1. Xii nga ni jma feu biʼniʼ Pedru lu xquendanabani.

QUÉ ziuu dxi gusiaandaʼ Pedru modo biiyadxí Jesús laa. Ñee bisihuinni Jesús qué ñuni Pedru ni cabeza o casi ora cuchani lube pur modo biiyadxí laabe la? Qué gánnadinu pa zacá gúcani, purtiʼ ndisi nga ni cuzeeteʼ relatu ca: «Bidxigueta lú Señor biiya dxí laabe» (Luc. 22:61). Peru né modo si biiyadxí Jesús laabe que biénebe pabiáʼ feu ngue modo bicheebe. Cásipeʼ guca ni maca bizeeteʼ Jesús que: guníʼ Pedru qué runibiáʼ Maestru ni jma nadxii, laa ndaʼ guníʼ qué ziuu dxi gúnini. Zándaca ora guniʼbe qué runibiaʼbe Jesús que nga ti cosa ni jma feu bíʼnibe lu xquendanabánibe. Yanna huaxa gudidisú Pedru né ni biʼniʼ riʼ.

2. Xi ti cosa nabé risaca biziidiʼ Pedru, ne ximodo zanda gacané ejemplu stibe laanu.

² Ñee rusihuinni ni biʼniʼ Pedru ca maʼ qué ziuuruʼ dxi guni ni jneza la? Coʼ, cadi zacá diʼ ni. Cumu gúcabe ti hombre ni napa fe la? despué bisihuínnibe dxandíʼ zanda gúnibe ni jneza sti biaje. Gunda biʼniʼ chaahuibe ca cosa ni qué ñúnibe jneza ne bisiidiʼ Jesús laabe naquiiñeʼ guni perdonarbe. Laanu laaca naquiiñeʼ guiénenu pabiáʼ risaca gúninu zacá, ne zanda guizíʼdinu stale de yuubaʼ ni biʼniʼ sentir Pedru ora bichee.

3, 4. 1) Xi gunabadiidxaʼ Pedru Jesús, ne xi zándaca guníʼ ique Pedru. 2) Ximodo bisiene Jesús Pedru riníʼ íqueruʼ casi ca binni ni bibani tiempu que.

³ Guininu xi bizaaca biaʼ xhoopaʼ beeu ante gaca ni bizéʼtenu riʼ. Dxi nuucabe Capernaum, xquidxi Pedru, gunabadiidxabe Jesús: «Señor, panda tiru gune perdonar ti hermanu ni uchee ne naa. Ñee biaʼ gadxe la?». Zándaca guníʼ ique Pedru cayaca nachaʼhuiʼ ngue ora guníʼ biaʼ que, purtiʼ ca xaíque ni rusiidiʼ ndaaniʼ ca yuʼduʼ que riniʼcaʼ chonna si biaje nga naquiiñeʼ guni perdonar binni. Nabé bidxagayaa Pedru ora bicabi Jesús laa: «Cadi gadxe si, sínuque setenta [ne] gadxe» (Mat. 18:21, 22).

⁴ Né ca diidxaʼ guníʼ Jesús riʼ, ñee caniʼbe naquiiñeʼ ugabaʼ binni panda biaje gucheené tuuxa laa la? Coʼ, cadi nga diʼ nga gucaláʼdxibe  guiniʼbe. Ra bichaa Jesús 7 ni guníʼ Pedru que pur 77 la? cusiidibe ora dxandíʼ nadxii tuuxa, cadi naquiiñeʼ diʼ quixheʼ panda si biaje nga zanda guni perdonar (1 Cor. 13:4, 5). Rapa Jesús gana gudii Pedru cuenta riníʼ íqueruʼ casi ca binni ni qué riaʼ ni nabani tiempu que. Ca binni que rugábacaʼ panda biaje runi perdonarcaʼ stobi casi ora ñápacaʼ ti libreta ra nucaacaʼ guiráʼ ni nuzaabiʼ binni laacaʼ. Peru ca binni ni runi casi runi Dios, naquiiñeʼ gácacaʼ nachaʼhuiʼ ora gutiidiláʼdxicaʼ donda (biindaʼ 1 Juan 1:7-9).

5. Pora nga rudiʼnu cuenta pabiáʼ risaca guni perdonar binni.

⁵ Qué niníʼ diʼ Pedru cadi jneza ngue ni guníʼ Jesús. Peru ñee yendá ca diidxaʼ ni guníʼ Maestru stibe que ndaaniʼ ladxidoʼbe la? Nuu tiru, ora caquiiñenu guni perdonárcabe laanu, óraca nga rudiʼnu cuenta pabiáʼ risaca guni perdonar binni. Ngapeʼ nga ni bizaaca ante gatiʼ Jesús. Lu ca hora jma nagana que nga biiyaʼ Pedru pabiáʼ caquiiñeʼ guni perdonar Jesús laa.

6. Xi biʼniʼ Pedru ora gucalaʼdxiʼ Jesús nusiidiʼ ca apóstol stiʼ cadi naquiiñeʼ gudxiibacaʼ laca laacaʼ, ne ximodo guniʼné Jesús Pedru.

⁶ Gueelaʼ chiguzéʼtenu riʼ nga ni jma risaca, purtiʼ laani nga últimu gueelaʼ bibani Jesús ndaaniʼ Guidxilayú riʼ. Peru náparube stale cosa ni gusiidibe ca apóstol stibe. Tobi de laacani nga gánnacaʼ cadi naquiiñeʼ gudxiibacaʼ laca laacaʼ. Ximodo bíʼnibe ni yaʼ. Bíʼnibe ni ora gudiibibe ñeecaʼ, ne ngue nga ti dxiiñaʼ ni runi ca mozo ni huaxiéʼ risaca. Primé la? qué ñuulaʼdxiʼ Pedru ni cayuni Jesús que. Despué qué ninádibe niguiibiʼ Jesús ñeebe, peru ora bisiene Jesús laabe xiñee cayuni ni la? gunábabe laa quiʼbiʼ nabe ne íquebe. Qué nidxiichi Jesús óraque, sínuque né diidxaʼ nadóʼ bisiene ca apóstol stiʼ xiñee runi ca cosa que ne pabiáʼ risaca cani (Juan 13:1-17).

7, 8. 1) Xi sti cosa biʼniʼ Pedru para guihuinni pa qué zará paciencia stiʼ Jesús. 2) Ximodo bisihuinni Jesús biaʼ Pedru ne biene laabe.

⁷ Qué nindaa de ngue biʼniʼ Pedru sti cosa ra zahuinni pa qué zará paciencia stiʼ Jesús. Bizulú gudindediidxaʼ ca apóstol que ne caniʼcaʼ tuu nga jma risaca ládecaʼ. Zándaca dede né Pedru guyuu ra gudindediidxaʼ ca apóstol que, nanna ndacaʼ cadi jneza ni. Neca zaqué, né diidxaʼ nadóʼ bidii Jesús conseju laacabe ne dede gudxi laacabe riuulaʼdxiʼ ca cosa galán rúnicabe, tobi de laacani nga cadi caxélecabe de laa. Peru laaca gudxi laacabe qué zandaa zusaanacabe laa. Oraqueca bicabi Pedru Maestru stiʼ ne gudxi laabe qué ziuu dxi gusaana laabe ne dede zudii xquendanabani pur laabe. Peru Jesús gudxi laabe gadxé ni zúnibe: gueelaʼ queca, ante guʼndaʼ ti gallu chupa biaje, zaníʼ Pedru qué runibiáʼ laabe chonna biaje. Nagueendaca bicabi Pedru ne guníʼ cadi jneza ngue ni na Jesús, ne cadi ngasi nga ni bíʼnibe, sínuque laaca bichabe bi yánnibe ne guniʼbe qué zusaanadibe Jesús neca xcaadxi que gusaana laa (Mat. 26:31-35; Mar. 14:27-31; Luc. 22:24-28; Juan 13:36-38).

 ⁸ Guizáʼ ridxagayaanu gánnanu qué liica nidxiichi Jesús pur cani guníʼ Pedru que. Stale cosa ngue ni maʼ biʼniʼ ca apóstol que, peru qué nusaana Jesús de ñuuyaʼ ca cosa galán rúnicabe neca binni ruchee laacabe. Nánnabe zucheené Pedru laabe, neca zaqué gúdxibe laa: «Ma unaba lu Dios pur lii cadi guiaadxa fe lii. Ne ora ma biasa lu sti tiru la? ucané ca hermanu stiuʼ uzuhuaa chaahui caʼ» (Luc. 22:32). Nanna Jesús zanda guiasa Pedru ne zuni xhiiñabe sti biaje. ¡Guizáʼ galán nga gánnanu biaʼ Jesús Pedru ne biénebe laa!

9, 10. 1) Xiñee caquiiñeʼ uguu jneza Jesús Pedru ora nuucabe ndaaniʼ jardín ni nuu Getsemaní. 2) Xi rusihuinni cani biʼniʼ Pedru.

⁹ Despué, ora nuucabe ndaaniʼ jardín ni nuu Getsemaní, laaca guluu jneza Jesús Pedru stale biaje. Nabé naná yuubaʼ nuu ladxidóʼ Jesús óraque ne caquiiñeʼ gacané ca xhamigu laa. Ngue runi gunábabe Pedru, Santiago ne Juan gatanacaʼ laga ziguni orarbe, peru cada biaje guibiguétabe ra nuucaʼ nisiaasicaʼ. Neca zaqué, biʼniʼ perdonar Jesús laacabe ne gudxi laacabe né diidxaʼ nadóʼ: «Ndaani ladxidóʼ to racalaʼdxi tu guni tu jneza, peru cuerpu stitu, nagueenda riguudxi» (Mar. 14:32-41).

¹⁰ Cadi xadxí de ngue, málasi biuu jma binni naaze antorcha, espada ne palu. Yanna nga ora jma caquiiñeʼ gúnicabe ca cosa ca né guendabiaaniʼ. Peru xi biʼniʼ Pedru óraque yaʼ. Oraqueca guxha espada stiʼ ne bigá diaga Malco, esclavu stiʼ xaíque ca sacerdote. Peru laaca qué nidxiichi Jesús óraque, sínuque né diidxaʼ nadóʼ gúdxibe Pedru cadi jneza ni biʼniʼ ne bisiándabe diaga hombre que. Laaca gúdxibe ca discípulo stibe cadi galán diʼ tíndecaʼ, ne ngaca nga ni runi ca xpínnibe dede yanna (Mat. 26:47-55; Luc. 22:47-51; Juan 18:10, 11). ¡Maʼ stálepeʼ nga ni biʼniʼ Pedru, peru qué nusirádibe paciencia stiʼ Maestru stibe! Cani biʼniʼ apóstol riʼ rusihuínnicani guiráʼ ora rucheʼnu (biindaʼ Santiago 3:2). Ñee nuu tuuxa ndaaniʼ Guidxilayú riʼ ni cadi caquiiñeʼ guinabaʼ guni perdonar Dios laa guiráʼ dxi la? Peru nuuruʼ sti cosa ni chiguizaaca Pedru gueelaʼ que, ne laani nga ni jma feu bíʼnibe.

11, 12. 1) Xiñee zanda guininu guca Pedru nadxibalú ora gunaazecabe Jesús. 2) Xiñee zanda guininu qué ñuni Pedru ni maca guníʼ que.

¹¹ Gudxi Jesús ca binni que gudiicaʼ lugar cheʼ ca apóstol stiʼ, purtiʼ nanna laa nga ziyúbicabe. Cumu qué ñanda ñuni Pedru gastiʼ para cadi niné ca binni que Maestru stiʼ la? bixhooñelú cásica biʼniʼ xcaadxi apóstol que.

¹² Gupa si ratu de ngue, gulezadxí Pedru ne Juan. Zándaca yendácabe gaxha de ralidxi Anás, ni guca xaíque stiʼ ca sacerdote. Cumu raqué nga yenécabe Jesús primé para guni juzgárcabe laa la? ngue runi, guyécabe raqué. Ora yenécabe Jesús sti lugar la? yenándaruʼ Pedru ne Juan laabe peru «zitu zitu» (Mat. 26:58; Juan 18:12, 13). Qué zanda diʼ guininu bidxibi Pedru. Gúcabe ti hombre nadxibalú, ngue runi  yenándabe ca binni naazeʼ guiibaʼ que. Ne cadi guiaandaʼ laanu maʼ bininabe tobi de laacaʼ. Neca zacá, cadi ladxa guniʼbe qué zusaanabe Jesús la? Dede guniʼbe zudiibe xquendanabánibe pur laa (Mar. 14:31).

13. Ximodo nga jma jneza chinándanu Cristu.

¹³ Ca dxi stinu riʼ, stale binni zinanda Cristu, peru casi ñaca rúnicabe ni «zitu zitu», cásica biʼniʼ Pedru; qué rinácabe ganna binni pa cayúnicabe ni. Peru casi bicaa Pedru despué, para chinándanu Cristu jneza la? naquiiñeʼ chuʼnu gaxha de laa, gúninu casi biʼniʼ, ne cadi guidxíbinu ora guiníʼ íquenu xi gueeda guizaacanu pur laabe (biindaʼ 1 Pedro 2:21).

14. Paraa biaana Pedru gueelaʼ cayuni juzgárcabe Jesús.

¹⁴ Né stale cuidadu zizá Pedru dede yendá ralidxi Caifás, ti hombre ricu ni nabé risaca ne naca xaíque stiʼ ca sacerdote. Lidxi hombre que nga tobi de ca yoo jma naroʼbaʼ ne sicarú ni guyuu Jerusalén. Ca clase yoo riʼ rápacani ti patiu dentru ne ti puertaʼ frente de laacani. Ora yendá Pedru ra puertaʼ yoo riʼ, gunaa ni cayapa ra puertaʼ riʼ qué niná diʼ ñuube. Peru cumu Juan runibiáʼ sacerdote gola que ne maʼ nuu ndaaniʼ yoo que la? bibiguetaʼ para guniʼné gunaa que, zaqué nga para gunda biuu Pedru. Zándaca bixeleʼ Pedru de Juan ne qué liica nuyubi modo ñuu ndaaniʼ yoo que, gaxha de Maestru stiʼ. Ngue runi, biaanabe lu patiu ra biʼniʼ caadxi esclavu ne mozo ti guí para guidxaacaʼ, laga riuu riree binni ni beeda para guindisaʼ falsu luguiáʼ Jesús ndaaniʼ yoo que (Mar. 14:54-57; Juan 18:15, 16, 18).

15, 16. Ximodo guca ni maca gudxi Jesús Pedru.

¹⁵ Cumu nuu Pedru gaxha de guí que la? binibiáʼ baʼdudxaapaʼ ni bidii lugar guyuube que laabe. Binibiaʼbe Pedru ne gúdxibe laa: «Lii laca xpinni Jesús de Galilea lii». Qué liica niníʼ íquebe pa ninabadiidxaʼ gunaa que ndiʼ laabe. Guniʼbe qué runibiaʼbe Jesús ne dede guniʼbe qué gánnabe xi caníʼ baʼdudxaapaʼ que. Óraque guyebe neza ra puertaʼ que, para cadi gúʼyacabe laabe. Peru biiyaʼ sti baʼdudxaapaʼ laabe raqué ne guníʼ: «Ndi laca xpinni Jesús de Nazaret laa». Pedru bicabi: «Qué runebiaʼya diaʼ hombre ca» (Mat. 26:69-72; Mar. 14:66-68). Maʼ ne ndiʼ nga guiropa biaje guiníʼ Pedru qué runibiáʼ Jesús. Zándaca guiropa biaje guniʼbe qué runibiaʼbe Jesús binadiágabe biindaʼ ti gallu; peru cumu jma nuube xizaa pur cadi gúʼyacabe laabe la? qué ñetenaláʼdxibe ni guníʼ Jesús chupa chonna hora ante.

¹⁶ Pedru cuyúbiruʼ xi guni para cadi gunibiáʼ ca binni que laa, peru málasi bidxiña ti grupu de binni laabe. Tobi de ca binni que nga binnilidxi Malco, esclavu ni bininabe que. Hombre que gudxi laabe: «Ñee cadi ne lii biiya nuu neu laabe ra leʼ olivo que la?». Gucalaʼdxiʼ Pedru nusihuinni cusiguii guiráʼ ca binni que; ne dede ró yu na dxandíʼ ni caníʼ, ¡ne gunidé Dios laa na pa cusiguii! Ndiʼ nga guionna biaje guiniʼbe qué runibiaʼbe Maestru stibe ne biluxe guníʼsibe ca diidxaʼ riʼ, biindaʼ ti gallu, ndiʼ nga guiropa biaje gunadiaga Pedru guʼndaʼ gallu gueelaʼ que (Juan 18:26, 27; Mar. 14:71, 72).

17, 18. 1) Xi biʼniʼ Pedru ora bidii cuenta pabiáʼ feu ngue ni biʼniʼ. 2) Xi zándaca guníʼ ique Pedru óraque.

 ¹⁷ Oraquepeʼ guleelú Jesús lu balcón ni nuu neza ranuu patiu que ne biiyadxibe xhamígube ne laa biiyaʼ laabe, casi guninu ra bizulú capítulo riʼ. Yánnaruʼ bidii Pedru cuenta pabiáʼ feu ngue ni biʼniʼ. ¡Bicheené Maestru stiʼ! Cumu guizáʼ naná yuubaʼ nuu ladxidoʼbe la? bireebe de raqué. Qué liica gánnabe paneza zebe ora zizabe ndaaniʼ ca calle ra maʼ biaʼ rihuinni si xtuxhu beeu ni cayuni llena que, purtiʼ mayaca guiaaziʼ ni. Dede maʼ qué ganda sabe, purtiʼ guizáʼ maʼ daʼ nisa lube. De raqué, maʼ qué ñanda ñuni huantarbe ne bizulú biinabe dede guyuu yuubaʼ ladxidoʼbe (Mar. 14:72; Luc. 22:61, 62).

¹⁸ Ora guchee tuuxa casi modo bichee Pedru riʼ, zándaca nagueenda guiníʼ íquenu qué zanda diʼ gaca perdonar binni ca. Nanna dxíchinu zacaca nga guníʼ ique Pedru. Ñee zuni perdonar Maestru stibe laabe la?

19. Xi biʼniʼ sentir Pedru pur ni biʼniʼ, peru xiñee nánnanu qué niníʼ íquebe maʼ qué zanda gaca chaahuiʼ guiráʼ ni maʼ bíʼnibe.

¹⁹ Qué zanda diʼ guxuíʼlunu xi guiráʼ biʼniʼ sentir Pedru birá si gueelaʼ ne guidubi dxi que. ¡Nanna pabiáʼ guníʼ ique Pedru napa donda ora gunna guiráʼ yuubaʼ gudiʼdiʼ Jesús para guti yaʼ! ¡Guizáʼ biuubaʼ ladxidoʼbe ora bietenaláʼdxibe jma bininabe Maestru stibe últimu dxi bibani ndaaniʼ Guidxilayú riʼ! Nánnanu gucadé ladxidóʼ Pedru, peru cadi pur ngue niníʼ ique maʼ qué zanda gaca chaahuiʼ guiráʼ ni maʼ biʼniʼ. Relatu ca na nagueendaca bizulú bidagulisaanebe ca discípulo (Luc. 24:33). Zándaca guirácabe caníʼcabe xiñee bisaanácabe Jesús gueelaʼ jma nagana gudiʼdiʼ que, peru ora guyuucabe juntu la? gulusaacabe gana laacabe.

20. Xi rizíʼdinu de Pedru pur ni gudixhe ique guni.

²⁰ Zanda guininu ndiʼ nga tobi de ca cosa jma risaca biʼniʼ Pedru lu xquendanabani. Ora ti xpinni Cristu gucheené Dios, zeeda gácani casi ora ñaba tuuxa. Cadi naquiiñeʼ diʼ guiníʼ ique pabiáʼ naná modo biaba, sínuque zucaa ique guiasa nagueendaca. Ngaca nga ni naquiiñeʼ guni binni ora maʼ bicheené Dios, naquiiñeʼ gucaa ique guiasa para guni chaahuiʼ ra bichee (biindaʼ Proverbios 24:16). Pedru bisihuinni dxandíʼ napa fe ora gudixhe ique guidagulisaané ca xpinni Cristu neca nuu triste. Ora nuunu triste ne cuchiiñaʼ xquendabiaaninu laanu pur xiixa ni bíninu la? zándaca jma ziuuláʼdxinu chuʼnu stúbinu, peru cadi jneza diʼ gúninu zacá (Prov. 18:1). Ni jma jneza  gúninu nga chuʼnu gaxha de ca binni ridagulisaa, ti ganda gápanu stipa ni caquiiñenu para cadi gusaana de gúninu ni na Dios (Heb. 10:24, 25).

21. Xi gunna Pedru ora nuu lade ca xpinni Cristu.

²¹ Cumu nuu Pedru lade ca xpinni Cristu la? ngue runi gúnnabe ti cosa ni nabé bidxagayaabe: ¡maʼ gastiʼ cuerpu stiʼ Jesús ra bicaachicabe laa, neca deʼguʼ dxiichi ruaa baʼ que! Oraqueca biree guxooñeʼ Pedru ne Juan zecaʼ ra baʼ que. Cumu jma nahuiiniʼ Juan la? yendá primé. Peru ora biʼyaʼ zuxeleʼ baʼ que, qué niná ñuu ndaaniʼ ni. Peru Pedru, neca maʼ apena cacaa bi, qué nibezadxí ne casi zeʼ biuu. Óraque biiyabe guirutiʼ nuu ndaaniʼ baʼ que (Juan 20:3-9).

22. Ximodo gunna Pedru dxandíʼ maʼ biasa Jesús lade gueʼtuʼ ne maʼ qué liica ñuuruʼ triste.

²² Primé que la? qué ñuni cré Pedru pa dxandíʼ maʼ biasa Jesús lade gueʼtuʼ. Laaca qué ñuni crebe ora gudxi ca gunaa que ca discípulo stiʼ Cristu biiyacaʼ caadxi ángel ni gudxi laacaʼ maʼ biasa Jesús lade gueʼtuʼ (Luc. 23:55–24:11). Peru ra biluxe dxi que maʼ gúnnabe dxandíʼ guiráʼ ni guníʼ ca gunaa que ne maʼ qué liica ñuurube triste. Xiñee yaʼ. Purtiʼ ¡maʼ nabani Jesús! Yanna maʼ nácabe ti espíritu ni napa poder, ne maʼ guyebe ranuu ca apóstol stibe. Peru ante la? bíʼnibe ti cosa nabé risaca. Xi laani yaʼ. Relatu ni zeeda lu Biblia na dxi que ca apóstol que guniʼcaʼ: «Dxandí bibani Señor. Ma biiya Simón laabe» (Luc. 24:34). Simón nga sti lá napa Pedru. Despué, apóstol Pablu laaca bicaa ni biʼniʼ Jesús dxi que, laa guníʼ: «Uyé be ra nuu Pedru ne laca uyé be ra nuu irá ca apóstol» (1 Cor. 15:5). Ca relatu riʼ rusihuínnicani nabé risaca ni bizaaca dxi riʼ lu xquendanabani Pedru: dxi que laga nuube stúbibe, guyé Jesús ra nuube.

23. Xiñee naquiiñeʼ guietenalaʼdxiʼ ti xpinni Cristu ni maʼ bichee ejemplu stiʼ Pedru.

²³ Biblia qué riníʼ diʼ xi guiráʼ guca ora biʼyaʼ Pedru Jesús. Peru zanda guxuíʼlunu pabiáʼ biéchebe ora bíʼyabe maʼ nabani Maestru stibe, ne gunda gúdxibe laa pabiáʼ triste nuube ne maʼ guca arrepentirbe pur ni bíʼnibe. Ni jma gucuá íquebe óraque nga guni perdonar Jesús laabe. Ne nánnanu dxandíʼ biʼniʼ perdonar Jesús laabe de guidubi ladxidóʼ. Ca dxi stinu riʼ, ora guchee ti xpinni Cristu, naquiiñeʼ guietenalaʼdxiʼ ejemplu stiʼ Pedru ne qué chuʼ dxi guiníʼ ique qué zuni perdonar Dios laa. Cadi guiaandaʼ laanu bisihuinni Jesús ximódopeʼ nga Bixhoze, ti «Dios ni rutiidilaʼdxiʼ stonda binni» (Is. 55:7).

24, 25. 1) Ñee gunaazeʼ Pedru benda gueelaʼ que la? 2) Xi biʼniʼ Pedru ora biʼyaʼ milagru ni biʼniʼ Jesús ra zirá gueelaʼ.

²⁴ Jesús gudxi ca apóstol stiʼ checaʼ Galilea, raqué gúʼyacabe laabe sti biaje. Ora yendácabe raqué, guníʼ Pedru cheʼ guuzeʼ ne yené xcaadxi  discípulo laabe. Yanna maʼ nuu Pedru lu nisadóʼ que sti biaje, ne lugar que nga ra maca xadxí huayúnibe dxiiñaʼ. Ora binadiágabe modo caxidxi canuá que, ora bíʼyabe ca ola que ne ora biʼniʼ sentirbe nanaa ca chín que, bisietenaláʼdxicani laabe dxiiñaʼ ni maca huayúnibe. Peru neca bíʼnicabe stale dxiiñaʼ guidubi gueelaʼ, gastiʼ qué ninaazecabe (Mat. 26:32; Juan 21:1-3).

²⁵ Ra maʼ zedará gueelaʼ, binadiágacabe gudxi tuuxa ni nuu dede guriá nisa que laacabe gusábacabe ca chín que sti ladu canuá que. Bíʼnicabe ni, ¡ne gunaazecabe 153 benda! Ora binibiáʼ Pedru tuu ngue guniʼné laacaʼ, nagueendaca biaba ndaaniʼ nisa que ne bixuubaʼ dede  yendá guriá. Guriá nisadóʼ que bidii Jesús laacabe benda ni bigaaguiʼ lu buu para gócabe. Óraque biiyadxibe Pedru (Juan 21:4-14).

26, 27. 1) Xi gudxi Jesús Pedru guni chonna biaje. 2) Ximodo bisihuinni Jesús dxandíʼ biʼniʼ perdonar Pedru.

²⁶ Biluiʼnáʼ Jesús guiráʼ ca benda ni gunaazecabe que ne gunabadiidxaʼ laabe: «Nadxiiu naa jma que irá xixé [ndiʼ] la?». Ñee zusihuinni Pedru jma riuulaʼdxiʼ guni guuzeʼ que gannaxhii Jesús la? Raca chupa chonna gubidxa nga de guniʼbe qué runibiaʼbe Jesús chonna biaje. Cumu chonna biaje ngue guníʼ Pedru zaqué la? ngue runi, rapa Jesús gana guiniʼbe laaca chonna biaje pabiáʼ nadxiibe laa nezalú ca xcompañérube, ne zaqué biʼniʼ Pedru ni. Óraque gunabaʼ Maestru stibe laabe gusihuínnibe ni. Ximodo yaʼ. Ra guni adorarbe Dios primé lu xquendanabánibe, ne zusihuínnibe ni ra gápabe ca dendxuʼ stiʼ Cristu, o guquídxibe fe stiʼ ca bíʼchibe ne ca bizáʼnabe ni naca xpinni Cristu (Luc. 22:32; Juan 21:15-17).

²⁷ Zacá nga gucané Jesús Pedru guiene risácaruʼ para laabe ne para Bixhózebe, ne zaquiiñeʼ Cristu laabe para gacanebe ca binni ridagulisaa. ¡Rihuínnica dxandíʼ guca perdonarbe! Pur modo bilaselaʼdxiʼ Jesús Pedru, bicaani laa gannaxhii laabe de guidubi ladxidóʼ.

28. Ximodo bisihuinni Pedru beeda gaca casi ti guié.

²⁸ Stale iza biʼniʼ Pedru dxiiñaʼ ni bisaanané Jesús laa. Guluube gana ca xpinni, casi maca gudxi ni laabe ra mayaca gatiʼ. Gunnaxhiibe ca dendxuʼ stiʼ Cristu ne gúcabe nachaʼhuiʼ ora gúpabe laacaʼ. Pedru nga lá ni bidii Jesús Simón, ni riníʼ labe ca nga guié. Ne dxandíʼ beeda gácabe casi ti guié, purtiʼ gúcabe ti hombre nadipaʼ, naguidxi ne gunda biʼniʼ cré ca binni ridagulisaa laabe. Ne zacá rihuínnini lu guiropaʼ carta ni bicaabe, ne laacani nuucani lu Biblia. Ca carta ca rusihuínnicani qué ñuu dxi ñaandaʼ Pedru bisiidiʼ Jesús laa naquiiñeʼ guni perdonar (biindaʼ 1 Pedro 3:8, 9; 4:8).

29. Ximodo zanda gusihuínninu nápanu fe casi gupa Pedru ne rilaseláʼdxinu binni casi biʼniʼ Maestru stiʼ.

²⁹ ¡Aque galán nga guizíʼdinu ni biziidiʼ Pedru ca! Ñee rinábanu Dios guni perdonar laanu guiráʼ dxi pur ca cosa ni qué rúninu jneza la? Ñee runi crenu runi perdonar Dios laanu ne rusiaandaʼ cani qué ñúninu jneza la? Yanna laanu, ñee runi perdonarnu xcaadxi binni la? Pa gúninu zacá, zusihuínninu nápanu fe casi gupa Pedru ne rilaseláʼdxinu binni casi biʼniʼ Maestru stibe.