Gapa binni meta qué riniʼni guxuiʼlú nizaaca xiixa, sínuque laani nga quixhe ique guni xiixa, guʼyaʼ xi zanda guni ne guni dxiiñaʼ nadipaʼ.

Zándaca zadiʼdiʼ semana, beeu o iza para ugaandaluʼ ca meta stiluʼ, ne para guni cumplirluʼ meta ni rábiluʼ zadiʼdiʼ iza para ugaandaluʼ la? napa xidé guni cumplirluʼ né caadxi meta ante de laani.

Zápaluʼ jma confianza laca lii ora ugaandaluʼ ca meta stiluʼ, zacaneni lii gápaluʼ jma xhamíguluʼ ne ziuuluʼ jma nayecheʼ.

Zápaluʼ jma confianza laca lii. Ora ugaandaluʼ ca meta stiluʼ nagueenda la? zucaa ca ni lii guni cumplirluʼ né ca meta jma naroʼbaʼ stiluʼ ne zudxiiluluʼ ca guendanagana ni gápaluʼ cada dxi, tobi de laani nga ora gucaa xcaadxi binni lii gúniluʼ xiixa cosa.

Zápaluʼ jma xhamíguluʼ. Guiráʼ binni riuulaʼdxiʼ guidxaaga binni ni nanna xi racalaʼdxiʼ ne runi stipa pur ugaanda ca ni. Ora racanesaa chupa binni para guni cumplircaʼ meta sticaʼ la? nga racané laacaʼ jma gaca xhamígucaʼ.

Ziuʼnu jma nayecheʼ. Pa gápaluʼ meta ne ugaandaluʼ ca ni, zabániluʼ jma galán.

Christopher guníʼ «Riuuladxeʼ gapaʼ meta purtiʼ napaʼ ni guneʼ ne rucaani naa guneʼ dxiiñaʼ. Guizáʼ galán ora maʼ biʼniʼ cumplirluʼ ti meta, purtiʼ óraca nga riniʼluʼ: “Gunda bineʼ ni”».

CONSEJU ZEEDA LU BIBLIA: «Tu cabeza si guiete bi la? qué zudxiibaʼ diʼ ne tu cayuuyadxí si za la? qué zutopa diʼ» (Eclesiastés 11:4).

Para gápaluʼ meta ne guni cumplirluʼ ca ni la? biʼniʼ ca ni chiguzéʼtenu riʼ.

Gulí ca meta stiluʼ. Bicaa ca meta stiluʼ ne de racá biiyaʼ ximodo zanda guni cumplirluʼ cada tobi de laacani.

Gudixhe ique ximodo guni cumplirluʼ ca meta stiluʼ. Biʼniʼ ca ni chiguzéʼtenu riʼ né cada meta ni nápaluʼ:

• Gudixhe ique padxí zuni cumplirluʼ ca ni.

• Bicaa ca cosa ni zúniluʼ.

• Guníʼ ique xi guendanagana zándaca guidxaagaluluʼ ne ximodo gudxiiluluʼ ca ni.

Bizulú biʼniʼ xiixa para guni cumplirluʼ ca meta stiluʼ. Cadi cuézaluʼ chuʼ guiráʼ ni listu para guzululuʼ. Guníʼ ique gunáʼ nga primé cosa ni caquiiñeʼ gúniluʼ para ugaandaluʼ ca meta stiluʼ ne biʼniʼ ca ni. Laaca galán cueeluʼ tiempu para gúʼyaluʼ pabiáʼ ziyúniluʼ para guni cumplirluʼ ca meta stiluʼ.

CONSEJU ZEEDA LU BIBLIA: «Binni runi dxiiñaʼ la? zareendú ca ni quixhe ique guni» (Proverbios 21:5).