¡GUIZÁʼ riéchenu guizíʼdinu de Jiobá lu ca guendaridagulisaa roʼ ca! Peru nuu sti cosa ni racané chuʼnu nayecheʼ ora riuunu cani: ora maʼ cadóʼnenu ca bíʼchinu ne ca bizáʼnanu raqué.

Lu beeu septiembre iza 1919, ca Binni Ruundaʼ Biblia gúpacaʼ ti guendaridagulisaa de xhono gubidxa guidxi Cedar Point (Estados Unidos). Maca biyúbicabe chupa chonna hotel para guiaana ca binni cheʼ guendaridagulisaa que ne para gocaʼ gueta. Peru cumu stale tu guyé la? bixooñelú stale meseru, purtiʼ bidxíbicabe ora biiyacabe guiráʼ binni que. Ora tobi de cani runi dxiiñaʼ ndaaniʼ hotel que gunabadiidxaʼ pa nuu tu gacané laa la? stale tu gucané laabe, ládecabe zeeda Sadie Green. Despué guníʼ: «Qué huayuu dxi gacaʼ meseru, peru guizáʼ guyuuladxeʼ ora bineʼ ni».

Dede dxiqué, stale xpinni Cristu —ládecabe nuu stale ni nahuiiniʼ— nabé nayecheʼ bíʼnicaʼ guendaró para ca binni ni guyé ca guendaridagulisaa roʼ que. Ora biʼniné cani nahuiiniʼ que xcaadxi hermanu dxiiñaʼ, gucané ni laacaʼ quixhe íquecaʼ gúnicaʼ jma lu xhiiñaʼ Dios. Nga nga ni bizaaca Gladys Bolton, ni biʼniʼ dxiiñaʼ lu ti guendaridagulisaa roʼ lu iza 1937. Laa guníʼ: «Binebiaʼyaʼ hermanu de sti lugar ne biziideʼ ximodo bidxiilúcabe ca guendanagana gúpacabe. Óraque gudixhe iqueʼ gacaʼ precursora».

Hermana Beulah Covey guníʼ sicaríʼ de cani yeguni dxiiñaʼ raqué: «Guizáʼ galán bíʼnicabe dxiiñaʼ stícabe cásipeʼ modo runi ti reló dxiiñaʼ». Peru nagana nga gúnicabe guendaró para guiráʼ binni que ne gudiicabe ni laacaʼ. Casi Angelo Manera gunna maʼ laa nga chigaca xaíque stiʼ Departamento de Alimentos ora yendá ndaaniʼ Estadio de los Dodgers de Los Ángeles (California). Laa guníʼ: «Qué huayuu dxi guidxibeʼ biaʼ bidxibeʼ dxi que». Lu guendaridagulisaa roʼ ni guca lu iza 1969 gupa xidé gundaacabe ti zanja de 400 metru para cúʼcabe ti tubu de gas para guninécabe guendaró.

Lu guendaridagulisaa ni guca lu iza 1982 ndaaniʼ guidxi Sierra Leona, gupa xidé bisiácabe ti layú ante gúnicabe ti comedor raqué neca nápacabe chupa chonna si herramienta. Lu guendaridagulisaa roʼ ni guca ndaaniʼ guidxi Frankfurt (Alemania) lu iza 1951, biʼniʼ ca hermanu que ti cosa ni qué huayaca: gudíxecaʼ ti locomotora para cuee vapor ne gusindáʼ ni 40 guisu para gaguiʼ guendaró. Bidiicabe ni  gudó 30,000 binni pur hora. Para guixiéʼ ca dxiiñaʼ stiʼ 576 binni ni yegacané para guiaʼriʼ bladuʼ, gunábacabe cani guyé guendaridagulisaa que chinecaʼ gudxara sticaʼ. Ndaaniʼ guidxi Yangón (Myanmar), cani biʼniʼ guendaró que huaxiéʼ guiiñaʼ biquiiñecaʼ para ganda gó ca binni ni zeeda de sti guidxi.

Annie Poggensee rietenalaʼdxiʼ ni bizaaca lu iza 1950 lu ti guendaridagulisaa roʼ ni guca Estados Unidos laga cabe cola lu gubidxa yaa para guicaabe guendaró, laa guníʼ: «Binadiagaʼ chaahueʼ ni caníʼ chupa hermana ni beeda lu barcu dede Europa». Caníʼcabe ximodo gucané Jiobá laacabe chindácabe ra cayaca guendaridagulisaa roʼ que. Annie guníʼ: «Qué nizaaláʼdxicabe nuzuhuaacabe lu fila que ne guni huantárcabe gubidxa yaa que. Guirútiruʼ nuu jma nayecheʼ que laacabe».

Ximodo riguixhe chaahuicabe para guyaanacabe guiráʼ binni cheʼ guendaridagulisaa roʼ ca yaʼ. Rucuícabe stán naroʼbaʼ ne ruzuhuaacabe mexaʼ nasoo para gócabe neca zuhuaacabe ne chécabe nagueenda. Zacá rusaanacabe lugar para xcaadxi. Ti binni ni cadi naca Testigu guizáʼ bidxagayaa ne guníʼ: «¡Biaʼ ximodo religión riʼ! Ruzuhuaacabe para gócabe».

Ca militar ne xaíque stiʼ xcaadxi grupu nabé bidxagayaacaʼ ora biiyacaʼ pabiáʼ nexheʼ chaahuiʼ ca dxiiñaʼ ni cayaca raqué. Ora biiyaʼ cani nuu lu ejércitu ni nuu Estados Unidos comedor stiʼ ti guendaridagulisaa roʼ ni guca lu Estadio de los Yankees de Nueva York, guluucabe gana comandante Faulkner, ni nuu lu Departamento de Guerra del gobierno británico, guni zacaca ndaaniʼ xquidxi. Lu iza 1955, guyé comandante que ne xheelaʼ ti guendaridagulisaa roʼ ni biree lá «Reino Triunfante» ni guca ndaaniʼ guidxi Twickenham (Inglaterra) ne guniʼbe rihuinni nadxiisaacabe ra cayaca guendaró que.

Ra maʼ gudiʼdiʼ iza, mil de hermanu huayúnicaʼ guendaró nanixe ne baratu para cani rié ca guendaridagulisaa roʼ que. Nabé rúnicabe dxiiñaʼ ne pur laani maʼ qué nucaadiágacabe chupa chonna libana. Nga runi, ra maʼ ziluxe iza 1970 maʼ qué ñúnicabe stale guendaró ne 1995 gunábacabe cada tobi de cani cheʼ guendaridagulisaa roʼ chinecaʼ guendaró sticaʼ. Zacá cani rigacané jma randa rucaadiágacaʼ ni guieeteʼ lu ca guendaridagulisaa roʼ ca ne guiníʼnecaʼ xcaadxi hermanu ni cheʼ. *

Nabé gunnaxhii Jiobá cani biʼniʼ dxiiñaʼ nadipaʼ para gucanecaʼ xcaadxi hermanu. Nuu tu ribanaʼ ca dxi nayecheʼ guyuucaʼ ndaaniʼ ca comedor que. Peru nuu ti cosa ni qué huachaa lu ca guendaridagulisaa roʼ stinu: rihuinni nadxiisaa ca xpinni Cristu (Juan 13:34, 35).