1, 2. Xi guendanagana rapa ca binni rié sti guidxi ora ribiguétacaʼ ra nuu binnilídxicaʼ. (Biiyaʼ foto ni zeeda ra ruzulú tema riʼ.)

SICARÍʼ guníʼ Eduardo: «Gulezaʼ sti guidxi; ne raqué gupaʼ ti dxiiñaʼ ra nabé bineʼ ganar bueltu. * Peru dxi bizulú biindané ca testigu stiʼ Jiobá naa Biblia, bidieeʼ cuenta napaʼ ti dxiiñaʼ jma risaca: gacaniáʼ binnilidxeʼ chuʼcaʼ gaxha de Dios ne cadi gudieesiáʼ ni iquiiñecaʼ. Ngue runi bibiguetaʼ ra nuucaʼ» (Efes. 6:4).

² Nanna Eduardo racalaʼdxiʼ Jiobá guibiguetanebe binnilídxibe. Peru cásica Liliana —gunaa ni bizéʼtenu lu tema ni gudídinu ca—, gúcani nagana para laabe, purtiʼ naquiiñeʼ gusihuínnibe nadxiibe binnilídxibe. Ne laaca naquiiñeʼ gudiibe ni caquiiñeʼ xheelabe ne ca xiiñibe ndaaniʼ ti guidxi ra gástipeʼ bueltu. Ximodo zanda gúnibe ni yaʼ. Ñee zanda gacané ca xpinni Cristu laabe la?

3. Ximodo racaná ladxidóʼ xiiñiʼ binni ora qué riuu bixhózecaʼ né laacaʼ.

³ Eduardo guníʼ: «Bidieeʼ cuenta qué nulabeʼ ca xiiñeʼ ora jma biquiiñecaʼ tu gacané laacaʼ ne tu ñannaxhii laacaʼ. Qué guineʼ para ñuundaniáʼ laacabe ca historia stiʼ Biblia, ñuni orardu juntu, niguiidxeʼ laacabe ne niguiteniáʼ laacabe» (Deut. 6:7).  Ana, xiiñibe huaniisi guníʼ: «Nabé riuaaʼ triste, purtiʼ qué guinni bixhozeʼ. Dxi bibiguétabe, runibiaʼdu lube ne ridxi si stibe. Huaxiéʼ galán runeʼ sentir ora riguiidxibe naa».

4. Xiñee raca nagana para ti hombre ni yeguni dxiiñaʼ sti guidxi gusihuinni laa nga xaíque ndaaniʼ lidxi.

⁴ Ora jma xadxí chuʼ ti hombre zitu de ra lidxi, jma nagana zaca para laa guni ni nexheʼ guni ti binni ni naca xaíque ndaaniʼ lidxi. Rubí, xheelaʼ Eduardo guníʼ: «Laaca naa nga amá ne laaca naa nga apá. Naa nga riguixheʼ xi guni binnilidxeʼ. Nga runi, dxi bibiguetaʼ Eduardo la? gupaʼ xidé yenandaʼ ni quíxhebe gaca, casi naquiiñeʼ guni ca xpinni Cristu. Nuu biaje riaandaʼ naa maʼ nuu xheelaʼ ra yoo» (Efes. 5:22, 23). Eduardo guníʼ: «Ca dxaapahuiiniʼ stidu maʼ biaacaʼ guinábacaʼ permisu jñaacaʼ. [...] Biyubeʼ modo guʼyaʼ ca binnilidxeʼ naa casi ti binni ni naca xaíque lidxi, peru bineʼ ni casi naquiiñeʼ guni ca xpinni Cristu ni». Eduardo ne Rubí bidiicaʼ cuenta naquiiñeʼ guʼyaʼ ca xiiñicaʼ guiropaʼ ca nga riguíxhecaʼ xi gaca.

5. 1) Xi biʼniʼ Eduardo para gunda guyuu binnilidxi tobi si. 2) Xi guleendube.

⁵ Gudixhe ique Eduardo guni intiica cosa para gacané binnilidxi chuʼ gaxha de Dios ne guyubi modo gannaxhii binnilidxi laa. Laabe guniʼbe: «Gudixheʼ iqueʼ gusiideʼ ca xiiñeʼ ni na Biblia ne gúʼyacaʼ guneʼ ni; gudxeʼ ca xiiñeʼ gannaxhiicaʼ Jiobá, peru naa laaca bineʼ ni» (1 Juan 3:18). Ñee guluu ndaayaʼ Dios stipa biʼniʼ Eduardo la? Ana guníʼ: «Ora ridúʼyadu cayúnibe stipa pur gusiniisibe laadu jneza la? nabé bisisácadu ni. Ne nabé nayecheʼ runi sentirdu ora ridúʼyadu pabiáʼ racanebe neza binni ridagulisaa ra riuudu. Guidxilayú stiʼ Binidxabaʼ gucalaʼdxiʼ nuxheleʼ laadu de Jiobá, peru jñaaʼ ne bixhozeʼ gudixhe íquecaʼ gúnicaʼ ni na Jiobá, ne zacaca bínidu. Bixhozeʼ gudxi laadu maʼ qué ziuuruʼ dxi gusaana laadu, ne zaqué bíʼnibe ni. Pa ñaca ñebe sti biaje la? zándaca maʼ cadi nuaaʼ ndaaniʼ xquidxi Jiobá».

6. Xi bidii chupa chonna binni napa xiiñiʼ cuenta dxi guca guerra de los Balcanes.

⁶ Dxi guca guerra de los Balcanes, chupa chonna de ca familia ni naca testigu stiʼ Jiobá ni nabeza ra guca guerra ca biiyacaʼ nayecheʼ guyuu ca xiiñicaʼ neca nagana modo bibánicaʼ. Xiñee yaʼ. Cumu qué ñanda ñe bixhózecabe dxiiñaʼ la? Ngue runi biaanacabe ra lídxicabe ne biquiiñecabe tiempu que para guʼndanécabe ca xiiñicabe Biblia, quitenécabe laacaʼ ne güinécabe laacaʼ diidxaʼ. Xi rusiidiʼ ndiʼ laanu yaʼ. Rusiidiʼ ni laanu jma riuulaʼdxiʼ xiiñiʼ binni chuʼné jñaa ne bixhoze que gusigáʼdecaʼ laabe stale cosa o gápacaʼ bidxichi. Ne Stiidxaʼ Dios na jma galán rusiniisi binni xiiñiʼ ora ribee tiempu para laacabe ne ora rizaalaʼdxiʼ laacabe (Prov. 22:6).

7, 8. 1) Xi huaníʼ chupa chonna binni ni napa xiiñiʼ, peru cadi jneza ni. 2) Xi zanda guni ti binni para gannaxhii binnilidxi laa.

⁷ Ora ribiguetaʼ ca binni ni riguni dxiiñaʼ sti guidxi, rudiicaʼ cuenta cadxiichiné xiiñicaʼ laacaʼ ne maʼ qué gápacaʼ confianza laacabe. Ora guizaaca nga, nuu tu laa huaníʼ: «Xiñee ruʼnuʼ naa zacá. ¡Despué de guiráʼ ni maʼ bidieeʼ lii!». Peru cadi jneza diʼ riníʼcabe zacá. Qué rudiicabe cuenta naná nuu ladxidóʼ xiiñicabe purtiʼ bisaanacabe laacaʼ. Pa zacá cazaacaluʼ, xi zanda gúniluʼ para guni chaahuiluʼ guendanagana riʼ yaʼ.

⁸ Gunabaʼ Jiobá gacané lii gánnaluʼ ximodo cayuni sentir binnilídxiluʼ. Ne gudxi laacabe laaca nápaluʼ donda. Gudxi laacabe naná nuu ladxidoʼloʼ pur ni bíʼniluʼ. Pa guʼyaʼ xheelaluʼ ne ca xiiñiluʼ rúniluʼ stipa guiráʼ dxi pur guni chaahuiluʼ ca guendanagana ni nápatu la? Zudiicabe cuenta cayúniluʼ ni de guidubi ladxidoʼloʼ. Pa gápaluʼ paciencia, zannaxhii binnilídxiluʼ lii ne zuni respetarcaʼ lii sti biaje.

9. Xiñee cadi caquiiñeʼ gapa ca xpinni Cristu stale bidxichi para gudiicaʼ ni caquiiñeʼ binnilídxicaʼ.

⁹ Apóstol Pablu bizeeteʼ naquiiñeʼ gacané xiiñiʼ binni laa ne ca xhiágacaʼ ora maʼ qué ganda gúnicaʼ dxiiñaʼ, «purtiʼ laacaʼ bisiniisicaʼ laacabe». Peru laacaʼ gúdxibe ca xpinni Cristu chuʼcaʼ nayecheʼ né ni caquiiñesicaʼ casi ni gocaʼ, lari gácucaʼ ne ra cuézacaʼ, lugar de guicá íquecaʼ gápacaʼ stale bidxichi (biindaʼ 1 Timoteo 5:4, 8; 6:6-10). Nga runi, para ganda gudii ti xpinni Cristu ni caquiiñeʼ binnilidxi, cadi caquiiñeʼ diʼ gápabe stale bidxichi, purtiʼ maʼ cadi candaa zaluxe guidxilayú riʼ (1 Juan 2:15-17). Cadi gudiʼnu lugar «quite bidxichi» íquenu o guicá íquenu «ni ricá ique binni ni qué runibiáʼ Dios» ne pur nga maʼ qué guicaa binnilídxinu «enda nabani ni qué zaluxe» (Mar. 4:19; Luc. 21:34-36; 1 Tim. 6:19).

10. Xiñee cadi naquiiñeʼ guzáʼbinu stiʼ binni.

¹⁰ Nanna Jiobá caquiiñenu ti ndaa bueltu para guibaninenu. Peru bueltu ca qué zanda gacané laanu casi racané cani rusiidiʼ Jiobá laanu (Ecl. 7:12; Luc. 12:15). Stale binni qué riníʼ ique xi guiráʼ gastu zuni ora chiguni dxiiñaʼ sti guidxi. Ne cadi guiráʼ diʼ biaje runi ganárcabe stale bueltu ora chécabe sti guidxi. Laaca ridxaagalúcabe stale guendanagana. Ne stale tu laa ruzaabiʼ stiʼ binni. Lugar de ñápacabe stale tiempu para ñúnicabe xhiiñaʼ Dios la? laga rúnicabe stale dxiiñaʼ para quíxecabe ra nuzaabicabe. Biblia na: «Binni ricu nga runi mandar ca binni pobre, ne ni riguiiñeʼ raca esclavu stiʼ hombre ni rutiiñeʼ laa» (Proverbios 22:7). Yanna, xi rusiidiʼ Dios laanu yaʼ. Primé, cadi guzáʼbinu stiʼ binni.

11. Xiñee galán guʼyaʼ binni pabiáʼ zanda guni gastu.

¹¹ Bibiguetaʼ Eduardo né binnilidxi peru nánnabe naquiiñeʼ gúnibe dxiiñaʼ para gudiibe ni caquiiñecaʼ. Laabe ne xheelabe biiyacabe xii nga ni jma caquiiñecabe ne biiyacabe pabiáʼ zanda gúnicabe gastu. Bidiicabe cuenta zacaneni laacabe para cadi gúnicabe stale gastu casi bíʼnicabe dxiqué. Ne guirácabe maʼ qué nizíʼcabe cosa ni cadi caquiiñecabe. * Eduardo guníʼ: «Guleeʼ ca xiiñeʼ ra scuela de paga ne bicaa laca ra scuela stiʼ gobiernu, purtiʼ laaca galán rusiidicabe raqué». Laabe ne binnilídxibe gunábacabe Jiobá guidxélabe ti dxiiñaʼ ni cadi gucueeza laabe gúnibe xhiiñaʼ Dios. Ximodo bicabi Jiobá laabe yaʼ.

12, 13. 1) Xi biʼniʼ Eduardo para bidii ni caquiiñeʼ binnilidxi. 2) Ximodo guluu Jiobá ndaayaʼ stipa stibe.

¹² Eduardo guníʼ: «Chupa iza de bibiguetaʼ que, biaadxaʼ bueltu laadu. Qué rugaanda biaʼ runeʼ ganar que para sidu guiráʼ ni caquiiñedu, maʼ cará bueltu ni naguu chaahuidu ne nabé maʼ ridxagaʼ. Peru qué riaadxadu ca guendaridagulisaa ne rucheechedu diidxaʼ juntu». Eduardo gudixhe ique cadi guni xiixa dxiiñaʼ ni guxheleʼ laa de binnilidxi chupa chonna beeu o ti iza. Laabe guniʼbe: «Biziideʼ gadxé gadxé dxiiñaʼ. Ti ora gastiʼ tobi la? zanda guneʼ stobi».

¹³ Cumu bindaa Eduardo para quixe guiráʼ ra nuzaabiʼ la? jma stale interés gudixe. Peru gudixhe ique Eduardo guni ni ti ganda chuʼné binnilidxi tobi si, casi naquiiñeʼ guni ca xpinni Cristu. Laabe guniʼbe: «Yanna runeʼ ganar menu de 10% de biaʼ bineʼ ganar dxi guyuaaʼ sti guidxi, peru nápadu ni caquiiñedu. Nuuca Jiobá para gacané laadu. Gúcadu precursor, ne despué maʼ gúpadu sti ndaa bueltu, ne maʼ qué ñaca nagana para naa gudieeʼ ni caquiiñeʼ binnilidxeʼ» (Is. 59:1).

14, 15. 1) Xi zanda guni ca xpinni Cristu ora gucaa binnilídxicaʼ laacaʼ gúnicaʼ dxiiñaʼ ne cadi ni na Dios. 2) Xi zuni ca binnilídxinu ora gúʼyacaʼ ejemplu stinu.

¹⁴ Ndaaniʼ stale guidxi, maʼ biaa binni gudii bueltu ne gusigaʼdeʼ cosa ca binnilidxi ne ca xhamigu. Eduardo guníʼ: «Zacá nga runi binni xquídxidu, ne riuuláʼdxidu gúnidu ni. Peru naquiiñeʼ ganna binni cadi guiráʼ biaje zanda gúnini. Né diidxaʼ nadóʼ rabeʼ ca binnilidxeʼ ne ca xhamiguaʼ zudieeʼ laacabe biaʼ ganda, peru primeru naquiiñeʼ gudieeʼ ni caquiiñeʼ xheelaʼ ne ca xiiñeʼ para ganda gúnidu xhiiñaʼ Dios».

¹⁵ Nuu binnilidxi ca binni ni ribiguetaʼ xquidxi, ridxiichicaʼ o qué riuuláʼdxicaʼ ora qué rinácabe chigúnicabe dxiiñaʼ zitu. Ne zándaca guiniʼcaʼ ruyúbibe para laasibe. Xiñee riníʼcabe zacá yaʼ. Purtiʼ ricá lucaʼ xpuéltube (Prov. 19:6, 7). Ana, xiiñiʼ Eduardo guníʼ: «Pa gúnidu xhiiñaʼ Jiobá primé lu xquendanabánidu, zudii ca binnilídxidu cuenta nga nga ni jma risaca para laadu. Zacatiʼ nga zanda guiénecabe dxandíʼ ni rábidu laacabe» (zanda gúʼndaluʼ 1 Pedro 3:1, 2).

16. 1) Xiñee cadi jneza modo riníʼ ique caadxi binni (Sant. 1:22). 2) Pora nga riguu ndaayaʼ Jiobá ni riguixhe ique ti binni.

¹⁶ Ti gunaa xpinni Cristu bisaana xheelaʼ ne ca xiiñiʼ para cheʼ sti guidxi ra jma nuu bueltu. Ora yendabe guidxi zebe que, gúdxibe ca binnigola: «Bínidu stale cosa para gunda benda raríʼ. Bisaana xheelaʼ de gaca binnigola. Nga runi, ribeza cuʼ ndaayaʼ Jiobá laadu pur ni gudixhe íquedu gúnidu riʼ». Riguu Dios ndaayaʼ ca binni ni rusihuinni napa fe laabe ora quixhe ique guni xiixa, peru qué riguube ndaayaʼ ca binni ni qué rinanda ca ley stibe, ne jmaruʼ si pa cusaanacaʼ ti dxiiñaʼ ni bidii Dios laacaʼ (biindaʼ Hebreos 11:6 ne 1 Juan 5:13-15).

17. 1) Xiñee naquiiñeʼ guinábanu Jiobá gacané laanu ante quixhe íquenu gúninu xiixa. 2)Xi zanda gúninu para gacané Jiobá laanu.

¹⁷ Para ganda guiree cani quixhe íqueluʼ jneza, gunabaʼ gacané Jiobá lii ante gúniluʼ ni, ne cadi despué. Gunabaʼ laabe gacanebe lii, gudiibe lii espíritu santu ne guendabiaaniʼ (2 Tim. 1:7). Guníʼ ique: «Pabiaʼtiʼ racaladxeʼ guzuubaʼ stiidxaʼ Jiobá yaʼ. Ñee zuneʼ ni nabe neca gucaalúcabe naa la?  Pa zacá ni, ñee cadi naquiiñeʼ guzuubaʼ stiidxabe neca gapaʼ ni guibaneniaʼsiáʼ la?» (Luc. 14:33). Guniʼné ca binnigola ne biʼniʼ ni na ca conseju stiʼ Biblia ni gudiicabe lii. Zacá zusihuínniluʼ runi creluʼ zacané Jiobá lii casi maʼ guníʼ. Ca binnigola ca qué zanda diʼ gábicaʼ lii xi naquiiñeʼ gúniluʼ, peru ca conseju stícabe zacanécani lii para quixhe íqueluʼ gúniluʼ ni jneza ne ni gusiecheʼ lii (2 Cor. 1:24).

18. 1) Tuu nga naquiiñeʼ gudii ni caquiiñeʼ binnilidxi. 2) Ximodo zanda gacanenu ca xpinni Cristu ni napa familia.

¹⁸ Dxiiñaʼ ni maʼ bidii Jiobá ca hombre ca nga gudiicaʼ ni caquiiñeʼ binnilídxicaʼ (Gál. 6:5). Stale tu laa cayuni dxiiñaʼ riʼ sin gusaana xheelaʼ ne ca xiiñiʼ, neca xcaadxi binni cayabi laabe gúnibe ni o neca riníʼ íquebe gúnibe ni. Ñee rábinu laacabe jneza nga ni cayúnicabe la? Ñee ruzéʼtenu laacabe ora runi orarnu Dios la? Zanda gusihuínninu nadxiinu laacabe ora iquiiñecabe tu chiné laacabe ra nuu doctor o guizaacacabe xiixa desgracia (Gál. 6:2; 1 Ped. 3:8). Ñanda ñacanenu laacabe para guidxélacabe dxiiñaʼ neza ra nabézanu la? o guni invitarnu laacabe ti guendaró o gudiʼnu laacabe ti ndaa bueltuhuiiniʼ la? Nga zanda gacané laacabe para cadi gusaanacabe binnilídxicabe ne chécabe sti lugar (Prov. 3:27, 28; 1 Juan 3:17).

19, 20. Xiñee naquiiñeʼ ganna dxichi ca xpinni Cristu zacané Jiobá laacaʼ.

¹⁹ Stiidxaʼ Dios na: «Cadi ibani tu para gapa si tu bidxichi, sínuque laguieche né biaʼ tiica napa tu, purti na Dios rabi laanu: “Qué zusaana laatu ne qué ziaana dxie de acaniá laatu”. Nga runi zanda iní nu sin chuʼ nu xizaa: “Racané [Jiobá] naa. Nga runi qué zadxibe ni guni binni naa”» (Heb. 13:5, 6). Ximodo zanda gúninu ni na ca diidxaʼ riʼ yaʼ.

²⁰ Ti xpinni Cristu ni maʼ xadxí de naca binnigola ne nabeza ndaaniʼ ti guidxi pobre guníʼ: «Stale biaje riníʼ binni nabé nayecheʼ nabani ca testigu stiʼ Jiobá. Ne laaca rudiicabe cuenta nabé galán modo ruzuchaahuiʼ ca Testigu neca pobre laacaʼ ne ruluíʼ jma nápacaʼ bueltu que xcaadxi binni». Ndiʼ rusihuinni dxandíʼ ca diidxaʼ ni guníʼ Jesús ora gúdxibe ca xpínnibe naquiiñeʼ gúnicaʼ ni na Reinu primé lu xquendanabánicaʼ (Mat. 6:28-30, 33). Naquiiñeʼ ganna dxíchiluʼ nadxii Bixhózeluʼ ni nuu guibáʼ lii ne racalaʼdxiʼ guibanineluʼ binnilídxiluʼ galán. Biblia na: «Cayuuyaʼ [Jiobá] guiráʼ ni cayaca lu guidxilayú para guluiʼbe stipa stibe luguiáʼ cani runi cré laabe de guidubi ladxidóʼ» (2 Crón. 16:9). Nga runi, maʼ bidiibe laanu ca ley stibe ni caníʼ ximodo gápanu ca binnilídxinu ti guibáninu galán. Ora ruzúʼbanu stiidxabe rusihuínninu nadxiinu laabe ne nápanu confianza laabe. Biblia na: «Sicarí nga ganaxhii nu Dios: guni nu ni na. Ne cadi nagana ni na be guni nu» (1 Juan 5:3).

21, 22. Xiñee maʼ gudixhe íqueluʼ guni confiarluʼ Jiobá.

²¹ Eduardo guníʼ: «Nannaʼ maʼ qué zanda gudxiguetaʼ tiempu guyuaaʼ zitu de xheelaʼ ne ca xiiñeʼ, peru qué ricapeʼ ni iqueʼ. Stale de cani bineniáʼ dxiiñaʼ dxiqué, yanna maʼ nápacaʼ stale bidxichi, peru cadi nabánicaʼ nayecheʼ. Guizáʼ stale guendanagana napa binnilídxicabe. Peru laadu, nuudu tobi si ne nabánidu nayecheʼ. Nabé ridxagayaaʼ ora ruuyaʼ nuu stale xpinni Cristu cayúnicaʼ xhiiñaʼ Dios primé lu xquendanabánicaʼ neca pobre laacaʼ. Ne guiradu cudiʼdu cuenta dxandíʼ ca diidxaʼ ni guníʼ Jesús» (biindaʼ Mateo 6:33).

²² Nga runi, ¡cadi guireeluʼ gana! Bizuubaʼ stiidxaʼ Jiobá ne gupa confianza laabe. Zanda gácaluʼ ti ejemplu para xcaadxi binni ora gusihuínniluʼ nadxiiluʼ xheelaluʼ ne ca xiiñiluʼ. Ne zacá zudiiluʼ cuenta Jiobá nga ni zacané lii.