GUCA si Pablu xpinni Cristu, bizulú bicheeche stiidxaʼ Reinu stiʼ Dios ne stale gana. Peru yanna maʼ laabe nga naquiiñeʼ guni huantarbe guiráʼ guendanagana guidxagalube pur gucheechebe diidxaʼ. Ruluíʼ nga qué nidxaga apóstol Pablu pur modo biʼniʼ xhiiñaʼ. Xiñee rininu zacá yaʼ. Purtiʼ guyebe zitu para guiniʼbe de gobiernu ni chiguni guiráʼ ni maca gudixhe ique Dios guni para binni guidxilayú.

Dxi bíʼnibe primé biaje stibe, guyebe Listra ne raqué bisiándabe ti hombre ni nachiitaʼ ñee dede dxi gule. Ca binni ni biʼyaʼ ni bíʼnibe que bizulú bicaacaʼ ridxi ne guniʼcaʼ Pablu ne Bernabé dios laacaʼ. De apena para gunda bicueezacabe ca binni que de nuzaaquicaʼ maniʼ para guni adorarcaʼ laacabe. Peru qué liica nindaa de ngue biʼniʼ ca binni que ni na ca xhenemigu Pablu ne bichacaʼ guié laabe. Neca guníʼ íquecaʼ maʼ gútibe, peru nabánirube ne qué nindaa bibiguétabe ndaaniʼ guidxi que para uguube gana ca xpinni Cristu.

Despué, guníʼ caadxi judíu ni naca xpinni Cristu caquiiñeʼ guni ca xpinni Cristu ni cadi judíu caadxi cosa ni zeeda lu Ley ni gucuaa Moisés. Para ganda gaca chaahuiʼ guendanagana que la? guyé Pablu ra nuu ca apóstol ne ca binnigola ni nuu Jerusalén para gabi laacabe xi cazaaca. Despué de biindaʼ chaahuicabe Stiidxaʼ Dios ne gunábacabe gacané espíritu santu laacabe la? bicaacabe ra nuu ca neza binni ridagulisaa que ne biʼniʼ mandárcabe laacaʼ cadi guni adorarcaʼ bidóʼ, cadi gocaʼ rini nin beela biuʼchaʼ rini ne cadi chúʼnecaʼ ni cadi xheelacaʼ. Nga nga ca mandatu ni caquiiñeʼ gúnicabe, peru cadi caníʼ diʼ ni caquiiñepeʼ chinándacabe guiráʼ ca Ley bidii Dios Moisés (Hechos 15:28, 29).

Lu guiropa biaje biʼniʼ Pablu, guyé ndaaniʼ guidxi Berea, ti lugar ni guyuu ra nuu Grecia yanna. Ca judíu ni nabeza ndaaniʼ guidxi que bicaadiágacaʼ Stiidxaʼ Dios ne stale gana ne guiráʼ dxi biyúbicaʼ lu Xquiʼchiʼ Dios pa jneza guiráʼ ni caziidicaʼ. Nin qué nindaa bixooñeʼ Pablu sti biaje de ca xhenemigu. Guyebe dede Atenas, ra nuu caadxi binni nuu xpiaaniʼ ne raqué bidiibe ti libana ne stale respetu ne maca para gucuudxibe laacaʼ.

Biluxe si Pablu guionna biaje stiʼ guyé Jerusalén. Ora guyebe ndaaniʼ yuʼduʼ que, gucalaʼdxiʼ caadxi judíu ñuuticaʼ laabe. Peru gulee ca soldadu que laabe de lu náʼ ca binni que para gaca juzgarbe. Cumu de Roma laabe la? bidiicabe lugar gusiénebe cani runi crebe nezalú gobernador Félix. Qué ñanda nusihuinni ca judíu que dxandíʼ ni guniʼcaʼ de laabe. Neca zaqué, Festo, ni gurí despué de Félix, gucalaʼdxiʼ nusaana laabe lu náʼ ca judíu que. Para cadi gaca ngue la? gunabaʼ apóstol que cheʼ nezalú César, ngue runi biseendaʼ Festo laabe «ra nuu César» (Hechos 25:11, 12).

Cumu ndaaniʼ guidxi Roma nga chigaca juzgar Pablu la? ngue runi, biseendacabe laabe ndaaniʼ ti barcu ni zeʼ Italia, peru barcu que biaazini ne gupa xidé biaanabe tiempu nanda que ndaaniʼ isla stiʼ Malta. Ora yendabe Roma gulézabe chupa iza ndaaniʼ ti yoo ni gudíxebe. Neca nuu tu cayapa laabe la? qué ñuu dxi nireebe gana ne qué nusaana de niníʼnebe ca binni ni yeganna laabe de Reinu stiʼ Dios.

(Zeedani lu Hechos 11:22–28:31.)