1, 2. Ximodo naquiiñeʼ guibáninu para chuulaʼdxiʼ Dios modo runi adorarnu laa.

 STALE binni riuulaʼdxiʼ ganna xi riníʼ ique stobi de laa. Peru laanu, ca xpinni Cristu, jma riuuláʼdxinu gánnanu ximodo ruuyaʼ Jiobá laanu. Xiñee yaʼ. Purtiʼ laabe nga Dios ni runi mandar guibáʼ ne Guidxilayú ne ra nuube nga «cadá guendanabani» (Sal. 36:9).

² Para chuulaʼdxiʼ Jiobá modo laanu, naquiiñeʼ gúninu ni guníʼ apóstol Pedru riʼ: «Naquiiñeʼ gácatu binni ni nabani jneza ne gúnitu ni na Dios modo riuulaʼdxiʼ» (2 Ped. 3:11, TNM). Nga runi, naquiiñeʼ gúninu ni  jneza, gaca xquendabiaaninu nayá, ne guni adorarnu Dios modo riuulaʼdxiʼ. Ne laaca zahuinni rúninu «ni na Dios modo riuulaʼdxiʼ» pa nadxiinu laa de guidubi ladxidoʼno ne pa runi respetarnu laa. Nga runi, para ganda chuulaʼdxiʼ Jiobá modo laanu, naquiiñeʼ gúninu ni nabe, peru laaca naquiiñeʼ gusihuínninu dxandíʼ riuuláʼdxinu gúninu ni. Ruuyaʼ Jiobá xi nuu ndaaniʼ ladxidoʼno, ne nánnabe pa nabáninu jneza ne pa runi adorarnu laasibe, o pa coʼ (1 Crón. 29:17).

3. Xi naquiiñeʼ guinabadiidxanu laca laanu.

³ Qué racalaʼdxiʼ Binidxabaʼ guicá íquenu gúninu ni riuulaʼdxiʼ Jiobá. Riraruʼ ni runi Binidxabaʼ para guxheleʼ laanu de Dios. Racalaʼdxiʼ gusiguii ne quite laanu ti gusaana de guni adorarnu Dios (Juan 8:44; 2 Cor. 11:13-15). Nga runi, naquiiñeʼ guinabadiidxanu laca laanu: «Ximodo racalaʼdxiʼ Binidxabaʼ quite naa. Xi zanda guneʼ ti cadi guixeleʼ de Jiobá».

4. Paraa racalaʼdxiʼ Binidxabaʼ guiuu para guxheleʼ laanu de Dios, ne xiñee.

⁴ Discípulo Santiagu bicaa: «Ni riulaʼdxi nu ni cadi jneza, nga nga ni ruquiinde laanu, purti ricá ique nu ni». Ne laaca guníʼrube: «Riguba yu ni laanu  dede inaaze dxiichi ni laanu, ne ni qué usaana de icá ique ni cadi jneza la? zuchee. Ne ni qué usaana de uchee la? zati» (Sant. 1:14, 15). Cumu racalaʼdxiʼ Binidxabaʼ guxheleʼ laanu de Dios la? ruyubi ximodo guiuu ndaaniʼ ladxidoʼno para guniná laanu, purtiʼ racá nga riale guiráʼ ni riuuláʼdxinu.

5, 6. 1) Ximodo runiná Binidxabaʼ ladxidoʼno. 2) Xi trampa riquiiñeʼ Binidxabaʼ para guniná ladxidoʼno, ne xiñee nánnabe iquiiñebe cani.

⁵ Ximodo runiná Binidxabaʼ ladxidoʼno. Biblia na: «Naaze dxiichi binidxaba idubi guidxilayú» (1 Juan 5:19). Nga runi, ndaaniʼ Guidxilayú riʼ nga nuu guiráʼ ni riquiiñeʼ Binidxabaʼ para gusaba laanu (biindaʼ 1 Juan 2:15, 16). Maʼ stale iza nga de caquiiñeʼ Binidxabaʼ guiráʼ ni nuu lu Guidxilayú para quite binni. Cumu nabáninu lade ca binni riʼ la? naquiiñeʼ gatananu ti cadi guiábanu lu ca trampa stibe (Juan 17:15).

⁶ Riquiiñeʼ Binidxabaʼ caadxi trampa ni  riuulaʼdxiʼ ladxidoʼno para gucaa laanu gucheʼnu. Apóstol Juan bizeeteʼ chonna de laacani: 1) «riulaʼdxi binni guni ni na ique», 2) riuulaʼdxiʼ binni guni ne «gapa irá ni guʼyaʼ» ne 3) riuulaʼdxiʼ binni «gaca tuuxa nezalú ca xcaadxi». Laaca guionnaʼ trampa riʼ nga gudíxhebe nezalú Jesús dxi guyuu lu desiertu. Ne guizáʼ maʼ nuu xpiaaniʼ Binidxabaʼ para iquiiñeʼ ca trampa riʼ, purtiʼ maʼ stale iza de cayúnibe ni. Ne laaca nánnabe gunáʼ ni zanda gundaabe luguiáʼ cada binni, ora maʼ bidxélabe paraa nadá cada tobi de laacaʼ. Peru ante guizíʼdinu xi zanda gúninu para cadi guiábanu lu ca trampa stibe, guidúʼyanu ximodo biquiiñebe cani para bisábabe Eva ne ximodo gucaláʼdxibe niquiiñebe cani para nusábabe Xiiñiʼ Dios, ne xiñee gadxé gadxé ni biʼniʼ cada tobi de ca binni riʼ.

7. Ximodo bicaa Binidxabaʼ Eva guchee pur ni biʼyaʼ.

⁷ Guiráʼ binni guidxilayú naquiiñeʼ gó para ganda guibani. Nga runi, maca bizáʼ Jiobá Guidxilayú para ganda gudiini stale guendaró ni iquiiñeʼ binni. Peru laaca zanda iquiiñeʼ Binidxabaʼ ni casi trampa para gucaa laanu gusaana de guni adorarnu Dios. Guidúʼyanu ximodo biquiiñebe ni para gudxítebe Eva. Gudxi Binidxabaʼ laabe zanda gobe «cuananaxhi stiʼ yaga stiʼ guendananna ni jneza ne ni cadi jneza» ne qué zátibe pa gúnibe ni (Gén. 2:9; 3:1-6). Dede guníʼ Binidxabaʼ zácabe casi Dios, cásipeʼ gobe cuananaxhi que. Né ca diidxaʼ riʼ, casi ora ñabi Binidxabaʼ Eva cadi caquiiñeʼ diʼ guzuubaʼ stiidxaʼ Jiobá para ganda guibani. ¡Aque rusiguii Binidxabaʼ, njaʼ! Xi guni Eva yanna yaʼ. Zanda gúnibe chupa cosa: gucaanabe ni gudxi Binidxabaʼ laabe, o gudiibe lugar gucaa ladxidoʼbe laabe gobe ni. Triste guininu ni, peru qué nusaana de niníʼ ique Eva ni gudxi  Binidxabaʼ laa de cuananaxhi que, nuuruʼ ndaʼ xcaadxi cuananaxhi ni ñanda ñobe raqué. Xi biʼniʼ Eva yaʼ. «Gucuaabe cuananaxhi que ne gudobe ni.» Bicaa Binidxabaʼ ladxidoʼbe chuulaʼdxiʼ ti cosa ni gudxi Dios laabe cadi naquiiñeʼ gúnibe.

8. Xi trampa biquiiñeʼ Binidxabaʼ ora gucalaʼdxiʼ nusaba Jesús, ne xiñee qué ñaba Jesús lu trampa que.

⁸ Ngaca nga trampa biquiiñeʼ Binidxabaʼ ora gucalaʼdxiʼ nuquiinde Jesús lu desiertu que. Cumu maʼ ziné Jesús cuarenta dxi ne cuarenta gueelaʼ sin gó la? gucalaʼdxiʼ Binidxabaʼ nusaba laabe lu trampa stiʼ purtiʼ maʼ candaanabe. Sicaríʼ gudxi Binidxabaʼ laabe: «Pa dxandí Xiiñi Dios lii la? gudxi guie ri gaca pan» (Luc.4:1-3). Zanda guni Jesús chupa cosa: guni ti milagru para gapa ni gó, o cadi guni ni. Ne nánnabe cadi galán iquiiñebe poder stibe para gúnibe ni riuuláʼdxisibe. Neca candaanabe, para laabe jma risaca gúnibe ni na Jiobá que gápabe ni gobe. Ngue runi bicabi Jesús: «Cá lu Xquiʼchi Dios: “Cadi pan si nga ibani né binni, sínuque ne stiidxa Dios”» (Luc. 4:4).

9. Ximodo zanda guiénenu ca diidxaʼ riʼ: riuulaʼdxiʼ binni «gapa irá ni guʼyaʼ», ne ximodo biquiiñeʼ Binidxabaʼ trampa riʼ para bisaba Eva.

⁹ Laaca guníʼ Juan de sti trampa: riuulaʼdxiʼ binni «gapa irá ni guʼyaʼ». Ca diidxaʼ riʼ cusihuínnicani zanda gacalaʼdxiʼ binni guicaa o guni xiixa ni guʼyaʼ. Zacá nga gudxite Binidxabaʼ Eva ora gúdxibe laa: «Zaxeleʼ lutu». Cada biaje gúʼyabe cuananaxhi que, jma rucaa ladxidoʼbe laabe gobe ni. Dxandíʼ, cuananaxhi stiʼ «yaga que nabé sicarú ni para gúʼyabe ni» ne para gobe ni.

10. Ximodo gucalaʼdxiʼ Binidxabaʼ nusaba Jesús, peru xi bicabi Jesús.

¹⁰ Yanna, ximodo gucalaʼdxiʼ Binidxabaʼ nusaba Jesús lu trampa ra biaba Eva que yaʼ. Biblia na: «Tobi biluíʼ si [Binidxabaʼ] laabe idubi naca guidxilayú, ne na rabi laabe: “Zudiee lii irá ca guidxi sicarú ca”» (Luc. 4:5, 6). Nánnanu cadi dxandipeʼ nga biiyaʼ Jesús ca reinu que. Biluíʼ Binidxabaʼ cani laabe lu ti visión para chuuláʼdxibe cani. Óraque gudxi Binidxabaʼ Jesús: «Stiuʼ cani pa uzuxibi lu xañeeʼ usisaca lu naa» (Luc. 4:7). Peru Jesús qué liica ñacalaʼdxiʼ ñaca tobi de ca xpinni Binidxabaʼ. Ngue runi bicabi Jesús sicaríʼ: «Bixele de naa, binidxabaʼ, purti cá lu Xquiʼchi Dios: “Dios si nga naquiiñe usisaca cabe, ne guni cabe ni na”» (Luc. 4:8).

11. Ximodo gudxite Binidxabaʼ Eva.

¹¹ Lade ca cosa bizeeteʼ Juan nuu ndaaniʼ guidxilayú, laaca guniʼbe riuulaʼdxiʼ binni «gaca tuuxa nezalú ca xcaadxi». Cumu Adán ne Eva si nga nabani ndaaniʼ  Guidxilayú riʼ dxiqué la? qué zanda diʼ gábicabe xcaadxi binni xi guiráʼ nápacabe. Peru bisihuínnicabe rudxiibacabe laca laacabe. Ximodo yaʼ. Ora biquiinde Binidxabaʼ Eva, bicaabe laa guiníʼ ique qué naʼ Jiobá gudii laa xiixa ni nabé sicarú. Gúdxibe laa zaca casi Dios pa gó «cuananaxhi stiʼ yaga stiʼ guendananna ni jneza ne ni cadi jneza» ne «zanna xii nga ni jneza ne ni malu» (Gén. 2:17; 3:5). Né ca diidxaʼ riʼ cayábibe laa cadi caquiiñeʼ diʼ guni mandar Jiobá laa. Yanna, xiñee biʼniʼ cré Eva ni guníʼ Binidxabaʼ yaʼ. Zándaca purtiʼ bidxiibabe laca laabe. Cumu guníʼ íquebe qué zátibe la? gudobe cuananaxhi que. ¡Guizáʼ gudxite Binidxabaʼ laabe!

12. Xi sti trampa biquiiñeʼ Binidxabaʼ ora gucalaʼdxiʼ niguite Jesús, peru xi bicabi Jesús.

¹² Peru qué ñuni Jesús casi biʼniʼ Eva, ¡Jesús bisaana ti ejemplu sicarú purtiʼ qué nudxiibaʼ laca laa! Despué gucalaʼdxiʼ Binidxabaʼ nucaa laabe ñúnibe xiixa para nidxagayaa binni ne para gúʼyabe pa dxandíʼ zulá Jiobá laabe. Peru nanna Jesús zusihuinni rudxiibaʼ laca laa pa guni ni na Binidxabaʼ. Ngue runi, nagueendaca bicabi Jesús: «Laca cá lu Xquiʼchi Dios: “Cadi inaba cabe xiixa Dios para quite si cabe laa”» (biindaʼ Lucas 4:9-12).

13, 14. Ximodo racalaʼdxiʼ Binidxabaʼ quite laanu.

¹³ Yanna riʼ laaca riquiiñeʼ Binidxabaʼ ca trampa ni biquiiñeʼ para bisaba Eva ne ora gucalaʼdxiʼ nusaba Jesús. Cumu «riulaʼdxi binni guni ni na ique» la? rucaa Binidxabaʼ laacaʼ gúnicaʼ cosa dxabaʼ, gocaʼ ne gueʼ xhaatacaʼ. Ne cumu nánnabe riuulaʼdxiʼ binni guni ne gapa «irá ni guʼyaʼ» la? ruquiindebe laacaʼ gúʼyacaʼ pornografía, ne stale binni riaba lu trampa riʼ ora maʼ nuu lu Internet. Ne laaca rucaabe binni chuulaʼdxiʼ gusisácacabe laa, gapa poder ne gapa bidxichi para gudxiibaʼ laca laa ti gusihuinni naca «tuuxa nezalú ca xcaadxi».

¹⁴ Ca cosa nuu ndaaniʼ «guidxilayú» riʼ zeeda gaca cani casi ni riguu ti binni ruaa anzuelu para guinaazeʼ benda. Riquiiñeʼ Binidxabaʼ ca cosa ni riuulaʼdxiʼ binni guni para gucaabe laacaʼ gúnicaʼ xiixa ni qué riuulaʼdxiʼ Dios. Cumu nanna Binidxabaʼ riquiiñenu stale de cani nuu lu Guidxilayú riʼ la? ruyúbibe ximodo iquiiñebe cani casi ti trampa para quítebe laanu ne guxhélebe laanu de Dios. Racalaʼdxiʼ Binidxabaʼ guiníʼ íquenu jma risaca  gápanu guiráʼ ni caquiiñenu para guibáninu galán que guzúʼbanu stiidxaʼ Jiobá. Ñee zagúʼruaanu anzuelu stiʼ Binidxabaʼ la?

15. Ximodo racané ejemplu stiʼ Jesús laanu para cadi guiábanu lu ca trampa stiʼ Binidxabaʼ.

¹⁵ Biaba Eva lu trampa stiʼ Binidxabaʼ, peru Jesús qué ñaba luni. Cada biaje gucalaʼdxiʼ Binidxabaʼ nusiguii Jesús, laa bicabi ni zeeda lu Stiidxaʼ Dios ora guníʼ: «Maca cá lu Xquiʼchi Dios» ne «Cá lu Xquiʼchi Dios». Pa guidúʼndanu Stiidxaʼ Dios ne guiénenu ni, zanda guietenaláʼdxinu xiixa textu ni gacané laanu para cadi guiábanu lu ca trampa stiʼ Binidxabaʼ (Sal. 1:1, 2). Ne pa guiníʼ íquenu lu ca ejemplu stiʼ ca xpinni Dios ni bizuubaʼ diidxaʼ dxiqué, zaguucani gana laanu para chinándanu ejemplu stícabe (Rom. 15:4). Pa guni respetarnu Jiobá, pa gannaxhiinu ca cosa ni riuuláʼdxibe ne gacananaláʼdxinu ca cosa ni nanaláʼdxibe la? zacanécani laanu para cadi guiábanu lu ca trampa stiʼ Binidxabaʼ (Sal. 97:10).

16, 17. Ximodo rusihuinni cani riníʼ íquenu modo laanu.

¹⁶ Apóstol Pablu cayabi laanu gúninu stipa para guiníʼ íquenu casi riníʼ ique Dios, ne cadi casi riníʼ ique binni guidxilayú (Rom. 12:1, 2). Ne ora cuzeeteʼ Pablu pabiáʼ naquiiñeʼ chuʼnu cuidadu né cani riníʼ íquenu, guníʼ: «Ruseʼgu du ruaa cani riguiñe yu stiidxa Dios, cani raca nandxóʼ ne riguixhe xiixa para qué chuʼ tu gunibiáʼ Dios. Ruyubi du ucueeza du irá ni riníʼ ique binni guidxilayú, ti iníʼ ique ca ni na Cristu» (2 Cor. 10:5). Ni riníʼ íquenu nga rusihuinni ximodo laanu; nga runi, naquiiñeʼ guiníʼ íquenu lu ca cosa ni riuulaʼdxiʼ Dios (Filip. 4:8).

¹⁷ Pa racaláʼdxinu guʼyaʼ Dios laanu casi ti binni nayá la? naquiiñeʼ gucáʼnanu ca cosa malu ni gacalaʼdxiʼ chuʼ ndaaniʼ íquenu ne cadi gúninu cani. Ribeza Jiobá gúninu ni na ne gaca ladxidoʼno nayá (1 Tim. 1:5). Peru cadi guiaandaʼ laanu ti cosa: ladxidóʼ binni nga ni jma riguite laa; ne zándaca qué zudiʼnu cuenta pora maʼ cayuniná ca cosa nuu ndaaniʼ Guidxilayú riʼ laanu (Jer. 17:9). Nga runi, nabé risaca chinándanu ni na conseju bidii Pablu riʼ: «Laguuya chaahui ximodo nuu tu, pa zuhuaa chaahui tu lu ni runi cre tu. Laguuya chaahui laca laatu» (2 Cor 13:5). Ora ma cadúʼndanu Biblia, galán guinabadiidxanu laca laanu: «Ñee riuulaʼdxiʼ Dios cani riníʼ iqueʼ ne cani racalaʼdxeʼ guneʼ la?».

18, 19. Xiñee naquiiñeʼ gúninu stipa para guibáninu casi modo riuulaʼdxiʼ Jiobá.

¹⁸ Sti cosa ni zacané laanu gucáʼnanu cani nuu ndaaniʼ Guidxilayú nga guietenaláʼdxinu ca diidxaʼ guníʼ Juan riʼ: «Canitilú guidxilayú ne irá ni nuu ndaani ni que, peru qué ziuu dxi initilú ni guni ni na Dios» (1 Juan 2:17). Ruluíʼ nga dxandíʼ guiráʼ ni nuu ndaaniʼ guidxilayú stiʼ Binidxabaʼ riʼ ne ruluíʼ qué ziuu dxi guiluxe cani, peru mayaca guinitilú cani. Cadi quítenu laca laanu: zanitilú guiráʼ ca cosa ni rudii guidxilayú riʼ binni.

¹⁹ Apóstol Pedru caguu gana laanu guni adorarnu Dios modo riuulaʼdxiʼ «laga cabeza [nu] dxi stiʼ [Jiobá]. Zacá gui xaibáʼ dxi que, ne zia ca luceru» (2 Ped. 3:12). Mayaca guedandá dxi stiʼ Jiobá ra gunitilube guidxilayú malu riʼ. Peru laga guedandá dxi ca, zaquiiñeruʼ Binidxabaʼ ca cosa nuu ndaaniʼ Guidxilayú riʼ para uquiinde laanu, cásica bíʼnibe né Eva ne Jesús. Cadi gúninu casi biʼniʼ Eva, laa guníʼ ique guni puru si ni racalaʼdxiʼ. Pa gúninu zacá la? zeeda gácani casi ora ñápanu Binidxabaʼ casi dios stinu. Jma galán chinándanu ejemplu stiʼ Jesús ne gucáʼnanu guiráʼ modo uquiinde Binidxabaʼ laanu, neca ruluíʼ galán cani guluiʼbe laanu. Nga runi, quixhe íquenu gúninu stipa para guibáninu modo riuulaʼdxiʼ Jiobá.