Bidxiña Dios

Ni zanda quixhedxí ladxidóʼ ca binni nuu triste

TI GUNAA xpinni Cristu ni maʼ xadxí de napa depresión guníʼ sicaríʼ: «Guizáʼ nagana de gannaxhii Jiobá naa». Stale biaje guniʼbe zacá dede biʼniʼ crebe nuu Dios zitu de laabe. Peru ñee dxandíʼ zitu nuu Jiobá de ca xpinni ni nuu triste la? Lu Salmo 34:18 ridúʼndadu caadxi diidxaʼ bicaa David ni zanda quixhedxí ladxidoʼno, ne laacani nga cacabi cani ni gunabadiidxanu ca.

Pur guiráʼ ni bizaaca David nanna xi guiráʼ guendanagana rapa ti xpinni Dios ora riuu triste. Dxi gúcabe nahuiiniʼ bixooñelube de rey Saúl. Cumu gupa rey que envidia laabe la? gudixhe ique guuti laabe. Ti biaje yegucachilube Gat, ti guidxi stiʼ ca filisteu. Zándaca guníʼ íquebe qué ziyubi rey que laabe raqué, purtiʼ nácani ti guidxi stiʼ ca xhenemígucabe. Peru binibiáʼcabe laabe raqué, ne gunda bireebe de guidxi que sin ñuuticabe laabe purtiʼ bíʼnibe casi ora cayaca íquebe. Bisisaca David Dios purtiʼ bilá laabe, ne bicaabe guiráʼ ni bizaacabe lu Salmo 34.

Ñee guníʼ ique David nuu Dios zitu de ca binni ni riree gana ora cadíʼdicaʼ lu xiixa guendanagana o cani riníʼ ique guirutiʼ nácacaʼ para guizaalaʼdxiʼ Dios laacaʼ la? David bicaa: «Jiobá nuu gaxha de cani maʼ gucadé ladxidóʼ; ne rulabe cani maʼ biree gana» (versículo 18). Guidúʼyanu ximodo riguixhedxí ca diidxaʼ riʼ ladxidoʼno ne ximodo racanécani laanu gánnanu rizaalaʼdxiʼ Dios laanu.

«Jiobá nuu gaxha.» Ti libru ni cusiene de tema riʼ na: «Ca diidxaʼ ca rusihuinni cani pabiáʼ rizaalaʼdxiʼ Señor xquidxi, nuube listu para gacanebe laa ne para gulabe laa». Ratadxí ladxidoʼno gánnanu rapa Jiobá ca xpinni, ne nuucabe listu para gacanebe laacaʼ lu ca dxi «jma nagana» riʼ, ne nánnabe xi runi sentircaʼ dede ndaaniʼ ladxidoʼcaʼ (2 Timoteo 3:1; Hechos 17:27).

«Cani maʼ gucadé ladxidóʼ.» Ndaaniʼ stale guidxi riquiiñecabe diidxaʼ casi «gucadé ladxidóʼ», ora qué riná ti gunaa gusiguenda né ti hombre. Ti binni ni biindaʼ de tema riʼ bisiénebe ni gucalaʼdxiʼ David niníʼ né ca diidxaʼ riʼ nga «ti yuubaʼ ni rapa binni pur intiica guendanagana». Ne ni nánnanu nga dede né ca xpinni Dios ni ruzuubaʼ diidxaʼ zanda guidxaagalucaʼ guendanagana ni gunidé ladxidoʼcaʼ.

«Cani maʼ biree gana.» Nuu tiru ca binni ni maʼ biree gana, riníʼ íquecaʼ guirutiʼ nácacaʼ para chuʼ tu guizaalaʼdxiʼ laacaʼ. Ti libru ni riquiiñeʼ ca binni ni rutiixhi Biblia lu sti diidxaʼ na zanda guibiʼxhiʼ ca diidxaʼ ca casi «ca binni ni cadi cabeza xiixa cosa galán».

Ximodo ricabi Jiobá oración stiʼ ca binni ni «maʼ gucadé ladxidóʼ» ne «cani maʼ biree gana» yaʼ. Ñee riuube zitu de binni purtiʼ riníʼ íquebe guirutiʼ nácacaʼ para gannaxhiibe laacaʼ ne gápabe laacaʼ la? Coʼ, cadi zacá diʼ nga laani. Cásica rusihuinni ti binni nadxii xiiñiʼ ora riguiidxi laabe ne riguixhedxí ladxidoʼbe purtiʼ cadíʼdibe lu xiixa yuubaʼ, zacaca nuu Jiobá gaxha de ca xpinni ni canabaʼ gacanebe laa, laaca racaláʼdxibe quixhedxibe ne gusiándabe ladxidoʼcaʼ ne gacanebe cani maʼ biree gana. Dios zanda gudii laacabe guendabiaaniʼ ne stipa ni caquiiñecabe para gudxiilúcabe intiica guendanagana (2 Corintios 4:7; Santiago 1:5).

Galán guyúbiluʼ modo guidxíñaluʼ jma gaxha de Jiobá. Dios cayabi laanu né diidxaʼ nadóʼ: «[Nuaaniáʼ] cani naná nuu ladxidóʼ ne cani qué rudxiibaʼ laca laa», racaniáʼ «ca binni pobre ti chuʼcaʼ galán sti biaje» ne laaca racaniáʼ «cani cayacaná ladxidóʼ» (Isaías 57:15).

BIAʼ RA NEXHEʼ GUIUUNDAʼ BIBLIA BEEU RIʼ:

◼ Salmo 26 dede 59