CA XPINNI Cristu de primé siglu que bíʼnicaʼ stipa pur guni predicarcaʼ «ca diidxaʼ nacubi ne galán stiʼ Reinu» guiráʼ binni guidxélacaʼ (Mat. 24:14, TNM). Nuu de laacaʼ guyecaʼ xcaadxi guidxi. Casi apóstol Pablo guyé región ra nuu Turquía yanna riʼ ne nabé biʼniʼ predicarbe raqué lu ca viaje ni bíʼnibe casi misioneru. * Lu iza 2014, chupa mil iza despué, guca ti campaña especial de predicación ndaaniʼ guidxi Turquía. ¿Tu biʼniʼ ni, ne xiñee yaʼ?

Ndaaniʼ guidxi Turquía nabeza biaʼ 79 millón binni ne nuu jma de 2,800 publicador. Nga rusihuinni nuu 28,000 binni pur cada publicador. Pur nga zanda guininu caadxi si binni nga huayuni predicárcabe. Ni gudixhe íquecabe né campaña especial que nga guni predicárcabe stale binni ne gúnicabe ni huaxiéʼ tiempu. Biaʼ tiempu bindaa campaña riʼ, guyé 550 hermanu de sti guidxi ni riníʼ diidxaʼ turco para guni predicarcaʼ né ca hermanu de Turquía. ¿Xi guleendúcabe lu campaña riʼ yaʼ?

Biʼniʼ predicárcabe stale binni. Sicaríʼ bicaa ti congregación de Estambul: «Cumu guiráʼ ladu biiyacabe ca testigu stiʼ Jiobá la? gunabadiidxacabe laadu pa chigaca ti asamblea especial». Ne ti congregación ni nuu ndaaniʼ guidxi Izmir, bicaa sicaríʼ: «Ti hombre ni runi dxiiñaʼ ra parada taxi bidxiña ti ancianu ne gunabadiidxaʼ laabe: “¿Xi cayaca pue? ¿Ñee bidale dxiiñaʼ stitu la?”». Nga rusihuinni nabé gunna binni de campaña riʼ.

Nabé guyuulaʼdxiʼ ca hermanu de xcaadxi guidxi gucheechecaʼ diidxaʼ raqué. Steffen, ti xpinni Cristu de Dinamarca, guníʼ: «Guiráʼ dxi, gunda gunieniáʼ binni ni qué huayuu dxi gunadiágacaʼ de Jiobá. Bineʼ sentir dxandipeʼ cusiideʼ binni lá Jiobá». Jean-David, ti hermanu de Francia bicaa: «Stale hora rinedu para guni predicardu ti calle si. ¡Guizáʼ galán! Stale binni de raqué qué runibiaʼcaʼ ca testigu stiʼ Jiobá. Ne casi guiráʼ yoo ra riuʼdu randa rinínedu binni, ruluidu ti videu ne rusaanadu ti publicación».

 Lu chupa si semana bisaana 550 hermanu 60,000 publicación. Rihuinni dxíchica, pur campaña riʼ gunda biʼniʼ predicárcabe stale binni.

Jma guyuucabe gana gucheechecabe diidxaʼ. Nabé guluu campaña especial riʼ gana ca hermanu de raqué. Stale tu guníʼ ique gaca precursor regular. Guyuu 24% jma de precursor regular ndaaniʼ guidxi Turquía lu doce beeu despué de guca campaña riʼ.

Ca hermanu ni beeda de xcaadxi guidxi guniʼcaʼ pabiáʼ gucané campaña que laacaʼ neca maʼ bibiguétacaʼ xquídxicaʼ. Ti hermana de Alemania láʼ Şirin bicaa: «Cadi nagana raca para ca hermanu de Turquía guni predicarcaʼ ra tiica nuucaʼ. Nagana guca para naa guneʼ ni, purtiʼ nabé natuéʼ. Peru campaña especial riʼ, ca oración ne ca hermanu de raqué gucané naa para gunda bineʼ ni. ¡Dede bineʼ predicar ne bisaanaʼ tratadu ndaaniʼ metru! Maʼ cadi nacaʼ ti binni natuí casi dxiqué».

Johannes, ti hermanu de Alemania, guníʼ: «Biziideʼ caadxi cosa ni zanda iquiiñeʼ ora guneʼ predicar. Ca hermanu de Turquía nabé rizaaláʼdxicaʼ guni predicarcaʼ guiráʼ binni guidxélacaʼ ne runi predicarcaʼ ra tiica nuucaʼ. Dxi maʼ bibiguetaʼ Alemania gudixheʼ iqueʼ guneʼ zaqueca, yanna jma maʼ stale binni runeʼ predicar que dxiqué».

Ti hermana de Francia láʼ Zeynep guníʼ: «Campaña riʼ nabé gucané ni naa para gucheecheʼ diidxaʼ ne gucané ni naa gacaʼ nadxibalú ne gapaʼ jma confianza Jiobá».

Ca hermanu que biʼniʼ sentircaʼ jma guyuucaʼ tobi si. Qué ziuu dxi guiaandaʼ guendarannaxhii ni guyuu lade ca hermanu que ne ra guyuucaʼ tobi si neca de gadxé gadxé guidxi laacaʼ. Jean-David, hermanu ni maca bizéʼtenu que, guníʼ: «Bíʼyadu pabiáʼ nachaʼhuiʼ ca hermanu que né laadu. Bidxaagalúcabe laadu ra lídxicabe ne biʼniʼ tratárcabe laadu casi xhamígucabe ne xfamíliacabe. Nannaʼ tobi si laanu ne ca hermanu stinu ni nuu lu guidubi Guidxilayú, purtiʼ stale biaje huayuundaʼ ni lu ca publicación stinu. Peru yanna la? naapiaʼ biiyaʼ dxandíʼ ni. Yanna jmaruʼ si nayecheʼ nuaaʼ purtiʼ  nacaʼ ti siervu stiʼ Jiobá. Rudieeʼ xquíxepeʼ Jiobá pur privilegiu sicarú bidii naa».

Ti hermana de Francia láʼ Claire guníʼ: «Ti familia si nga guiradu, neca nuu tu laa zeeda de Alemania, Dinamarca, Francia ne Turquía. Zeeda gácani casi ora nuxhiá Dios ca frontera stiʼ ca guidxi ni rucueeza laadu para chuʼdu tobi si».

Stéphanie, ti xpinni Cristu de Francia, laaca guníʼ: «Campaña especial riʼ gucané ni laadu gudiʼdu cuenta ni runi laadu tobi si nga guendarannaxhii ni nápadu Jiobá ne cadi cultura o diidxaʼ rinidu».

Stale de ca hermanu ni guyé lu campaña que guníʼ íquecaʼ chindézacaʼ Turquía para gacanecaʼ gaca dxiiñaʼ naroʼbaʼ ni cayaadxaʼ gaca raqué. Caadxi de laacaʼ maʼ nabézacaʼ raqué, rudiʼnu xquíxepeʼ laacabe pur dxiiñaʼ ni cayúnicabe riʼ.

Guzéʼtenu de ti lugar stini, raqué guyuu ti grupuhuiiniʼ de 25 publicador, ne stale iza ti ancianu si guyuu raqué. Peru lu iza 2015 yendeza xhoopaʼ hermanu de Alemania ne Países Bajos raqué para gacanecaʼ laacabe. ¡Guizáʼ nayecheʼ guyuu ca publicador que!

¿Ximodo runi sentir caadxi hermanu ni yegacanecaʼ guidxi Turquía yaʼ? Huayápacabe guendanagana, peru laaca huayápacabe stale ndaayaʼ. Guidúʼyanu xi ná chupa chonna de laacabe.

Federico, ti hermanu de España, ni maʼ bichaganáʼ ne napa biaʼ 40 iza, yendeza raqué. Laa guníʼ: «Cumu cadi stale cosa material napaʼ la? qué rucueeza cani naa, ne racané ni naa guneʼ ca cosa ni jma risaca». ¿Ñee riguube gana xcaadxi guni zacá la? Laabe bicábibe: «¡Riguaaʼ pue! Ora chindézaluʼ sti guidxi para gacaneluʼ binni gunibiáʼ Jiobá, ni dxandíʼ nga cusaanaluʼ xquendanabániluʼ lu nabe ne zuuyaluʼ ximodo zápabe lii».

Rudy, ti hermanu ni maʼ bichaganáʼ, de Países Bajos, ni napa biaʼ 60 iza, guníʼ: «Nabé nayecheʼ runi sentirdu ra gúcadu tobi de ca primé binni ni yegacané para gaca predicar ca binni ni qué  huayunadiaga mensaje riʼ. Ora gúʼyadu pabiáʼ nayecheʼ riuucabe ora guiziidicabe ni dxandíʼ la? guizáʼ rusiecheʼ ni laadu».

Sascha nga ti hermanu ni maʼ bichaganáʼ ni napa jma de 40 iza, ni beeda de Alemania, para cueza guidxi riʼ. Laabe guniʼbe: «Cada biaje chiguneʼ predicar, ridxelaʼ binni ni deruʼ primé biaje cucaadiaga stiidxaʼ Dios. Nabé ridxá tipa ladxiduáʼ gacaniáʼ laacabe gunibiáʼcabe Jiobá».

Ti hermana de Japón láʼ Atsuko, maʼ bichaganáʼ ne napa biaʼ 35 iza, guníʼ: «Dxiqué, para naa pa ñanda si maʼ ñeeda Armagedón. Peru despué de yendezaʼ Turquía, rudieeʼ xquíxepeʼ Jiobá pur cayáparuʼ paciencia. Ra jma guuyaʼ modo riguixhe chaahuiʼ Jiobá ca cosa ca, jmaruʼ si rucaa ni naa chuaaʼ gaxha de laabe».

Alisa, ti hermana de Rusia, ni napa jma de 30 iza, guníʼ: «Guneʼ xhiiñaʼ Jiobá ra chiguneʼ predicar sti guidxi, racané ni naa guuyaʼ dxandíʼ nacháʼhuibe» (Sal. 34:8). Ne laaca guniʼbe: «Cadi naca si Jiobá Bixhozeʼ, sínuque laabe nga ni jma xhamiguaʼ, purtiʼ runebiaʼyaʼ laabe jma ora ridideʼ lu gadxé gadxé guendanagana. Nabé nayecheʼ huabaneʼ, maʼ bizaacaʼ stale cosa galán ne maʼ gucuaaʼ stale ndaayaʼ».

Pur campaña especial ni guca Turquía riʼ maʼ yendá ca noticia galán stiʼ Reinu ra nuu stale binni. Peru nuuruʼ stale lugar ra caʼruʼ gaca predicar. Ca hermanu ni maʼ yendeza Turquía guiráʼ dxi ridxélacaʼ binni ni qué huayuu dxi gunadiaga de Jiobá. ¿Ñuuláʼdxiluʼ nigacaneluʼ ti lugar casi Turquía la? Pa zacá ni, bietenalaʼdxiʼ ni rieeteʼ lu Juan 4:35, ra ná: «Laindisa lú, laguuya ca ñaa ca guʼya tu ma nuu cani para iree cani guela». ¿Ñanda nigacaneluʼ xiixa lugar ni zeeda gaca casi ñaa ni maʼ nuu para guiree guela la? Pa zacá ni, dédeca yanna biʼniʼ xiixa para ugaandaluʼ ni naguixhe íqueluʼ. Gunna dxichi, pa guyúbiluʼ modo guni predicarluʼ ca lugar ni nuu jma zitu lu «guidxilayú», zápaluʼ stale ndaayaʼ, jma de biaʼ guníʼ íqueluʼ (Hech. 1:8).