Lunes siadóʼ, 10 de octubre de 2022, bisaba guidxi Rusia caadxi misil ndaaniʼ caadxi guidxi stiʼ Ucrania. Bizaaca ndiʼ purtiʼ chupa gubidxa ante guyuu ti explosión lu ti puente ni riaana entre Crimea ne Rusia. Ne cadi tan xadxí, guníʼ caadxi políticu maʼ cadi candaa zuzulú Armagedón.

•   «Dede ca dxi biʼniʼ mandar Kennedy [presidente stiʼ Estados Unidos] ne dede dxi bidxélacabe ti lugar ra nuu stale misil ndaaniʼ guidxi Cuba, qué huayuʼnu tan gaxha de Armagedón casi yanna riʼ. [...] Ra guzulú iquiiñecabe ca arma nuclear, zándaca racá nga guzulú Armagedón (Joe Biden, presidente stiʼ Estados Unidos, 6 de octubre de 2022).

•   «Para naa la? maʼ bizulú Armagedón; ne zuninani guidubi Guidxilayú» (ni guníʼ Volodímir Zelenski —presidente stiʼ Ucrania— ora gunabadiidxacabe laabe xi zanda guizaaca pa iquiiñecabe arma nuclear; BBC News, 8 de octubre de 2022).

 ¿Ñee ra iquiiñeʼ ca arma nuclear ca nga ra guzulú Armagedón la? ¿Xi caníʼ Biblia de laani?

 Coʼ. Ti biaje si riete diidxaʼ Armagedón lu Biblia, lu Apocalipsis 16:16. Ne cadi laani nga ti guerra ni chiguzulú caadxi guidxi, sínuque nácani ti guerra ra chitinde Dios ne «ca rey nuu lu guidubi guidxilayú» (Apocalipsis 16:14). Ne lu guerra de Armagedón riʼ nga chigunitilú Dios ca gobiernu nuu ndaaniʼ Guidxilayú (Daniel 2:44).

 Para gánnaluʼ xi zazaaca Guidxilayú lu Armagedón, biindaʼ artículo ni láʼ «¿Xii nga Armagedón?».

 Coʼ. Zándaca despué zaquiiñeʼ ca gobiernu arma nuclear, peru qué zudii Dios lugar iquiiñecabe ni para gunitilúcabe Guidxilayú. Biblia ná:

•   «Guidxilayú riʼ qué ziuu dxi guiluxe» (Eclesiastés 1:4).

•   «Zacaa ca ni biʼniʼ ni jneza guidxilayú ne zabánicaʼ luni para siempre» (Salmo 37:29).

 Guiráʼ ni riete lu ca profecía zeeda lu Biblia ne guiráʼ ni cazaaca tiempu riʼ rusihuínnicani maʼ nabáninu lu ca últimu dxi (Mateo 24:3-7; 2 Timoteo 3:1-5). Biiyaʼ xi rusiidiʼ Biblia de ni chiguizaaca despué ra gúʼndaluʼ Biblia sin quíxeluʼ.