Ti binni ni qué riree gana, qué rudii lugar gusaba ca guendanagana stiʼ laa, ne ra zidiʼdiʼ tiempu nga riziidiʼ binni gapa guenda o cualidad riʼ. Cásica ti xcuidi qué zaziidiʼ saʼ sin qué gacaná, zacaca qué zaziidibe gudxiilube ca guendanagana gápabe lu xquendanabánibe pa qué gacanabe.

Nuu xcuidi riree gana ora cadi biaʼsi runi xiixa cosa, ora ridxaagalú xiixa guendanagana, ora guicaa xiixa conseju, ne nuu xcaadxi xcuidi maʼ qué lica rúnicaʼ stipa pur gúnicaʼ ni sti biaje. Peru nabé risaca nga guiénecabe ca puntu riʼ:

• Qué zanda diʼ guiree guiráʼ cosa ni gúninu jneza (Santiago 3:2).

• Guiranu ridídinu guendanagana lu xquendanabáninu (Eclesiastés 9:11).

• Guiranu caquiiñenu tu gudii conseju laanu, purtiʼ zacatiʼ zanda guizíʼdinu (Proverbios 9:9).

Pa gusiidiluʼ xiiñiluʼ cadi guiree gana, zanda gudxiilube ca guendanagana gápabe sin guidxíbibe.

Ora guchee xiiñiluʼ

CONSEJU ZEEDA LU BIBLIA: «Zándaca guiaba ti binni runi ni jneza gadxe biaje, peru ziásabe sti biaje» (Proverbios 24:16).

Gucané xiiñiluʼ guʼyaʼ pa dxandipeʼ qué zanda gaca chaahuiʼ xiixa guendanagana. Quíxhenu ti ejemplu, ¿xi ñúnibe pa ñuni reprobarbe lu ti examen? ¿Nireebe gana ne niniʼbe: «¡Guiráʼ cosa ni runeʼ cadi jneza riree!»?

Para ganda gusiidiluʼ xiiñiluʼ cadi nagueenda guiree gana, gucané laabe guiníʼ íquebe xi zanda gúnibe para ganda guni mejorarbe. Zacá zanda gudxiilube ca guendanagana gápabe lugar de guiníʼ íquebe cayuninácabe laabe.

Laaca nabé risaca nga cadi guni chaahuiluʼ ca guendanagana gápabe. Gucané laabe guni chaahuibe ni laasibe. Zanda guinabadiidxaluʼ laabe: «¿Xi zanda gúniluʼ para ganda guiene chaahuiluʼ materia ni cusiidicabe lii ra scuela yaʼ?».

Ora guizaaca xiixa desgracia

CONSEJU ZEEDA LU BIBLIA: «Xiñee riníʼ tu zacá, nin qué ganna tu xi chi aca ixíʼ» (Santiago 4:14).

 Guirutiʼ nanna xi zazaaca lu xquendanabani. Nagueendaca nga zanda gunítinu xpuéltunu ne gueeda gaca huaranu. Casi ná Biblia: «Cadi guiráʼ diʼ ora runi ganar cani ruxooñeʼ reciu, nin cani nadipaʼ qué runi ganarcaʼ xiixa guendaridinde, [...] purtiʼ guiranu rizaacanu cosa ni cadi caníʼ íquenu ne ora cadi cabézanu cani» (Eclesiastés 9:11).

Normal nga gápaluʼ xiiñiluʼ de xiixa peligru o guendanagana, purtiʼ nadxiiluʼ laabe. Peru ni dxandíʼ nga, qué zanda diʼ gápaluʼ laacabe de guiráʼ ca guendanagana guidxaagalúcabe lu xquendanabánicabe.

Zándaca nagasi cadi cadxaagalú xiiñiluʼ guendanagana casi guniti dxiiñaʼ stiʼ o guiaana sin bueltu, peru zanda guidxaagalube guendanagana casi pa gusaanaʼ ti xhamígube de guiniʼné laabe o gatiʼ ti binnilídxitu. *

Ora gudiicabe conseju ca xiiñiluʼ

CONSEJU ZEEDA LU BIBLIA: «Bicaadiaga conseju, [...] para gácaluʼ ti binni nuu xpiaaniʼ despué» (Proverbios 19:20).

Cadi malu nga gudiicabe conseju xiiñiluʼ, purtiʼ ni racalaʼdxiʼ binni ca nga gacané laabe gúʼyabe paraa bicheebe ne gúnibe stipa pur guchaabe ne cadi para guniná diʼ laabe.

Pa gusiidiluʼ xiiñiluʼ gucaadiaga ca conseju gudiicabe laa, zacané ni lii ne laabe. Ti hombre lá John guníʼ: «Pa guni chaahuiluʼ guiráʼ ca guendanagana stiʼ ca xiiñiluʼ, qué ziuu dxi guiziidicabe. Zápacabe stale guendanagana ne siempre lii nga guni chaahuiluʼ cani. Qué zapuʼ vida né laacabe».

¿Ximodo zanda gacaneluʼ xiiñiluʼ guicaa ca conseju gudiicabe laa? Ora guni corregírcabe xiiñiluʼ, ra scuela o stiʼ lugar, biʼniʼ stipa cadi guni defenderluʼ laabe. Lugar de gúniluʼ nga, gunabadiidxaʼ laabe:

• «¿Xiñee rábiluʼ bidiicabe lii conseju ca?».

• «¿Ximodo zanda guni mejorarluʼ?».

• «¿Xi zúniluʼ pa gácaluʼ ni sti biaje?».

Bietenalaʼdxiʼ, ti conseju zanda gacané ni xiiñiluʼ yanna ne laaca zacané ni laabe ora guiniisibe.