Gucané Biblia laacabe para bichaacabe

XI GUCANÉ ti baʼdudxaapaʼ para bibiguetaʼ ndaaniʼ religión ra bisiniisi bixhoze ne jñaa laa. Gudiʼnu lugar laapebe gusiénebe ni laanu.

«Yanna nga dxandipeʼ nabaneʼ nayecheʼ» (LISA ANDRÉ)

GÚLEBE LU IZA 1986

DE LUXEMBURGO LAABE

GUCA ARREPENTIRBE

MODO BIBANEʼ DXIQUÉ: Biniiseʼ ndaaniʼ ti guidxi huiiniʼ ni láʼ Bertrange, ti lugar nabé nayá, gastiʼ ni uguu xquendanabani binni ra naxoo, nabani binni galán raqué; ne riaanani gaxha de guidxi Luxemburgo. Bixhozeʼ ne jñaaʼ gúpacaʼ gaayuʼ xiiñicaʼ, naa nga ni jma nahuiiniʼ. Maca testigu stiʼ Jiobá laacabe dede dxi nahuíʼnidu, ne dede dxiqué nga maca gucuá íquecabe gusiidicabe guiradu ca conseju zeeda lu Biblia.

Peru dxi jma maʼ ziniiseʼ, bizulú guníʼ iqueʼ zándaca cadi dxandíʼ ni rusiidiʼ ca testigu stiʼ Jiobá. Cumu qué nizaaladxeʼ ñuuyaʼ pa jneza ni riníʼ iqueʼ que la? chaahuidugá bisaana de ñuneʼ cré cani zeeda lu Biblia. Bixhozeʼ ne jñaaʼ biyúbicaʼ modo ñacanecaʼ naa ñuneʼ ni jneza, peru qué ninaʼyaʼ. Bizuluáʼ bidxaagaʼ ca hombrehuiiniʼ ne ca dxaapahuiiniʼ ni qué riuulaʼdxiʼ chuʼ tu guni mandar laacaʼ, ne bineʼ ni sin ñanna bixhozeʼ ne jñaaʼ. Naa racalaʼdxeʼ guneʼ ni gapaʼ gana casi rúnicabe que, purtiʼ para naa zaqué nga jma galán guibani binni. Guiráʼ ra cayaca saa maʼ ziuudu, tutiica ratanedu ne reʼ xhaatadu nisadxuʼniʼ ne raca drogardu.

Dxandipeʼ la? qué ñuaadiáʼ nayecheʼ. Qué nuchátipa diʼ guiráʼ ni cayuneʼ que ladxiduáʼ, purtiʼ nin tobi de ca xhamiguaʼ qué rizaaláʼdxicaʼ gastiʼ. Peru naa nabé rizaaladxeʼ ca cosa ni cadi jneza runi binni. Zeʼ dxi jmaruʼ si triste guyuaaʼ.

XIMODO GUCANÉ BIBLIA NAA PARA BICHAAʼ: Ti dxi bidii jñaaʼ cuenta nabé nuaaʼ triste, ngue runi gúdxibe naa guundaʼ Biblia sti biaje, ndiʼ bizaaca ni dxi maʼ napaʼ 17 iza. Laaca gúdxibe naa guuyaʼ chaahueʼ xi guiráʼ rusiidiʼ Biblia ne guiníʼ iqueʼ pa zuneʼ ni nani lu xquendanabaneʼ. Modo byuidu diidxaʼ que bicaa ni naa guiníʼ iqueʼ xi cayuneʼ. De raqué rabeʼ zaa guʼndané bendaʼ ni huaniisi naa de Biblia, Caroline, ne xheelabe Akif. Xcuñaduaʼ riʼ qué ñaca Testigu dxi nahuiiniʼ, sínuque bedagaca ni dxi maʼ huaniisi. Ngue runi guníʼ iqueʼ zanda gabe laabe guiráʼ ni gacalaʼdxeʼ, ne ngue nga ni jma risaca para naa.

 Nannaʼ cadi nabaneʼ casi riquiiñeʼ guibani ti Testigu, ne guníʼ iqueʼ naasiaʼ cayuniná guiráʼ ni cayuneʼ que. Peru ra bizuluáʼ biindaʼ Biblia bidieeʼ cuenta laaca runenaʼyaʼ ladxidóʼ Jiobá né cani cayuneʼ que (Salmo 78:40, 41; Proverbios 27:11). Ne cadi laasibe, sínuque laaca runenaʼyaʼ xcaadxi binni.

Ra jma ziyuundaʼ Biblia, jma ziyuneʼ cré dxandíʼ Stiidxaʼ Dios ni. Bidxelaʼ stale razón ni bisihuinni dxandíʼ zaqué ni, ne tobi de laacani nga biiyaʼ pabiáʼ jneza modo guca ni na stale de ca diidxaʼ riguixhená zeeda lu Biblia. Guirá nga gucané naa gusaanaʼ de guiníʼ iqueʼ cadi dxandíʼ ni rusiidiʼ ca Testigu.

Ti iza despué de bizuluáʼ cayuundaʼ Biblia sti biaje, yeniáʼ bixhozeʼ ne jñaaʼ yegánnadu ti bizanaʼ ni jma huaniisi que naa, ni nuu ra raca dxiiñaʼ stiʼ ca testigu stiʼ Jiobá ndaaniʼ guidxi Alemania. Ora biiyaʼ pabiáʼ nayecheʼ nuube nabé biniibi ni ladxiduáʼ. ¡Zaquepeʼ nga racalaʼdxeʼ guibaneʼ! Laaca nabé bidxagayaaʼ ora binebiaʼyaʼ xcaadxi de cani runi dxiiñaʼ raqué. Paraa chiguchaagaʼ laacabe né ca binni ni bidxaagaʼ dxiqué yaʼ, purtiʼ laacaʼ qué rúnicaʼ ni jneza ne riuuláʼdxicaʼ gúnicaʼ intiica cosa ni riguu xquendanabánicaʼ ra naxoo. Qué nindaa de guyuudu lugar que bineʼ orar Dios de guidubi ladxiduáʼ ne bidieeʼ stiidxaʼ laabe guneʼ ni nabe biaʼ dxi guibaneʼ. Dxi napa 19 iza guyuaanisaʼ para gusihuinneʼ maʼ bidieeʼ xquendanabaneʼ Jiobá.

XI MAʼ GULEENDUAʼ: Yanna nga dxandipeʼ nabaneʼ nayecheʼ. Riuuladxeʼ gusiideʼ binni cani zeeda lu Biblia ne gacaniáʼ laacabe guiziidicabe de Jiobá ne gánnacabe xi guiráʼ naguixhe íquebe gúnibe despué. Ni bineʼ que laaca gucaneni binnilidxeʼ, purtiʼ maʼ qué niguaaʼ xizaa laacabe.

Stale cosa feu bineʼ dxiqué, peru runeʼ stipa pur cadi gucaaʼ iqueʼ cani. Ni jma riníʼ ique nga pabiáʼ nadxii Jiobá naa ne nácabe ti Dios ni rutiidilaʼdxiʼ stonda binni. De guidubi ladxiduáʼ riniéʼ dxandíʼ ni na ca diidxaʼ ni zeeda lu Proverbios 10:22: «Ndaayaʼ stiʼ Jiobá... nga nga ni runi binni ricu, ne qué rudiidibe yuubaʼ ne laani».

[Ni caníʼ yaza 14]

«Guiráʼ ra cayaca saa maʼ ziuudu, tutiica ratanedu ne reʼ xhaatadu nisadxuʼniʼ ne raca drogardu»

[Ni caníʼ yaza 15]

«Stale cosa feu bineʼ dxiqué, peru runeʼ stipa pur cadi gucaaʼ iqueʼ cani»