Modo nabani ca binni jma pobre

RIUU xquendanabani binni ra naxoo ora nabé pobre laa. Zanda guininu nabé pobre binni ora qué gapa ni gó, nisa ni gueʼ, gas ni iquiiñeʼ, ti lugar ra cueza, doctor ni guʼyaʼ laa o cheʼ scuela. Mil millón de binni nabani zacá, casi biaʼ binni nabani lu guidubi continente americano. Neca zacá, stale de ca binni ni nabani Europa Occidental ne Estados Unidos qué huayuu dxi gunibiaʼcaʼ tuuxa binni ni nabé pobre. Guidúʼyanu modo nabani chupa chonna de ca binni pobre riʼ.

Mbarushimana nabezané xheelaʼ ne gaayuʼ xiiñiʼ ndaaniʼ guidxi Ruanda, ti guidxi stiʼ África. Laaca gúpacabe sti xiiñicabe ni guti de paludismo. Hombre riʼ guníʼ: «Gundaa bixhozeʼ layú stiʼ xhoopaʼ ndaa, ne cumu nabé nahuiiniʼ ni guca caber naa la? ngue runi gupa xidé yendezaniáʼ ca binnilidxeʼ ndaaniʼ ti guidxi huiiniʼ. Ne dxiiñaʼ bínidu nga gudúbadu sacu guié ne sacu yuxi. Lídxidu qué gapa ventana, ricaadu nisa dede ra bizé ni nuu ra cuartel stiʼ ca puliciá. Ti biaje si ridoʼdo lu ti dxi, ne ora gastiʼ dxiiñaʼ la? qué ridoʼdo. Ora rizaaca zacá, ni runetiáʼ rireeʼ de ralidxeʼ, purtiʼ nabé racaná ladxiduáʼ gunadiagaʼ ca xiiñeʼ gúʼnacaʼ purtiʼ candaanacaʼ».

Víctor ne Carmen runi chaahuicaʼ zapatu ndaaniʼ ti guidxi huiiniʼ ni nuu Bolivia para gápacaʼ ni guibaninecaʼ. Nápacabe gaayuʼ xiiñicabe ne nabézacabe ndaaniʼ ti yoo huiiniʼ de beñe, ne ca guiibaʼ dxiʼbaʼ ique ni maʼ nade ne qué gapa yoo que biaaniʼ. Cumu guizáʼ stale baʼduʼ rié scuela raqué la? gupa xidé biʼniʼ Víctor ti banca ra cuí dxaapahuiiniʼ stiʼ ti ganda cheʼ scuela. Laabe ne Carmen rizácabe chii kilómetru para chitópacabe yaga ni guninécabe guendaró ne gusindaabicabe nisa guécabe. Carmen guníʼ: «Cumu qué gápadu bañu la? ngue runi riuudu ra guiiguʼ, ne raqueca raze binni ne rusaʼbiʼ guixi, pur nga nabé raca huará ca baʼduhuiiniʼ ca».

Francisco ne Ilídia nabézacaʼ ndaaniʼ ti guidxi huiiniʼ stiʼ Mozambique. Tapa de ca xiiñicabe nabániruʼ, peru tobi de laacaʼ guti de paludismo purtiʼ qué niná ca binni ni runi dxiiñaʼ ndaaniʼ ti hospital ñuni tendercaʼ laabe. Laacabe rudxiibacabe arroz ne gu lu ti ndaa layú huiiniʼ nápacabe, ne ni rudiini apena rugaanda para chonna beeu si. Francisco guníʼ: «Cumu nuu tiru qué riaba nisaguié o riuu tu ribaʼnaʼ cosecha stidu la? nga runi, richuuguaʼ bixiá ni ribiné yoo para guneʼ ganar ti ndaa bueltu. Laaca rizadu biaʼ chupa hora para chitópadu  yaga ndaaniʼ ti guiʼxhiʼ. Xheelaʼ ruaʼ ti terciu ne naa ruayaʼ stobi, ti terciu que riquiiñedu ni ra yoo ne stobi que rutoʼdo».

Stale binni na cadi jneza diʼ nga guibani tobi de cada gadxe binni casi nabani Mbarushimana, Víctor ne Francisco, ne xcaadxi mil millón guibánicaʼ galán ne cadi guiaadxaʼ laacaʼ gastiʼ. Nga runi huayuu binni huayacalaʼdxiʼ guni xiixa para guirá guendapobre. Lu sti tema ca zadúʼyanu chupa chonna de cani huacá ique binni guni ne cani huayacalaʼdxiʼ ugaanda.

[Dibuju/foto ni zeeda lu yazas 2, 3]

Carmen ne chupa xiiñiʼ cacaacaʼ nisa ra guiiguʼ