ÚLTIMU libru stiʼ Biblia, Apocalipsis, riguixhedxini ladxidóʼ binni guidxilayú. Apóstol Juan nga bicaani ne luni zeeda stale visión ni chiguizaaca dxi maʼ gaca ni maca gudixhe ique Jiobá guni.

Primé visión ca culuiʼni modo gucané ne modo guluu neza Jesús, ni biasa de lade gueʼtuʼ que, stale neza binni ridagulisaa. Guiropa visión ca culuíʼ ximodo nga trono stiʼ Dios ni nuu guibáʼ ne laaca rihuinni caadxi binni de espíritu cusisácacaʼ Jiobá.

Ra mayaca guedandá dxi guiluxe guiráʼ ni gudixhe ique Dios guni, bihuinni gucuaa Dendxuʼ huiiniʼ (ni zeeda gaca Jesucristu), ti rollo ni napa gadxe sellu. Ora bixhélebe ca primé tapa sellu que bihuinni tapa hombre dxiʼbaʼ maniʼ. Primé hombre dxiʼbaʼ maniʼ quichiʼ que nga Jesús, ne maʼ bíʼnicabe laa Rey. Xhonna hombre que dxíʼbacaʼ maniʼ de gadxé gadxé color ni zeeda gaca guendaridinde, guendarindaana ne guendahuará, ne laacani cusihuinni cani mayaca guinitilú guidxilayú riʼ. Ora bixheleʼ Dendxuʼ huiiniʼ que últimu sellu que binadiágacabe guxidxi gadxe trompeta ni cusihuinni guiráʼ ni chiguni Dios para gunitilú ca cosa malu. Ne laacani bedanécani xcadxe plaga ni zeeda gaca xiana stiʼ Dios.

Despué biiyaʼ Juan gule ti baʼduhuiiniʼ, ne nga bisihuinni maʼ bizulú cayuni mandar Jesús dede guibáʼ lu Reinu stiʼ Dios. Guca ti guendaridinde ne guleecabe Binidxabaʼ ne ca demonio stiʼ de guibáʼ ne bilaacabe laacaʼ lu Guidxilayú riʼ. Ne binadiágabe ti ridxi de guibáʼ na: «Lagapa gá si laatu cani nuu ndaani guidxilayú». Xiñee yaʼ. Purtiʼ nabé cadxiichi Binidxabaʼ ne nanna maʼ huaxiéʼ dxi napa (Apocalipsis 12:12).

Juan bibiguetaʼ biiyaʼ Jesús sti biaje casi ti dendxuʼ huiiniʼ ne cueʼbe zuhuaa 144,000 binni ni bibí para guni «mandar né» laabe. Libru stiʼ Apocalipsis racané laanu gánnanu 144,000 binni guidxilayú nga zeeda gaca xcaadxi de cani za de gunaa que (Apocalipsis 14:1; 20:6).

Despué guiráʼ cani runi mandar lu Guidxilayú riʼ zadagulisaacaʼ lu Armagedón, o dxi cuidxi Dios ni jma Nandxóʼ cuenta binni ne zucaalucaʼ hombre ni dxiʼbaʼ maniʼ quichiʼ que ne nga nga Jesús ne ca ángel stiʼ. Ximodo zaluxe guendaridinde riʼ yaʼ. Zaluxe ni ra guinitilú ca gobiernu nuu lu Guidxilayú riʼ ne ra guieguyoo Binidxabaʼ. Jesús ne 144,000 binni ca zuni mandarcaʼ lu Guidxilayú riʼ ti mil iza ne despué zanitilú Binidxabaʼ (Apocalipsis 16:14; 20:4).

Xi zuni Cristu pur ca binni ni guzuubaʼ diidxaʼ ora maʼ guni mandar lu ti mil iza. Guidúʼyanu xi ná Juan chiguni Jiobá: «Zuchaa be nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni uyuu chiqué» (Apocalipsis 21:4). Ya, ¡zabiguetaʼ zaca Guidxilayú riʼ ti paraísu!

Casi maʼ bidúʼyanu ca, Apocalipsis nga últimu libru ni cusiene cani zeeda lu Biblia: Jiobá zaquiiñeʼ Reinu stiʼ para guiá lá ne gusihuinni laa si nga napa derechu de guni mandar.

(Zeedani lu libru stiʼ Apocalipsis.)