1. Xi biʼniʼ Jiobá pur nadxii binni guidxilayú.

 JIOBÁ nga Dios ni nabani ne qué ziuu dxi guinitilube. Laabe nga rábibe laanu xi naquiiñeʼ gúninu para guicaanu guendanabani ni qué zaluxe. Ni canábabe laanu gúninu riʼ, qué zuchaabe ni, purtiʼ «stiidxa [Jiobá] qué ziuu dxi initilú» (1 Ped. 1:23-25). ¡Rudiʼnu xquixe Dios ra bisihuinni pabiáʼ nadxii laanu purtiʼ bisaanané laanu Biblia, ra cá guiráʼ ni caquiiñeʼ gánnanu para gápanu guendanabani!

2. Xi guníʼ Jiobá guicá lu Biblia para iquiiñeʼ xquidxi.

² Jiobá nga láʼ Dios, ne laabe nga guniʼbe guicá labe (o xlabe) lu Stiidxabe ti ganna xquídxibe tu labe. Primé biaje rieeteʼ lá Jiobá lu Biblia nga dxi bizaʼbe «guibáʼ ne guidxilayú» (Gén. 2:4). Gudiʼdiʼ si tiempu, bíʼnibe ti milagru para bicaabe tu labe lu caadxi guié bata ra zeeda Chii Mandamientu ni bidiibe Moisés. Primé Mandamientu que ruzulú sicaríʼ: «Naa nga Jiobá, Dios stiluʼ» (Éx. 20:1-17). Maʼ biʼniʼ Binidxabaʼ stale cosa para cadi ganna binni tu láʼ Dios ne laaca gucalaʼdxiʼ nunitilú Stiidxabe; peru Jiobá, Señor ni runi mandar guibáʼ ne lu guidubi Guidxilayú, qué nudii lugar ñúnibe ni (Sal. 73:28).

3. Xi rusiidiʼ Jiobá laanu lu Stiidxaʼ.

³ Jiobá laaca riquiiñeʼ Biblia para gusiidiʼ laanu xii nga ni dxandíʼ. Ne riéchenu stale purtiʼ maʼ nuunu lu neza ra cuzaaniʼ Stiidxabe. Biblia na: «Biseendaʼ biaaniʼ stiluʼ ne bisiidiʼ naa ni naquiiñeʼ gannaʼ. Laacani gábicani naa xi naquiiñeʼ guneʼ. Chinécani naa lu dani nayá stiluʼ ne ra nuu tabernáculo naroʼbaʼ stiluʼ. Dxandipeʼ zadxiñaʼ ra nuu altar stiʼ Dios, ra nuu Dios ni rusiecheʼ naa. Zusisacaʼ lii, dxandíʼ zuneʼ ni né ti arpa, Dios, Dios stinneʼ» (Salmo 43:3, 4). Nga runi, neca canazá binni lu gueelacahui purtiʼ runi cré stale cosa ni cadi dxandíʼ, laanu nuunu lu biaaniʼ stiʼ Dios (1 Juan 1:6, 7).

4, 5. Xi ndaayaʼ gucuaanu iza 1931.

⁴ Laanu, cani dxandíʼ xpinni Cristu, nápanu ti  herencia nabé risaca. Sicaríʼ rusiene Gran Diccionario de Uso del Español Actual diidxaʼ herencia: «Laani nga guiráʼ costumbre ne modo nabani ti grupu de binni, neca tiidiʼ stale iza qué riniti cani, purtiʼ rusiidicabe ni xiiñicabe». Lade ca herencia ni maʼ bisaanané Dios laanu zeeda ca ndiʼ: riene chaahuinu Stiidxabe, runibiaʼnu laabe ne nánnanu xi guiráʼ naguixhe íquebe gúnibe. Ne laaca ti ndaayaʼ nga gunibiáʼ binni laanu casi testigu stiʼ Jiobá.

⁵ Gucuaanu ndaayaʼ ca dxi guca ti guendaridagulisaa roʼ Columbus (Ohio), Estados Unidos iza 1931. Lu programa stiʼ guendaridagulisaa que zeeda ca letra riʼ: JW. Ti gunaa xpinni Cristu guníʼ: «Ca xpinni Cristu que nuucaʼ gánnacaʼ xi riníʼ ca letra que». Peru gupa xidé gulézacabe dede domingu 26 stiʼ julio, dxi bisiénecabe xi riníʼ cani: maʼ qué zunibiáʼcabe laanu casi Binni Ruundaʼ Biblia, sínuque maʼ zunibiáʼcabe laanu casi testigu stiʼ Jiobá (Jehovahʼs Witnesses lu diidxaʼ inglés). Nabé biéchecabe dxi que. Biblia na: «Naapeʼ gunieeʼ ne maʼ bilaʼyaʼ ne maʼ bicaa laacabe gunadiágacabe, dxi caʼruʼ chuʼ sti [dios]. Nga runi laatu nga testigu stinneʼ, na Jiobá, ne naa nga Dios» (Isaías 43:12). Ti xpinni Cristu guníʼ: «Qué ziuu dxi guiaandaʼ naa ridxi biasa raqué ne modo gudapanáʼ guiráʼ ca binni nuu raqué». Nin sti religión qué niná niquiiñeʼ lá Jiobá, peru laanu maʼ zinenu jma de ochenta iza de riquiiñenu ni. ¡Ti ndaayaʼ naroʼbaʼ nga gácanu testigu stiʼ Jiobá!

6. Xi sti ndaayaʼ nápanu casi herencia.

⁶ Sti ndaayaʼ nuu lu herencia stinu nga guiráʼ ni rusiidiʼ Biblia laanu de ca xpinni Jiobá ni bibani dxiqué ne risaca gánnanu cani. Guiníʼ íquenu ejemplu stiʼ Abrahán, Isaac ne Jacob. Laacabe ne binnilídxicabe guníʼcabe xi naquiiñeʼ gúnicabe ti chuulaʼdxiʼ Jiobá guiráʼ ni gúnicabe. Nga runi, qué ridxagayaanu xiñee bicaanáʼ José ti gunaa ni gucalaʼdxiʼ ñatané laa, purtiʼ nanna zucheené Dios pa gúnini (Gén. 39:7-9). Lu primé siglu que, de diidxaʼ ruaa si ca xpinni Cristu nga bisiidicaʼ de Dios ne laaca bisiidicaʼ né ejemplu sticaʼ, casi biʼniʼ Pablu ora guníʼ ximodo gaca Guendaroxhi stiʼ Señor (1 Cor. 11:2, 23). Peru yanna riʼ, maʼ nápanu Biblia ne luni nga zeeda guiráʼ ni naquiiñeʼ gánnanu para guni adorarnu Dios modo racalaʼdxiʼ (biindaʼ Juan 4:23, 24). Neca guiráʼ binni zanda guiziidiʼ ni zeeda lu Biblia, laasinu nga rusisácanu guiráʼ ni rusiidini.

7. Xii nga ni maca guníʼ Jiobá zuni.

⁷ Lu herencia bidii Dios laanu laaca zeeda ca relatu ni rusihuinni nuuné Jiobá laanu tiempu riʼ (Sal. 118:7). Ora ridúʼndanu ca relatu ca lu libru ne revista stinu, rudiʼnu cuenta rapa Jiobá laanu, neca nuu tu canazananda laanu. Ne ziroobaʼ herencia stinu ra zidiʼdiʼ dxi, purtiʼ Jiobá maca guníʼ zaca ni na ca diidxaʼ riʼ: «“Intiica guiibaʼ gúnicabe para gucaalúcabe lii, qué zabeendunedícabe ni gastiʼ, ne intiica guiníʼcabe para gucaalúcabe lii ora gaca  juzgarluʼ la? zudxiibaluʼ donda íquecabe. Ndiʼ nga herencia stiʼ ca xpinni Jiobá, ne pur naa nga cayúnicabe ni jneza”, nga nga ni guníʼ Jiobá» (Is. 54:17). Neca guniná Binidxabaʼ laanu zadxiña dxi gunichaahuiʼ Jiobá guiráʼ yuubaʼ gutiidibe laanu.

8. Xi zadúʼyanu lu tema riʼ ne lu stobi ca.

⁸ Maʼ xadxí nga de racalaʼdxiʼ Binidxabaʼ gunitilú Stiidxaʼ Dios, qué racaláʼdxibe ganna binni tu láʼ Dios ne pa ñanda si guirutiʼ ñanna xii nga ni dxandíʼ. Peru qué ganda gúnibe gastiʼ, purtiʼ qué rudii Jiobá lugar gúnibe guiráʼ ni racaláʼdxibe. Lu tema riʼ ne lu stobi ca zazíʼdinu chonna cosa, 1) ximodo qué nudii Jiobá lugar nunitilú Binidxabaʼ Biblia, 2) xi biʼniʼ Jiobá para gánnanu tu láʼ ne 3) ximodo huayacanebe para gánnanu xii nga ni dxandíʼ.

9-11. Ximodo huayapa Jiobá Biblia neca huayacalaʼdxiʼ binni gunitilú ni.

⁹ Neca huayacalaʼdxiʼ stale binni gunitilú Biblia, qué ganda gúnicabe ni purtiʼ cayapa Jiobá ni. Guidúʼyanu xiná Enciclopedia Cattolica: «Lu Concilio ni guca ndaaniʼ guidxi Toulouse lu iza 1229, guníʼcabe cadi iquiiñeʼ ca laico [Biblia ni nuu lu stiidxacaʼ] purtiʼ nuudinde ca albigense ne ca valdense [...]. Lu iza 1234, guníʼ Jaime I gaca sti Concilio guidxi Tarragona (España), raqué gudíxhebe sti ley casi ni guca [Toulouse]. [...] Lu iza 1559 tobi de ca xaíque stiʼ religión católica ni guyuu Roma, Pablo IV gulee ti libru ni láʼ Índice de libros prohibidos, luni guniʼbe cadi naquiiñeʼ gaca imprimir o gapa binni Biblia lu stiidxaʼ pa qué gudii Santo Oficio permisu laacaʼ».

¹⁰ Yanna guidúʼyanu xiñee nápanu Biblia ca dxi stinu riʼ, neca huayacalaʼdxiʼ binni gunitilú ni. Zándaca lu iza 1382 nga biʼniʼ John Wyclef ne ca xpinni primé Biblia lu diidxaʼ inglés. William Tyndale nga sti hombre ni bitiixhiʼ Biblia lu diidxaʼ inglés, peru biiticabe laa lu iza 1536. Nácabe guniʼbe ca diidxaʼ riʼ ora nundiibicabe laabe cueʼ ti poste: «Señor, bixheleʼ lú rey stiʼ Inglaterra». De raqué bixhiicabe yánnibe ne bizaaquicabe laabe.

¹¹ Neca huayacalaʼdxiʼ stale binni gunitilú Biblia, qué ganda diʼ gúnicabe ni. Guidúʼyanu xi guca lu iza 1535, dxi bihuinni Biblia biʼniʼ Miles Coverdale. Para bíʼnibe dxiiñaʼ stibe biquiiñebe Nuevo Testamento ni biʼniʼ Tyndale ne laaca biquiiñebe ti ndaa stiʼ Antiguo Testamento, de Génesis hasta Crónicas. Laaca biquiiñebe xcaadxi Biblia ni nuu lu diidxaʼ latín ne lu diidxaʼ alemán ni bicaa Martín Lutero, para bitiixhibe xcaadxi libru ni zeeda lu Stiidxaʼ Dios. Yanna riʼ, stale binni nabé riuulaʼdxiʼ Traducción del Nuevo Mundo de las Santas Escrituras purtiʼ cadi nagana para guiene binni ni, biaʼsi modo bibíʼxhini ne cadi nagana para iquiiñecabe ni ora gucheechecabe diidxaʼ. Riéchenu stale purtiʼ nánnanu qué zudii Jiobá lugar gunitilú Binidxabaʼ ne ca xpinni Biblia.

12. Ximodo huayacané Traducción del Nuevo Mundo para ganna binni tu láʼ Dios.

¹² Dxi bíʼnicabe Traducción del Nuevo Mundo biiyacabe naquiiñeʼ gucaacabe lá Jiobá ndaaniʼ ni. Cani biʼniʼ Biblia riʼ bíʼnicaʼ xhiiñacaʼ jneza, ne ra ruzulú Biblia diidxastiá zeeda ca diidxaʼ riʼ: «Lu Biblia riʼ zeeda lá Jiobá ra naquiiñeʼ guicá ni ne nga nga dxiiñaʼ ni jma galán bíʼnicabe. Zeeda ni 6,973 biaje lu Escrituras Hebreas ne 237 biaje lu Escrituras Griegas Cristianas, ne lu diidxastiá ricá ni sicaríʼ “Jehová”». Traducción del Nuevo Mundo riʼ nuu tu napa guidubi ni ne nuu tu napa ti ndaa si de laani, ne nuuni lu 116 diidxaʼ ne maʼ guca jma de 178,545,862 de laani.

13. Xiñee zanda guininu biquiiñecabe lá Dios dede dxi bizulú guyuu binni lu Guidxilayú.

¹³ Dede dxi bizulú guyuu binni lu Guidxilayú maʼ riquiiñeʼ lá Dios. Adán ne Eva gúnnacaʼ tu láʼ Dios ne Biblia na biquiiñecabe ni. Guidúʼyanu xi guníʼ Noé dxi qué ñuni respetar Cam laa gudiʼdiʼ si Nisaguié naroʼbaʼ que: «Guisaca Jiobá, Dios stiʼ Sem, ne gaca Canaán [xiiñiʼ Cam] esclavu stibe» (Gén. 4:1; 9:26). Ne laaca guníʼ Dios: «Naa nga Jiobá. Nga nga laʼyaʼ; ne guirútiruʼ qué zudieeʼ guendanandxóʼ stinneʼ». Ne laaca guniʼbe: «Naa nga Jiobá, gástiruʼ stobi. Naasiáʼ nga tobi lucha Dios» (Is. 42:8; 45:5). Zacá nga huayapa Jiobá lá ti cadi gusiaandaʼ binni ni. Cadi dxandíʼ ridxá tipa ladxidoʼno iquiiñenu lá Dios ne gácanu Testigu stiʼ la? (Sal. 20:5.)

14. Aparte de Biblia, paraaruʼ zeeda lá Dios.

¹⁴ Cadi ndaaniʼ Biblia si nga cá lá Dios. Laaca cá ni lu ti Guié ni bidxélacabe Moab, gaxha de Dhiban (Dibón), ni riaana 21 kilómetru neza ra rindani gubidxa stiʼ mar Muerto. Lu guié riʼ cá lá Omrí ti rey ni biʼniʼ mandar guidxi Israel ne laaca cá ni guníʼ Mesá rey stiʼ Moab dxi gudindené ca israelita (1 Rey. 16:28; 2 Rey. 1:1; 3:4, 5). Peru ni jma risaca cá lu guié riʼ nga tapa letra ni riquiiñecabe para guicá lá Jiobá lu diidxaʼ hebreu ni runibiáʼcabe casi Tetragrámaton. Guidapaʼ letra riʼ laaca cá ni stale biaje lu caadxi Carta stiʼ Lakís, lu caadxi bisiʼñaʼ ni bidxélacabe Israel.

15. Xii nga Biblia ni runibiáʼcabe casi Septuaginta, ne xiñee gúcani.

¹⁵ Ca primé hombre bitiixhi Biblia nga gucané para cadi gusiaandaʼ binni tu láʼ Dios. Raca jma de chupa mil iza bitiixhicabe Stiidxaʼ Dios ni nuu lu diidxaʼ hebreu lu diidxaʼ griegu, laani nga binibiáʼcabe casi Septuaginta. Xiñee guca Biblia riʼ lu diidxaʼ griegu yaʼ. Purtiʼ stale de ca judíu ni guyuu esclavu Babilonia 70 iza maʼ qué nibiguétacaʼ xquídxicaʼ, Judá ne Israel. Lu siglu III stale de laacabe yendézacabe Alejandría, Egipto, ra riníʼcabe diidxaʼ griegu. Ngue runi caquiiñeʼ guibiʼxhiʼ Biblia ni nuu lu diidxaʼ hebreu que lu diidxaʼ griegu. Lu caadxi copia stiʼ Septuaginta que zeeda lá Jehová lu diidxaʼ hebreu.

16. Bisiene ximodo biquiiñeʼ lá Dios lu ti libru ni guca lu iza 1640.

¹⁶ Laaca zeeda lá Jiobá lu Bay Psalm Book (Libro de Salmos de la Bahía), primé libru ni gupa ca binni de Inglaterra ni beedabii América del Norte. Primé libru ni guca lu iza 1640, zeeda ca Salmo ni gucuá lu diidxaʼ hebreu peru bitiixhicabe ni lu diidxaʼ inglés riníʼ binni tiempu que. Riquiiñeʼ ni lá Dios lu textu casi Salmo 1:1, 2, ra na: «Nayecheʼ nga riuu hombre» ni qué rinanda conseju stiʼ binni malu, sínuque riuulaʼdxiʼ guʼndaʼ ley stiʼ Jiobá. Zanda guizíʼdinu jma de lá Dios lu folletu El nombre divino que durará para siempre.

17, 18. 1) Ximodo nusiéneluʼ diidxaʼ dxandíʼ. 2) Xii nga caadxi de cani dxandíʼ maʼ bisiidiʼ Jiobá laanu.

¹⁷ Riéchenu ora maʼ cayúninu ni na Jiobá, «Dios ni dxandíʼ» (Sal. 31:5). Guidúʼyanu ximodo rusiene Diccionario de  uso del español de América y España diidxaʼ dxandíʼ: «Laani nga xiixa ni dxandíʼ guca o xiixa ni [nanna binni] dxandíʼ nuu, cadi xiixa ni ruzáʼ si binni lu xquendabiaaniʼ». Diidxaʼ hebreu ni biquiiñecabe lu Biblia para «dxandíʼ», caniʼni de xiixa ni zanda guni cré binni o xiixa ni maʼ bihuinni dxandíʼ guca. Laaca zacá riénecabe diidxaʼ riʼ lu griegu.

¹⁸ Jiobá racalaʼdxiʼ guizíʼdinu ni dxandíʼ ne cada dxi tiidiʼ cayacanebe laanu para guiénenu ni (2 Juan 1, 2). Cada dxi tiidiʼ jma jneza ziyénenu xii nga ni dxandíʼ, purtiʼ «neza stiʼ ca binni nachaʼhuiʼ zeeda gaca casi biaaniʼ ne zeʼ ora ziyácani jma nayaʼniʼ dede guiaaniʼ dxindxi» (Prov. 4:18). Biáʼsipeʼ nga ca diidxaʼ guníʼ Jesús ora biʼniʼ orarbe Dios sicaríʼ: «Dxandíʼ stiidxa luʼ» (Juan 17:17). Lu Biblia zeeda guiráʼ ni rinabaʼ Jiobá guni cré cani dxandíʼ xpinni Cristu (Gál. 2:14). Xii nga caadxi de cani dxandíʼ maʼ bisiidiʼ Jiobá laanu yaʼ. Caadxi de laacani nga tu láʼ Dios, derechu ni nápabe para guni mandarbe, guendaguti stiʼ Cristu, zadxiña dxi guiasa ca gueʼtuʼ ne de Reinu stibe. Yanna guidúʼyanu ximodo huayapa Dios ni dxandíʼ neca racalaʼdxiʼ Binidxabaʼ gucaachiʼ ni de laanu.

19, 20. Tu guca Nemrod, ne xi gucaláʼdxibe ñúnibe.

¹⁹ Gudiʼdiʼ si Nisaguié naroʼbaʼ que, nabé guníʼ binni ca diidxaʼ riʼ: «Casi Nemrod, ti hombre ni nabé biiti maniʼ ne ni bicaalú Jiobá» (Gén. 10:9). Cumu biʼniʼ adorar Nemrod Binidxabaʼ la? ngue runi bicaalube Jiobá. Ne laaca ngueca nga ni biʼniʼ ca xhenemigu Jesús, ngue runi gúdxibe laacaʼ: «Binidxaba nga bixhoze tu ne racalaʼdxi tu guni tu ni na be. [...] Qué huayuu dxi iníʼ be ni dxandíʼ» (Juan 8:44).

²⁰ Biʼniʼ mandar Nemrod guidxi Babel ne xcaadxi guidxi guyuu gaxha de guiiguʼ Tigris ne Éufrates (Gén. 10:10). Zándaca laabe nga guniʼbe gaca guidxi Babel ne torre stiʼ lu iza 2269 ante de ca dxi stiʼ Jesús. Jiobá maca gudixhe ique guibani binni lu guidubi Guidxilayú, peru cani cucuí guidxi que guniʼcaʼ: «Gúninu ti guidxi ne ti torre ni chindá dede guibáʼ, zacá zuuyacabe laanu casi binni ni jma risaca, ti cadi guireeche ndásenu lu guidubi guidxilayú». Peru qué nireendú ni gucuá íquecabe ñúnicabe purtiʼ bichaa Jiobá stiidxaʼ ca binni ni cucuí torre que, ngue runi bireeche ndásecabe lu guidubi naca Guidxilayú (Gén. 11:1-4, 8, 9). Pa ni gucalaʼdxiʼ Binidxabaʼ nga nuzáʼ ti religión para ñuni adorar guiráʼ binni laa la? qué ñanda ñaca ni gudixhe íquebe ca. Biaʼ dxi huabani binni lu Guidxilayú huayuu tu huayuni adorar Jiobá ne ca dxi stinu riʼ jma stale tu cayuni ni.

21, 22. 1) Xiñee qué huayuu religión ni rusiidiʼ ni dxandíʼ ra naxoo. 2) Xi zadúʼyanu lu sti tema ca.

²¹ Ni nánnanu nga qué liica huayuu religión ni rusiidiʼ ni dxandíʼ ca ra naxoo. Xiñee yaʼ. Purtiʼ Jiobá ni cusiidiʼ laanu riʼ cayapa Stiidxaʼ para gunibiáʼ binni labe (o xlabe) ne dede yanna cusiidibe laanu ni dxandíʼ (Is. 30:20, 21). Ora rúninu ni na Dios modo racalaʼdxiʼ riuʼnu nayecheʼ. Nga runi naquiiñeʼ gatananu para cadi guixélenu de ni maʼ bisiidiʼ Jiobá laanu, guni crenu laabe de guidubi ladxidoʼno ne chinándanu guiráʼ ni rusiidibe laanu pur espíritu santu stibe.

²² Lu sti tema ca zadúʼyanu ximodo bihuinni caadxi cosa ni cadi jneza bisiidiʼ stale religión ni cadi dxandíʼ ne ximodo rusihuinni Stiidxaʼ Dios cadi dxandíʼ cani. Laaca zadúʼyanu ximodo caguu Jiobá ndaayaʼ laanu pur guiráʼ ni cusiidiʼ laanu ni zeeda gaca casi herencia stinu.