Biiyaʼ baʼduhuiiniʼ cá lu dibuju riʼ. Cadi dxandíʼ rihuinni cadxíbibe ne nuube stúbibe la? Lii yaʼ, ñee huayuu dxi guidxíbiluʼ la?... Guiranu nga huadxíbinu. Lu Biblia rieeteʼ guyuu xpinni Dios ni bidxibi ne biʼniʼ sentir nuu stubi neca nadxii Jiobá. Tobi de laacabe nga Elías. Guidúʼyanu xi bizaacabe.

Maʼ xadxí guleza Elías ndaaniʼ guidxi Israel, guca nga stale iza ante gale Jesús. Tiempu que gupa Israel ti rey ni láʼ Acab. Laabe ne xheelabe, Jezabel, cadi nadxiicabe Jiobá, Dios ni dxandíʼ, sínuque runi adorárcabe Baal, ti dios ni cadi dxandíʼ. Nga runi, stale de ca binni nabeza Israel laaca biʼniʼ adorarcaʼ Baal. Nabé qué iquiiñeʼ guca reina Jezabel ne gucalaʼdxiʼ ñuuti guiráʼ binni ni ruzuubaʼ stiidxaʼ Jiobá. Ne cumu runi Elías ni na Jiobá la? laaca nuube guutibe laa. Xi guni Elías yaʼ. Lii yaʼ, xi ñuʼnuʼ...

 ¡Zítupeʼ ra guyé Elías! Bixooñelube dede yendabe lu ti desiertu ne bicaachilube ndaaniʼ ti cueva. Xiñee bicaachilube yaʼ... Purtiʼ cadxíbibe. Peru cadi naquiiñeʼ nidxibi Elías. Xiñee yaʼ. Laabe nánnabe zacané Dios laabe. Ne maca huayacané laabe ante. Casi ti biaje la? biʼniʼ Elías ti oración ne bicabi Dios laa ora bisaba gui de guibáʼ. Cadi dxandíʼ napa Jiobá stale poder la? Napa pue. ¡Ñanda ñuni cré Elías zacanebe laa!

Dxi nuu Elías ndaaniʼ cueva que gunabadiidxaʼ Jiobá laa: «Xiñee nuuluʼ raríʼ». Óraque bicabi Elías laabe: «Dxiqué nuuruʼ binni ruzuubaʼ stiidxaluʼ, peru yanna maʼ naasiaʼ nuaaʼ. Ne cadxibeʼ guuticabe naa casi biiticabe xcaadxi xpínniluʼ». Guníʼ íquebe maʼ biiticabe guiráʼ binni runi ni na Dios. Peru gudxi Jiobá laabe: «Cadi stúbiluʼ nuuluʼ. Nuu xcadxe mil binni ni qué huasaana de guni adorar naa. Cadi guidxíbiluʼ, purtiʼ napaʼ ti dxiiñaʼ guʼnuʼ». Ximodo raʼbuʼ biʼniʼ sentir Elías ora gudxi Dios laa ca diidxaʼ riʼ yaʼ... ¡Nanna dxíchinu guyuube nayecheʼ!

Yanna, guníʼ ique ni bizaaca Elías. Xi rusiidini laanu... Nuu tiru zuni sentirluʼ nuuluʼ stúbiluʼ o zadxíbiluʼ. Peru ora guni sentirluʼ zacá, guníʼ ique cadi stúbiluʼ nuuluʼ, nápaluʼ ca xhamíguluʼ ni nadxii Jiobá ne laaca nadxiicaʼ lii. Ne cadi guiaandaʼ lii napa Jiobá stale poder ne qué zusaana de gacané lii. Cadi dxandíʼ galán gánnanu nga la?...