Daianeeʼ kajaʼan Brasil, letiʼeʼ juntúul u testigo Jéeoba, yéetel jach u tsʼaamaj u yóol predicar. Junpʼéel kʼiin le táan u predicar tiʼ teléfonoeʼ tsikbalnaj yéetel junpʼéel matrimonio, letiʼobeʼ jach taakchaj u kankoʼob u maasil. Chéen baʼaleʼ tu yaʼaloʼob tiʼ Daianeeʼ yaan u binoʼob kajtal tiʼ junpʼéel chan kaaj tuʼux minaʼan corriente mix Internetiʼ. Tsʼoʼoleʼ mix juntúul u testigo Jéeoba kajaʼan teʼeloʼ. Utiaʼal u seguer u tsikbaloʼob tiʼ le Bibliaoʼ letiʼobeʼ tu tsʼáajoʼob tiʼ Daiane u númeroil u teléfonoil le kaajoʼ, tu tsʼáajubaʼob de acuerdoil baʼax kʼiin yéetel baʼax hora jeʼel u páajtal u tʼaʼanloʼobeʼ.

 Daianeeʼ tu tʼanoʼob teʼ kʼiin u chʼaʼtukultmoʼoboʼ, le matrimoniooʼ tu núukoʼob u tʼaan. Tu yáamil le kaʼapʼéel semanaʼob seguernajoʼ Daianeʼ óoxtéen maas béeychaj u tsikbal tu yéeteloʼob.

 Chéen baʼaleʼ desde leloʼ le matrimoniooʼ maʼ tu ka núukoʼob le llamadaoʼ. Pero Daianeeʼ maʼ lúub u yóoliʼ, letiʼeʼ seguernaj u tʼaan teʼ teléfonooʼ, óoxtéen tiʼ junpʼéel semana, letiʼeʼ tu tsikbaltaj baʼax ku yaʼalik le Biblia tiʼ jeʼel máaxak ka u núuk le llamadaoʼ. Yoʼolal leloʼ joʼopʼ u tsʼáaik xook tiʼ yaʼab máakoʼob teʼ kaajoʼ.

 Juntéeneʼ le táan u tsʼáaikoʼob xook Daiane yéetel u yíicham tiʼ juntúul xiʼipaleʼ teʼ teléfonooʼ u nojchil u iglesiail le kaajoʼ joʼopʼ u yuʼubik le tsikbaloʼ, utiaʼal u maas uʼuyikeʼ tu natsʼuba tu tséel le xiʼipaloʼ. Ka tsʼoʼokeʼ tu kʼáataj wa jeʼel u béeytal u tsikbal yéetel Daiane yéetel u yíichameʼ, le máakoʼ taakchaj u maas kaanbal tiʼ le Bibliaoʼ tumen jach jatsʼuts tu yuʼubil bix u tsʼaʼabal xook tiʼ le xiʼipaloʼ.

 Ka máan kʼiineʼ Daiane yéetel u yíichameʼ joʼopʼ u tsʼáaikoʼob xook tiʼ seis máakoʼob teʼ kaajoʼ, ichiloʼobeʼ tiaʼan u nojchil le iglesiaoʼ. Jujuntúuloʼobeʼ hasta tsʼoʼok u yuʼubikoʼob le reunión tu teléfonoil le kaajoʼ, juntúul tiʼ letiʼobeʼ tu beetaj junpʼéel banca utiaʼal u kutaloʼob le táan u tsʼaʼabal xook tiʼoboʼ.

 Daiane yéetel u yíichameʼ jach kiʼimak u yóoloʼob ikil u páajtal u tsikbaltikoʼob u Reino Dios teʼ chan kaajoʼ. Daianeeʼ ku yaʼalik: «Jéeobaeʼ jeʼel u beetik tuláakal le ku páajtal utiaʼal u tsikbaltaʼal baʼax ken u beet u Reino tiʼ tuláakal máakeʼ, tak tiʼ le máaxoʼob jach náach tuʼux kajaʼanoʼoboʼ».