Estrés nga modo runi reaccionar cuerpu stinu ora ridxaagalunu xiixa guendanagana. Runi cerebru stinu dxiiñaʼ para gapa cuerpu stinu stale hormona. Pur ndiʼ la? ripapa ladxidóʼ binni, riete o riguiʼbaʼ presión stiʼ, runi sentir cará bi stiʼ ne richonga ca músculo stiʼ. Ante gudiʼnu cuenta xi cayácanu, nagueendaca riuu cuerpu stinu listu para guni reaccionar pa guizaaca xiixa. Ora riete estrés nápanu, ribiguetaʼ runi cuerpu stinu dxiiñaʼ normal.

Naca estrés ca ti modo runi reaccionar cuerpu stinu para ganda gudxíʼlunu xiixa guendanagana o gúninu xiixa nagueendaca ora nuu xquendanabáninu lu peligru. Peru guiráʼ ni ruzulú ndaaniʼ cerebru stinu. Zanda gacané estrés riʼ laanu para ganda gúninu xiixa nagueendaca ora guizaaca xiixa. Laaca zanda gacaneni laanu gúninu xiixa ni naguixhe íquenu o gúninu dxiiñaʼ jma galán, casi ora chigúninu ti examen, chiyúbinu dxiiñaʼ o para ganda gúninu ti deporte.

Peru ora guizáʼ nápanu estrés zanda guninani laanu. Zanda guindísani xiixa guendahuará luguianu, guidxiichinu stale o chuʼnu triste, guiaandaʼ laanu stale cosa, gaca nagana para laanu guiníʼ íquenu ne dede zanda gucaani laanu guidxíbinu stale. Laaca zanda gucaani laanu guchaʼnu modo runi tratarnu binni ne modo raca comportarnu. Nuu binni ni guizáʼ napa estrés zanda guiaba lu viciu de guendarixudxi, cubaʼ droga, gueʼ xhaataʼ xiixa medicina, gó xhaataʼ, cubaʼ gueza ne gapa xcaadxi viciu. Ne nuu biaje dede zanda gucaa estrés riʼ binni gaca deprimir, guiaana sin stipa o dede guiníʼ ique guuti laca laa.

Neca gadxé gadxé nga modo runiná estrés riʼ cada binni, zanda guindísani stale guendahuará luguiáʼ o guninani intiica si parte de cuerpu stiʼ.