CAPÍTULO 25

¿Zanda gusaanaʼ de quiteʼ ra nacaʼ hombre o ra nacaʼ gunaa la?

«Dxi napaʼ xhono iza bizuluáʼ gudxiteʼ ra nacaʼ hombre. Ma’ despué gunnaʼ ximodo ruuyaʼ Dios ni, ngue runi, cada biaje guneʼ ni la? runeʼ sentir mal dede guníʼ ique, “qué zannaxhii Dios naa”». (Luis)

ORA maʼ ziniisi ca hombrehuiiniʼ ne ca dxaapahuiiniʼ ca ruzulú ruchaa cuerpu sticaʼ ne ruluiʼláʼdxicaʼ gatanecaʼ tuuxa, pur nga runi stale de laacaʼ riguítecaʼ ra nácacaʼ hombre o ra nácacaʼ gunaa o gaca masturbarca’. a Zándaca chuʼ tu gabi lii cadi malu peʼ guʼnuʼ ni purtiʼ guirutiʼ zacaná, peru nuu stale razón para cadi gúniluʼ ni. Biiyaʼ xi guníʼ apóstol Pablo: «Lagucueeza ca deseu malu ni nuu lu cuerpu stitu ti cadi guni cometertu pecadu sexual» (Colosenses 3:5). Ni dxandíʼ nga ora quite tobi ra naca gunaa o ra naca hombre qué rucueeza diʼ ni ca deseu malu de guni cometer pecadu sexual, sínuque laga rucaa ni laacaʼ gúnicaʼ ni, peru cadi ngasi nga ni rucaa ni binni guni:

● Rucaa ni laacabe guyúbicabe puru si para laacabe ne gúnicabe ni cayuni sentírcabe.

● Ruuyacabe hombre o gunaa casi ti cosa ni zanda iquiiñecabe para si guni satisfacércabe ca deseu sexual stícabe.

● Rucaani laacabe guyúbicabe puru si para laacabe ne pur nga raca nagana para laacabe chúʼcabe nayecheʼ ora gatanécabe xheelacabe.

Nga runi, jma galán nga gucueeza tobi laca laa que gaca masturbar para si guni satisfacer ca deseu sexual stiʼ ne guicá ique puru si laani (1 Tesalonicenses 4:4, 5). Yanna, ¿xi zanda gúniluʼ para gucueezaluʼ laca lii yaʼ? Biblia cayabi lii cadi gúniluʼ xiixa ni gucaa lii gaca excitarluʼ (Proverbios 5:8, 9). Peru ¿pa maʼ nápaluʼ viciu de quíteluʼ ra nácaluʼ hombre o ra nácaluʼ gunaa yaʼ? Zándaca huayacaláʼdxiluʼ gusaanaluʼ ni peru qué ganda. Pur nga zándaca guiníʼ íqueluʼ maʼ qué zanda gusaanaluʼ ni ne guibániluʼ modo riuulaʼdxiʼ Dios. Ne nga peʼ nga ni guníʼ ique ti joven láʼ Pedro, laa guníʼ: «Cada biaje guiabaʼ lu viciu riʼ runeʼ sentir napaʼ donda. Ngue runi, guníʼ iqueʼ maʼ qué zuni perdonar Dios naa pur ni runeʼ. Dede maʼ qué ñanda ñuneʼ orar».

Pa zacá cayuni sentirluʼ la? cadi guireeluʼ gana. Cadi guiníʼ íqueluʼ maʼ qué zanda guchaaluʼ. Cásica joven, zaqueca ni huaniisi gunda bisaanacaʼ viciu riʼ. Nga runi, pa gunda bíʼnicabe ni la? lii laaca zanda gúniluʼ ni.

¿Ñee runi sentirluʼ nápaluʼ donda la?

Casi maʼ bidúʼyanu, stale de ca ni napa viciu quítecaʼ ra nácacaʼ hombre o ra nácacaʼ gunaa runi sentircaʼ nápacaʼ donda o casi ná 2 Corintios 7:11 riuucaʼ triste modo riuulaʼdxiʼ Dios. Cadi malu guni sentirluʼ zacá purtiʼ zacané ni lii gusaanaluʼ viciu ca. Peru pa qué rusaana de guiníʼ íqueluʼ nápaluʼ donda la? zándaca guireeluʼ gana dede guiníʼ íqueluʼ maʼ qué zanda guchaaluʼ (Proverbios 24:10).

Nga runi cadi tan ugaaniluʼ donda íqueluʼ, dxandíʼ ti cosa guizáʼ nabiidiʼ nga quite binni ra naca hombre o ra naca gunaa, purtiʼ ra gúniluʼ ni zácaluʼ esclavu stiʼ ca deseu stiluʼ ne zucaani lii gúniluʼ ni cadi jneza (Tito 3:3). Peru cadi ti pecadu sexual grave ni, casi fornicación (Judas 7). Nga runi, pa nápaluʼ viciu riʼ, cadi guiníʼ íqueluʼ qué zuni perdonar Dios lii, ni jma jneza gúniluʼ nga cadi gusaana de gúniluʼ stipa pur gucueezaluʼ ca deseu stiluʼ ne cadi guireeluʼ gana.

Ne pa ibigueta gúniluʼ ni la? cadi guireeluʼ gana. Bietenalaʼdxiʼ ca diidxaʼ ni zeeda lu Proverbios 24:16: «Peru neca guiaba ti binni runi ni jneza gadxe biaje, ziásabe sti biaje; peru ca binni malu zarenda ñeecaʼ pur ca guendananá gueeda luguiacaʼ». Pa gueeda gucheeluʼ cadi guníʼ íqueluʼ maʼ nácaluʼ ti binni malu. Nga runi, guníʼ ique xiñee bíʼniluʼ ni ne xi zanda gúniluʼ para cadi guibiguetaʼ gúniluʼ ni sti biaje.

Guníʼ ique de guendarannaxhii ne guendariáʼ stiʼ Dios. Nanna David xi runi sentir binni ora runi ni ná beela ladi, nga runi bicabeʼ ca diidxaʼ riʼ: «Cásica riá ti Padre xiiñiʼ, zacaca riá Jehová ca binni ni ridxibi laa. Purtiʼ nanna dxíchibe ximodo guyanu, ne rietenaláʼdxibe de yu laanu» (Salmo 103:13, 14). Nanna Dios nácanu binni ruchee, nga runi nuucabe listu para guni perdonarbe laanu (Salmo 86:5). Peru laaca ribézabe gúninu stipa pur guchaʼnu. Yanna, guidúʼyanu xi zacané lii para gusaanaluʼ viciu riʼ.

Biiyaʼ ximodo riquiiñeluʼ tiempu libre stiluʼ. ¿Ñee ruuyaluʼ película, programa de televisión o riuuluʼ lu xiixa página de internet ni rucaa lii chuuláʼdxiluʼ gátaneluʼ tuuxa la? Biiyaʼ xi gunabaʼ ti hombre bicaa Salmo Dios lu ti oración: «Cadi gudiiluʼ lugar guʼyaʼ luaʼ cosa qué iquiiñeʼ» (Salmo 119:37). b

Bi’ni’ stipa guiníʼ íqueluʼ sti cosa. Zanda gúniluʼ ni binni ti xpinni Cristu láʼ William, laa guníʼ: «Nabé risaca guiníʼ íqueluʼ xiixa ni zeeda de Dios. Nga runi, ante chigásiluʼ biindaʼ xiixa información ni caníʼ de lu Biblia» (Filipenses 4:8).

Guníʼ xi guendanagana nápaluʼ. Neca guituí luluʼ la? gudxi tuuxa xi cazaacaluʼ. Purtiʼ nga zacané lii gusaanaluʼ viciu ca. Ne nga peʼ nga ni bi’ni’ ti hombrehuiiniʼ ni láʼ David: «Gudxeʼ bixhozeʼ de ni cazaacaʼ que. Qué ziuu dxi guiaandaʼ naa ca diidxaʼ ni gúdxibe naa. Cumu bidiibe cuenta pabiáʼ nagana guca para naa gabeʼ ni laabe la? bixidxihuiinibe ne gúdxibe naa: guizáʼ nuaaʼ orgulloso de lii. Ngue peʼ nga ni caquiiñeʼ ne guizáʼ guluu ni gana naa. Ngue runi gudixheʼ iqueʼ gusaanaʼ viciu ni napaʼ que.

Ni bíʼnibe primé nga biindanebe naa chupa chonna versículo stiʼ Biblia para cadi tan guneʼ sentir mal, ne despué biindanebe naa xcaadxi textu para gúʼyabe pa cayeneʼ pabiáʼ naxoo ngue ni cazaacaʼ que. Ne gúdxibe naa guneʼ stipa para cadi gacaʼ masturbar dede ora guedandá dxi güidu diidxaʼ sti biaje. Laaca gúdxibe naa, pa guibiguetaʼ guneʼ ni sti biaje la? cadi tan chuaaʼ xizaa ne guneʼ stipa pur guneʼ huantar jma xadxí». ¿Ximodo gucané ndiʼ David yaʼ? Laa guníʼ: «Gástiruʼ sti cosa jma galán que chuʼ tuuxa guizaalaʼdxiʼ ne gacané naa». c

NI ZADÚʼYANU LU STIʼ CAPÍTULO CA ¿Dxandíʼ nga gastiʼ naca gatané tuuxa sti binni para si chuʼ nayecheʼ la?

[Nota]

TEXTU NI ZANDA GACANÉ LII

«Bixeleʼ de ca deseu ni rapa ca joven, biʼniʼ ni jneza ne gupa fe, gunnaxhii binni ne biyubi gatadxí ladxidoʼloʼ, lii né ca ni napa confianza Señor» (2 Timoteo 2:22).

NI ZANDA GÚNILUʼ

Bi’ni’ orar Jehová Dios ante chuuláʼdxiluʼ gúniluʼ ni jma. Gunabaʼ laabe gudiibe lii poder stibe purtiʼ laabe jma nadípabe ne zanda gacanebe lii (2 Corintios 4:7).

¿ÑEE NANNUʼ NI LA?

Cadi nagana gúniluʼ ni ná ca deseu sexual stiluʼ, peru pa riníʼ íqueluʼ casi ti binni huaniisi la? zanda gucueezaluʼ laca lii, jmaruʼ si o a nuuluʼ stúbiluʼ.

¡BIZULÚ BIʼNIʼ NI!

¿Xi zanda guneʼ para guiníʼ iqueʼ puru si cosa ni jneza ne ni nayá yaʼ? ․․․․․

¿Xi zanda guneʼ pa málasi gudii gana naa guneʼ ni sti biaje yaʼ? ․․․․․

¿Xi zanda guinabadiidxaʼ bixhozeʼ o jñaaʼ de tema riʼ? ․․․․․

¿XI RINÍʼ ÍQUELUʼ?

● ¿Xiñee galán guietenaláʼdxiluʼ nuuca Jehová «listu para guni perdonar»? (Salmo 86:5).

● Nanna Dios nadipaʼ nga ca deseu sexual ca purtiʼ laabe bizaʼbe laanu, yanna, pa canábabe gucueezaluʼ laca lii, ¿ñee cadi rábiluʼ purtiʼ nánnabe zanda gúniluʼ ni la?

[Ni caníʼ/Epígrafe]

«Dede dxi bisaanaʼ viciu riʼ, maʼ nayá nuu conciencia stinneʼ, gástiruʼ sti cosa jma risaca que nga». (Sara)

[Imagen]

Pa gueeda guiábaluʼ ora maʼ zeluʼ lu ti carrera, ziásaluʼ ne zuxooñeluʼ sti biaje. Zacaca nga pa gaca masturbarluʼ sti biaje la? qué riníʼ diʼ nga qué risaca guiráʼ stipa ni maʼ bíʼniluʼ