«Intiica iquiiñuʼ la? maca nannuʼ na, raríʼ nuaaʼ para gacaniáʼ lii.» Zándaca cadi casi zeluʼ ñábiluʼ ndiʼ ti binni ni qué runibiaʼluʼ o tuuxa ni deruʼ binibiaʼluʼ. Peru qué lica niníʼ íqueluʼ para ñábiluʼ ni tobi ni maʼ xadxí xhamíguluʼ. Ne cadi guendaridxagayaa nga, purtiʼ guiranu racaláʼdxinu gacanenu ca xhamígunu ne gúninu ni guinábacaʼ laanu.

Biblia rusiidiʼ laanu maʼ biaa Jiobá guni stale cosa para guibani ca xpinni nayecheʼ. Casi rey David, ti hombre ni nabé guca xhamigu Dios guníʼ ca diidxaʼ riʼ: «Stale cosa sicarú nga ni maʼ bíʼniluʼ para laadu, [...] nabé nga riníʼ íqueluʼ laadu; [...] stale cani dede qué zanda guiniéʼ guiráʼ cani» (Salmo 40:5). Peru cadi ngasi nga ni runi Jiobá, laabe rúnibe stale cosa galán dede né para ca binni ni qué lica runibiáʼ laabe. Biblia na: «Qué rusiaadxa be ni idóʼ no, ne ruchá be ladxidóʼ no de enda nayecheʼ» (Hechos 14:17).

Cumu nabé riuulaʼdxiʼ Jiobá gusiecheʼ laanu la? laanu laaca naquiiñeʼ gúninu stipa pur gusiéchenu laabe (Proverbios 27:11). Nga runi, xi naquiiñeʼ gúninu para gusiéchenu Dios yaʼ. Biblia ricabi guendarinabadiidxaʼ riʼ: «Cadi usiaanda tu aca tu nachaʼhui ne binni, ne udii tu tindaa de ni napa tu cani qué gapa, purti casi ñaca nusigaʼde tu ni Dios ne nga nga ni riulaʼdxiʼ» (Hebreos 13:16). Ñee riníʼ ca diidxaʼ ca gácasinu nachaʼhuiʼ ne gacanenu xcaadxi binni nga zusiéchenu ladxidóʼ Jiobá la?

Coʼ, cadi nga si nga ni naquiiñeʼ gúninu. Biblia na: «Peru qué zanda guni binni ni riulaʼdxi Dios pa qué runi cre» (Hebreos 11:6). Laaca ruzeeteʼ ni beeda gaca Abrahán «xhamigu [Jiobá]», peru despué de gupa fe laabe (Santiago 2:23). Ne Jesucristu peʼ guníʼ para ganda gápanu ndaayaʼ stiʼ Dios naquiiñeʼ gápanu fe (Juan 14:1). Yanna, ximodo zanda gápaluʼ fe ni riuulaʼdxiʼ Dios gapa ca xhamigu yaʼ. Ni naquiiñeʼ gúniluʼ primé nga guiaaluʼ guni estudiarluʼ Biblia. Zacá zánnaluʼ xi canabaʼ Dios lii ne zanda gusiécheluʼ laabe lu guiráʼ ni gúniluʼ. Pa gúniluʼ stipa pur gunibiáʼ chaahuiluʼ laabe ne guzuubaluʼ stiidxabe la? zaca fe stiluʼ jma naguidxi ne jma zadxíñabe lii (Colosenses 1:9, 10).