«Naa nuaaniáʼ lii»
«Naa nuaaniáʼ lii»
«Stale tu zuyubi guiene [...], ne zadale ca binni ni ganna xii nga ni dxandíʼ.» (DAN. 12:4)
XI NICÁBILUʼ.
Xi huayacané binni ganna «xii nga ni dxandíʼ» ca dxi stinu riʼ.
Ximodo cadale cani riuulaʼdxiʼ guiziidiʼ ni dxandíʼ.
Xi caquiiñeʼ xquidxi Jiobá para guiziidiʼ binni xii nga ni dxandíʼ.
1, 2. 1) Ximodo nánnanu nuuné Jesús ca discípulo stiʼ yanna ne ziuunerube laacaʼ despué. 2) Xiná Daniel 12:4 zabeendú cani guʼndaʼ chaahuiʼ Stiidxaʼ Dios.
BIXUIʼLÚ maʼ nuuluʼ ndaaniʼ Paraísu. Guiráʼ siadóʼ guibániluʼ, runi sentirluʼ maʼ biziiláʼdxiluʼ ne napuʼ stale gana para guʼnuʼ dxiiñaʼ. Nin ti ladu cadi cayuubaʼ lii, purtiʼ maʼ gastiʼ ca guendahuará gúpaluʼ dxiqué. Nayaʼni dxindxi ruuyaluʼ, runadiaga chaahuiluʼ, riuuxiiluʼ guiráʼ ni rindáʼ naxhi, nanixe roloʼ ne runi sentir ládinu xi cazaaca. Napuʼ stale stipa, nuuluʼ nayecheʼ né ca dxiiñaʼ stiuʼ, napuʼ stale xhamíguluʼ ne gastiʼ qué riguu xizaa lii. Guiráʼ ndiʼ nga ndaayaʼ ni zapuʼ ora maʼ guni mandar Reinu stiʼ Dios. Cristu Jesús, Rey ni gulí Dios zaguu ndaayaʼ guiráʼ ca xpinni ne zusiidiʼ laacabe gunibiáʼcabe Jiobá.
2 Zaguu Dios ndaayaʼ ca xpinni lu guidubi Guidxilayú ora maʼ guzulú guiziidicabe de laa. Qué huayuu dxi gusaana Jiobá ne Jesús ca xpinni ni ruzuubaʼ diidxaʼ. Ne ante cheʼ Jesús guibáʼ, gudxi ca discípulo stiʼ qué zaxeleʼ de laacabe (biindaʼ Mateo 28:19, 20). Para iguidxi fe stinu lu cani guníʼ Jesús, guidúʼyanu xiná ti diidxaʼ riguixhená ni guníʼ Dios guicá raca chupa mil gaayuʼ gayuaa iza, ndaaniʼ guidxi Babilonia. Yanna riʼ nabáninu lu «ca últimu dxi», ne ora bizeeteʼ Daniel xi zazaaca tiempu riʼ guníʼ: «Stale tu zuyubi guiene [...], ne zadale ca binni ni ganna xii nga ni dxandíʼ» (Dan. 12:4). Diidxaʼ hebreu ni biquiiñeʼ ora guníʼcabe «stale tu zuyubi guiene», riniʼni guiene chaahuiʼ binni xiixa. Nga runi, cani guʼndaʼ chaahuiʼ Stiidxaʼ Dios zacaacaʼ ti ndaayaʼ nabé sicarú, purtiʼ ziénecaʼ xipeʼ nga rusiidiʼ Biblia. Cumu stale binni zanna de laani la? zanda gusiidicabe ni xcaadxi ne qué zácani nagana para laacabe. Laga cadúʼndanu ximodo cayaca ni na ca diidxaʼ riʼ, zadúʼyanu nuuné Jesús ca discípulo stiʼ ca dxi riʼ ne zudiʼnu cuenta napa Jiobá poder para guni ni maʼ guníʼ.
BIÉNECABE «XII NGA NI DXANDÍʼ»
3. Xi bizaaca guti si ca apóstol que.
3 Pablu maca guníʼ ziuu binni ni gusiguii lade ca xpinni Cristu, ne guti si ca apóstol que bihuínnicabe. Nabé nagueenda guzá ni bisiidicabe, cásica nagueenda rizá ti guí ngola ni cuzaaquiʼ ti guiʼxhiʼ (Hech. 20:28-30; 2 Tes. 2:1-3). Gudiʼdiʼ si stale siglu, maʼ qué liica ñanna binni «xii nga ni dxandíʼ», nin ca binni ni guníʼ xpinni Cristu laa qué ñánnacaʼ ni. Neca guníʼ ca xaíque stiʼ stale yuʼduʼ runi crecaʼ ni cá lu Stiidxaʼ Dios, bisiidicaʼ «ni rusiidi binidxabaʼ», peru qué ñuulaʼdxiʼ Jiobá guiráʼ ni bíʼnicabe (1 Tim. 4:1). Bisiidicabe naca Dios ti Trinidad, qué rati alma stiʼ binni ne rié caadxi alma ti lugar ra cacaguí para gacanacaʼ, zaqué nga casi ora nusaanacabe binni lu gueelacahui, purtiʼ qué ñánnacaʼ ni dxandíʼ.
4. Xi biʼniʼ caadxi xpinni Cristu dede lu iza 1870 para biénecaʼ «xii nga ni dxandíʼ».
4 Peru dede dxi biuʼnu iza 1870, biaʼ cuarenta iza ante guzulú ca últimu dxi, bizulú bichaa stale cosa. Ca iza que bidagulisaa caadxi xpinni Cristu de guidxi Pensilvania (Estados Unidos) para gúʼndacaʼ ne guiénecaʼ Biblia, ti gánnacaʼ «xii nga ni dxandíʼ» (2 Tim. 3:1). Biree lácabe Binni Ruundaʼ Biblia. Peru qué ñuucabe lade ca binni ni na «nuu xpiaani ne cani na riene», purtiʼ maca guníʼ Jesús qué zudii Jiobá lugar guiene ca binni riʼ xii nga ni dxandíʼ (Mat. 11:25). Ca Binni Ruundaʼ Biblia riʼ, qué nudxiibacaʼ laca laacaʼ, sínuque gucuá íquecaʼ gúnicaʼ ni na Dios de guidubi ladxidoʼcaʼ. Biindaʼ chaahuicabe Stiidxaʼ Dios, guníʼ íquecabe de laani ne guníʼcabe xi cayénecabe lu Biblia. Laaca bichaagacabe ca relatu zeeda lu Biblia ne biindacabe ni bicaa xcaadxi binni ni gupa gana ñene Stiidxaʼ Dios casi laacabe. Chaahuiʼ chaahuiʼ, ca Binni Ruundaʼ Biblia riʼ biénecaʼ xii nga ni dxandíʼ, ni qué ñanda ñene binni pur stale siglu.
5. Xi para biree caadxi tratadu ni biree lá The Old heology (Ni biénecabe de Dios dxiqué).
5 Neca nabé cayecheʼ ca Binni Ruundaʼ Biblia riʼ pur guiráʼ ni caziidicaʼ, qué nuchacaʼ bi yánnicaʼ pur laani ne laaca qué niniʼcaʼ cusiidicaʼ xiixa ni nacubi (1 Cor. 8:1). Para ganda gacanécabe binni guiene xi rusiidiʼ Biblia, guleecabe caadxi tratadu ni láʼ The Old Theology (Ni biénecabe de Dios dxiqué). Xi bisiidiʼ primé tratadu que yaʼ. «Ni caquiiñeʼ guʼndaʼ binni para guiene Biblia, ti guixeleʼ de guiráʼ costumbre ni cadi jneza ne guiziidiʼ ni dxandíʼ de Jesús ne de ca apóstol guyuu dxiqué» (The Old Theology, númeru 1, abril 1889, yaza 32).
6, 7. 1) Xi maʼ gucané Jiobá laanu guiénenu dede lu iza 1870. 2) Xii nga ni jma bisiecheʼ lii dxi bizulú cayuundaluʼ Biblia.
6 ¡Stale cosa sicarú nga maʼ biénecabe dede dxi bizulúcabe raca jma de ti gayuaa iza! a Qué rusiidisícabe laanu caadxi cosa ni caquiiñeʼ gánnanu, sínuque racanécani laanu para guibáninu galán, chuʼnu nayecheʼ, gánnanu xi pur nabáninu ne cuézanu ni chigudii Dios laanu. Racanécani laanu gánnanu pabiáʼ nadxii Jiobá laanu ne xi chigúnibe. Laaca rusiidicani laanu tuu nga Jesús, xiñee bibánibe ndaaniʼ Guidxilayú, xiñee gútibe ne xi dxiiñaʼ cayúnibe yanna. Cani rusiidiʼ Biblia racanécani laanu gánnanu xiñee cudii Dios lugar chuʼ cosa malu yanna, xiñee rátinu, ximodo naquiiñeʼ guni orarnu ne xi naquiiñeʼ gúninu para chuʼnu nayecheʼ.
7 Yanna maʼ riénenu ca diidxaʼ riguixhená ni qué ñene binni pur stale iza ne cadúʼyanu cayaca ni nácani lu ca últimu dxi riʼ (Dan. 12:9). Lu Biblia zeeda guiráʼ cani, peru cani jma ruzeeteʼ de laacani nga ca Evangeliu ne libru stiʼ Apocalipsis. Jiobá laaca maʼ bisiene laanu caadxi cosa ni qué rihuinni, casi dxi guca Jesús rey, dxi gudinde Jesús ne Binidxabaʼ ne dxi guleebe laa de guibáʼ (Apoc. 12:7-12). Laaca maʼ bisiene Dios laanu xi pur cayaca caadxi cosa ni ridúʼyanu, casi guerra, xu, guendahuará, gubiña ne xiñee cadale binni malu ne pur laacaʼ «jma nagana» para guibani binni tiempu riʼ (2 Tim. 3:1-5; Luc. 21:10, 11).
8. Tu naquiiñeʼ gusisácanu pur ca cosa ni ridúʼyanu ne runadiáganu.
8 Qué raca nagana para laanu guiénenu ca diidxaʼ ni gudxi Jesús ca discípulo stiʼ: «Dichoso laatu pur irá ni cayuuya tu riʼ. Purti stale profeta ne stale rey ucalaʼdxi ñuuya ni cayuuya tu riʼ, ne qué ñuuyaʼ. Ne ucalaʼdxi ca ñuna diaga ca ni cayuna diaga tu riʼ, peru qué ñuu dxi ñuna diaga caʼ» (Luc. 10:23, 24). Laanu, ca discípulo stiʼ Jesús, rusisácanu Jiobá pur rudii lugar gúʼyanu ne guiénenu ca cosa riʼ, ne rudiʼnu xquíxepeʼ laabe pur biseendabe espíritu santu stibe para gacané laanu guiénenu «irá ni dxandíʼ» (biindaʼ Juan 16:7, 13). Nga runi, cadi gusaana de gusisácanu guiráʼ ni maʼ bizíʼdinu ne chuuláʼdxinu gusíʼdinu ni sti binni.
STALE TU CAZIIDIʼ «XII NGA NI DXANDÍʼ»
9. Xi invitación beeda lu revista riʼ lu beeu abril iza 1881.
9 Lu beeu abril iza 1881, ante gusaa chupa iza de biree primé revista riʼ, biree ti invitación luni ra canábacabe chuʼ ti mil binni para gucheeche diidxaʼ. Tema que na sicaríʼ: «Guiráʼ cani ganda iquiiñeʼ ti galaa dxi de tiempu stiʼ o jma para guni xhiiñaʼ Señor, rápadu gana [...] gábidu laacaʼ: checaʼ ndaaniʼ guidxi roʼ ne guidxi huiiniʼ, casi colportor o precursor, pa ganda, ne gúnicaʼ stipa pur guidxélacaʼ guiráʼ ca binni riuulaʼdxiʼ guni adorar Dios de guidubi ladxidóʼ, peru qué ganna chaahuicaʼ ximodo gúnicaʼ ni; laguyubi laacabe para gusiiditu laacabe gunibiáʼcabe Dios ne gánnacabe guiráʼ cosa sicarú ni cá lu Stiidxabe».
10. Xi biʼniʼ stale binni ora gúnnacaʼ caquiiñeʼ chuʼ ti mil binni para gucheeche diidxaʼ.
10 Gucané invitación riʼ ca Binni Ruundaʼ Biblia para guiénecaʼ gunáʼ nga tobi de ca dxiiñaʼ risaca naquiiñeʼ guni cani dxandíʼ xpinni Cristu: gucheechecaʼ diidxaʼ. Ca dxi que, chupa chonna gayuaa si nga rié ra ridagulisaacabe, ngue runi, ruluíʼ nabé stale binni ngue canábacabe. Peru xi runi stale binni ora ruundacaʼ ti tratadu o ti revista yaʼ. Rudiicaʼ cuenta maʼ biénecaʼ xi rusiidiʼ Biblia ne ricá íquecaʼ gacanecaʼ xcaadxi binni. Guidúʼyanu xi biʼniʼ ti señor de Londres biindaʼ si revista Torre stiʼ ni rapa ne ti folletu ni bicaa ca Binni Ruundaʼ Biblia. Lu iza 1882 bicaabe ca diidxaʼ riʼ: «Rapaʼ gana gábitu naa xi guiniéʼ ne ximodo gucheecheʼ diidxaʼ ti ganda guneʼ dxiiñaʼ sicarú ni racalaʼdxiʼ Dios gaca».
11, 12. 1) Xi gucuá ique ca colportor dxi bicheechecaʼ diidxaʼ. 2) Ximodo gucané ca colportor para guyuu «grupu», o neza binni ridagulisaa.
11 Lu iza 1885 nuu biaʼ chonna gayuaa Binni Ruundaʼ Biblia ni runi dxiiñaʼ casi colportor (lu diidxastiá binibiáʼcabe laacaʼ casi repartidor). Gucuá íquecabe gacanécabe binni gaca discípulo stiʼ Jesucristu, cásica rúninu yanna. Peru gadxé modo bíʼnicabe dxiiñaʼ riʼ dxiqué. Yanna riʼ ridúʼndanenu ti binni si, de racá maʼ runi invitarnu laa cheʼ ra ridagulisaanu. Ca colportor guyuu dxiqué, rusaananecaʼ binni libru ne rutagulisaacaʼ guirácabe para gúʼndanecaʼ laacabe Stiidxaʼ Dios. Lugar de guʼndanécabe ti binni si la? ruzáʼcabe «grupu», o ti neza binni ridagulisaa.
12 Lu iza 1907 guyuu ti grupu de colportor ni guyé ndaaniʼ stale guidxi para guyúbicaʼ guiráʼ ca binni ni maʼ napa libru La Aurora del Milenio (laaca biree lani Estudios de las Escrituras). Revista riʼ guníʼ: «[Ca binni riuulaʼdxiʼ guiziidiʼ] bidagulisaacaʼ ralidxi tobi de laacaʼ. Guidubi ti dxi domingu bisiene colportor que laacabe xi naguixhe ique Dios guni para binni guidxilayú, ne sti domingu que gudxi laacabe cadi gusaana de guidagulisaacabe». Peru lu iza 1911 bidxaa modo rusiidicabe binni. Guyuu cincuenta y ocho binnigola ni riganna ca binni ridagulisaa, laacaʼ bidiicaʼ libana para gucaadiaga binni guidubi naca Estados Unidos ne Canadá, laaca bicaacabe lá ca binni ni ridagulisaané laacabe ne paneza ralídxicaʼ. De raqué riguíxhecabe paraa guidagulisaa ca binni que ne zaqué nga ruzulú ti «grupu». Yanna, panda neza binni ridagulisaa gupa ca Binni Ruundaʼ Biblia iza 1914 yaʼ. Gúpacabe ti mil chupa gayuaa guidubi Guidxilayú.
13. Xiñee ridxagayaaluʼ ora gannuʼ pabiáʼ cadale binni ni cayanna «xii nga ni dxandíʼ» ca dxi stinu.
13 Yanna maʼ nuu biaʼ 109,400 neza binni ridagulisaa lu guidubi Guidxilayú, ne ndaaniʼ cani nuu biaʼ 895,800 precursor. Biaʼ xhono millón de binni maʼ nanna «xii nga ni dxandíʼ», ne rúnicaʼ ni nani lu xquendanabánicaʼ. Biblia na: «Guidxi huiiniʼ riʼ zácani ti mil, ne zácani ti guidxi guizáʼ nadipaʼ. Naa, Jiobá, naa chigutaleʼ ni ora gacalaʼdxeʼ» (Isaías 60:22). b Nabé ridxagayaanu pabiáʼ stálecabe, jmaruʼ si ora guietenaláʼdxinu guníʼ Jesús «zaca nanalaʼdxi» binni laacabe purtiʼ cayúnicabe ni na ne zazananda binni laacabe, zuseguyoo laacabe ne dede zuuti laacabe (Luc. 21:12-17). Binidxabaʼ, ca demonio ne ca binni guidxilayú cucaalucaʼ ca xpinni Jiobá, neca zacá cayacanécabe binni gaca discípulo ne cabeendúcabe stale cosa galán. Yanna riʼ, cucheechecabe diidxaʼ «idubi naca guidxilayú», cásica ndaaniʼ guidxi ra nabé nandáʼ o ra nabé riaba hielu, ne ca lugar ra huaxiéʼ nuu binni (Mat. 24:14). Qué ñanda ñúnicabe guiráʼ nga pa qué ñacané Jiobá laacabe.
NABÉ CADALE CA BINNI NI CAZIIDIʼ «XII NGA NI DXANDÍʼ»
14. Xiñee cayacané ca revista ne ca libru stinu para guidale binni ni caziidiʼ «xii nga ni dxandíʼ».
14 Cumu stale nga tu rucheeche diidxaʼ la? nabé cadale binni ni caziidiʼ «xii nga ni dxandíʼ», peru laaca riquiiñenu libru ne revista. Lu beeu julio iza 1879, ca Binni Ruundaʼ Biblia guleecaʼ primé númeru stiʼ revista riʼ, dxiqué biree lani Zionʼs Watch Tower and Herald of Christʼs Presence (La Torre del Vigía de Sión ne Heraldo de la Presencia de Cristo). Para guca revista que, gudíxecabe ti empresa para biʼniʼ 6,000 de laani lu diidxaʼ inglés. Gulícabe Charles Taze Russell para guʼyaʼ xi guicá lu revista que, dxiqué nápabe 27 iza. Peru laaca guyuu gaayuʼ Binni ni Ruundaʼ Biblia ni maʼ huaniisi lu stiidxaʼ Dios para gacané laabe. Yanna maʼ riree revista Torre stiʼ ni rapa lu 195 diidxaʼ. Laani nga revista ni jma ruundaʼ binni lu guidubi Guidxilayú, raca 42,182,000 de laani. Despué de laani maʼ zeeda revista ¡Despertad!, riree 41,042,000 de laani lu 84 diidxaʼ. Ne guiráʼ iza raca biaʼ 100 millón de libru ne Biblia.
15. Paraa riree bueltu ni riquiiñeʼ para gaca libru ne revista stinu.
15 Para gaca dxiiñaʼ roʼ riʼ, riquiiñeʼ bueltu ni rudii binni biaʼ naʼ ladxidóʼ (biindaʼ Mateo 10:8). Cani nanna pagala saca ti imprenta, pabiáʼ bueltu riquiiñeʼ para guidxela guiʼchiʼ, tinta ne xcaadxi cosa ni riquiiñeʼ para laani, nabé ridxagayaacaʼ ora ruuyacaʼ randa raca dxiiñaʼ riʼ né ca bueltu si ni rudii binni. Ti xpinni Cristu ni rizíʼ ca cosa ni riquiiñeʼ para gaca libru ne revista ndaaniʼ ca Yoo Betel guníʼ: «Ora riguuya ca hombre ni runi negocio ca máquina ni nuu Betel ridxagayaacaʼ xi guiráʼ dxiiñaʼ randa rúninu né bueltu si ni rudii binni. Laaca ridxagayaacabe ora ruuyacabe guiráʼ ca binni nahuiiniʼ cayuni dxiiñaʼ Betel ne pabiáʼ nayecheʼ nuucaʼ».
ZANNA GUIRÁʼ BINNI «XII NGA NI DXANDÍʼ»
16. Xi para caziidiʼ binni «xii nga ni dxandíʼ».
16 Xiñee racalaʼdxiʼ Dios ganna binni «xii nga ni dxandíʼ». Cayúnibe ni purtiʼ racaláʼdxibe guilá «irá binni, ne ganna» chaahuicaʼ xipeʼ nga rusiidiʼ Biblia (1 Tim. 2:3, 4). Rápabe gana guiziidiʼ binni ni cá lu Biblia ti guni adorarcaʼ laabe modo racaláʼdxibe ne guicaacaʼ ndaayaʼ stibe. Cumu cusiidiʼ Jiobá binni «xii nga ni dxandíʼ» la? cayanda cutagulisaabe ti grupu de xpinni Cristu ni bibí pur espíritu. Ne laaca cutagulisaabe «jma binni», ni «za [...] de irá ladu ne de irá guidxi ne irá idioma riníʼ binni». Guiráʼ ca binni riʼ cabézacaʼ guibánicaʼ sin gáticaʼ ndaaniʼ Guidxilayú (Apoc. 7:9).
17. Xi pur cadale ca binni ni cayuni adorar Jiobá jneza.
17 Lu ti gayuaa treinta iza ni maʼ gudiʼdiʼ riʼ, nabé maʼ bidale binni ni cayuni adorar Jiobá jneza. Racá ridúʼyanu pabiáʼ cayacané Dios ne Rey stiʼ, Jesucristu, ca xpinni, nuunécabe laacaʼ para guluíʼcabe laacaʼ xi gúnicaʼ, para gápacabe laacaʼ, ti ganda gúnicaʼ dxiiñaʼ sticaʼ ne para gusiidicabe laacaʼ. Modo cadale binni ni caziidiʼ xi cá lu Biblia, laaca rusihuínnini zuni Jiobá ni maʼ guníʼ. «Guidxilayú riʼ zadxá típani de guiráʼ ni rusiidiʼ Jiobá cásica dxaʼ tipa nisadóʼ.» (Is. 11:9.) ¡Nabé zaguu Jiobá ndaayaʼ laacabe dxi ca!
[Nota]
a Rinábadu lii gúʼyaluʼ DVD Los testigos de Jehová: una historia de fe viva. Parte 1: Salen de la oscuridad ne Los testigos de Jehová: una historia de fe viva. Parte 2: Dejan brillar su luz.
[Guendarinabadiidxaʼ stiʼ párrafo]
[Imagen ni zeeda lu yaza 6]
Ca Binni Ruundaʼ Biblia qué nudxiibacaʼ laca laacaʼ ne bíʼnicaʼ ni na Dios de guidubi ladxidoʼcaʼ
[Imagen ni zeeda lu yaza 7]
Nabé rusisaca Jiobá ca stipa rúninu para gusíʼdinu «xii nga ni dxandíʼ»
