NUU binni riuulaʼdxiʼ guni ni rinabaʼ beela ladi laa. Peru xcaadxi binni racalaʼdxiʼ gucueeza laca laa. Lii, xi rábiluʼ yaʼ. Ñee naquiiñeʼ gucáʼnanu guiráʼ cosa ni ruquiinde laanu gúninu la? o cadi naquiiñeʼ gucáʼnanu cani.

Cadi guiráʼ diʼ ni ruquiinde laanu gúninu nga zuniná laanu. Casi pa zineluʼ ti dieta ne goloʼ ti ndaa pastel la? qué zuuti diʼ nga lii. Peru pa gúninu xcaadxi ni ruquiinde laanu gúninu, casi gatanenu tuuxa la? nga huaxa zuniná laanu. Ndaaniʼ Biblia lu Proverbios 6:32, 33 na ora chuʼné ti binni tuuxa ni cadi xheelaʼ, rusihuinni cadi nuu xpiaaniʼ ne cayuniná laca laa.

Xi naquiiñeʼ gúniluʼ pa gápaluʼ xiixa guendanagana casi ni bizéʼtenu ca yaʼ. Sicaríʼ na Biblia: «Ni racalaʼdxi Dios nga sa tu jneza, cadi chuʼ né tu ni cadi xheela tu» (1 Tesalonicenses 4:3). Ximodo zanda gúninu ni na ca diidxaʼ ca yaʼ. Nuu chonna cosa ni naquiiñeʼ gúninu. Guidúʼyanu xi laacani.

Pa nabé ruuyaluʼ ra cá tuuxa para uquiinde binni guni cosa malu la? jma zuluiʼláʼdxiluʼ gúniluʼ cosa dxabaʼ. Jesús peʼ guníʼ zacá ni: «Neca chuʼlaʼdxi si tuuxa ti gunaa ni cadi xheelaʼ, ne icá ique chuʼ né laabe la? ma bichee, neca qué ñuu né pe laabe». Ne laaca guniʼbe: «Pa nuu xiixa ruuya lu ne ruquiinde ni lii guʼnu ni cadi jneza la? bixele de laani» (Mateo 5:28, 29). Nga runi, para ganda gudxíʼlunu cani ruquiinde laanu gúninu cosa dxabaʼ, nagueendaca gucáʼnanu cani ne gusaananu de gúʼyanu cani.

 Guidúʼyanu ti ejemplu. Pa málasi ñuuyaluʼ ra cayuni soldar tuuxa, cadi dxandíʼ nagueendaca nutiixhiluluʼ sti ladu ti cadi ñuninani luluʼ la? Zacaca nga naquiiñeʼ gúniluʼ ora gúʼyaluʼ xiixa ni uquiinde lii guʼnuʼ cosa dxabaʼ, casi pa cá ni lu guiʼchiʼ, guihuinni ni lu ti pantalla o pa gúʼyaluʼ tuuxa ni guquiinde lii guyadxiluʼ laa, nagueendaca bitiixhilú sti ladu. Gupa xquendabiaaniluʼ. Juan, ti hombre ni nabé biʼyaʼ pornografía dxiqué, guníʼ: «Ora guuyaʼ ti gunaa nabé sicarú la? ruquiinde naa guuyadxiéʼ laa biaʼ chonna biaje. Nga runi, runeʼ stipa para gutiixheluáʼ sti ladu, ne rabeʼ laca naa: “¡Guniʼné Jiobá! ¡Biʼniʼ orar nagásica!”. Ora guiluxeʼ guneʼ orar nagueendaca ridiʼdiʼ ni canabaʼ ladxiduáʼ naa guneʼ» (Mateo 6:9, 13; 1 Corintios 10:13).

Guníʼ ique ca diidxaʼ ni guníʼ Job, ti hombre ni qué nucheené Dios: «Maʼ bineʼ ti pactu né bizaluáʼ. Nga runi, ximodo ndiʼ guuyadxiéʼ ti binnidxaapaʼ ne gacalaʼdxeʼ laa yaʼ» (Job 31:1). Xiñee qué quixhe íqueluʼ gúniluʼ zacaca yaʼ.

Xiñee qué gúniluʼ ndiʼ: Pa málasi gúʼyaluʼ xiixa ni ruquiinde binni guni cosa malu, nagueendaca bitiixhilú sti ladu. Biʼniʼ orar cásica biʼniʼ tobi de ca hombre bicaa Biblia, laabe guniʼbe: «Cadi gudiiluʼ lugar guʼyaʼ luáʼ cosa qué iquiiñeʼ» (Salmo 119:37).

Cumu binni gulené donda laanu la? nuu biaje nabé nagana raca para laanu gucáʼnanu cani ruquiinde laanu gúninu. Sicaríʼ na Biblia: «Ni riulaʼdxi nu ni cadi jneza, nga nga ni ruquiinde laanu, purti ricá ique nu ni, ne zacá randa riguba yu ni laanu dede inaaze dxiichi ni laanu. Ne ni qué usaana de icá ique ni cadi jneza la? zuchee» (Santiago 1:14, 15). Xi zanda gúniluʼ para cadi guiábaluʼ lu trampa ni zunitilú lii riʼ yaʼ.

Pa málasi guedandá xiixa cosa malu ndaaniʼ íqueluʼ, bietenalaʼdxiʼ lii nga cuiluʼ xi gúniluʼ. Bicaanáʼ ca cosa malu ni ruquiinde lii guʼnuʼ, gulee cani ndaaniʼ íqueluʼ. Cadi gudiiluʼ lugar guicaa xcu ca cosa dxabaʼ ca ndaaniʼ íqueluʼ. Tomás, ti hombre ni nabé biʼyaʼ pornografía, guníʼ sicaríʼ: «Bineʼ stale stipa para cueeʼ ca cosa malu que ndaaniʼ iqueʼ ne jma bineʼ  pur guiníʼ iqueʼ cosa ni galán. Ne chaahuidugá biziideʼ gucueezaʼ ca cosa malu riníʼ iqueʼ». Dxi nahuiiniʼ Elsa nabé biʼniʼ stipa para gucaanaʼ ca cosa malu ni biquiinde laa guni, sicaríʼ nabe bíʼnibe: «Gunda bicueezaʼ ca cosa malu ni guníʼ iqueʼ dxiqué purtiʼ nabé bineʼ orar ne biyubeʼ guiníʼ iqueʼ xcaadxi cosa galán».

Xiñee qué gúniluʼ ndiʼ: Ora málasi guedandá cosa dxabaʼ ndaaniʼ íqueluʼ, nagueendaca biʼniʼ orar. Zanda gucaanaluʼ cani ra guiníʼ íqueluʼ «ni dxandí si, ne ni naquiiñe ulabi nu, ne ni jneza, ne ni nachaʼhuiʼ, ne ni rusieche binni, ne ni guiaba laacaʼ [...] ne ni dxandí risaca» (Filipenses 4:8).

Ora cuquiinde lii guʼnuʼ xiixa ne gúʼyaluʼ ni la? jma nagana zaca gucueezaluʼ laca lii (Proverbios 7:6-23). Xi naquiiñeʼ gúniluʼ para gápaluʼ lii yaʼ.

Biblia cudii conseju riʼ: «Binni nuu xpiaaniʼ la? rucaachilú ora guʼyaʼ maʼ zeeda xiixa guendanagana ni zuniná laa, peru ni cadi nuu xpiaaniʼ la? runi guiráʼ ni racalaʼdxiʼ ne racaná» (Proverbios 22:3). Nga runi, biiyaʼ xii nga cani rúniluʼ. Guníʼ ique dede ante xii nga cani zándaca gucaa lii guʼnuʼ ni cadi jneza ne bixeleʼ de laacani (Proverbios 7:25). Felipe, ti hombre ni gunda bicaanáʼ pornografía, guníʼ: «Bizuhuaaʼ computadora stinneʼ ra zanda guʼyaʼ binnilidxeʼ ni ne guluaaʼ ti filtru para Internet luni. Ne riuaaʼ lu Internet ora si nuu tuuxa ra yoo». Zacaca biʼniʼ Tomás, laabe guniʼbe: «Qué ruuyadiáʼ película ra zeeda cani rucaa binni guni cosa dxabaʼ ne qué ridxaagaʼ cani riníʼ de laani. Qué racaladxediáʼ chuʼ xiixa ni gucaa naa guneʼ ni cadi jneza».

Xiñee qué gúniluʼ ndiʼ: Biiyaʼ xii nga cani ruquiinde lii guʼnuʼ cosa dxabaʼ ne guníʼ ique dede ante xi zanda gúniluʼ para cadi chuʼ xiixa ni gucaa lii guiábaluʼ lu trampa stícani (Mateo 6:13).

Yanna, pa neca cayúniluʼ stipa málasi guiábaluʼ luni sti biaje yaʼ. Qué chiguireeluʼ gana. Biblia na: «Zándaca guiaba ti binni nachaʼhuiʼ hasta gadxe biaje, ne ziásabe» (Proverbios 24:16). Dios, Bixhózenu ni nuu guibáʼ, nga cayabi laanu zanda guiásanu sti biaje. Ñee zudiiluʼ lugar gacanebe lii la? Pa zaca ni, cadi lica gusaanaluʼ de guni orarluʼ ne de gúʼndaluʼ Stiidxabe ti gaca fe stiluʼ naguidxi. Zanda gúniluʼ ni naguixhe íqueluʼ pa qué gusaanaluʼ de guidagulisaaneluʼ ca xpinni Cristu. Ne cadi gusiaandaluʼ ca diidxaʼ guníʼ Dios riʼ: «Naa dxandipeʼ zudieeʼ stipa lii. Dxandipeʼ zacaniáʼ lii» (Isaías 41:10).

Carlos, hombre ni bizéʼtenu ra bizulú tema riʼ, guníʼ sicaríʼ: «Nabé nagana guca para naa gusaanaʼ de guuyaʼ pornografía. Chupa chonna biaje biabaruáʼ luni, peru Dios gucané naa gusaanaʼ ni». Dylan, sti hombre ni bizéʼtenu ra bizulú tema riʼ, guníʼ: «Gastiʼ biaadxaʼ para ñaataniáʼ baʼdudxaapaʼ ni runeniáʼ dxiiñaʼ que, peru gucaʼ naguidxi ne gudxeʼ laabe qué ziaadiáʼ. Guizáʼ galán runeʼ sentir nayá nuu xquendabiaaneʼ. Ne ni jma risaca nga nannaʼ rusiecheʼ Jiobá».

Ora lii gácaluʼ naguidxi, gucaanaluʼ ca cosa dxabaʼ ni ruquiinde lii guʼnuʼ la? gunna dxichi laaca guizáʼ zusiécheluʼ Jiobá (Proverbios 27:11).