Guleʼ ndaaniʼ ti guidxihuiiniʼ láʼ Sajonia, ni binibiáʼcabe casi República Democrática Alemana o RDA. Nabé gunnaxhii bixhozeʼ ne jñaaʼ naa ne bisiidicaʼ naa guneʼ ni jneza. Cumu guca República Democrática Alemana ti guidxi comunista la? stale binni de guidxi Sajonia guníʼ íquecaʼ qué risaca ca religión. Naa qué ñuneʼ cré pa nuu Dios, ne dede dxi nahuiineʼ hasta dxi napaʼ dieciocho iza gucaʼ ateu ne bineʼ apoyar ti partidu comunista.

¿Xiñee bineʼ apoyar ti partidu comunista yaʼ? Purtiʼ gucalaʼdxeʼ guisaca guiráʼ binni biaʼ queca. Dede guníʼ iqueʼ maʼ cadi chuʼ binni ricu nin pobre ne gapa binni biaʼ queca para iquiiñeʼ. Bineʼ apoyar ti partidu comunista ra nuu puru joven. Dxi napaʼ 14 iza, gucaniáʼ ti lugar ra raca reciclar guiʼchiʼ. Bidii ca autoridad municipal de guidxi Aue xquixe peʼ naa pur ni cayuneʼ que ne dede bidiicaʼ naa ti premiu. Neca nahuiineruaʼ binebiaʼyaʼ stale políticu risaca. Guníʼ iqueʼ biaʼsi ni cayuneʼ que ne ruluíʼ galán zabaneʼ.

Peru málasi bizaaca xiixa ni cadi cabezaʼ. Lu iza 1989 biaba muru de Berlín ne maʼ qué ñuuruʼ partidu comunista ladu este stiʼ Europa. Guizáʼ bireeʼ gana pur guiráʼ ni cayaca que. Laaca bidieeʼ cuenta biʼniʼ partidu comunista ni cadi jneza ne bíʼnicabe menu binni ni qué runi apoyar partidu stícabe. Peru ¿xiñee guca guiráʼ nga yaʼ? ¿Ñee cadi xa rusiidiʼ ca comunista ca chuʼ binni tobi si la? Racá nga bidieeʼ cuenta cadi dxandíʼ guiráʼ ni rúnicabe ne pur guiráʼ ndiʼ, guizáʼ guyuaaʼ xizaa.

Bichaa’ modo nabaneʼ ne bizuluáʼ biziideʼ jma de música ne biziideʼ gutieeʼ. Guyuaaʼ lu ti scuela para guiziideʼ jma de música. Laaca gucuá iqueʼ chaaʼ universidad, gacaʼ músicu ne gutieeʼ. Ti cosa cadi jneza ni bineʼ nga maʼ qué ñuneʼ ni bisiidiʼ bixhozeʼ ne jñaa naa guneʼ dxi nahuiineʼ. Ni jma gucuá iqueʼ nga gaca’ divertir ne dede gupaʼ stale novia. Peru qué nusaana de ñuaaʼ xizaa neca biziideʼ jma de música, biziideʼ gutieeʼ ne bineʼ ni gupaʼ gana, ne bisihuinneʼ ni lu ca cuadru ni bitieeʼ. Dede guníʼ ique: ¿Ximodo zabaneʼ despué yaʼ? ¿Xi pur nabaneʼ?

Guizáʼ bidxagayaaʼ dxi biziideʼ xi naquiiñeʼ guneʼ para guibaneʼ nayecheʼ. Ti dxi gurieniáʼ caadxi baʼduʼ scuela ni caniʼcaʼ de ximodo zabani binni despué. Ládecabe nuu Mandy, * ti testigu stiʼ Jehová ni bidii naa ti conseju nabé galán. Gúdxibe naa: «Andreas, pa racaláʼdxiluʼ gánnaluʼ ximodo guibániluʼ nayecheʼ ne xi zazaaca despué la? biyubi ni lu Biblia».

Primerugá qué naʼyaʼ guʼndaʼ Biblia, peru despué biʼndaʼ ni. Biluíʼ Mandy naa capítulo 2 stiʼ libru de Daniel, ne ora biʼndaʼ ni, guizáʼ bidxagayaaʼ. Lu profecía que riete nuu caadxi potencia mundial o gobiernu ni huayuni stale cosa lu Guidxilayú. De racá biluíʼ Mandy naa xcaadxi profecía ni riníʼ ximodo zabani binni despué. Yanna huaxa bidxelaʼ ca respuesta ni cuyubeʼ que. Peru ¿tu bicaa ca profecía riʼ yaʼ? ¿Tu laa guníʼ xi peʼ nga chiguizaaca despué? ¿Ñee riníʼ ndiʼ dxandíʼ nuu Dios la?

Biʼniʼ presentar Mandy naa ti guendaxheelaʼ de Testigu, Horst ne Angelika. Gucané guendaxheelaʼ riʼ naa guieneʼ chaahueʼ ni rusiidiʼ Biblia. Nagueendaca bidieeʼ cuenta naca ca testigu stiʼ Jehová ti organización ni ziné lá Dios ne rusiidicaʼ binni de laabe (Salmo 83:18; Mateo 6:9). Biziideʼ racalaʼdxiʼ Jehová guibani binni lu ti paraísu ndaaniʼ Guidxilayú riʼ. Lu Salmo 37:9 ná: «Ca ni cabezaʼ gulá Jehová laacaʼ, zacaacaʼ Guidxilayú». Ra biindaʼ textu riʼ bidieeʼ cuenta racalaʼdxiʼ Jehová guibani guiráʼ binni ni guni ni nabe galán.

Cadi casi ziaaʼ bichaaʼ ne guca nagana para naa guibaneʼ modo ná Biblia. Ra gucaʼ músicu ne pintor, biʼniʼ ni naa ti binni orgulloso, ngue runi gupa xidé gucaʼ humilde. Laaca guca nagana para naa gusaana de guneʼ cosa malu. Rudieeʼ xquixe peʼ Jehová purtiʼ napa paciencia, riene ne nadxii ca binni ni runi stipa pur guni ni rusiidiʼ Biblia.

Dede dxi nahuiineʼ hasta dxi napaʼ dieciocho iza gucaʼ ateu ne bineʼ apoyar ti partidu comunista, peru bichaa Biblia modo nabaneʼ. Ni biziideʼ lu Biblia gucaneni naa chuaadxiéʼ ne maʼ cadi chuaaʼ xizaa pur ni chiguizaaca despué. Guyuaanisaʼ lu iza 1993 casi testigu stiʼ Jehová, ne lu iza 200 bichaganaʼyaʼ Tabitha, ti hermana ni runi xhiiñaʼ Dios né stale gana. Guirópadu rusíʼdidu binni de Biblia. Cásica bizaacaʼ dxiqué, tiempu riʼ, stale binni qué runi cré Dios ne runi apoyar partidu comunista. Peru guizáʼ riecheʼ ora racaniáʼ binni gunibiáʼ Jehová.

Dxi bizuluáʼ biindaniáʼ ca testigu stiʼ Jehová, guizáʼ bidxibi bixhozeʼ ne jñaaʼ. Peru ra gudiʼdiʼ tiempu bidiicaʼ cuenta ximodo cuchaa Biblia modo nabaneʼ. Yanna maʼ nuaaʼ nayecheʼ purtiʼ maʼ cayuni estudiárcabe Biblia ne maʼ riécabe reunión ni runi ca testigu stiʼ Jehová.

Naa ne Tabitha rúnidu stipa chinándadu ca conseju ni zeeda lu Biblia para ca ni maʼ bichaganáʼ ne nga huayacané laadu guibánidu nayecheʼ. Cumu nayá xquendaxheeladu ne rusisácadu ni la? nga runi nuudu tobi si (Hebreos 13:4).

Maʼ cadi nuaaʼ xizaa pur ni chiguizaaca despué. Yanna ra maʼ nacaʼ testigu stiʼ Jehová, nuaaʼ ndaaniʼ ti familia ni nuu tobi si ne nadxiisaa. Ndaaniʼ familia riʼ, guiranu igual laanu, ndiʼ nga ni siempre bineʼ cré ne ni biyubeʼ dede dxiqué.