甘心舍己——土耳其
公元一世纪嘅基督徒为咗传讲“王国嘅好消息”，尽力接触更多人。（马太福音24:14）有啲甚至去到异国他乡，例如使徒保罗喺海外传道旅程期间，曾经喺而家土耳其嘅各个地区向人作见证。 * 二千几年之后，喺2014年，土耳其再一次成为传道活动嘅焦点。点解要组织呢个特别传道活动？有边啲人参加呢？
“发生咩事呀？”
虽然土耳其有超过2800个传道员，但系整个国家嘅人口总数有成7900万，噉意味住传道员同人口嘅比例系1:28000。可想而知，传道员喺呢个国家能够接触到嘅住户只系好少嘅一部分。特别传道活动嘅目标系，喺短时间内尽量接触更多人。大约550个识得讲土耳其语嘅弟兄姊妹，从唔同国家嚟到土耳其，同当地嘅传道员一齐参加呢次特别嘅活动。有乜嘢成果呢？
一次广泛嘅见证工作。伊斯坦布尔嘅一个会众报道:“啲人一睇到我哋，就问:‘呢度系咪有个特别嘅大会呀？我哋见到四周围都系耶和华见证人㖞！’”伊兹密尔市嘅一个会众又报告话:“一个喺的士站做嘢嘅男人问一个本地长老:‘最近你哋嘅活动好似多咗㖞，发生咩事呀？’”特别传道活动真系引起咗好多人嘅注意。
斯特芬
嚟参加特别传道活动嘅外国弟兄姊妹，都非常享受呢个传道工作。嚟自丹麦嘅斯特芬话:“每一日，我都可以向嗰啲未听过耶和华嘅名嘅人传道。我觉得自己真系喺度彰显紧耶和华嘅圣名。”从法国嚟嘅让-戴维写道:“我哋净系传咗一条街就用咗几嗰钟嘞。感觉实在太好嘞！大多数人都未听过耶和华见证人。几乎每间屋，我哋都有机会同住户倾计，分享短片，同留低啲出版物。”
让-戴维（中间）
只系短短两个星期，550个传道员就分发咗6万本出版物！呢个特别传道活动确实有效作咗一次广泛嘅见证。
对传道工作热心大增。呢个特别活动推动当地嘅好多弟兄开始考虑参与全时服务。喺特别传道活动结束后嘅一年之内，土耳其正规先驱嘅数目增加咗百分之二十四。
西林
即使呢个特别传道活动结束咗，外国嘅弟兄姊妹返到家乡之后，佢哋依然从中得益。德国嘅西林写道:“土耳其嘅弟兄做非正式见证做得好轻松好自然。不过，我做非正式见证嗰时就好怕丑。我好开心可以参加呢次活动，亦都好多谢当地弟兄嘅榜样，同好多人嘅祷告。因为呢一切，我做到嗰啲之前做唔到嘅嘢。我仲喺土耳其嘅地铁度传道同派传单添！而家，我冇以前咁怕丑喇。”
约翰内斯
嚟自德国嘅约翰内斯话:“我喺传道方面学到好多。土耳其嘅弟兄真系好想同人分享圣经真理，佢哋尽可能把握每一个机会作见证。当时我就下定决心，返到德国之后都要噉样做。而家我接触到嘅人真系比以前多咗。”
泽伊内普
“呢次活动对我嘅传道工作有好大嘅影响，使我更加勇敢，亦都更加信赖耶和华。”嚟自法国嘅泽伊内普讲。
传道员之间嘅关系更亲密。嚟自唔同国家嘅弟兄姊妹之间充满爱心，精诚团结，呢种气氛令人留低深刻嘅印象。之前提到嘅让-戴维话:“我哋‘品尝’到弟兄姊妹嘅好客精神。”跟住佢又话:“当地嘅弟兄姊妹热情噉招待我哋，就好似对待朋友同家人噉。我知道我哋系一个国际弟兄团体，呢一点，我已经喺组织嘅出版物度睇过好多次嘞，但呢一次我先至真正亲身体验到。有咗呢次经历，我更加觉得，身为耶和华嘅子民系好值得自豪嘅。我衷心感谢上帝俾我呢个殊荣。”
克莱尔（中间）
法国嘅克莱尔姊妹话:“无论嚟自丹麦、法国、德国，抑或土耳其，我哋都系一家人。就好似上帝用一个大胶擦将啲国界都擦甩晒噉。”
丝特凡妮（中间）
丝特凡妮都系嚟自法国嘅，佢话:“我哋从呢个特别传道活动睇出，使我哋团结起嚟嘅，唔系文化或语言，而系我哋所有人对耶和华嘅爱。”
长远嘅益处
好多外国嘅传道员开始考虑搬到土耳其，去呢个需求极大嘅地区帮手，甚至有啲传道员已经搬咗过去嘞。我哋真系好感激呢啲愿意搬到去外国服务嘅弟兄姊妹。
例如，喺一个偏远嘅地区，有一个由25位传道员组成嘅小组。好多年嚟，呢个小组只有一个长老。喺2015年，有六位嚟自德国同荷兰嘅传道员，搬去支持呢个小组。可想而知，当地嘅弟兄姊妹几咁高兴！
喺属灵嘅前线服务
喺土耳其服务咗一段时间嘅传道员有乜嘢心声呢？呢啲传道员喺需求较大嘅地区服务，时不时都会遇到一啲挑战，但系佢哋生活得好有意义。请留意佢哋点样讲:
费得里科
一位四十几岁嘅已婚弟兄费得里科，嚟自西班牙，佢噉样讲:“少咗物质嘅嘢，我成个人都轻松晒，因为我可以将精力放喺最重要嘅事上。”佢会唔会鼓励其他弟兄姊妹搬到需求更大嘅地区服务呢？“当然会啦！”佢话，“如果你搬去外国嘅目的，系为咗帮助人认识耶和华，你就系将自己放喺耶和华嘅手中。嗰时你就会真正感受到耶和华关心自己。”
鲁迪
鲁迪系一位五十几岁嘅已婚弟兄，嚟自荷兰。佢话:“喺属灵嘅前线服务，能够同咁多未听过真理嘅人分享圣经知识，呢个使我哋感到极大嘅满足。见到当地嘅人因为接受真理而得到快乐，我哋都觉得非常喜乐。”
萨沙
一位四十几岁嘅已婚弟兄叫萨沙，嚟自德国，佢话:“喺土耳其传道嘅时候，我每次都可以遇到第一次听见真理嘅人。有机会帮助佢哋认识耶和华，俾我好大嘅满足感。”
温子
温子系一位三十几岁嘅已婚姊妹，嚟自日本，佢话:“之前，我成日都想哈米吉多顿即刻嚟到。但系，搬到土耳其之后，我好感激耶和华一直以来表现耐心。我越清楚了解耶和华点样指引全球嘅传道工作，我就越渴望亲近佢。”
阿莉萨系一位三十几岁嘅姊妹，嚟自俄罗斯，佢讲:“以呢种传道方式为耶和华服务，帮助我体验到佢嘅所有良善。”（诗篇34:8）佢又话:“耶和华唔单止系我嘅父亲，亦都系我亲密嘅朋友。经历过唔同嘅情况之后，我对佢嘅认识更加深入。我嘅人生充满快乐嘅时刻、令人振奋嘅经验，同慷慨嘅祝福！”
“睇吓啲田”
喺土耳其举行嘅呢个特别传道活动，使更多嘅人听到好消息。但系，仲有好广大嘅地区，系冇传道员去过嘅。嚟土耳其服务嘅传道员，每日都会遇到一啲从来未听过耶和华嘅人。你想唔想喺呢啲地区服务呢？如果想嘅话，我哋就鼓励你:“举目睇吓啲田，已经发白，可以收割庄稼嘞。”（约翰福音4:35）你可唔可以去一啲“已经发白”咗嘅，又可以“收割庄稼”嘅地区帮手呢？如果可以嘅话，而家就要为呢个目标详细噉计划。我哋可以肯定嘅系:如果我哋更加努力将好消息传到“地极”，就会得到超越我哋所能想象嘅福分。（使徒行传1:8）
^ 2段 请睇《看看这片美地》册子32-33页。
