Nuu binni raca nagana para laa gannaxhii Dios, purtiʼ riníʼ ique guirutiʼ zanda ganna ximodo laabe, nuube zitu de binni ne nabé malu laabe. Biiyaʼ xi huaníʼ caadxi binni de laabe:

• «Neca gunabaʼ Dios gacané naa, bineʼ sentir nabé zitu nuube de naa. Qué ñuu dxi niníʼ iqueʼ pa naca Dios ti binni ni rannaxhii.» (Marco, Italia.)

• «Racalaʼdxeʼ guneʼ ni na Dios, Peru bineʼ sentir zitu nube de naa. Biiyaʼ laabe casi ti Dios nabé malu ni cuyubi si pora guni castigar binni. Qué ñuneʼ cré pa nadxiibe binni.» (Rosa, Guatemala.)

• «Dxi dxaapahuiiniruʼ naa bineʼ cré cayuuyaʼ si Dios para rucheʼnu para guni castigar laanu. Despué biiyaʼ laabe casi tuuxa ni nuu zitu de binni, casi runi tuuxa ni naca primé ministru ni runi mandar binni ne qué rizaalaʼdxiʼ laacabe.» (Raimunda, Canadá.)

Yanna lii xi riníʼ íqueluʼ yaʼ. Xi rucueeza lii para cadi gannaxhiiluʼ Dios yaʼ. Stale binni rinabadiidxaʼ zacá neca nápacaʼ religión sticaʼ. Ne lu ca iza 500 hasta 1500 despué de ca dxi stiʼ Jesús stale binni qué ñuni orarcaʼ Dios. Xiñee yaʼ. Purtiʼ bidxíbicabe laabe. Historiador ni láʼ Will Durant guníʼ sicaríʼ: «Ximodo ndiʼ guni orar binni ruchee Dios ni zuba lu ti trono ni nuu zitu ne maca para guchibi yaʼ».

Xi rucaa binni guʼyaʼ Dios zacá yaʼ. Xi rusiidiʼ Biblia de laabe yaʼ. Ñee cadi jma nagueenda ñannaxhiinu Dios pa ñaca ñunibiáʼ chaahuinu laabe la?