seis u túulal Testigoʼob kajaʼanoʼob teʼeloʼ.

 Tu áakʼabil le kʼiin ka kʼuchoʼoboʼ taal junpʼéel kʼaʼamkach jaʼ, ka tu beetaj u kaʼantal u jaʼil le Río Grande de Matagalpaoʼ. Dos días maʼ xuʼul u kaʼantal u jaʼil le ríooʼ. Le tuʼux ku muchʼkuba le Testigoʼob yéetel le u maasil najoʼob yanoʼob teʼ kaajoʼ láaj búuloʼob, le oʼolaleʼ anchaj u yáantaj tak le Testigoʼob utiaʼal u jóoʼsaʼal le máakoʼoboʼ. Óoliʼ tuláakloʼob anchaj u pʼáatloʼob yiknal juntúul koʼolel Testigo de dos pisos u yotoch.

 Tu áakʼabil u yóoxpʼéel kʼiineʼ u presidenteil le kaajoʼ tu kʼáataj tiʼ le Testigoʼob wa jeʼel u yáantajoʼob yéetel u barcoʼobeʼ. Como chéen u barcoʼob chan nojocheʼ jeʼel u meyaj utiaʼal u yáantaʼal u maasil máakoʼobeʼ. Le presidenteoʼ tu kʼáatajtiʼob wa jeʼel u biskoʼob u jaats máakoʼob u yáantoʼob uláakʼ kaajoʼobeʼ, letiʼobeʼ tu yaʼaloʼob jeʼel u yáantajoʼobeʼ.

 Tu sáastal uláakʼ kʼiineʼ bin óoxtúul Testigoʼob yéetel le u jaats máakoʼoboʼ. Stephen, juntúul tiʼ le Testigoʼoboʼ, tu yaʼalaj: «Jach táaj peligroso kaʼachi tumen chich u yáalkab le ríooʼ, tsʼoʼoleʼ como yaan u muukʼeʼ tak nukuch cheʼob ku jíitik. Yaan tuʼuxoʼob xaneʼ chíikaʼan tuʼux ku woʼoltikuba le jaʼoʼ». Kex istikyajeʼ béeychaj u kʼuchloʼob tiʼ óoxpʼéel mejen kaajoʼob.

 Le máaxoʼob kajaʼanoʼob teʼeloʼ jach yaachajaʼan u yóoloʼob kaʼachi, le oʼolaleʼ le Testigoʼoboʼ tu aprovechartoʼob utiaʼal u líiʼskoʼob u yóoloʼob. Letiʼobeʼ tu tʼoxoʼob xan le revista ¡Aajkech! jóoʼsaʼab ich español tu añoil 2017. Le revistaoʼ ku kʼaabaʼtikeʼ: «Cuando golpea un desastre. Qué hacer para sobrevivir». Lelaʼ letiʼe baʼax jach kʼaʼabéet kaʼach tiʼ le máakoʼoboʼ.

 Letiʼobeʼ jach tu tsʼáajoʼob u graciasil úuchik u yáantaʼaloʼob bey xan úuchik u líiʼsaʼal u yóoloʼob yéetel le Bibliaoʼ. Yanoʼobeʼ tu yaʼaloʼob: «Le Testigoʼoboʼ tu yáantoʼonoʼob teʼ hora jach kʼaʼabéetoʼ». Uláakʼoʼobeʼ tu yaʼaloʼob: «Letiʼobeʼ jach tu jaajil u yaabiltmoʼob u yéet máakiloʼob». Yaʼab máakoʼob kajaʼanoʼob teʼ bandaoʼ le ka tu yiloʼob bix úuchik u yáantaʼaloʼob tumen le Testigoʼoboʼ taakchaj u maas kankoʼob baʼax ku yaʼalik le Bibliaoʼ.