Guca Rebeca ti gunaa ni nabé gunnaxhii Jiobá. Isaac, xheelabe, laaca nabé gunnaxhii Jiobá. Lu historia riʼ zazíʼdinu ximodo beeda gacabiáʼcabe ne xiñee bisiecheʼ Rebeca ladxidóʼ Jiobá.

Bixhoze Isaac biree lá Abrahán ne jñaa biree lá Sara. Ni racalaʼdxiʼ Abrahán nga guichaganáʼ xiiñiʼ ti gunaa ni nadxii Jiobá. Peru laacabe nabézacabe Canaán, ti guidxi ra qué runi adorar binni Jiobá. Ngue runi, biseendaʼ Abrahán tobi de ca mozo stiʼ (zándaca Eliezer) Harán. Xiñee biseendabe hombre riʼ Harán yaʼ. Purtiʼ raqué nabeza caadxi binnilídxibe ne raqué nga zanda guidxela Eliezer ti gunaa nachaʼhuiʼ guichaganáʼ Isaac.

Biʼniʼ Eliezer ne xcaadxi mozo stiʼ Abrahán ti viaje nabé zitu. Yenécabe 10 camellu nuaʼ guendaró ne xcaadxi cosa ni gusigáʼdecabe. Peru, ximodo guidxela Eliezer tu guichaganáʼ Isaac yaʼ. Laabe nánnabe nuu ti bizé ra ricaa ca gunaa de guidxi que nisa. Ngue runi, guyécabe ra bizé que ora yendácabe Harán. Óraque biʼniʼ orarbe Jiobá ne gúdxibe laa: «Chinabaʼ ti baʼdudxaapaʼ gudii nisa gueeʼ. Pa gudiibe nisa gueeʼ ne laaca gudiibe ni gueʼ ca camellu stinneʼ la? laabe nga gunaa ni maʼ guliluʼ».

Oraquepeʼ bedandá Rebeca ra bizé que. Biblia na guizáʼ sicarú baʼdudxaapaʼ   riʼ. Para gunabaʼ Eliezer laabe caadxi nisa, ne laabe bicábibe laa: «Né stale guendanayecheʼ zudieeʼ nisa gueluʼ ne ni gueʼ ca camellu stiluʼ». Cumu ziáʼ nisa reʼ camellu la? ziáʼ nisa gulee Rebeca ndaaniʼ bizé que. ¡Gupa xidé guyebe ne beedabe stale biaje ra bizé que! Biiyaʼ dibuju cá lu yaza gudídinu ca. Ñee maʼ biiyuʼ xi cayuni Rebeca la?... Nabé bidxagayaa Eliezer ora biʼyaʼ modo cayúnibe dxiiñaʼ: ¡Zaqué nga bicabi Jiobá oración biʼniʼ Eliezer!

Bisigaʼdeʼ Eliezer stale cosa sicarú Rebeca, ne biʼniʼ invitar baʼdudxaapaʼ riʼ laabe ne xcaadxi mozo que chécabe ra nabezané binnilidxi. Bisiene Eliezer laacabe xiñee biseendaʼ Abrahán laa Harán. Laaca byuiʼné laacabe ximodo bicabi Jiobá oración stiʼ. Nabé biecheʼ binnilidxi Rebeca ora gunna xi nabe. Gúdxicabe Eliezer: «Zaa guichaganabe Isaac».

Ñee zaná Rebeca guichaganáʼ Isaac la?... Ora gunabadiidxaʼ binnilídxibe laabe pa zachaganabe Isaac la? guniʼbe zachaganabe laa. Xiñee bicabi Rebeca zaqué yaʼ. Purtiʼ nánnabe Jiobá biseendaʼ Eliezer. Ngue runi yenebe laa Canaán ne bichaganabe Isaac yendásicabe raqué.

Cumu bizuubaʼ Rebeca stiidxaʼ Jiobá la? ngue runi guizáʼ gupa Jiobá laa. Ne cadi ngasi, gudiʼdiʼ si iza beeda gale Jesús lade familia stibe. Nga runi, pa guzuubaluʼ diidxaʼ casi biʼniʼ Rebeca la? laaca zapa Jiobá lii. Ne laaca zusiécheluʼ ladxidoʼbe.