Neca nuu tu ná stale nga guendanagana ni ridxaagalú binni ora gatiʼ ti familia stiʼ, peru cada binni nga gadxé laa. Yanna, ¿ñee riníʼ nga nuu binni qué riuu peʼ triste o qué riná gusihuinni ni runi sentir la? Coʼ, cadi zacá ni. Zándaca nuu binni ratadxí ladxidóʼ ora guʼnaʼ o guiníʼ xi cayuni sentir, peru cadi maca nexheʼ diʼ xi zanda gacané guiráʼ binni despué de gatiʼ tuuxa ni nadxii. Maʼ gadxé nga cada binni, purtiʼ gadxé modo biniisi, guiráʼ ni huadiʼdiʼ ne modo gutiʼ binni ni nadxii.

Ora nacubi gutiʼ ti familia stiʼ binni, zándaca qué ganna xi ca cosa guidxaagalú. Peru, stale tu ridxaagalú ca guendanagana chiguzéʼtenu riʼ:

Raca nagana para binni guni controlar ni runi sentir. Ora nacubi gutiʼ ti familia stiʼ binni la? normal nga guʼnaʼ, guibanaʼ binni ni maʼ guti ca o nuu ora ziuu galán né nuu ora coʼ. Ne jmaruʼ si runi sentir binni zacá ora guietenalaʼdxiʼ o guiníʼ xcaandaʼ xiixa de binni ni maʼ guti ca. Nuu binni la? primeru ga qué runi cré diʼ ni, ne raca nagana para laa guiene ni. Ti gunaa láʼ Tina cusiene xi biʼniʼ sentir ora ni málasi gúdxicabe laa guti xheelaʼ: «Biaanacayaʼ siaʼ ne qué ganda guunaʼ. Guizáʼ nuaaʼ xizaa dede qué ganda guicaaʼ bi. Ne qué guiráʼ guneʼ cré ni cazaacaʼ que».

Rapa binni ansiedad, ridxiichi ne rugaaniʼ donda ique. Iván guníʼ: «Despué de guti xiiñidu Eric, dxi napa 24 iza, naa ne xheelaʼ, Yolanda, guyuʼdu ti tiempu nisi canadxiichi stúbidu. Nabé bidxagayaadu, purtiʼ qué niníʼ íquedu pa ñuni sentirdu zaqué. Laaca biʼniʼ sentirdu nápadu donda pur guti xiiñidu ne gunabadiidxadu pa ñanda ñúnirudu xiixa para cadi ñátibe». Alejandro, ti hombre ni gutiʼ xheelaʼ de ti guendahuará malu, laaca bigaaniʼ donda ique pur ni bizaaca. Ndiʼ nga ni bizeetebe: «Primeru ga que guníʼ iqueʼ nacaʼ ti binni malu, nga runi cudii Dios lugar guneʼ sufrir. Despué bineʼ sentir mal purtiʼ cugaaneʼ donda ique Dios pur ni cazaacaʼ que». Ne Kostas, hombre ni bizéʼtenu lu tema gudiʼdiʼ que, guníʼ: «Nuu tiru ridxiicheniaʼ Sofía xiñee guti. Peru despué rabeʼ cadi jneza guiníʼ iqueʼ zacá. Nannaʼ cadi laapebe biyúbibe gátibe».

Raca nagana para binni gaca concentrar. Zándaca nuu tiru riníʼ ique binni xiixa cosa ni cadi dxandíʼ cayaca o qué ziuu dxi gaca. Casi ora gatiʼ ti familia stiʼ ti binni, zándaca guiníʼ ique cayuuyaʼ, cayunadiaga o cayuni sentir nuu binni ni maʼ guti ca gaxha de laa. O zándaca gaca nagana para laa guietenalaʼdxiʼ xiixa o gaca concentrar. Tina guníʼ: «Nuu tiru ora maʼ canieniaʼ tuuxa gadxé ra maʼ nuu xquendabiaaneʼ. Nisi maʼ caníʼ iqueʼ xiñee guti Timo. Qué randa racaʼ concentrar ne riguu ngue naa triste».

Racalaʼdxiʼ binni chuʼ stubi. Nuu binni ora gatiʼ ti familia stiʼ qué runi sentir galán ora nuu lade binni. Kostas ná: «Qué runeʼ sentir galán ora nuaaʼ lade binni ni maʼ bichaganáʼ. Peru zaqueca runeʼ sentir ora nuaaʼ lade ca solteru». Ne Yolanda, xheelaʼ Iván, ná: «Qué riuuladxeʼ gaca quejar binni de xiixa guendanaganahuiiniʼ napa purtiʼ jma naroʼbaʼ guendanagana ni cadídidu. Riecheʼ ora riníʼ binni galán de ca xiiñiʼ, peru zaqueca riuaaʼ triste ora gunadiagaʼ laacabe. Naa ne xheelaʼ nánnadu caquiiñeʼ gudxíʼludu ni cazaacadu que, peru runi sentirdu qué gápadu stipa nin paciencia para gúnidu ni».

Raca huará binni. Laaca normal nga cadi guindaana binni, guiete de pesu, cuee xcaandaʼ o gó stale, quibaʼ de pesu ne gasi stale. Ndiʼ nga ni guníʼ Aarón bizaaca lu primé iza despué de guti bixhoze: «Qué randa raseʼ. Guiráʼ gueelaʼ ribaneʼ maʼ caníʼ iqueʼ xiñee guti bixhozeʼ».

 Alejandro biʼniʼ sentir huará neca cadi dxandíʼ peʼ huará. Laabe guniʼbe: «Stale biaje guyaaʼ doctor para guʼyaʼ ximodo nuaaʼ, peru gúdxibe naa nuaaʼ nazaaca. Ngue runi guníʼ iqueʼ zándaca pur nacubi gutiʼ xheelaʼ que nga nuaaʼ zaqué». Jneza biʼniʼ Alejandro guyé doctor neca despué gudiʼdiʼ ni cayaca. Pa nápaluʼ ti guendahuará ora nacubi gutiʼ ti familia stiluʼ la? zándaca guniná ni lii jma o guiasa sti guendahuará luguialuʼ.

Raca nagana para binni guni tender xiixa cosa risaca. Iván guníʼ: «Gupa xidé gúdxidu ca xhamígudu ne ca familia stidu guti Eric, ne laaca gúdxidu xcaadxi binni casi jefe stibe ne ni cuquixe laabe yoo ra nabézabe que. Laaca bínidu stale trámite ne bitópadu ca xcosabe. Dxandíʼ peʼ cadi nuu íquedu para gúnidu guiráʼ ngue, maʼ bidxágadu ne nuudu triste».

Peru nuu binni la? tidiʼ si ti tiempu nga ridxaagalú ca guendanagana riʼ, purtiʼ napa xidé guni ca cosa biʼniʼ binni ni maʼ guti ca. Nga peʼ nga ni bizaaca Tina. Laabe guniʼbe: «Dxiqué la? xheelaʼ nga ruuyaʼ guiráʼ cuenta ni nápadu ra bancu ne xcaadxi cosa. Peru yanna la? maʼ naa nga naquiiñeʼ guneʼ guiráʼ ni, ne nabé biʼniʼ estresar ngue naa. Ngue runi gunabadiidxaʼ pa zanda guneʼ guiráʼ ni».

Zándaca pur guiráʼ ni maʼ bizéʼtenu riʼ guiníʼ íqueluʼ qué ziuu dxi guibiguetaʼ guibániluʼ nayecheʼ despué de gatiʼ tuuxa binni ni nadxiiluʼ. Dxandíʼ, neca naná yuubaʼ riaanané binni, peru pa ganna tuuxa dede ante xi guendanagana ridxaagalú binni ora gatiʼ ti familia stiʼ la? zanda gacaneni laa pa guizaaca ni. Bietenalaʼdxiʼ, cadi guiráʼ diʼ binni nga ridiʼdiʼ lu guiráʼ guendanagana ni bizéʼtenu riʼ. Ne nuu binni ratadxí ladxidóʼ ora ganna normal nga guiráʼ ni cazaaca ne ni runi sentir despué de gatiʼ tuuxa binni ni nadxii.

Xi zazaaca. Cadi siempre nga ziuu yuubaʼ ndaaniʼ ladxidoʼloʼ; ra zidiʼdiʼ tiempu maʼ qué zuni sentirluʼ stale yuubaʼ. Peru qué riníʼ diʼ nga zusiaandaluʼ binni ni maʼ guti ca, coʼ. Sínuque chaahuiʼ chaahuiʼ maʼ qué zuni sentirluʼ stale yuubaʼ neca nuu biaje ziuu yuubaʼ ladxidoʼloʼ ora gueedasilú lii xiixa de laabe o ganda xiixa fecha ni gusietenalaʼdxiʼ binni ca lii. Ne tidiʼ si ti tiempu stale binni maʼ ruzulú runi sentir galán ne maʼ randa runi ca cosa stiʼ normal. Peru para ganda gúnibe ndiʼ la? naquiiñeʼ gacané ca xhamígube ne familia stibe laabe, para chuʼbe gana ne cadi tan guniná yuubaʼ ca laabe.

¿Pabiáʼ tiempu zandaa ni? Nuu binni la? chupa chonna beeu si runiná ni laa ne nuu tu laa chupa chonna iza. Ne xcaadxi binni dede ridiʼdiʼ iza para chuʼ galán. * Nga nga ni bizaaca Alejandro, laabe guniʼbe: «Naa la? biaʼ chonna iza nga guyuu yuubaʼ ladxiduáʼ».

Gupa paciencia ne bietenalaʼdxiʼ cadi nagueenda raca chaahuiʼ ca cosa ca. Laaca cadi guiaandaʼ lii cadi siempre nga ziuu yuubaʼ ladxidoʼloʼ. Peru neca zacá, ¿ñee nuu xiixa ni zanda gúniluʼ para cadi guni sentirluʼ stale yuubaʼ ne tidiʼ ni nagueenda la?