Diana, gunaa ni bizéʼtenu lu tema gudídinu ca, biʼniʼ sentir ca guendanagana ni gupa bicaa ni laa jmaru si gueʼ nisadxuʼni. Cadi cá diʼ lu Biblia pa malu nga gueʼ binni caadxi nisadxuʼni, peru cayabi ni laanu: «Cadi chuʼluʼ lade cani reʼ xhaataʼ vinu» (Proverbios 23:20). Gueʼ xhaata binni nisadxuʼni redané ni guendahurá, runiti binni ca xhamigu ne pur laani guiráʼ iza millón de binni rati nahuiiniruʼ. Pa ninanda binni ca conseju galán ni zeeda lu Biblia, qué ñápacaʼ stale de ca guendanagana riʼ.

Nga nga biʼniʼ Diana, laa guníʼ: «Bidieeʼ cuenta guendarixudxi ca qué racané diʼ ni naa gucueezaʼ ansiedad stinneʼ. Bineʼ ni ná conseju zeeda lu Filipenses 4:6, 7: “Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu”. Guiráʼ gueelaʼ, ora cadi nuu dxi xquendabiaaneʼ, runeʼ orar Jiobá ne rabeʼ laabe xi cayuneʼ sentir: rabeʼ laabe pabiáʼ cadxiicheʼ, cayacanaʼyaʼ, ne qué guidxelaʼ xi guneʼ... ne rinabaʼ laabe gacanebe naa chuaaʼ nayecheʼ. Sti dxi que, runeʼ stipa para cadi guicá iqueʼ ne guneʼ sentir zaqué. Guneʼ orar Jiobá gucané ni naa gusisacaʼ ni napaʼ ne cadi ni qué gapaʼ. Gudixheʼ iqueʼ gusaanaʼ  de gueeʼ nisadxuʼni purtiʼ qué racalaʼdxeʼ guniteʼ guendariuudxi ni maʼ bidxelaʼ».

Inmoralidad sexual ca nga tobi de ca cosa ni jma runiná binni ne redané stale yuubaʼ. Peru ca principiu stiʼ Biblia zanda gacané cani laanu cadi tiidinu ca yuubaʼ riʼ purtiʼ ruzeeteʼ ni de guni coquetear binni ne guʼyaʼ pornografía. Ti joven láʼ Samuel guníʼ: «Cadi nagana nga guni coquetear binni... Nuu tiru neca qué riuuladxeʼ ti baʼdudxaapaʼ, peru pa guuyaʼ riuuláʼdxibe naa la? runeʼ ni». Últimu la? cumu nabé maʼ nanna binni runi coquetearbe neca qué racaláʼdxibe la? maʼ laapebe bíʼnibe ni, peru despué bichiiñaʼ xconcienciabe. Laabe guniʼbe: «Cadi jneza nga guni coquetear tuuxa, runi ni lii egoísta».

Samuel biindaʼ ti artículo para ca joven ni nuu lu sitiu de Internet jw.org. Laaca guníʼ íquebe ni ná Proverbios 20:11, ra ná: «Dede ti hombrehuiiniʼ rusihuinni pa nayá ne pa runi ni jneza pur cani runi». ¿Ximodo gucané conseju riʼ laabe yaʼ? Samuel bidii cuenta cadi jneza diʼ nga guni coquetear. Laabe guníʼrube: «Biziideʼ pa tuuxa guni sicaríʼ zuniná xheelaʼ ora guichaganáʼ. Guníʼ iqueʼ xi ñuni sentir gunaa ni guichaganaʼyaʼ pa ñuuyaʼ naa cayuneʼ coquetear né sti gunaa. Nga gucané naa gudieeʼ cuenta naca ni ti viciu malu. Neca fácil nga guni coquetear binni, qué ribeendú gastiʼ». Bichaa Samuel, ne ngue gucané laa cadi guiaba lu inmoralidad.

Jma naxoo ra biuu Antonio: gúpabe viciu de gúʼyabe pornografía. Neca nadxiibe xheelabe, zeʼ dxi maʼ qué ganda gusaanabe ni. Laabe guniʼbe ni gucané laabe nga principiu ni zeeda lu 1 Pedro 5:8: «Lacuu xpiaani tu ne lagataná, purti canazá binidxabaʼ, enemigu stitu, canananda laatu casi ti lion ni canaguu beedxeʼ, canayubi tu uxuuxe». Antonio bisiene: «Guiráʼ ladu nuu imagen de pornografía, ni zanda guiaana ndaaniʼ íquenu. Gucané versículo que naa guiníʼ iqueʼ tu dé zeeda ca cosa ca. Gupa xidé bineʼ stipa guiníʼ iqueʼ de Binidxabaʼ nga zeeda ca imagen ca. Yanna maʼ nannaʼ Jiobá si nga zanda gacané naa gacaʼ ti binni nuu xpiaaniʼ ne gatanaʼyaʼ para gapaʼ xquendabiaaneʼ, ladxiduáʼ ne xquendaxheelaʼ». Gucanécabe Antonio ne zaqué gunda bisaana viciu malu riʼ. Nga runi maʼ qué ñáparube guendanagana jma naroʼbaʼ.

Rihuinni dxíchica napa Biblia conseju galán ni zanda gacané laanu cadi gápanu guendanagana jma naroʼbaʼ. Peru ¿pa maʼ naroʼbaʼ guendanagana ca ne qué guidxélanu xi gúninu yaʼ? Guidúʼyanu ximodo zanda gacané Stiidxaʼ Dios laanu.