1, 2. Xiñee cadi naquiiñeʼ ugáʼninu donda Dios pur ca guendanagana ni cadiʼdiʼ binni. Bizeeteʼ ti ejemplu.

 BIXUIʼLÚ lii nga ti hombre ni maʼ ziné stale iza de bichaganáʼ ne nayecheʼ nabanineluʼ xheelaluʼ. Peru ti dxi, ora bibiguétaluʼ de dxiiñaʼ, málasi biiyaluʼ reeche ndase guiráʼ ca cosa stitu, casi ora ñuu tuuxa ralídxitu. Gulaa roperu, mexaʼ, bladuʼ ne ca ventana stitu. Binitilú lídxiluʼ. Ñee zaníʼ íqueluʼ xheelaluʼ biʼniʼ ni la? Coʼ njaʼ. Ni zaníʼ íqueluʼ nga: «Tu biʼniʼ ndiʼ pue». Xiñee yaʼ. Purtiʼ nannuʼ nadxii xheeluʼ lii ne qué ziuu dxi gunitilube lídxitu.

² Tiempu riʼ laaca maʼ binitilú Guidxilayú stinu, purtiʼ nuu stale guendaquéiquiiñeʼ, maʼ nabiidiʼ nisa rideʼnu ne bi ni ricaanu ne nuu stale binni ni runi cosa dxabaʼ. Peru maʼ bizíʼdinu lu Biblia qué gapa diʼ Jiobá donda pur guiráʼ ca cosa malu ni cayaca, purtiʼ bizaʼbe Guidxilayú riʼ para gácani ti paraísu (Gén. 2:8, 15). Jiobá nga ti Dios ni nadxii binni (1 Juan 4:8). Stiidxaʼ Dios cayabi laanu Binidxabaʼ nga napa donda pur ca guendanagana nápanu, purtiʼ laabe nga «xaíque sti guidxilayú» (Juan 14:30; 2 Cor. 4:4).

3. Xi cadi naquiiñeʼ guiníʼ íquenu ora maʼ cadídinu lu ti guendanagana.

³ Peru laaca cadi jneza nga ugáʼninu donda Binidxabaʼ pur guiráʼ ca guendanagana stinu. Xiñee yaʼ. Purtiʼ nuu biaje laca laanu nga nápanu donda. Biblia na: «Laacabe rúnicabe ni qué iquiiñeʼ; cadi xiiñidibe laacaʼ; ca cosa ni cadi jneza ca zeedani de laacaʼ. ¡Binni malu ni qué iquiiñeʼ!» (Deuteronomio 32:5). Neca maʼ nánnanu ni, peru cumu binni gulené donda laanu la? zándaca gucaani laanu guchaʼnu modo riníʼ íquenu ne chineni laanu lu ti neza ra zacananu (Prov. 14:12). Xii nga racaláʼdxinu guininu yaʼ. Lugar de guininu nápanu donda o napa Binidxabaʼ donda pur ca guendanagana stinu, zándaca maʼ guzulú guiníʼ íquenu Jiobá nga napa donda  pur laacani. Dede zándaca guidxiichinenu Jiobá (Prov. 19:3).

4, 5. Ximodo rusihuinni ti xpinni Cristu cadxiichiné Jiobá.

⁴ Zándaxa guidxiichinenu Jiobá. Qué zabeendunu gastiʼ pa gúninu ni (Is. 41:11). Naquiiñeʼ gánnanu qué zanda gucáʼlunu Dios ne guni ganarnu laa. Neca qué ziuu dxi gábinu Jiobá cadxiichinenu laa, peru zándaca guidxiichinenu laabe ndaaniʼ ladxidoʼno, purtiʼ Proverbios 19:3 na: «Guendahuati stiʼ ti binni nga rucaa laa cheʼ lu ti neza ra zacaná, ne pur nga ridxiichiné ladxidoʼbe Jiobá». Ne zahuinni cadxiichinenu laabe pa gusaana de chuunu ca guendaridagulisaa, pa gusaana de gúninu xhiiñabe o pa guixélenu de ca binni ridagulisaa.

⁵ Xi zanda gucaa laanu guidxiichinenu Jiobá. Xi gúninu para cadi guiábanu lu trampa riʼ. Naquiiñeʼ guicábinu ca guendarinabadiidxaʼ riʼ, purtiʼ zacá qué zaxélenu de Dios.

6, 7. Xiñee bidxiichiné ca israelita ni bibani tiempu stiʼ Moisés que Jiobá.

⁶ Xi zanda gucaa ti xpinni Dios guidxiichiné Jiobá ndaaniʼ ladxidóʼ. Lu tema riʼ zadúʼyanu gaayuʼ cosa ni zanda gucaa laanu gápanu xiana ndaaniʼ ladxidoʼno ne laaca zadúʼyanu chupa chonna ejemplu ni zeeda lu Biblia de ca binni ni biaba lu trampa riʼ (1 Cor. 10:11, 12).

⁷ Cadi gucaʼdiáganu cani riníʼ mal de Jiobá. Biblia na: «Paraa ndiʼ chichuʼnu pue. Maʼ bichibi ca bíʼchidu ladxidoʼdo purtiʼ caniʼcaʼ: “Nabé nasoo ca binni que ne jma nadípacaʼ que laadu, nuu guidxi roʼ ni napa lindaa ni rindá dede guibáʼ, ne laaca bidúʼyadu ca xiiñiʼ anaquim raqué”» (Deuteronomio 1:28). Ma biree xquidxi Dios de Egipto, ra guyuucaʼ de esclavu. Gulee Jiobá laacabe raqué ora biseendaʼ chii plaga ndaaniʼ guidxi ni cuquiichináʼ laacabe, ne maʼ binitilube Faraón ne ca soldadu stiʼ ndaaniʼ nisadóʼ Xiñáʼ (Éx. 12:29-32, 51; 14:29-31; Sal. 136:15). Yanna maʼ nuu guidxi que listu para guiuu lu Layú ni Bizabiruaa Dios gudii laacaʼ. Peru oraquepeʼ nga bizulú bidxiichinécabe Jiobá. Xiñee maʼ qué ñápacabe fe yaʼ. Bidxibi ladxidóʼcabe ora binadiágacabe ni guníʼ chii de ca hombre ni yeguuya layú que (Núm. 14:1-4). Xi bizaaca pur ngue yaʼ. Qué nudii Jiobá lugar ñuu guiráʼ ca binni que lu layú sicarú que (Deut. 1:34, 35). Yanna, laanu yaʼ. Ñee zudiʼnu lugar guirá fe stinu pur gucaʼdiáganu ca binni ni riníʼ mal de Dios ne guni nga guidxiichinenu laabe ora guininu cadi jneza ni canábabe gúninu la?

8. Xiñee bigaaniʼ ca israelita ni bibani tiempu stiʼ Isaías donda Jiobá pur ca guendanagana sticaʼ.

⁸ Cadi guireʼnu gana pur ca desgracia ne pur ca guendananá ni gápanu. Biblia na: «Cumu candaanabe ne cadxiichibe la? dxandipeʼ zaniʼbe mal de rey ne de Dios stibe» (Isaías 8:21). Gudiʼdiʼ guidxi Judá lu ti guendanagana ca dxi bibani Isaías. Guluu ca xhenemígucabe leʼ laacabe. Stale de laacabe qué ñapa guendaró purtiʼ bidxunu ni raqué. Peru ndiʼ nga ni jma triste: maʼ cadi cucaadiágacabe Jiobá ne chaahuiʼ chaahuiʼ zixélecabe de laa (Amós 8:11). Lugar de nuyúbicabe Jiobá ora cadíʼdicabe ra nagana, laga guníʼcabe «mal de rey ne de Dios» stícabe. Bigaanicabe donda Jiobá pur ca guendanagana stícabe. Pa gueeda guizaacanu xiixa desgracia o pa gápanu xiixa guendanagana, ñándaca ñábanu lu trampa biábacabe ne nininu ndaaniʼ ladxidoʼno: «Xiñee qué ñacané Jiobá naa órapeʼ caquiiñeʼ laa pue».

9. Xiñee guníʼ ique ca israelita ni bibani tiempu stiʼ Ezequiel cadi jneza modo runi Jiobá dxiiñaʼ.

⁹ Qué ganna chaahuinu xi guiráʼ bizaaca. Cumu qué ganna ca israelita ni nabani tiempu stiʼ Ezequiel xiñee cayaca stale cosa la? guníʼ íquecaʼ «cadi jneza guiráʼ ni cayuni Jiobá» (Ezeq. 18:29). Beeda  gácani casi ora niguíxhecabe ley stícabe ne niquiiñecabe ni para ñuni juzgárcabe Jiobá ne niníʼcabe cadi jneza ni cayuni, neca qué gánnacabe xiñee cayuni Dios cani. Zándaca ziuu biaje qué ziénenu xiixa relatu zeeda lu Biblia o xiñee nápanu xiixa guendanagana, peru ñee zudiʼnu lugar gucaa ladxidoʼno laanu guiníʼ íquenu «cadi jneza guiráʼ ni cayuni Jiobá» la? (Job 35:2.)

10. Xi zanda gucaa tuuxa guni cásica biʼniʼ Adán.

¹⁰ Cadi ugáʼninu donda Dios pur ca pecadu stinu ne ora gucheʼnu. Adán nga primé hombre ni bibani ndaaniʼ Guidxilayú, laa bigaaniʼ donda Dios pur pecadu stiʼ (Gén. 3:12). Nanna Adán cucheené ley stiʼ Dios ne nanna zuni castigar Dios laa pur ni chiguni, neca zaqué bigaanibe donda Jiobá, casi ora ñábibe laa cadi jneza biʼniʼ bicheelaʼ laabe Eva, purtiʼ bicaa gunaa que laabe gucheebe. Dede dxi que, stale binni rugaaniʼ donda Dios ora guchee, cásica biʼniʼ Adán. Galán guinabadiidxanu laca laanu: «Pa naa nga napaʼ donda pur bicheeʼ ne pur laani cadideʼ lu ti yuubaʼ ni cayuniná naa, ñee zudieeʼ lugar gucaacani naa guiniéʼ cadi jneza guiráʼ cani rinabaʼ Jiobá naa guneʼ la?».

11. Xi rusiidiʼ historia stiʼ Jonás laanu.

¹¹ Cadi guiníʼ íquenu jma risácanu que stobi. Laaca bidxiichi profeta Jonás dxi bilaselaʼdxiʼ Jiobá ca binni de Nínive (Jon. 4:1-3). Xiñee yaʼ. Purtiʼ jma guyuube xizaa xi guiníʼ binni de laabe pa qué guinitilú guidxi que. Jma rápabe gana guʼyaʼ binni laabe casi tuuxa ni qué rusiguii, lugar de nilaseláʼdxibe ca binni de Nínive ni guca arrepentir. Pa guiníʼ íquenu lu ni caquiiñesinu la? zándaca guidxiichinenu Jiobá ora guininu xiñee caʼruʼ gunitilube guiráʼ binni malu. Pa maʼ xadxí de cusíʼdinu binni mayaca guedandá dxi stiʼ Jiobá, ñee zadxiichinenu Jiobá ora guiníʼ binni mal de laanu purtiʼ caʼruʼ gueeda dxi ca la? (2 Ped. 3:3, 4, 9.)

12, 13. Xi naquiiñeʼ gúninu pa guiníʼ íquenu cadi jneza runi Jiobá xiixa cosa o xiñee rudiibe lugar gaca xiixa.

¹² Xi naquiiñeʼ gúninu pa guiníʼ íquenu cadi jneza runi Jiobá xiixa cosa o xiñee  rudiibe  lugar gaca xiixa yaʼ. Ti guendahuati nga guiníʼ íquenu zacá. Sicaríʼ rutiixhi sti Biblia Proverbios 19:3: «Nuu binni huati  laca laa runitilú xquendanabani, peru despué maʼ rugaaniʼ donda Dios» (La Palabra de Dios para Todos). Yanna guidúʼyanu gaayuʼ cosa ni zacané laanu para cadi chuʼ dxi ugáʼninu donda Jiobá ora gápanu xiixa guendanagana.

¹³ Cadi gusaana de gaca xhamígunu Jiobá. Pa dxandíʼ xhamígunu Jiobá la? qué ziuu dxi guidxiichinenu laabe. Biblia na: «Gulaʼquiʼ guidubi ladxidoʼloʼ lu náʼ Jiobá, ne cadi gúniluʼ ni na si xpiaaniluʼ. Lu guiráʼ ni gúniluʼ guníʼ ique laabe, ne laabe zúnibe ca neza stiluʼ derechu» (Proverbios 3:5, 6). Naquiiñeʼ guni crenu Jiobá ne cadi guiníʼ íquenu jma nánnanu que laabe o guininu jma risácanu que stobi (Prov. 3:7; Ecl. 7:16). Zacá qué ziuu dxi ugáʼninu donda Jiobá pur xiixa cosa malu ni guizaacanu.

14, 15. Xi naquiiñeʼ gúninu para cadi guireʼnu gana ora gunadiáganu xi guiníʼ sti binni.

¹⁴ Cadi gucaʼdiáganu ca binni ni zabee gana laanu. Ca israelita ni bibani ca dxi stiʼ Moisés que, gúpacaʼ stale razón para guni crecaʼ zanda uguu Jiobá laacaʼ lu layú ni maca guniʼbe guicaacaʼ (Sal. 78:43-53). Peru ora binadiágacabe guiráʼ ni cadi jneza caníʼ chii de ca hombre ni yeguuya layú que la? biaandaʼ «laacabe pabiáʼ nadipaʼ» náʼ Jiobá (Sal. 78:42). Pa guiníʼ íquenu lu guiráʼ ca cosa sicarú ni maʼ biʼniʼ Jiobá pur laanu la? jma zaca xhamígunu laabe. Zacá qué zaxélenu de Jiobá ora gunadiáganu guiníʼ ti binni xiixa cosa malu de laabe (Sal. 77:11, 12).

¹⁵ Pa guiníʼ íquenu mal de ca xpinni Cristu la? laaca zaxélenu de Jiobá (1 Juan 4:20). Guzéʼtenu xi biʼniʼ ca israelita. Ora gúnnacabe gulí Jiobá Aarón para gaca sacerdote la? bidxiichicabe, peru biiyaʼ Jiobá laa ngue cadxiichinécabe (Núm. 17:10). Zacaca nga laanu, pa quiche ruaanu ne guidxiichinenu ca hombre ni caquiiñeʼ Jiobá para sániruʼ ndaaniʼ xquidxi lu Guidxilayú riʼ la? zeeda gácani casi ora nugáʼninu donda Jiobá pur ni cayuni (Heb. 13:7, 17).

16, 17. Xi naquiiñeʼ gúninu pa gápanu xiixa guendanagana.

¹⁶ Guietenaláʼdxinu qué gapa Jiobá donda pur ca guendanagana ridídinu. Neca maʼ bixeleʼ ca israelita ni bibani ca dxi stiʼ Isaías que de Jiobá, gúparuʼ Jiobá gana ñacané laacabe (Is. 1:16-19). Intiica guendanagana cadídinu, ratadxí ladxidoʼno ora gánnanu rizaalaʼdxiʼ Jiobá laanu ne racalaʼdxiʼ gacané laanu (1 Ped. 5:7). Dede maʼ guniʼbe zudiibe stipa laanu para guni huantarnu (1 Cor. 10:13).

¹⁷ Pa gueeda guizaacanu xiixa ni cadi jneza cásica guca Job la? naquiiñeʼ guietenaláʼdxinu qué gapa Jiobá donda. Biblia na nanaláʼdxibe binni ni qué runi ni jneza, peru nadxiibe ca binni ni nachaʼhuiʼ (Sal. 33:5). Gácanu casi Elihú, xhamigu Job, laa guníʼ: «¡Zitu zuhuaa de ndaaniʼ ique Dios ni dxandíʼ ca guni ni malu, ne zitu zuhuaa de ni jma napa poder ca guni ni cadi jneza!» (Job 34:10). Qué gapa diʼ Jiobá donda pur ca guendanagana ni cadídinu, purtiʼ de laabe reeda «irá ni nachaʼhui ne irá ni dxandí sicarú» (Sant. 1:13, 17).

18, 19. Xiñee naquiiñeʼ guni crenu Jiobá de guidubi ladxidoʼno. Bizeeteʼ ti ejemplu.

¹⁸ Guni crenu Jiobá de guidubi ladxidoʼno. Jiobá nga ti Dios ni qué ruchee, ne jma jneza modo riníʼ íquebe que laanu (Is. 55:8, 9). Nga runi, pa qué rudxíʼbanu laca laanu la? zudiʼnu cuenta cadi guiráʼ diʼ biaje nga nánnanu xi guiráʼ guca (Rom. 9:20). Huaxiéʼ si biaje zanda gánnanu xi pur cayaca ti cosa. Zándaca maʼ bidiiluʼ cuenta dxandíʼ ni na ca diidxaʼ riʼ: «Primé binni ni guiníʼ de xiixa ni bizaaca ruluíʼ dxandíʼ ni caníʼ,  peru ora gueeda binni ni cadindenebe ca zusihuinni cusiguiibe» (Prov. 18:17, Nueva Biblia al Día).

¹⁹ Pa málasi ñánnanu biʼniʼ ti xhamígunu xiixa ni rábinu cadi jneza, ñee nagueendaca zaníʼ íquenu bíʼnibe ni purtiʼ malu laabe la? Coʼ, njaʼ. Ni jma jneza gúninu nga guiníʼ íquenu qué ganna chaahuinu xi guiráʼ bizaaca. Yanna, pa zacá riníʼ íquenu de ti xhamígunu, ñee cadi laaca zacá nga naquiiñeʼ guiníʼ íquenu de Bixhózenu ni nuu guibáʼ, ti Dios ni qué ruchee ne jma jneza modo riníʼ ique la?

20, 21. Xiñee cadi jneza ugáʼninu donda Jiobá pur ca pecadu stinu.

²⁰ Guietenaláʼdxinu xiñee nápanu guendanagana. Zándaca laca laanu nga nápanu donda pur ca guendanagana cadídinu (Gál. 6:7). Xiñee cadi jneza ugáʼninu donda Jiobá yaʼ. Guzéʼtenu ejemplu stiʼ tuuxa ni napa ti carru. Pa nabé reciu o nadipaʼ zigusabe carru ca ora guiuube lu ti curva ne pur nga guidxelasaabe, tu napa donda yaʼ. Ñee napa binni ni bizáʼ carru ca donda la? ¡Coʼ njaʼ! Jiobá laaca rudii lugar cuinu xi gúninu, peru rudiibe conseju laanu para gánnanu xi naquiiñeʼ gúninu. Yanna, ñee zugáʼninu donda laabe ora gucheʼnu la?

²¹ Peru cadi guiráʼ diʼ biaje nga nápanu donda pur ca pecadu stinu. Nuu tiru «málasi rizaaca» xiixa ni cadi cabézanu (Ecl. 9:11). Ne cadi guiaandaʼ ndiʼ laanu: Binidxabaʼ nga napa donda pur guiráʼ guendanagana ni cadídinu yanna (1 Juan 5:19; Apoc. 12:9). ¡Laabe nga xhenemígunu, ne cadi Jiobá! (1 Ped. 5:8.)

22, 23. Xi naquiiñeʼ guietenaláʼdxinu pa careʼnu gana pur ca guendanagana stinu.

²² Ora tiidiluʼ lu xiixa guendanagana, bietenalaʼdxiʼ ejemplu stiʼ Josué ne Caleb. Laacabe guníʼcabe zanda chúʼcabe lu Layú ni Bizabiruaa Dios gudii laacabe ne qué nidxíbicabe casi bidxibi 10 hombre yenécabe (Núm. 14:6-9). Bisihuinni Josué ne Caleb dxandíʼ nápacaʼ fe. Neca zaqué, guzácabe cuarenta iza lu desiertu né ca israelita, neca qué gápacabe donda pur ni guca que. Peru qué ñuu dxi nidxiichicabe o nutópacabe xiana, sínuque gúpacabe fe Jiobá ne pur ngue guluu Dios ndaayaʼ laacabe. Guti stale de ca israelita lu desiertu que, peru bidii Jiobá lugar chuʼ Josué ne Caleb lu Layú ni Bizabiruaa Dios (Núm. 14:30). Laaca zaguu Jiobá ndaayaʼ laanu pa «qué cui sa nu atrá» ora maʼ cayúninu ni nabe (Gál. 6:9; Heb. 6:10).

²³ Xi naquiiñeʼ gúniluʼ pa maʼ bireeluʼ gana pur ca guendanagana stiluʼ, pur bicheeluʼ o pur ni biʼniʼ stobi yaʼ. Guníʼ ique pabiáʼ sicarú ca guenda napa Jiobá ne bixuiʼlú ca cosa sicarú ni chigudii Jiobá lii. Gunabadiidxaʼ laca lii: «Paraa ñuaaʼ nagasi pa qué ñunebiaʼyaʼ Jiobá yaʼ». Qué chuʼ dxi guixéleluʼ de Jiobá, ne cadi gudiiluʼ lugar guidxiichiné ladxidoʼloʼ laabe.