為你嘅思想打場勝仗
你而家正受到攻擊！你嘅敵人係撒但，佢用一個好犀利嘅武器嚟攻擊你。呢個武器係乜嘢？就係誤導人嘅宣傳！佢攻擊嘅唔係你嘅身體，而係你嘅思想。
使徒保羅清楚知道，撒但嘅宣傳有幾咁危險。但係，佢啲同工唔係個個都好似佢咁謹慎。例如，有啲哥林多嘅基督徒變得過度自信，以為自己喺真理企得好穩，永遠唔會跌倒。（哥林多前書10:12）所以保羅警告佢哋:“我驚你哋俾人用手段敗壞咗思想，失去對基督應有嘅誠懇同貞節，就好似蛇用詭計誘惑咗夏娃一樣。”（哥林多後書11:3）
保羅講嘅話使我哋睇出，我哋唔應該過度自信。如果你想喺思想上打贏呢場仗，就需要睇出誤導人嘅宣傳係幾咁危險，同埋識得點樣保護自己。
誤導人嘅宣傳有幾危險？
乜嘢係誤導人嘅宣傳？喺呢篇文章，呢種宣傳指嘅係用片面或者錯誤嘅信息嚟操控人嘅思想同影響人嘅行為。《宣傳與説服》（英語）呢本書話，有人形容誤導人嘅宣傳係“大話、扭曲嘅言論、欺騙、思想控制、洗腦，［同埋］心理戰術”，佢哋將呢種宣傳同“唔道德嘅，有害嘅，同埋唔公平嘅策略”聯繫埋一齊。
噉樣嘅宣傳有幾危險呢？呢個係一種好陰險嘅手段，就好似無色無味嘅毒氣一樣，可以不知不覺噉影響人嘅思想。行為學家萬斯·帕卡德留意到，“由於我哋睇唔出宣傳背後嘅真相，好多時俾人影響同操控咗都唔知道。”《古往今來嘅宣傳——輕易令人上當》（英語）呢本書裏面有一位學者話，喺誤導人嘅宣傳嘅影響之下，人往往“好容易做出一啲極度危險又唔合理嘅事，例如種族屠殺、戰爭，同埋種族或宗教迫害。”
如果凡人都能够利用宣傳嚟愚弄人，噉何況撒但呢？從人類被創造以來，撒但一直喺度研究人類嘅行為。而家撒但控制緊“全世界”，佢可以利用呢個世界嘅任何事物去散播佢嘅大話。（約翰一書5:19；約翰福音8:44）撒但好成功噉“整盲咗［人嘅］心眼”，所以今日“普天下嘅人”都受到佢嘅“迷惑”。（哥林多後書4:4；啟示錄12:9）你可以點樣對抗撒但嘅宣傳呢？
加强你嘅防衛能力
耶穌話:“認識真理，真理會使你哋自由。”（約翰福音8:31，32）呢個係一個簡單嘅方法可以對抗誤導人嘅宣傳。喺戰爭期間，士兵需要知道喺邊度得到可靠嘅情報，因為敵人會散布假情報嚟誤導佢哋。耶和華通過聖經為我哋提供真實嘅信息，噉我哋就可以揾到所需嘅知識去對抗撒但嘅宣傳。（提摩太後書3:16，17）
撒但呢個宣傳高手當然好清楚呢一點。佢利用自己所控制嘅呢個世界使我哋分心，唔想閲讀同埋研究聖經。千祈唔好俾佢呢個奸計得逞！（以弗所書6:11）要“清楚領會”真理嘅全貌。（以弗所書3:18）噉樣做係需要付出努力嘅。請留意作家諾庵·杭士基（諾姆·喬姆斯基）所講嘅事實:“冇人能够將真理灌入你個腦。真理係需要你自己去揾嘅。”所以要努力“日日細心查考聖經”，你就可以揾到真理。（使徒行傳17:11）
如果你想為自己嘅思想打場勝仗，就一定要睇出誤導人嘅宣傳有幾危險，噉先可以保護到自己
要緊記，撒但唔想你運用思考力，亦都唔想你善於推理。點解？因為“如果人缺乏嚴謹嘅思維，就會好容易接受錯誤嘅訊息。”——《第二十世紀嘅媒體與社會》（英語）。所以，千祈唔好盲目接受所有聽到嘅嘢，要小心諗清楚先。（箴言14:15）要運用上帝賜俾你嘅思考力同理智嚟强化自己嘅信心。（箴言2:10-15；羅馬書12:1，2）
提防“先分化，後攻破”嘅策略
軍事戰略家會先用宣傳嚟打擊敵人嘅士氣，削弱對方嘅戰鬥力。軍事戰略家可能會使對方引起内訌，又或者誤導對方，使佢哋離開大隊。據説一個德國嘅將軍曾經講過，佢哋喺第一次世界大戰當中之所以打敗仗，係因為當時嘅人民俾敵軍嘅宣傳所迷惑。撒但亦都用類似嘅手段去先分化，後攻破，例如佢喺基督徒成員當中引起紛爭，或者使佢哋感到自己受到唔公平嘅對待，覺得好委屈，就孤立自己，同耶和華嘅組織疏遠。
唔好上當！要受上帝嘅話語指引。例如，喺保持會衆團結方面，聖經鼓勵我哋要“彼此甘心寬恕”，盡快化解紛爭。（歌羅西書3:13，14；馬太福音5:23，24）聖經强烈警告我哋，千祈唔好孤立自己。（箴言18:1）要做好準備，盡力抵抗撒但嘅宣傳。問吓自己:“上一次我遇到噉樣嘅情況，當時我嘅思想受乜嘢支配呢？係世界嘅精神抑或係聖靈？”（加拉太書5:16-26；以弗所書2:2，3）
唔好失去你對上帝嘅信賴
如果一個士兵慢慢失去對自己上司嘅忠誠，就唔會盡力作戰。所以敵人會諗辦法散播謠言，破壞士兵同上司之間嘅信任。敵人嘅宣傳可能係“你嘅上司係唔值得信任嘅！”又或者“唔好聽你上司講，佢會害死你㗎！”敵人仲好識得利用呢啲上司曾經犯過嘅錯誤，使自己嘅宣傳更有説服力。呢啲就係撒但嘅手段嘞。佢一心想破壞你對上帝領導權安排嘅信心，所以佢係唔會放棄嘅。
噉你可以點樣保護自己呢？要決心緊緊依附耶和華嘅組織，亦都要忠心噉支持佢所委任嘅人，就算呢啲人係唔完美嘅。（帖撒羅尼迦前書5:12，13）叛道者或其他想誤導你嘅人可能會詆毁上帝嘅組織。即使表面睇嚟，指控好似係真實嘅，都“唔好輕易動搖，失去理智”。（帖撒羅尼迦後書2:2；提多書1:10）要聽從保羅俾提摩太嘅勸勉，持守你所學過嘅真理，亦都要緊記呢啲真理係嚟自邊度嘅。（提摩太後書3:14，15）差唔多有一百年嘅時間，耶和華都係運用同一個渠道嚟幫助人行走真理嘅道路。你一定可以揾到足够嘅證據，使自己能够信賴呢項安排。（馬太福音24:45-47；希伯來書13:7，17）
唔好俾恐嚇嘅手段嚇倒
撒但亦都會用直接嘅方式去影響人，例如恐嚇。呢種手段“係最古老嘅宣傳方法之一”——《古往今來嘅宣傳——輕易令人上當》（英語）。英國嘅教授菲爾普·泰勒講過，亞述人會將恐嚇同宣傳結合埋一齊去制服敵人。撒但都會利用我哋對迫害、死亡或者其他事物嘅恐懼心理嚟控制我哋，使我哋退縮，唔再事奉耶和華。（以賽亞書8:12；耶利米書42:11；希伯來書2:15）
撒但通過恐嚇使你意志消沉，破壞你對上帝嘅忠義，千祈唔好中咗佢嘅奸計。耶穌話:“唔好畏懼嗰啲殺身體之後，唔能够再做任何嘢嘅人。”（路加福音12:4）要對上帝嘅應許有堅定嘅信心，佢承諾會保護你，俾你“超凡嘅力量”，亦都會幫助你抵抗所有嚟自撒但嘅攻擊。（哥林多後書4:7-9；彼得前書3:14）
當然，你會遇到一啲令你恐懼、意志消沉嘅事。但係要緊記耶和華鼓勵約書亞嘅話:“要勇敢堅强，唔好恐懼，亦都唔好驚慌，因為無論你去到邊度，你嘅上帝耶和華都與你同在。”（約書亞記1:9）當你感到恐懼嘅時候，要馬上向耶和華禱告，將你嘅憂慮全部話俾佢知。你可以確信，上帝“一定會賜［你］平安，……可以守護［你］嘅内心同頭腦”，使你有力量抵抗撒但所有嘅宣傳。（腓立比書4:6，7，13）
仲記唔記得亞述王攻擊上帝子民嘅時候，佢差派嘅御前總長講咗乜嘢恐嚇人嘅話呢？其實佢嘅意思係，“冇嘢可以幫到你哋脱離亞述人嘅手，就算係你哋嘅上帝耶和華都無能為力”。佢仲好大膽噉話，“耶和華上帝叫我哋嚟毁滅呢個地方。”耶和華又點回應呢？“你聽見亞述王嘅侍役辱罵我嘅説話，唔使怕。”（列王紀下18:22-25；19:6）然後，佢差派一位天使喺一夜之間，殺死咗18萬5千個亞述士兵。（列王紀下19:35）
要明智，時刻聽從耶和華
喺睇戲嘅時候，你有冇見過戲入面嘅人俾人呃或者受人控制？你係唔係好想話俾嗰個人知，“唔好信佢哋呀！佢哋呃你㗎咋！”你可以想像到，天使都好想話俾你知，“唔好俾撒但嘅大話呃到呀！”
所以千祈唔好聽撒但嘅宣傳。（箴言26:24，25）要聽從耶和華，喺你所做嘅一切事上，都要全心信賴佢。（箴言3:5-7）要響應耶和華親切嘅呼籲:“我兒，你要有智慧，使我嘅心歡喜”。（箴言27:11）你噉樣做就可以為你嘅思想打場勝仗！
