Laadu, ca testigu stiʼ Jiobá biʼniʼ imprimirdu gadxé gadxé Biblia, biquiiñedu cani ne gudíʼzidu cani pur stale iza. Peru ra gudiʼdiʼ dxi bidúʼyadu caquiiñeʼ gutiixhidu ti Biblia ni ganda gacané binni «ganna ca ni dxandíʼ», ne ngapeʼ nga ni racalaʼdxiʼ Dios para guiráʼ binni (1 Timoteo 2:3, 4). Nga runi, lu iza 1950 bizulú guleedu caadxi libru stiʼ Biblia stidu lu diidxaʼ inglés, ne laani nga Traducción del Nuevo Mundo. Luni biquiiñedu diidxaʼ ni jma riene binni, ne jnézapeʼ modo bitiixhidu ni lu jma de ti gayuaa treinta diidxaʼ.

Caquiiñeʼ ti Biblia ni guiene binni. Ra zidiʼdiʼ iza ruchaa modo riníʼcabe ti diidxaʼ, nga runi, lu stale Biblia zeeda diidxaʼ ni huaxiéʼ riene binni o ni maʼ qué riquiiñecaʼ. Ne laaca maʼ huadxélacabe caadxi rollo nayooxhoʼ ne laacani nga copia jma jneza stiʼ ca primé rollo stiʼ Biblia. Nga runi, yanna maʼ zanda guiénenu cani gucuá lu diidxaʼ hebreu, arameu ne griegu ni biquiiñeʼ dxi gucuá Biblia.

Caquiiñeʼ ti Biblia ni cadi guchaa cani gucuá lu Stiidxaʼ Dios. Cani rutiixhi diidxaʼ cadi naquiiñeʼ gúnicaʼ ni gacaláʼdxicaʼ ora gutiixhicaʼ ca diidxaʼ ni guníʼ Dios guicá, sínuque naquiiñeʼ gucaacabe guiráʼ ni gucuá lu Stiidxaʼ Dios primé. Peru lu stale de ca Biblia ni huatiixhicabe qué riquiiñecabe lá Dios, Jiobá.

Caquiiñeʼ ti Biblia ni gusisaca ni guníʼ xi guicá luni (2 Samuel 23:2). Lu Traducción del Nuevo Mundo, maʼ bicaa chaahuicabe lá Jiobá biaʼ gadxe mil biaje ra cá ni lu ca rollo ni maʼ nayooxhoʼ, ne ñee yaza riʼ zeeda ti ejemplu (Salmo 83:18). Nabé nayecheʼ runi sentir binni ora ruundaʼ Biblia riʼ, purtiʼ nayá modo rusiéneni xi riníʼ ique Dios ne para gúcani zacá biquiiñeʼ stale iza para guihuinni xi guicá luni. Pa napuʼ Biblia riʼ lu stiidxaluʼ o pa qué gapuʼ ni la? rinábadu lii guiaaluʼ gúʼndaluʼ Stiidxaʼ Jiobá guiráʼ dxi (Josué 1:8; Salmo 1:2, 3).

• Xiñee bidúʼyadu caquiiñeʼ gutiixhidu ti Biblia.

• Xi caquiiñeʼ guiaa ti binni guni guiráʼ dxi pa riuulaʼdxiʼ ganna xi racalaʼdxiʼ Dios.