Naquiiñeʼ quixhedxinu «ladxidóʼ cani cayuubaʼ»
Naquiiñeʼ quixhedxinu «ladxidóʼ cani cayuubaʼ»
«Jiobá maʼ gulí naa [...] para quixedxieʼ ladxidóʼ cani cayuubaʼ.» (ISA. 61:1, 2)
1. Ximodo gucané Jesús cani cayacaná, ne xiñee bíʼnibe ni.
JESÚS guníʼ: «Endaró stinne nga gune ni na ni biseenda naa, ne gunduuxe dxiiña stiʼ» (Juan 4:34). Ne ora bíʼnibe dxiiñaʼ bidii Dios laabe, qué nusaanabe de nusihuínnibe ca guenda ni napa Bixhózebe, ne jma bisihuínnibe gunnaxhiibe binni guidxilayú (1 Juan 4:7-10). Ti modo rusihuinni Jiobá nadxii laanu nga ora riguixhedxí ladxidoʼno. Nga runi, apóstol Pablu guníʼ nácabe «Dios stinu ne riguixhe dxí be ladxidóʼ no» (2 Cor. 1:3). Laaca bisihuinni Jesús nadxii binni dxi guyuu ndaaniʼ Guidxilayú, casi maca guníʼ Isaías zúnibe. Biblia na: «Luguiaʼyaʼ nuu espíritu stiʼ Jiobá, Señor ni jma nandxóʼ, purtiʼ maʼ gulí Jiobá naa para guiniéʼ diidxaʼ nacubi ne galán ra nuu cani nachaʼhuiʼ. Biseendabe naa para guchendaʼ venda cani cayuubaʼ ladxidóʼ, para guiniéʼ maʼ guilaa cani nuu de esclavu ne para guxheleʼ lú cani daguyoo; para guiniéʼ de iza gaca Jiobá nachaʼhuiʼ né binni, ne dxi guquixe Dios stinu ni cayuni binni; para quixhedxieʼ ladxidóʼ cani cayuubaʼ ladxidóʼ» (Isaías 61:1, 2). Ne dxi guyebe ndaaniʼ ti sinagoga ni nuu Nazaret guniʼbe cayaca ni na ca diidxaʼ que luguiabe (Luc. 4:16-21). Ne gúcani zaqué, biaʼ dxi bicheechebe diidxaʼ gudixhe íquebe uguube gana binni ne quixhedxibe ladxidóʼ cani nuu triste.
2, 3. Xiñee naquiiñeʼ chinanda ca xpinni Cristu ejemplu stiʼ Jesús ne quixhedxicaʼ ladxidóʼ binni.
2 Laanu laaca naquiiñeʼ gacanenu binni purtiʼ discípulo stiʼ Jesús laanu (1 Cor. 11:1). Pablu guníʼ: «Lausieche saa [...] ne cada tobi uyubi uzuhuaa chaahui stobi» (1 Tes. 5:11). Ca binni ni nayá ladxidóʼ nga cani jma caquiiñeʼ quixhedxinu ladxidoʼcaʼ purtiʼ nuucaʼ triste ne cayuubacaʼ. Xiñee yaʼ. Purtiʼ lu ca dxi «jma nagana» nabáninu riʼ, nabé nuu binni ni ruyubi puru si para laa lu cani riníʼ ne lu cani runi (2 Tim. 3:1).
3 Casi ruzeeteʼ ca diidxaʼ riguixhená zeeda lu Biblia, lu ca últimu dxi riʼ cadale binni ni ruyubi «para laa si, ne nisi bidxichi zacá ique caʼ. Zuni ca laaca nandxóʼ ne zaca ca nayáʼ, ne zaguiñe yu ca stiidxa Dios. Ma qué zuzuuba ca stiidxa jñaa ca ne bixhoze caʼ ne qué zulabi ca laacabe. Zabani ca modo na ique caʼ ne nin zanna ca pa nuu Dios. Qué zanaxhii ca binni ne qué ziá ca irutiʼ, ne nisi zazá ca zaníʼ ca binni. Qué zanda ucueeza ca laca laaca de guni ca ni na ique caʼ. Zuniná cabe binni ne zaca nanalaʼdxi cabe irá ni jneza. Zutoo cabe xhamigu cabe, ne qué zuni lú cabe guni cabe intiisi, ne zudxiiba cabe laca laacabe. Zuyubi cabe ni chuʼlaʼdxi cabe lugar de nuyubi cabe Dios». Ne zeʼ dxi ziyaca ca tiempu ca jma malu casi na ca diidxaʼ riʼ: «Cani canauchee ne canausiguii la? ze dxi jma rusi zinitilú caʼ» (2 Tim. 3:2-4, 13).
4. Xi cayaca ca dxi nabáninu riʼ.
4 Ne qué ridxagayaadinu modo nuu tiempu riʼ, purtiʼ Biblia na: «Naaze dxiichi binidxaba idubi guidxilayú» (1 Juan 5:19). Ora ruzeeteʼ Biblia «idubi guidxilayú», laaca caniʼni de ca políticu, de ca religión ni qué rusiidiʼ ni dxandíʼ, de ca negocio ne de guiráʼ ni riquiiñeʼ Binidxabaʼ para gucaa binni guiníʼ ique casi laa. Nga runi, ruzeeteʼ Biblia naca Binidxabaʼ «xaíque sti guidxilayú» ne rusicahui xquendabiaaniʼ binni (Juan 14:30; 2 Cor. 4:4). Xiñee zeʼ dxi jma maʼ zinitilú binni guidxilayú yaʼ. Purtiʼ cadxiichi Binidxabaʼ ne nanna maʼ cadi candaa para gunitilúcabe laa (Apo. 12:12). Maʼ qué zudiiruʼ Jiobá lugar Binidxabaʼ ne ca xpinni gúnicaʼ guendaquéiquiiñeʼ ne zusihuínnibe cadi dxandíʼ ni guníʼ Binidxabaʼ ora guníʼ cadi jneza modo runi mandarbe. ¡Nabé zatadxí ladxidoʼno dxi ca! (Gén., cap. 3; Job, cap. 2.)
Cucheechenu diidxaʼ nacubi ne galán lu guidubi Guidxilayú
5. Ximodo rihuinni cayaca dxiiñaʼ de guireeche diidxaʼ lu ca últimu dxi riʼ.
5 Ca dxi riʼ laaca cadúʼyanu cayaca ni na ti diidxaʼ riguixhená guníʼ Cristu: «Zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ» (Mat. 24:14). Zeʼ dxi ziroobaʼ dxiiñaʼ stiʼ Dios lu guidubi Guidxilayú. Yanna riʼ nuu jma de 7,500,000 ni rucheeche diidxaʼ ndaaniʼ 107,000 neza binni ridagulisaa. Guirácabe cucheechecabe stiidxaʼ Reinu stiʼ Dios, laani nga gobiernu ni bisiidiʼ Jesús binni (Mat. 4:17). Ne pur dxiiñaʼ riʼ, ratadxí ladxidóʼ ca binni ni cayacaná. Ne rihuinni zacá ni, purtiʼ lu iza dxiiñaʼ 2009 ne 2010 guyuu stale binni ni guca testigu stiʼ Jiobá ora guyuunísacaʼ, biaʼsi 570,601.
6. Xi riníʼ íqueluʼ de modo ziroobaʼ xhiiñaʼ Dios lu guidubi Guidxilayú.
6 Sti modo rihuinni ziroobaʼ dxiiñaʼ de guireeche diidxaʼ nga purtiʼ cayaca ne cabiʼxhiʼ stale libru ne revista ni rusiidiʼ de Biblia lu jma de gaayuʼ gayuaa diidxaʼ. ¡Qué huayuu dxi chuʼ tu guni biaʼ dxiiñaʼ cayúninu riʼ! Neca nuu xquidxi Jiobá ndaaniʼ ti guidxilayú ni naaze dxiichiʼ Binidxabaʼ, ca xpinni Dios cayúnirucaʼ dxiiñaʼ ne zeʼ dxi zidálecaʼ. Qué ñanda diʼ ñaca nga pa qué ñacané espíritu santu stiʼ Dios laanu ne pa qué ñábini laanu xi naquiiñeʼ gúninu. Ca binni ni rucaadiaga stiidxaʼ Reinu ni careeche lu guidubi Guidxilayú, ratadxí ladxidoʼcaʼ, cásica nexhedxí ladxidóʼ ca xpinni Dios.
Quixhedxinu ladxidóʼ ca xpinni Cristu
7. 1) Xiñee cadi galán cuézanu cuee Jiobá guiráʼ ni cayuniná laanu nagueendaca. 2) Xiñee nánnanu zanda guni huantarnu ora sanándacabe laanu ne ora tiidinu lu guendanagana.
7 Nabáninu ndaaniʼ guidxilayú malu, nga runi ridxaagalunu guendanagana ni rusiuubaʼ ladxidoʼno. Cadi galán diʼ cuézanu cuee Jiobá guiráʼ ni runiná laanu, pa caʼruʼ guedandá dxi nexheʼ gunitilube cani. Laga cabézanu ganda dxi ca, zadxaagalunu guendanagana ni zusihuinni pa qué zusaananu Jiobá ne pa zusihuínninu nuunu pur derechu ni nápabe de guni mandarbe (2 Tim. 3:12). Cumu racané Bixhózenu ni nuu guibáʼ laanu ne riguixhedxibe ladxidoʼno la? zanda chinándanu ejemplu stiʼ ca xpinni Cristu ni guyuu Tesalónica, laacaʼ qué nireecaʼ gana, gúpacaʼ fe ne qué nixhacaláʼdxicaʼ ora guzanándacabe laacaʼ ne ora gudíʼdicaʼ ra nagana (biindaʼ 2 Tesalonicenses 1:3-5).
8. Xi ejemplu zeeda lu Biblia ni rusihuinni riguu Jiobá gana ca xpinni.
8 Jiobá rudii stipa ca xpinni ora caquiiñecaʼ ni. Guzéʼtenu ejemplu stiʼ Elías. Ti biaje gucalaʼdxiʼ Jezabel, ti reina nabé mala, ñuuti laabe. Xi bíʼnibe óraque yaʼ. Nabé bidxíbibe, bixooñebe ne guniʼbe maʼ racaláʼdxibe gátibe. Peru qué nidindené Dios laabe, sínuque guluu gana laabe ne gucané laabe para gácabe nadxibalú ti gúnirube dxiiñaʼ bidii laabe (1 Rey. 19:1-21). Dxandíʼ riguu Jiobá gana xquidxi, ne zacá rihuínnini pur ni bizaaca ca xpinni ni bibani lu primé siglu. Sicaríʼ ridúʼndanu lu Biblia: «Iruti nuchiiña ca xpinni Cristu, cani nuu Judea ne Galilea ne Samaria. Ne jma rusi bizuhuaa chaahui ca lu stiidxa Dios ne bidale caʼ. Qué niree chu ca de laani ne ucané Espíritu Santu laacaʼ» (Hech. 9:31). ¡Galán nga gánnanu «[ra]cané Espíritu Santu» laanu gatadxí ladxidoʼno!
9. Xiñee riguu ejemplu stiʼ Cristu gana laanu.
9 Sti cosa ni riguixhedxí ladxidóʼ ca xpinni Cristu nga gúʼndacaʼ de ejemplu stiʼ Jesús ne gúnicaʼ casi bíʼnibe. Laaca laabe guniʼbe: «Latáʼ ra nuaa irá ni ma bidxaga de cuyubi modo guia ladxidóʼ, cani ma qué ganda guni irá ni rucaa cabe laa guni, purti para laa ruluíʼ naguixhe cabe ti ayubu xa yanni. Latáʼ ra nuaaʼ, zaziilaʼdxi ladxidóʼ to. Laudxiiba ayubu stinne xa yanni tu purti nasisi ni, cadi nanaa ni casi ni nua tu ca. Laudii lugar usiide laatu purti qué zaca nia laatu naduxhuʼ ne qué zadinde nia laatu» (Mat. 11:28-30). Cristu guca nachaʼhuiʼ né binni ne gucané laacabe. Ne ora guidúʼndanu ejemplu stibe ne gúninu stipa pur chinándanu laabe, riguuni gana laanu para gudxíʼlunu guiráʼ ni riguu xizaa laanu.
10, 11. Tuu nga cani zanda quixhedxí ladxidóʼ cani nuu ndaaniʼ neza binni ridagulisaa.
10 Ca bíʼchinu ne ca bizáʼnanu laaca riguixhedxicaʼ ladxidoʼno. Peru ca binnigola nga cani jma zanda gacané laanu ora cadídinu lu xiixa guendanagana. Ngapeʼ nga ni guníʼ discípulo Santiago: «Pa nuu tobi de laatu huará la? useenda caa ca hermanu gola de lade cani runi cre, iníʼ né ca Dios pur laabe». Xi zabeendube yaʼ. «Pa dxandí runi cre ca zuni Dios ni canaba ca la? zalá be, ne zandisa [Jiobá] laabe, ne pa huachee be la? zuxhá [...] stonda be.» (Sant. 5: 14, 15.) Peru guiráʼ ca binni ridagulisaa zanda uguusaacaʼ gana laacaʼ.
11 Nuu gunaa jma riuulaʼdxiʼ guiniʼné sti gunaa de xiixa guendanagana ni rapa. Ca gunaa ni maʼ huaniisi lu Stiidxaʼ Dios, zanda gudiicaʼ conseju galán ca gunaa ni jma nahuiiniʼ, purtiʼ laacaʼ zándaca maʼ gudíʼdicaʼ ra cadíʼdicabe. Pa gucaadiaga chaahuicabe ne gusihuínnicabe riénecabe sti gunaa purtiʼ laaca gunaa laacabe la? nabé zacanécabe ca gunaa ni jma nahuiiniʼ (biindaʼ Tito 2:3-5). Peru ca binnigola ne xcaadxi xpinni Cristu laaca caquiiñeʼ gacanecaʼ «cani cadxibi» ni nuu ndaaniʼ neza binni ridagulisaa (1 Tes. 5:14, 15). Cadi guiaandaʼ laanu «rusieche [Dios] laanu ora tiica acaná ladxidóʼ no» para ganda «usieche nu stobi ni cayacaná ladxidóʼ» (2 Cor. 1:4).
12. Xiñee nabé risaca chuunu ca guendaridagulisaa ni rápanu.
12 Ca guendaridagulisaa ni rápanu laaca nabé risácacani purtiʼ riguu cani gana laanu. Lúcani rizíʼdinu stale cosa ni zeeda lu Biblia. Guidúʼyanu xi ruzeeteʼ Stiidxaʼ Dios de laani: «Byuíʼ né Judas ne Silas ca hermanu que stiidxa Dios [...]. Ne zacá bisieche ca laacabe ne ucané ca laacabe bizuhuaa chaahui cabe» (Hech. 15:32). Ne ante guzulú ca guendaridagulisaa ne ora maʼ bilúxecani zanda ugúʼsaanu gana laanu ora güinu diidxaʼ né ca xpinni Cristu. Nga runi, pa cadxaagalunu guendanagana, cadi guixélenu de ca bíʼchinu ne ca bizáʼnanu, purtiʼ qué zabeendunu gastiʼ pa guixélenu de laacabe (Pro. 18:1). Jma galán chinándanu conseju bidii apóstol Pablu riʼ: «Naquiiñe ucáʼ ique nu acané saa nu para ganaxhii nu jma, ne guni nu ni nachaʼhuiʼ. Ne cadi guni nu casi cani rusaana de che cultu, sínuque cada tobi acané stobi para indisa ique, ne jma rusi yanna purti caduʼya nu ma zeda dxiña dxi gueeda Jesucristu Señor stícanu» (Heb. 10:24, 25).
Stiidxaʼ Dios nga riguixhedxí ladxidoʼno
13, 14. Ximodo riguu Stiidxaʼ Dios gana laanu.
13 Pa maʼ xadxí de guyuʼnísanu o pa deruʼ cazíʼdinu de Jiobá ne cani chiguni, guiranu nápanu Biblia, ti libru ni riguixhedxí ladxidoʼno. Ngapeʼ nga ni guníʼ Pablu de laani: «Irá ni ucuá lu Xquiʼchi Dios ucuá para usiidi laanu, ti pur laani gata dxí ladxidóʼ no ne cadi ixhacalaʼdxi nu. Ne zacá cadi guiaana nu de icá lú nu Dios» (Rom. 15:4). Stiidxaʼ Dios riguu gana ca xpinni Cristu ne racaneni laacaʼ «ti iziidi chaahui ca [...] para ganda [gúnicaʼ] irá ni riree ndu» (2 Tim. 3:16, 17). ¡Nabé ratadxí ladxidoʼno gánnanu de cani naguixhe ique Jiobá guni ne riéchenu purtiʼ nánnanu zadxiña dxi gaca chaahuiʼ modo nabáninu yanna! Nga runi guidúʼndanu Biblia ne ca libru ne revista ni rusiene de laani. Pa gúninu zacá, zatadxí ladxidoʼno ne zabeendurunu stale cosa.
14 Jesús bidii laanu ti ejemplu sicarú para chinándanu. Laabe biquiiñebe Stiidxaʼ Dios para gusiidibe ne para quixhedxibe ladxidóʼ binni. Biásasibe de lade gueʼtuʼ, guyebe ra nuu chupa discípulo stibe ne «bisiene be [laacaʼ] xi na Xquiʼchi Dios», ne yendá cani bisiénebe ndaaniʼ ladxidoʼcaʼ (Luc. 24:32). Apóstol Pablu biʼniʼ cásipeʼ modo biʼniʼ Cristu, purtiʼ stale biaje biquiiñebe Stiidxaʼ Dios para bisiénebe binni. Xi biʼniʼ stale de ca binni ni bicaadiaga laabe yaʼ. Casi ca de Berea «bicaa diaga ca stiidxa Dios ne stale gana ne irá dxi ma cuyubi ca lu Xquiʼchi Dios» (Hech. 17:2, 10, 11). Racá ridúʼyanu naquiiñeʼ guidúʼndanu Biblia guiráʼ dxi. Pa guidúʼndanu ni né ca guiʼchiʼ ni ribee xquidxi Dios la? zatadxí ladxidoʼno ne zadxélanu modo gudxíʼlunu ca tiempu nagana riʼ.
Xcaadxi modo zanda quixhedxinu ladxidóʼ binni
15, 16. Gunáʼ nga caadxi modo zanda gacanenu ne uguʼnu gana ca bíʼchinu ne ca bizáʼnanu.
15 Nuu stale modo para gacanenu ne uguʼnu gana ca bíʼchinu ne ca bizáʼnanu. Ñee zanda gacanenu cani huará o cani maʼ nagola para chisinu guendaró sticaʼ, pa qué ganda chisicaʼ ni la? Laaca zanda gacanenu cani caquiiñeʼ gaca xiixa dxiiñaʼ ralidxi (Fili. 2:4). Laaca zanda gábinu laacabe galán modo rannaxhiicabe binni, modo ruyúbicabe gúnicabe xiixa, modo rusihuínnicabe nadxibalúcabe, modo nápacabe fe o xcaadxi guenda galán ni rusihuínnicabe.
16 Ti modo zanda quixhedxinu ladxidóʼ ca xpinni Cristu ni maʼ huaniisi nga chigánnanu laacaʼ ne gucaadiáganu laacaʼ ora gábicaʼ laanu xi cadíʼdicaʼ ne xi ndaayaʼ stiʼ Jiobá maʼ huacaacaʼ ora rúnicaʼ xhiiñabe. Zándaca laanu nga iguidxi fe stinu ora chigánnanu laacabe. Ora chuunu ra nuucabe, zanda gúʼndanenu laacabe xiixa ni zeeda lu Biblia o ni zeeda lu ca libru ne revista ni rudii xquidxi Dios laanu. Galán gúʼndanenu laacabe tema ni chiguiuundaʼ lu Torre stiʼ ni rapa o ra chiguiuundaʼ lu Guendaridagulisaa ra Riuundaʼ Biblia ni nexheʼ guiuundaʼ semana ca. Laaca zanda guidúʼyanenu laacabe ti DVD ni ribee xquidxi Dios, o guidúʼndanenu laacabe o güínenu laacabe xiixa ni bizaaca ti xpinni Cristu ni reeda lu ca guiʼchiʼ ni rudii xquidxi Dios.
17, 18. Xiñee zanda guni crenu zacané Jiobá laanu ne zaguixhedxí ladxidoʼno pa qué gusaananu laa.
17 Ora guidúʼyanu caquiiñeʼ ti xpinni Cristu quixhedxícabe ladxidóʼ la? zanda guzéʼtenu laabe lu ca oración ni rúninu (Rom. 15:30; Col. 4:12). Pa cá íquenu gacanenu stobi o pa cadídinu lu xiixa guendanagana, naquiiñeʼ gápanu fe cásica gupa David ora biʼndaʼ: «Bilaa guiráʼ ni nualuʼ luguiáʼ Jiobá, ne laapebe zacanebe lii. Qué ziuu dxi gudiibe lugar guitende ñee cani runi ni jneza» (Sal. 55:22). Pa qué guixélenu de Dios la? ziuube gaxha de laanu guiráʼ ora para gacanebe laanu ne uguube gana laanu.
18 Dxiqué gudxi Jiobá ca xpinni: «Naa... naapiaʼ nga caguixhedxiéʼ ladxidoʼto» (Isa. 51:12). Yanna riʼ laaca caguixhedxibe ladxidoʼno, ne laaca riguube ndaayaʼ ca stipa ni rúninu pur cayacanenu cani nuu triste, ora gábinu laacaʼ xiixa ne ora gúninu xiixa pur laacaʼ. Pa cabézanu guibáninu guibáʼ o lu Guidxilayú riʼ, guiranu riuʼnu gana ora ridúʼndanu ca diidxaʼ ni gudxi Pablu ca xpinni Cristu ni bibí: «Nabé nadxii Dios laanu ne uca nachaʼhui ne laanu, nga runi bidii laanu ti enda nayeche ni qué zaluxe, ne gudixhe ni sicarú para laanu. Yanna rinaba du laabe ne Jesucristu Señor stinu usieche cabe ladxidóʼ to ne acané cabe laatu iníʼ tu ne guni tu puru si ni nachaʼhuiʼ» (2 Tes. 2:16, 17).
Ñee rietenaláʼdxinu cani zeeda raríʼ la?
• Pa guidubi maʼ bigaanda dxiiñaʼ ni cayúninu de quixhedxinu ladxidóʼ cani cayuubaʼ.
• Gunáʼ nga caadxi modo zanda quixhedxinu ladxidóʼ binni.
• Xi textu cusihuinni riguixhedxí Jiobá ladxidóʼ ca xpinni.
[Guendarinabadiidxaʼ stiʼ párrafo]
[Dibuju/foto ni zeeda lu yaza 28]
Ñee riguixhedxinu ladxidóʼ cani cayacaná la?
[Dibuju/foto ni zeeda lu yaza 30]
Pa nahuiininu o pa maʼ huaniisinu, zanda uguʼnu gana xcaadxi binni
