¿ÑEE DXANDÍʼ ZANDA GUNI DECIDIRLUʼ XI FUTURO GÁPALUʼ LA? Nuu caadxi binni runi cré runi controlar destinu xquendanabáninu, ne nuu xcaadxi ná Dios runi controlar ni. Ora qué guiree ca cosa ca casi cabézacabe, riníʼcabe: «Maʼ nga nga ná Dios».

Nuu tu laa riree gana purtiʼ qué ganda guiree injusticia ne ni runi binni ora ruquiichináʼ pobre ndaaniʼ Guidxilayú. Nuu tu laa runi stipa pur guibani galán, peru qué randa pur ca guerra ni nuu, pur guiráʼ binni malu, ca guendahuará o ca desastre natural. Últimu la? riníʼ íquecaʼ pur gana si ca stipa rúnicaʼ.

Pur ni guizaacanu lu xquendanabáninu zanda guchaa ca ni cá íquenu gúninu (Eclesiastés 9:11). Peru neca zacá guiranu zanda cuinu xi futuro gápanu. Biblia cayabi laanu, lu nanu nuu futuro stinu. ¿Xiñee yaʼ?

Dxi mayaca chuʼ guidxi Israel lu layú ni bidii stiidxaʼ Dios gudii laacaʼ, Dios gudxi Moisés gabi laacabe: «Maʼ gudixheʼ guendanabani ne guendaguti nezaluluʼ, ndaayaʼ ne guendananá; ne nápaluʼ xidé cuiluʼ guendanabani ti cadi gátiluʼ, lii ne ca xiiñiluʼ, gannaxhiiluʼ Jehová Dios stiluʼ, gucaadiágaluʼ stídxibe ne cadi guixéleluʼ de laabe» (Deuteronomio 30:15, 19, 20).

«Maʼ gudixheʼ guendanabani ne guendaguti nezaluluʼ, ndaayaʼ ne guendananá; ne nápaluʼ xidé cuiluʼ guendanabani ti cadi gátiluʼ, lii ne ca xiiñiluʼ» (Deuteronomio 30:19).

Gulee Dios ca israelita de esclavu ndaaniʼ guidxi Egipto, ne bidiibe laacaʼ oportunidad de gácacaʼ libre ne guibánicaʼ nayecheʼ lu layú ni bidii stiidxabe gudiibe laacaʼ. Peru naquiiñeʼ gúnicabe xiixa para guicaacabe ca ndaayaʼ ca. Napa xidé gúnicabe ti cosa: cuícabe guendanabani. ¿Ximodo zanda gúnicabe ni yaʼ? Ra gannaxhiicabe Dios, gucaadiágacabe ne cadi guixélecabe de laa.

Lii laaca naquiiñeʼ guicaaluʼ ti decisión zacaca, ne pur ni cuiluʼ guʼnuʼ zacané ni lii gannuʼ xi futuro cabeza lii. Pa cuiluʼ gannaxhiiluʼ Dios, gucaadiágaluʼ laabe ne cadi guixéleluʼ de laabe la? zápaluʼ ti guendanabani ni qué zaluxe ndaaniʼ ti paraísu lu Guidxilayú riʼ. Peru ¿xi riníʼ gúniluʼ ca cosa riʼ yaʼ?

Apóstol Juan bicaa pur espíritu santu: «Dios nga guendarannaxhii», nga nga cualidad ni jma risaca stiʼ Dios (1 Juan 4:8). Cumu nanna Jesús ni la? ora gunabadiidxacabe laa gunáʼ nga mandamientu jma risaca, laa bicabi: «Gunnaxhii Jehová Dios stiluʼ de guidubi ladxidoʼloʼ, de guidubi xhiálmaluʼ ne de guidubi xquendabiaaniluʼ» (Mateo 22:37). Nga runi, xhamígunu Dios purtiʼ dxandíʼ nadxiinu laa, ne cadi purtiʼ ridxíbinu guninabe laanu. Peru ¿xiñee caquiiñeʼ gannaxhiinu Dios yaʼ?

Modo nadxii Jehová binni, zeeda gaca ni casi modo rannaxhii binni xiiñiʼ. Neca binni ruchee laacabe, peru rúnicabe stipa pur gusiidicabe, cúʼcabe gana, gacanécabe ne uguu jnézacabe ca xiiñicabe purtiʼ nadxiicabe laacaʼ ne ni racaláʼdxicabe nga guibánicaʼ galán ne nayecheʼ. ¿Xi ribézacabe de ca xiiñicabe yaʼ? Ribézacabe gannaxhii xiiñicabe laacabe, guzuubacaʼ diidxaʼ ne guiénecaʼ pur bien sticaʼ nga guiráʼ ni rábicabe laacaʼ. ¿Nouʼ cadi laaca zacaca nga ribeza Bixhózenu ni nuu  guibáʼ gannaxhiinu laa ne gudiʼnu xquíxepeʼ laa pur guiráʼ ni maʼ biʼniʼ pur laanu la?

Lu idioma original gucuá Biblia, diidxaʼ gucaadiaga stale biaje riníʼ ni «guzuubaʼ diidxaʼ». ¿Ñee cadi nga nga ribeza binni guni xiiñiʼ ora gábibe laa «bicaadiaga naa» la? Nga runi, gucaʼdiáganu Dios riníʼ ni gánnanu xi ribézabe de laanu ne gúninu ni nabe. Yanna riʼ maʼ qué riniʼné diʼ Dios binni, peru zanda gucaʼdiáganu laabe ra guidúʼndanu Stiidxabe, Biblia, ne gúninu stipa pur guzúʼbanu stiidxabe (1 Juan 5:3).

Para gánnanu pabiáʼ risaca nga gucaʼdiáganu Dios, sicaríʼ guníʼ Jesús: «Cadi de pan si nga guibani binni, sínuque de guiráʼ diidxaʼ ni guiree de ruaa Jehová» (Mateo 4:4). Risaca nga guidoʼno gueta, peru jma risaca nga gánnanu de Dios. ¿Xiñee yaʼ? Rey Salomón bisiene ni: «Purtiʼ guendanuuxpiaaniʼ ca rapa ni binni cásica rapa bueltu binni; peru tuuxa ni nanna ne nuu xpiaaniʼ la? jma xadxí zabani» (Eclesiastés 7:12). Guendanuuxpiaaniʼ ca ne ca ni cazíʼdinu de Dios zapa ca ni laanu ne zacané ca ni laanu sanu lu neza ni ziné laanu lu ti guendanabani ni qué zaluxe.

Lu artículo ni gudídinu que, bizéʼtenu caadxi diidxaʼ ni guníʼ Jesús ra ná: «Peru nabéʼ puertaʼ ne nabéʼ neza ni zeʼ lu guendanabani, ne huaxiéʼ si tu ridxela ni» (Mateo 7:13, 14). Para sanu lu neza riʼ, ¿cadi dxandíʼ ñuuláʼdxinu ñuu tu nuluíʼ laanu ximodo ugaandanu guendanabani ni qué zaluxe ca la? Nga runi, cadi naquiiñeʼ guixélenu de Dios (Salmo 16:8). Peru ¿ximodo gúninu ni yaʼ?

Guiráʼ dxi nápanu stale cosa ni gúninu ne stale cosa ni ñuuláʼdxinu ñúninu. Tantu stale dxiiñaʼ nápanu, huaxiéʼ tiempu riaana para guiníʼ íquenu xi racalaʼdxiʼ Dios gúninu. Nga runi, Biblia rusietenalaʼdxiʼ laanu: «Lachuu cuidadu cadi gácatu casi binni huati, sínuque lagaca casi binni nuu xpiaaniʼ. Laiquiiñeʼ tiempu stitu jneza purtiʼ nabé maʼ nagana ca dxi nabáninu riʼ» (Efesios 5:15, 16). Cadi guixélenu de Dios riníʼ ni gusisácanu amistad ni napanenu laabe ne gaca ni primeru lu xquendanabáninu (Mateo 6:33).

Neca qué zanda guʼnuʼ gastiʼ para guchaaluʼ ni bíʼniluʼ dxiqué, peru zanda gúniluʼ xiixa para gápaluʼ ti futuro guizáʼ galán né familia stiluʼ. Biblia rusiidiʼ guizáʼ nadxii Jehová, Bixhózenu ni nuu Guibáʼ laanu, ne rábibe laanu xi racaláʼdxibe gúninu. Biiyaʼ xi ná ca diidxaʼ guníʼ profeta Miqueas:

«Laabe maʼ gúdxibe lii, hombre de lu guidxilayú, xii nga galán. Ne xii ndiʼ ni canabaʼ Jehová lii yaʼ. Guʼnuʼ ni jneza ne cadi gusaana de gannaxhiiluʼ ne gápaluʼ modestia ora sáneluʼ Dios stiluʼ» (Miqueas 6:8).

¿Ñee zuzuubaluʼ stiidxaʼ Dios la? Pa gúniluʼ ni, zacaaluʼ ca ndaayaʼ ni qué zaluxe ni chigudii Dios ca xhamigu. Peru lu naluʼ nuu decisión ca.