U testigoʼob Jéeobaeʼ desde ka káaj u kʼojaʼanil le coronavirusoʼ tu kʼexoʼob bix u tsikbaltikoʼob u tʼaan Dios tiʼ le máakoʼoboʼ. Beoraeʼ maʼatech u kʼaʼaytajoʼob tuʼux yaʼab u máan máak mix joonaj joonajil, baʼaxeʼ ku kʼaʼaytajoʼob tiʼ carta wa tiʼ teléfono. a Yaʼab máakoʼobeʼ ku kʼamkoʼob le kʼaʼaytaj ku beetkoʼoboʼ, tsʼoʼoleʼ Jéeobaeʼ táan xan u bendecirtik le meyaj ku beetkoʼoboʼ (Proverbios 16:3, 4). Koʼox ilik baʼax úuch tiʼ junpʼéel chan isla.

 Antes u káajal le pandemiaoʼ, Heleneʼ suuk kaʼach u xíimbaltik juntúul koʼolel, letiʼeʼ u yaʼalmajtiʼ wa jeʼel u xook tu yéeteleʼ pero le koʼoleloʼ maʼ u yóot xookiʼ. Jach junpʼéel kʼiin antes u yaʼalaʼal yaan u kʼaʼalal máak tu yotocheʼ Heleneʼ tu bisaj tiʼ junpʼéel Biblia yéetel le libro ¿Baʼax k-kanik teʼ Bibliaoʼ? Le táan le pandemiaoʼ Heleneʼ tu kaʼa kʼáatajtiʼ wa jeʼel u yóotik xookeʼ chéen baʼaleʼ tiʼ teléfono, le ka kʼáataʼabtiʼeʼ tu yaʼalaj jeʼel u xookeʼ. Como jach uts tu yich le baʼax ku kanikoʼ letiʼeʼ tu yaʼalaj tiʼ Heleneʼ jeʼel u xook sáamsamaleʼ. Káaj u conectarkuba utiaʼal u yuʼubik le reuniónoʼoboʼ, tu beetaj xan jujunpʼéel kʼeexoʼob ichil u kuxtal, tsʼoʼoleʼ káaj u tsikbaltik tiʼ u maasil le baʼax ku kanikoʼ.

 Jujuntúul sukuʼunoʼobeʼ tu chʼaʼtuklaj u tsʼíibtikoʼob cartaʼob tiʼ le policíaʼoboʼ utiaʼal u tsʼáaikoʼob u graciasil yoʼolal le meyaj ku beetkoʼoboʼ. Le policíaʼoboʼ maʼ tu páaʼtkoʼob kaʼach u felicitartaʼaloʼob yoʼolal u meyajoʼob. Juntúul tiʼ letiʼobeʼ tu yaʼalaj tiʼ Jefferson, ku meyaj bey ancianoeʼ: «Teneʼ tin tukleʼ le Testigoʼoboʼ u pʼekmoʼob le policíaʼoboʼ». Pero Jeffersoneʼ tu yaʼalajtiʼ maʼ beyiʼiʼ. Le policíaʼoboʼ jach jatsʼuts tu yililoʼob le baʼax tsʼíibtaʼan teʼ cartaʼoboʼ le oʼolal tu takʼoʼob teʼ tuʼux ku meyajoʼoboʼ. Juntúuleʼ tu yaʼalaj: «Wa ka u yil u maasileʼ jeʼel xan u apreciarkoʼob le meyaj k-beetkoʼ».

 Edna yéetel Ednalyneʼ precursora regularoʼob, b como minaʼan Internet tu yotochoʼobeʼ maʼ tu páajtal u conectarkubaʼob teʼ reuniónoʼoboʼ. Le oʼolaleʼ kex maʼ Testigo u vecinaʼobeʼ tu kʼáatoʼobtiʼ wa jeʼel u páajtal u conectarkubaʼob tu Interneteʼ. Le kiikoʼoboʼ tu yaʼaloʼobtiʼ jeʼel u yáantkoʼob u boʼoteʼ. Le vecinaoʼ tu yaʼaleʼ maʼ problema ka u conectartubaʼobiʼ. Tu tsʼookeʼ maʼ tu cobrartajtiʼobiʼ. Bejlaʼeʼ le vecinaoʼ, juntúul tiʼ u hijoʼob bey xan kaʼatúul tiʼ u yáabiloʼob x-chʼúupalaloʼobeʼ, tsʼoʼok u káajal u xookoʼob yéetel ku conectarkubaʼob tiʼ le reuniónoʼoboʼ.

 Jujuntúul sukuʼunoʼobeʼ tu invitartoʼob u vecinoʼob bey xan u yéet meyajoʼob utiaʼal ka u conectartubaʼob u yuʼuboʼob junpʼéel discurso kun máansbil tiʼ videoconferencia. Ellaineeʼ ku meyaj tiʼ junpʼéel hospital, letiʼeʼ sajak kaʼach u invitart u yéet meyajoʼob tumen maʼ u yojel wa jeʼel u yóotkoʼob u conectartubaʼobeʼ. Kex beyoʼ tu tsʼáaj u invitación le doctoroʼob ku meyajoʼob tu yéeteloʼ. Pero maases sajak kaʼach u invitart juntúul doctor yéetel u yatan. Máan kʼiin táan u tuklik, pero le ka tsʼoʼok u orar tiʼ Jéeobaeʼ tu chʼaʼtuklaj u tsʼáaik xan u invitaciónoʼob. Le u yatan túun le doctoroʼ tu yaʼalajtiʼ: «¿A kʼáat wa ka in beetinba u testigo Jéeoba?». Le kiikoʼ tu yaʼalajtiʼeʼ tuláakal máak jeʼel u páajtal u conectarkuba u yuʼub le reuniónoʼ, maʼ tsaaj wa u testigo Jéeobaiʼ. Ka kʼuch u kʼiinil le reuniónoʼ Ellaineeʼ jaʼakʼ u yóol ka tu yilaj tu conectartubaʼob, hasta maʼ kʼuchuk u yorail u káajal le reuniónoʼ. Le kiikoʼ ku yaʼalik: «Antes u tsʼoʼokol le reuniónoʼ u yatan le doctoroʼ tu túuxtajten junpʼéel mensaje utiaʼal u tsʼáaikten u graciasil úuchik in invitartik. Kex yáax úuchik u conectarkubaoʼ jach jatsʼuts tu yilil.

 Ellaineeʼ tu invitartaj 20 u túulal doctoroʼob, jach kiʼimakchaj u yóol ka tu yojéelteʼ 16 tiʼ letiʼobeʼ tu conectartubaʼob. Letiʼeʼ jach uts tu tʼaan u kʼaʼajsik baʼax tu yaʼalaj apóstol Pablo tiʼ 1 Tesalonicenses 2:2. Ellaineeʼ ku yaʼalik: «Jach kiʼimak in wóol tumen maʼ sajakchajen in tsikbalt tiʼ in wéet meyajoʼob le jatsʼuts baʼaloʼob ku yaʼalik le Bibliaoʼ.

 Teʼ kʼiinoʼobaʼ chan yaj le kuxtal yoʼolal le pandemiaoʼ pero le sukuʼunoʼob yanoʼob teʼ islaaʼ bey xan le yanoʼob tiʼ tuláakal yóokʼol kaaboʼ tsʼoʼok u kankoʼob u aktáantoʼob yéetel kiʼimak óolal, yéetel táan u yilik u yáantkoʼob u maasil máakoʼob u kʼaj óoltoʼob baʼax ku kaʼansik le Bibliaoʼ (Hechos 20:35).