Lade ca ley ni bidii Dios Moisés para ca israelita zeeda ley «guié lú pur guié lú». Laaca bizeeteʼ Jesús ni lu Sermón del Monte (Mateo 5:38; Éxodo 21:24, 25; Deuteronomio 19:21). Ley riʼ ná naquiiñeʼ quixe binni biaʼ bininá tuuxa. a

 Laaca biquiiñeʼ ley riʼ para binni ni laa peʼ guniná stobi. Ley ni gucuaa Moisés que ná: «Dxita ladi pur dxita ladi, guié lú pur guié lú, laya pur laya; naquiiñeʼ guninatu laabe biaʼca bininabe sti binni» (Levítico 24:20).

•  ¿Xi para guʼtaʼ ley «guié lú pur guié lú»?

•  ¿Ñee naquiiñeʼ chinanda ca xpinni Cristu ley «guié lú pur guié lú» la?

•  Cosa ni cadi jneza riníʼ ique binni de ley «guié lú pur guié lú»

•  Bisiene Jesús cadi jneza ni riníʼ ique binni

 Cadi guʼtaʼ ley riʼ para guquixe binni ni gúnicabe laa, sínuque gucané ley riʼ ca juez de dxiqué para quíxhecaʼ castigu, nin tan naguudxi nin tan naná.

 Gucané ley riʼ binni guiníʼ ique ante guniná stobi o pa bininá tuuxa. Ca binni ni guʼyaʼ modo ná Ley stiʼ Dios gaca juzgar tuuxa, zadxíbicaʼ ne maʼ qué zúnirucaʼ xiixa cosa malu (Deuteronomio 19:20).

 Coʼ, maʼ cadi naquiiñeʼ chinanda ca xpinni Cristu ley riʼ. Biluxe Ley stiʼ Moisés que dxi gutiʼ Jesús (Romanos 10:4).

 Peru racané ley riʼ laanu gánnanu ximodo riníʼ ique Dios. Rusiene ni risaca para Dios guni ni jneza (Salmo 89:14). Laaca rusiidini laanu jneza ruuyaʼ Dios gaca castigar ti binni biaʼ caquiiñeʼ ni ora biʼniʼ ti cosa malu (Jeremías 30:11).

 Nuu binni riníʼ ique: Ley «guié lú pur guié lú» rucaani binni cadi gusaana de gaca vengar.

 Ni dxandíʼ: Ley gucuaa Moisés que ná: «Cadi guquíxeluʼ ni guni ca xiiñiʼ binni xquídxiluʼ lii ne cadi gapuʼ xiana laacabe» (Levítico 19:18). Lugar de nuquixe binni ni bíʼnicabe laa, bicaa Ley que laacabe gápacabe confianza Dios ne modo gudixhe gaca chaahuiʼ xiixa guendanagana (Deuteronomio 32:35).