Sicaríʼ guniʼbe: «Zadinde ti guidxi ne sti guidxi ne zadinde ti reinu ne sti reinu. Zaca xu roʼ, ne ziuu hambre ne guiráʼ clase guendahuará ti lugar ne sti lugar» (Lucas 21:10, 11). Ora guizaaca guiráʼ ca cosa ni bizeeteʼ Jesús riʼ juntu, zusihuínnicani maʼ gaxha nuu Reinu stiʼ Dios. ¿Ñee maʼ cazaaca ca cosa riʼ la? ¿Ñee cazaaca cani lu guidubi Guidxilayú la? ¿Xi rusihuinni ca cosa ni cazaaca tiempu riʼ?

1. GUERRA

Lu iza 1914 guca ti guerra nabé naroʼbaʼ ni qué huayuudxí gaca. Ca hombre ni nanna de historia ná dede lu iza ca bichaa stale cosa lu Guidxilayú, purtiʼ bizulú primé guerra ni bininá binni lu guidubi Guidxilayú. Luni biquiiñecabe stale carru ni rié lu guerra, bomba, guiibaʼ, gas ni napa venenu ne xcaadxi guiibaʼ ni biiti stale binni. Despué, lu Segunda Guerra Mundial, maʼ bizulú biquiiñecabe bomba atómica. Dede lu iza 1914, maʼ huayaca guerra guiráʼ ladu, ne pur laacani huayati millón de binni.

2. XU ROʼ

Enciclopedia Britannica Academic ná cada iza raca biaʼ ti gayuaa xu roʼ, ne cumu nadipaʼ cani la? «runinácani stale». Ca registru ni napa Servicio Geológico de Estados Unidos ná: «Dede lu iza 1900 cada iza ribézadu gaca biaʼ dieciséis xu roʼ». Stale binni riníʼ ique cumu maʼ zanda guni detectárcabe xu roʼ la? ruluíʼ jma huaxiéʼ raca tiempu riʼ. Peru neca yanna maʼ randa runi detectárcabe cani, jma stale binni racaná ne rati pur ca xu roʼ ca.

 3. GASTIʼ GUENDARÓ

Pur ca guerra ni raca, pur guendaribaʼnaʼ, pur gastiʼ bueltu ne pur riniti stale cosecha qué gapa stale binni ni nuu lu Guidxilayú ni gó. Informe ni bidii Programa Mundial de Alimentos ná: «Ndaaniʼ Guidxilayú, 821 millón binni qué gápacaʼ ni gocaʼ, ne 124 millón de laacabe zándaca gueeda gáticabe» (2018 Year in Review). Cada iza rati chonna millón ti gayuaa mil baʼduhuiiniʼ purtiʼ qué rizaa ni rocaʼ. Lu iza 2011, de lade guiráʼ ca baʼduhuiiniʼ ni rati lu guidubi Guidxilayú, 45% de laacaʼ ráticaʼ purtiʼ gastiʼ ni gocaʼ.

4. GUENDAHUARÁ NE EPIDEMIA

Ti informe bidii Organización Mundial de la Salud ná: «Lu siglu veintiuno huayuu stale epidemia. Cabiguetaʼ stale guendahuará ni guyuu dxiqué, casi cólera, peste ne fiebre amarilla, ne maʼ nuu stale guendahuará nacubi casi síndrome respiratorio agudo grave ne síndrome respiratorio de Oriente Medio ne laaca nuu guendahuará ni láʼ gripe pandémica, ébola ne zika». Ne nacubi biasa pandemia ni runibiaʼnu casi COVID-19. Neca maʼ nanna ca científicu ne ca doctor ca stale de ca guendahuará ca la? qué ganda guidxélacabe remediu stícani.

5. CAYACA PREDICAR LU GUIDUBI GUIDXILAYÚ

Bidii Jesús sti señal ora guníʼ: «Zaca predicar ca noticia galán stiʼ Reinu lu guidubi guidxilayú para gunadiaga guiráʼ xixé guidxi ni, ne oraqueruʼ nga gueeda fin» (Mateo 24:14). Neca nuu stale guendanagana lu Guidxilayú riʼ, jma de xhono millón binni de guiráʼ guidxi cayuni predicarcaʼ ca noticia nacubi stiʼ Reinu stiʼ Dios ndaaniʼ 240 guidxi ne territorio, lu jma de ti mil idioma. Qué huayuu dxi guizaaca ndiʼ.

Guiráʼ ni guníʼ Jesús, cayaca cani tiempu riʼ. ¿Xiñee risaca cani para laanu yaʼ? Cadi guiaandaʼ laanu ni guníʼ Jesús: «Ora gúʼyatu maʼ cayaca ca cosa riʼ, laganna maʼ gaxha nuu Reinu stiʼ Dios» (Lucas 21:31).

Señal bidii Jesús ne guiráʼ ni riete lu Biblia rusihuínnicani bizulú cayuni mandar Reinu stiʼ Dios guibáʼ lu iza 1914. a Iza ca, gulí Dios Jesucristu, Xiiñiʼ, para gaca rey (Salmo 2:2, 4, 6-9). Maʼ cadi candaa, zuni mandar Reinu stiʼ Dios binni guidxilayú, zunduuxeni guiráʼ ca gobiernu ne zuni ni Guidxilayú riʼ ti paraísu para guibáninu ndaaniʼ ni sin gátinu, casi racalaʼdxiʼ Dios.

Maʼ cadi candaa zaca cumplir ca diidxaʼ bisiidiʼ Jesús lu oración stiʼ padrenuestro: «Gueeda Reinu stiluʼ. Gaca ni naluʼ ndaaniʼ guidxilayú, cásica raca ni guibáʼ» (Mateo 6:10). Yanna, ¿xi huayuni Reinu stiʼ Dios guibáʼ dede lu iza 1914 yaʼ? ¿Ne xi zúnini ora guzulú guni mandar ni binni?