MARTIN LUTHER KING, ti hombre de Estados Unidos, ni ziné lá bixhoze, ne racané binni para ganda gaca respetar derechu sticaʼ, bitiidiʼ ti libana ni nabé runibiáʼ binni, 28 stiʼ agosto stiʼ iza 1963. Luni guniʼbe: «Ñuuladxeʼ ñaca ti cosa». Luther King bizeeteʼ ca diidxaʼ ca stale biaje para gusihuinni zedandá dxi maʼ qué ziuu binni guni menu stobi purtiʼ gadxé raza laa. Nécapeʼ ca binni de Estados Unidos nga gúdxibe ca diidxaʼ ca, peru stale binni ni nuu lu guidubi naca Guidxilayú guyuuláʼdxicaʼ modo nabe ca.

Chiguzéʼtenu ni bizaaca 20 stiʼ noviembre stiʼ iza 1963, gudiʼdiʼ si chonna beeu de bitiidibe libana que. Dxi riʼ, jma de ti gayuaa guidxi guniʼcaʼ zúnicaʼ ni gudixhe Naciones Unidas guni, cuee guiráʼ ni runi binni para guni menu stobi purtiʼ si naca de sti raza, ne lu ca iza gudiʼdiʼ despué que yenándacabe xcaadxi cosa ni gudixhe stale de ca guidxi ni nuu lu Guidxilayú. Yanna, maʼ gudiʼdiʼ cincuenta iza de guca nga, peru rinabadiidxarunu: xi guleendúcabe né guiráʼ ni bíʼnicabe que yaʼ.

Peru 21 stiʼ marzo stiʼ iza 2012, guníʼ Ban Ki-moon, Secretariu General stiʼ la ONU ca diidxaʼ riʼ: «Guiráʼ ca guidxi ni nuu lu guidubi naca Guidxilayú riʼ, zaqueca ca gobiernu huayúnicaʼ stale cosa para gucueezacaʼ de chuʼ tu gacananalaʼdxiʼ binni de sti raza ne maʼ qué chuʼ binni ni guni zacá, ne cueecabe cani runi menu binni purtiʼ si de sti raza laa, cani nanalaʼdxiʼ binni de sti guidxi ne xcaadxi cosa ni runi binni para guni menu stobi. Peru cadi cusaana de gacaná millón de binni ni nuu lu guidubi naca Guidxilayú purtiʼ rúnicabe menu laacaʼ pur raza sticaʼ».

Dede ndaaniʼ ca guidxi ra maʼ bíʼnicabe stale cosa para gacanécabe binni gusaana de gucaanáʼ stobi pur raza stiʼ, ne pur xcaadxi cosa, rinabadiidxaruʼ binni: ñee dxandíʼ nga maʼ bisaana binni de guni menu stobi dede ndaaniʼ ladxidóʼ la? o maʼ qué rihuinni si pa rúnicabe ni. Nuu tu na ni randa si racanécabe gaca nga gusaana binni de guni menu tuuxa, peru qué zanda gúnicabe xiixa para gusaana binni de guiníʼ ique mal de sti binni. Xiñee yaʼ. Purtiʼ ora gúnicabe menu tuuxa rihuinni ni ne nuu ti ley ni zanda guni castigar laacabe pa gúnicabe ni, peru guirutiʼ zanna pora caníʼ ique tuuxa mal de sti binni purtiʼ qué rihuinni ni ne runi binni ni lu xquendabiaaniʼ ne lu cani runi sentir. Ne nga jma nagana zaca para laacabe gucueezacabe binni de guni.

Para gusaana de guiníʼ íquenu mal de sti binni la? cadi caquiiñeʼ si gusaana de gúninu menu laacabe, sínuque laaca caquiiñeʼ guchaʼnu modo riníʼ íquenu ne cani runi sentirnu pur binni. Ñee zanda gaca nga la? Ne pa zanda, ximodo gaca ni yaʼ. Despué de guidúʼndanu ni bizaaca chonna binni, cadi zadúʼyasinu zanda guchaa binni xquendanabani, sínuque laaca zacaneni laanu gánnanu xi gucané stale binni guchaa.

Linda: Naa guleʼ Sudáfrica ne huera naa. Para naa la? huaxiéʼ risaca ca binni de sti raza, deʼguʼ xpiaanicaʼ ne huaxiéʼ zanda guni cré binni ni riniʼcaʼ, ne ruuyaʼ laacaʼ casi jmozo ca binni hueru. Modo riníʼ iqueʼ de ca binni de sti raza que biteeguʼ ni xpiaaneʼ dede qué nudieeʼ cuenta pabiáʼ gucananaladxeʼ laacabe. Peru dxi bizuluáʼ biindaʼ Biblia bichaaʼ modo naa. Biziideʼ «biaʼca risaca irá binni nezalú Dios» ne laaca biziideʼ jma risaca ni nuu ndaaniʼ ladxidóʼ binni que xi color laa o xi diidxaʼ riníʼ (Hechos 10:34, 35; Proverbios 17:3). Lu Filipenses 2:3 biziideʼ pa racalaʼdxeʼ gusaanaʼ de guneʼ  menu tuuxa la? naquiiñeʼ guiníʼ iqueʼ jma risaca xcaadxi binni para naa. Cásica gucané textu riʼ naa zaqueca gucané ca conseju ni zeeda lu Biblia naa guizaaladxeʼ binni neca intiisi color laa. Yanna huaxa maʼ bixeleʼ xpiaaneʼ ne maʼ qué runeʼ menu sti binni.

Michael: De Australia naa. Stale de ca binni ni nabeza ra biniiseʼ naquichicaʼ, pur ngue nabé bineʼ menu ca binni de Asia, ne jmaruʼ si ca chinu. Pa ziaaʼ ndaaniʼ xcarruaʼ ne málasi guuyaʼ tobi de laacabe la? rindeteʼ ventana huiiniʼ stinneʼ ne rucaa ridxi laabe reciu: «¡Yebíʼ xquídxiluʼ, lii Asiáticu lii!». Despué bizuluáʼ biindaʼ Biblia ne bieneʼ ximodo ruuyaʼ Dios binni. Laabe nadxiibe binni neca de intiica lugar laacaʼ o modo tiica rihuínnicaʼ. Ni biziideʼ que yendani ndaaniʼ ladxiduáʼ ne gucaneni naa maʼ cadi gacananalaʼdxeʼ binni sínuque gannaxhieeʼ laacaʼ. Dede zaca nagana para binni guni cré pabiáʼ stale cosa bichaaʼ lu xquendanabaneʼ. Yanna maʼ runeʼ sentir nayecheʼ ora guidxaagaʼ ca binni de guiráʼ guidxi ne ni napa gadxé gadxé costumbre, ne nga maʼ gucané naa guchaaʼ modo riníʼ iqueʼ de binni ne jma maʼ nayecheʼ nabaneʼ.

Sandra: Jñaaʼ guca de Umunede, ti guidxi huiiniʼ stiʼ estado stiʼ Delta, Nigeria, ne binnilidxi bixhozeʼ guca de estado stiʼ Edo, lugar que riníʼcabe esán. Cumu de gadxé gadxé lugar laacabe la? nabé biʼniʼ binnilidxi bixhozeʼ menu laabe dede dxi gútibe. Ngue runi guníʼ iqueʼ qué ziuu dxi guidxaagaʼ tuuxa ni riníʼ esán ninca qué zachaganaʼyaʼ tuuxa de Edo. Peru ra biindanécabe naa Biblia bichaa modo riníʼ iqueʼ de stale cosa. Pa Biblia ruzeeteʼ qué rusisaca Dios ti raza jma que sti raza, ne tutiica guidxibi laabe ruuyabe laa casi xiiñibe la? yanna naa, tu nacaʼ para gacananalaʼdxeʼ binni purtiʼ si naca de ti tribu o purtiʼ si riníʼ sti diidxaʼ yaʼ. Bichaaʼ modo naa ne biyubeʼ chuaaniáʼ binnilidxi bixhozeʼ tobi si. Yanna, ra maʼ runeʼ ni na ca conseju stiʼ Biblia lu xquendanabaneʼ maʼ gucanécani naa cadi guchiiñaʼ xquendabiaaneʼ naa ne chuaaʼ nayecheʼ. Ne laaca maʼ huayacanécani naa guidxaagaʼ xcaadxi binni neca de gadxé lugar laacaʼ, neca gadxé raza laacaʼ o gadxé diidxaʼ riniʼcaʼ. ¡Ne despué bichaganayaʼ ti hombre de Edo ni riníʼ esán!

Xiñee gunda gucané Biblia ca binni riʼ ne xcaadxi binni para gusaanacaʼ de gaca nanaláʼdxicaʼ binni ne de  guiníʼ íquecaʼ mal de laacabe neca maʼ xadxí de rúnicaʼ ni yaʼ. Purtiʼ laani nga Stiidxaʼ Dios. Biblia ca nápani poder para guchaa ni modo riníʼ ique ti binni de xcaadxi ne ni runi sentircaʼ pur sti binni. Ne laaca rusiidiʼ ni xiruʼ naquiiñeʼ para gusaana binni de guni menu stobi.

Nécapeʼ zanda gacané Stiidxaʼ Dios laanu gucueezanu laanu de gúninu menu sti binni o gusaanapenu de gúninu ni, nuu xhupa cosa ni caquiiñeʼ gaca chaahuiʼ para maʼ qué chuʼ dxi chuʼ tu guni menu sti binni. Primeca ni caquiiñeʼ guiree nga guendaruchee ne gusaana de gapa binni donda. Ne Biblia riquiiñeʼ chupa chonna si diidxaʼ para gusiene «guiráʼ hombre ruchee» (1 Reyes 8:46). Cásica apóstol Pablu, laanu laaca raca nagana para laanu gúninu ni jneza, ne laabe bicaabe: «Casi naa gacaladxe gune ni jneza, rutaagu pecadu naa» (Romanos 7:21). Nga runi gatigá riale ndaaniʼ ladxidoʼno ca cosa ni cadi jneza runi binni, ne laacani nga rucaa cani laanu gúninu menu binni (Marcos 7:21).

Sti cosa ni caquiiñeʼ guiree nga gusaana de gucaa Binidxabaʼ binni guni menu stobi. Biblia na naca Binidxabaʼ tuuxa «ni ruuti binni» ne «ni rusiguii irá binni» guidxilayú (Apocalipsis 12:9; Juan 8:44). Nga rusihuinni xiñee maʼ bidale binni ni runi menu stobi ne xiñee ruluíʼ nagana gusaana binni de chuulaʼdxiʼ guni zacá, guiníʼ ique mal de binni, guuti ti grupu de binni, guiníʼ ique qué zanda guidxaaga binni de sti raza, de sti religión o purtiʼ huaxiéʼ risácacaʼ.

Nga runi, para maʼ qué chuʼ tu guni menu sti binni la? naquiiñeʼ guiree guendaruchee ne gusaana de gapa binni donda, ne sti cosa ni caquiiñeʼ gaca nga gusaana Binidxabaʼ de gucaa binni guni menu stobi. Biblia cusiene ngapeʼ nga ni chiguni Reinu stiʼ Dios.

Jesús biquiiñeʼ ca diidxaʼ riʼ para gusiidiʼ ca discípulo stiʼ guni orarcaʼ Dios: «Biseendaʼ reinu stiluʼ. Gaca ni naluʼ cásica guibáʼ zaqueca lu guidxilayú» (Mateo 6:10, TNM). Dxi guni mandar Reinu stiʼ Dios maʼ qué ziuu razón para guni binni menu stobi, para guiníʼ ique mal de sti binni ne maʼ qué ziuu tu guni ni cadi jneza.

Dxi guni mandar Reinu stiʼ Dios lu Guidxilayú riʼ, zaliibi Binidxabaʼ ne maʼ qué zacaa lugar «usiguii binni» ni nuu ndaaniʼ guiráʼ guidxi (Apocalipsis 20:2, 3). Ne óraca nga maʼ chuʼ «ti guidxilayú cubi», ne laani nga ca binni ni guni ni jneza ni chiguibani ra maʼ qué ziuu «gasti enda nadxabaʼ» (2 Pedro 3:13). *

Ca binni ni guni ni jneza ca zareecaʼ de lu naʼ guendaruchee ne chaahuiʼ chaahuiʼ zeeda gácacaʼ binni ni qué gapa donda (Romanos 8:21). Ca binni ni chiguibani dxi guni mandar Reinu ca, qué zuninasaacaʼ laacaʼ ne qué zunitilúsaacaʼ laacaʼ. Xiñee yaʼ. «Purtiʼ guidxilayú riʼ zadxá típani de guiráʼ ni rusiidiʼ Jiobá.» (Isaías 11:9.) Guiráʼ binni guidxilayú zaziidicaʼ sacaʼ lu neza stiʼ Jiobá ne zaguixhe íquecaʼ gácacaʼ casi laabe. Racá nga guiluxe guiráʼ cosa ni rucaa binni guni menu stobi, «purti nezalú [Dios] biaʼca risaca irá binni» (Romanos 2:11).