Pa cadi Dios napa donda, ¿tu laa napa donda yaʼ? ¿Xiñee nuu stale binni cayati de hambre o guizáʼ pobre laacaʼ yaʼ? ¿Xiñee nuu stale guerra, guendahuará ne rizaaca stale desastre natural yaʼ? Lu Stiidxaʼ Dios, Biblia, rusiene runi sufrir binni pur chonna razón:

1. Nanaláʼdxisaa binni, rachelú gapa bueltu ne egoísta laacaʼ. «Binni runi mandar binni para gacanacaʼ» (Eclesiastés 8:9). Stale biaje, nabé runinácabe binni purtiʼ nuu xcaadxi binni ruchee naca egoísta.

2. Rizaacanu cosa ni cadi caníʼ íquenu ne ora cadi cabézanu. Laaca rusiene Biblia runi sufrir binni «purtiʼ guiranu rizaacanu cosa ni cadi caníʼ íquenu ne ora cadi cabézanu cani» (Eclesiastés 9:11). Rizaacanu xiixa accidente purtiʼ nuunu ti lugar o ti ora ra cadi naquiiñeʼ chuʼnu o purtiʼ qué riníʼ íquenu ante gúninu ti cosa o pur rucheʼnu.

3. Nabé malu ni cayuni mandar Guidxilayú riʼ. Biblia rusiene tu laa nga napa donda pur runi sufrir binni, ora ná ni: «Naaze dxiichi binidxaba idubi guidxilayú» (1 Juan 5:19). Naca Binidxabaʼ ti ángel malu ne nadipaʼ, neca dxiqué gúcabe ti ángel chaʼhuiʼ, peru «bixélebe de ni dxandíʼ» (Juan 8:44, TNM). Bieeguʼ xcaadxi ángel Binidxabaʼ para gúnicaʼ ni racaláʼdxicaʼ ne zacá beeda gácacaʼ demonio (Génesis 6:1-5). Dede dxi bicaalúcabe Dios, Binidxabaʼ ne ca demonio stiʼ rucaacabe binni guni cosa malu, ne yanna riʼ, jmaruʼ si rihuinni ni. Nabé cadxiichi Binidxabaʼ nga runi «rusiguii irá binni», pur nga Biblia ruzeeteʼ: «Lagapa gá si laatu cani nuu ndaani guidxilayú ne ndaani nisadóʼ» (Apocalipsis 12:9, 12). Naca Binidxabaʼ tuuxa ni runiná, malu ne riuulaʼdxiʼ guʼyaʼ guni sufrir binni. Laabe nga nápabe donda pur cayuni sufrir binni, cadi Dios diʼ.

GUNÍʼ IQUE NDIʼ: Tuuxa ni naca malu ne naguidxi ladxidóʼ nga rucaa guni sufrir binni ni qué guzaabiʼ gastiʼ. Peru Biblia ruzeete «Dios nga [...] enda ranaxhii» (1 Juan 4:8). Pur ca diidxaʼ ni guninu riʼ, nánnanu qué zaníʼ ique Dios ni Dxandíʼ guniná ne gaca injusto né binni (Job 34:10).

Yanna, né stale razón zándaca guinabadiidxaluʼ, «¿padxí nga gunitilú Dios ca cosa malu ni rucaa Binidxabaʼ guni binni yaʼ?». Casi maʼ bidúʼyanu, nanalaʼdxiʼ Dios cosa malu, ne racaná ladxidoʼbe ora gúʼyabe cayuni sufrirnu. Ne Stiidxabe riguu gana laanu gábinu laabe guiráʼ ni naguu xizaa laanu, purtiʼ laabe rizaaláʼdxibe laanu (1 Pedro 5:7). Lu sti artículo ca, zadúʼyanu caadxi cosa ni cusihuinni guizáʼ nadxii Dios laanu, ne nápabe poder para cueebe guiráʼ ni rucaa laanu guni sufrirnu ne ca cosa ni cadi jneza rizaaca binni. *