SICARÍʼ guníʼ François, ti binnigola ni nabeza ndaaniʼ ti guidxi ni deruʼ caroobaʼ: «Biluxe guca si ti votación nabé guyuudinde ca binni guidxi que, ngue runi bixooñeʼ mil de testigu stiʼ Jiobá de ralidxi. Cumu bixiéʼ ni gó binni ne bixiéʼ medicina la? guizáʼ caru bisaca cani. Bideeguʼ guiráʼ bancu, ne nuu caadxi cajero automático birá bueltu ndaanicaʼ ne xcaadxi de laacani bixiiñeʼ».

Ca xpinni Cristu de Betel ni nuu ndaaniʼ guidxi que bizulú biseendacaʼ bueltu ne xcaadxi cosa ni iquiiñeʼ ca Testigu ni bisaana lidxi ne yeguiaana ndaaniʼ ca Yoo stiʼ Reinu ni nuu ndaaniʼ guidubi naca guidxi que. Ca binni ni nuu lu guiropaʼ partidu que rucueezacabe binni lu carretera para cadi tiidiʼ tutiica si, peru cumu nánnacabe qué lica riuu ca Testigu lu política la? rudiicabe lugar tiidiʼ ca carru stiʼ Betel.

Sicaríʼ guníʼ François: «Neza ziuudu ra nuu ti Yoo stiʼ Reinu bicuaagu caadxi francotirador camioneta stidu. Biaʼ qué ninaaze si ca bala que laadu. Ora bíʼyadu zeeda guxooñeʼ ti soldadu naaze guiibaʼ neza ra nuudu la? nagueendaca bieʼquenedu camioneta que ne bibiguétadu Betel. Bidiʼdu xquíxepeʼ Jiobá purtiʼ qué ñátidu raqué. Sti dxi que, guiráʼ 130 xpinni Cristu ni guyé ndaaniʼ Yoo stiʼ Reinu que bilacaʼ. Caadxi de laacabe yendácabe Betel, ne raqué bidiʼdu laacabe guiráʼ ni caquiiñecabe para chúʼcabe galán né Dios ne laaca bidiʼdu laacabe ni guibaninécabe dede ora biluxe guiráʼ ni cayaca lugar que.

»Despué yendá stale carta Betel ni biseendaʼ ca xpinni Cristu ni nabeza ndaaniʼ guidxi que para gudiicaʼ xquíxepeʼ pur gucanécabe laacaʼ. Jma gúpacabe fe Jiobá ora bíʼyacabe gucané ca xpinni Cristu de xcaadxi lugar laacabe».

Ora guizaaca xiixa desgracia casi xu o guizaaca xiixa desgracia pur ni runi binni, qué rábidinu ca xpinni Cristu ni caquiiñeʼ tu gacané laacaʼ: «Uyuu xidxaa ne gudó de ra idxá luʼ» (Sant. 2:15, 16). Lugar de guininu zacá, ruyúbinu gudiʼnu ni iquiiñeʼ ca xpinni Cristu, cásica biʼniʼ ca discípulo ni bibani lu primé siglu que. Ora gunna ca discípulo que chigaca ti gubiña «uníʼ stiidxa ca [...] uchaaga ca biaʼ ganda udii cada tobi para acané ca ca hermanu ni nuu Judea» (Hech. 11:28-30).

Laanu ca xpinni Jiobá de guidubi ladxidoʼno racaláʼdxinu gudiʼnu ni caquiiñeʼ binni, peru nánnanu laaca caquiiñeʼ guiziidiʼ binni de Dios (Mat. 5:3). Para gacanenu laacabe gudiicabe cuenta caquiiñeʼ chúʼcabe gaxha de Dios ne gúnicabe ni nabe la? Jesús gudxi ca xpinni caquiiñeʼ gacanecaʼ binni gácacaʼ discípulo stiʼ (Mat. 28:19, 20). Cada tobi de laanu riquiiñenu stale tiempu, stipa ne cani nápanu para gúninu dxiiñaʼ riʼ. Xquidxi Jiobá riquiiñeʼ ca bueltu ni ricaacaʼ para gacanecaʼ cani caquiiñeʼ gacanécabe laacaʼ, peru jma nga riquiiñecabe ca bueltu ca para gaca xhiiñaʼ Reinu ne guireeche diidxaʼ. Zacá rusihuínninu nadxiinu Dios ne nadxiinu binni (Mat. 22:37-39).

Cani rudii bueltu para gaca dxiiñaʼ ni runi ca testigu stiʼ Jiobá lu guidubi Guidxilayú naquiiñeʼ gánnacabe caquiiñeʼ bueltu ni rudiicabe ca jneza. Ñee zanda gúninu xiixa para gacanenu ca xpinni Cristu ni caquiiñeʼ tu gacané laacaʼ la? Ñee zanda gacaneluʼ lu dxiiñaʼ ni cayúninu para ganda gaca jma binni discípulo stiʼ Cristu la? Pa racaláʼdxiluʼ gúniluʼ zacá la? galán chinándaluʼ conseju ni zeeda lu Proverbios 3:27: «Cadi gusaana de gacaneluʼ tuuxa ni caquiiñeʼ ni, pa nuu lu naluʼ gúniluʼ ni».