Coʼ, cadi sionista diʼ laadu. Ca testigu stiʼ Jehová nácadu xpinni Cristu ne lu Stiidxaʼ Dios nga zeeda cani runi credu. Neca nuu religión riníʼ zeeda caadxi profecía lu Stiidxaʼ Dios ni cuzeeteʼ zadagulisaa ca judíu ndaaniʼ guidxi Palestina, peru laadu, ca testigu stiʼ Jehová, qué riníʼ íquedu zacá. Qué runi credu pa zeeda xiixa profecía lu Stiidxaʼ Dios ni caníʼ de movimientu políticu riʼ. Ne qué riuu diʼ cani rusiidiʼ Stiidxaʼ Dios pur ti gobiernu ni nuu lu Guidxilayú ne laaca qué riuu diʼ cani pur ti raza binni si. Revista Torre stiʼ ni rapa, stiʼ ca testigu stiʼ Jehová, huaníʼ «qué lica rieeteʼ de sionismo políticu lu Biblia».

 Ti Encyclopædia Britannica cusiene xii nga sionismo. Laani nga ti «movimientu nacionalista stiʼ ca judíu ni cuyubi gacané para chuʼ ti gobiernu guni mandar guidubi territorio stiʼ Palestina». Ne zeeda ni de ca religión ne de política. Ca testigu stiʼ Jehová qué rinándadu doctrina religiosa stiʼ ca sionista ne laaca qué riuʼdu lu política sticaʼ.

 Ca testigu stiʼ Jehová nácacaʼ ti organización religiosa ne qué rinándacaʼ política, nin sionismo. Runibiáʼ binni laadu purtiʼ qué riuʼdu lu política, ne pur nga nabé huazabinándacabe laadu ndaaniʼ caadxi guidxi roʼ. Nanna dxíchidu, nin ti gobiernu o ti grupu de binni qué zanda gacané para gusaana binni de tinde lu Guidxilayú. Tobi lucha gobiernu ni zanda guni ni nga Reinu stiʼ Dios ni nuu guibáʼ.

 Nuu ti principiu ni rinanda ca testigu stiʼ Jehová lu xquendanabánicaʼ; rúnicaʼ ni na ca ley riguixhe gobiernu, ra tiica nabézacaʼ. Nin tobi de ca xpínnidu qué rucaalú gobiernu ne qué riuu lu guerra.