ÑEE dxandíʼ bibani Jesús nayecheʼ la? Casi maca nánnanu biniisi Jesús lade binni pobre ne qué ñápabe stale cosa risaca biaʼ dxi bibánibe; ne dede guniʼbe: «Qué gapa nin ra quixhe iqueʼ» (Lucas 9:57, 58). Ne laaca gucananalaʼdxiʼ ca xhenemígube laabe, gundísacabe falsu luguiabe ne dede biiticabe laabe.

Zándaca chuʼ tu guiníʼ: «Para naa cadi nga diʼ nga guibani binni nayecheʼ». Peru nuu xcaadxi cosa ni biʼniʼ Jesús ni galán gánnanu. Guidúʼyanu tapa de laacani.

«Endaró stinne nga gune ni na ni biseenda naa.» (Juan 4:34.)

Jesús gudixhe ique guni ni na Jiobá, Bixhózebe ni nuu guibáʼ, lu cani guniʼbe ne zaqueca lu cani bíʼnibe. * Casi guniʼbe lu textu ca, ora gúnibe ni na Dios zeeda gácani casi guendaró stibe, purtiʼ ruchá tipa ni ladxidoʼbe ora gúnibe ni. Ne laaca naquiiñeʼ gánnanu xi cayuni Jesús ora guníʼ ca diidxaʼ riʼ.

Maʼ gunda galaa dxi ora guníʼ Jesús ca diidxaʼ ca (Juan 4:6). Maʼ guzabe guidubi naca siadóʼ que lade ca dani stiʼ Samaria ne maʼ candaanabe óraque. Ca discípulo stibe rábicaʼ laabe: «Gudáʼ gouʼ, Maistru» (Juan 4:31). Óraque nga guniʼbe zeeda gaca dxiiñaʼ ni bidii Dios laabe gúnibe casi guendaró, ra guniʼbe ca diidxaʼ ca bisihuínnibe ruchá tipa ni ladxidoʼbe ne rudii ni stipa laabe. Ñee cadi rusihuinni nga bibani Jesús nayecheʼ la?

«Nadxiee Bixhozeʼ.» (Juan 14:31.)

Nabé gunnaxhii Jesús Bixhoze dxi guyuu guibáʼ. Ne cumu zacá ni la? nga bicaa laabe gusiidibe binni lá Dios, cani naguixhe ique guni ne ca guenda stiʼ. Jesús bisihuinni ximódopeʼ nga Dios pur cani guníʼ, cani biʼniʼ ne modo guca né binni. Zándapeʼ guininu cásipeʼ laabe nga Bixhózebe. Ngue runi, ora gudxi Felipe laabe: «Biluíʼ laadu Bixhoʼzo», Jesús bicabi laabe: «Ni ma biiya naa la? ma biiya Bixhozeʼ» (Juan 14:8, 9).

Cumu guizáʼ nadxii Jesús Bixhoze la? bizuubabe stiidxaʼ dede dxi gútibe (Filipenses 2:7, 8; 1 Juan 5:3). Ne pur nadxiibe Dios nga bibánibe nayecheʼ.

«Iruti zanda ganaxhii jma que biaʼ nadxii tobi ni udii xpida pur ca xhamigu.» (Juan 15:13.)

Cumu guiranu nácanu binni ruchee la? qué zanda diʼ cuézanu xiixa ni galán para laanu. Biblia na: «Pur tobi hombre [Adán] biuu enda ruchee ndaani guidxilayú, ne guti be purti bichee be, ne zacá ucuá enda guti que irá xixé binni, purti laca bichee caʼ» (Romanos 5:12). Qué zanda gulanu laca laanu de lu náʼ guendaguti, ni reeda pur ruchee binni (Romanos 6:23).

Riéchenu nga gánnanu nadxii Jiobá laanu, nga runi, gudixhe ni zanda gacané laanu. Ne para ganda gulabe laanu lu náʼ guendaruchee ne guendaguti la? bidiibe lugar gacaná ne gatiʼ Xiiñibe, ni qué gapa donda, pur laanu. Ne pur nadxii Jesús Bixhoze ne binni guidxilayú, nabé nayecheʼ bíʼnibe dxiiñaʼ ni bidii Dios laabe gúnibe ne bidiibe guendanabani sin donda stibe pur laanu (Romanos 5:6-8). Guiráʼ ni biʼniʼ Jesús riʼ nga ni bisiecheʼ laa. *

«Ndi nga Xiiñe ni nadxiee ne ni rusieche naa.» (Mateo 3:17.)

Jiobá nga guníʼ ca diidxaʼ ca dede guibáʼ ora guyuunisa Jesús. Ne zacá nga bisihuínnibe nadxiibe Xiiñibe ne riuuláʼdxibe cani runi; ngue runi, de guidubi ladxidóʼ Jesús guníʼ: «Nadxii Bixhoze naa» (Juan 10:17). Cumu nánnabe nadxii Bixhózebe laabe ne riuulaʼdxiʼ cani rúnibe la? ngue gucané laabe para gunda bidxiilube ca xhenemígube, cani gucananalaʼdxiʼ laabe ne guníʼ mal de laabe. Ne laaca ngaca nga bidii stipa laabe dxi mayaca gátibe (Juan 10:18). Gunna dxichi Jesús nadxii Bixhoze laa ne riuulaʼdxiʼ cani rúnibe, ne nga nga ni jma gucané laabe guibánibe nayecheʼ.

Nanna dxíchinu nabé galán bibani Jesús. Ne zanda guizíʼdinu stale de laa. Lu sti tema ca zeeda caadxi conseju ni bidiibe ca discípulo stibe para ganda guibánicaʼ nayecheʼ.