BIBANI profeta Daniel jma de gaayuʼ gayuaa iza ante gale Jesús. Peru Jiobá maca guníʼ ximodo gánnacabe padxí maʼ gúnibe Jesús Mesías, o Cristu. Gudxi Jiobá Daniel: «Naquiiñeʼ gánnaluʼ ne guiéneluʼ, dede dxi guiree diidxaʼ para gaca chaahuiʼ ne cuí Jerusalén sti biaje dede dxi gueeda Mesías Xaíque que, zadiʼdiʼ 7 semana, ne laaca zadiʼdiʼ 62 semana» (Daniel 9:25).

 Guidúʼyanu ximodo gúnnacabe padxí guihuinni Mesías que. Primé la? naquiiñeʼ gánnanu padxí nga ruzulú rigabaʼ tiempu ni naquiiñeʼ tiidiʼ dede dxi guedandabe. Daniel na ruzulú ni «dxi guiree diidxaʼ para gaca chaahuiʼ ne cuí Jerusalén sti biaje». Padxí nga biree diidxaʼ ca yaʼ. Nehemías, sti hombre bicaa Biblia, na dxi ca nga biʼniʼ mandárcabe gaca lindaa stiʼ Jerusalén sti biaje ne guca ni lu iza gande stiʼ rey Artajerjes (Nehemías 2:1, 5-8). Stale historiador nacaʼ primé iza de cayuni mandar rey Artajerjes que bizaa ni lu iza 474 ante gueeda Jesús (a.J.). Pa cueenu cuenta la? zadúʼyanu maʼ napa Artajerjes gande iza de cayuni mandar lu iza 455 a.J. Nga  runi, ca diidxaʼ guníʼ Daniel de Mesías que bizulú guca cani lu iza 455 a.J.

Guníʼ Daniel pabiáʼ tiempu zadiʼdiʼ para guedandá «Mesías Xaíque que». Ca diidxaʼ guníʼ Daniel que na «7 semana, ne laaca zadiʼdiʼ 62 semana», biaʼsi rizaa ni 69 semana. Pabiaʼpeʼ nga chiguindaa ca semana ca pue. Casi na xcaadxi Biblia, cadi dxandíʼ zandaa ni biaʼ rindaa ca semana ni napa gadxe gubidxa, sínuque gadxe iza nga zandaa cada semana. Ca judíu que dxiqué laaca biénecabe ca semana ca de gadxe iza, o ti neza de gadxe iza. Casi dxiqué, tiidiʼ si xhoopaʼ iza la? ra guizaa gadxe iza ca reeda gaca ni casi ti sábadu (Éxodo 23:10, 11). Nga runi, 69 semana ca zeeda gaca ni 69 neza de gadxe iza cada tobi ne biaʼsi rudii ni 483 iza.

Yanna maʼ chiugábasinu. Pa dede iza 455 a.J. guzulú ugábanu 483 iza ca la? zindanu lu iza 29 despué de Jesús (d.J.), ízapeʼ ca nga guyuunisa Jesús ne guca Mesías (Lucas 3:1, 2, 21, 22). * Dxandíʼ guca cásipeʼ cá lu Biblia chigaca que njaʼ.