Clase 138 stiʼ Scuela stiʼ Galaad guca graduación stiʼ ni sabadu 14 de marzo 2015, ndaaniʼ Centro Educativo stiʼ Watchtower ni nuu Patterson (Nueva York). Biaʼsi jma de 14,000 binni biʼyaʼ programa riʼ maca né cani guca conectar para guʼyaʼ ni pur videu ndaaniʼ xcaadxi lugar. Bizulú programa riʼ dede ora bixhídxicabe ti saa ra zeeda tapa diidxaʼ riuundaʼ nacubi, ni biʼndaʼ cani nuu ra cayaca graduación riʼ despué lu programa riʼ. *

Geoffrey Jackson, tobi de cani nuu lu Grupu ni Zaniruʼ stiʼ ca testigu stiʼ Jiobá, guca presidente stiʼ programa. Ora bizúlube, gúdxibe ca estudiante que cadi guiníʼ íquecaʼ laasicaʼ naquiiñeʼ gánnacaʼ cani biziidicaʼ, sínuque iquiiñecaʼ cani para gacanecaʼ stobi (2 Timoteo 2:2).

Bisiene hermanu Jackson ejemplu stiʼ Moisés. Guyuu ti tiempu biʼniʼ adorar guidxi Israel Dios ndaaniʼ tienda stiʼ profeta riʼ. Peru dxi gurí tabernáculo que, maʼ qué ñaca ni raqué. Ne ruluíʼ si qué ñanda ñuu Moisés lugar jma nandxóʼ stiʼ tabernáculo que, purtiʼ ca xaíque si stiʼ ca sacerdote nga naquiiñeʼ chuʼ raqué. Neca zaqué, qué ruzeeteʼ diʼ Biblia pa gudicheruaabe dxi bidxaa ni, laga gucanebe Aarón sin nudxiidéchebe laa ora gucuaa ti dxiiñaʼ nacubi, gaca xaíque stiʼ ca sacerdote (Éxodo 33:7-11; 40:34, 35). Xi rizíʼdinu de ejemplu riʼ yaʼ. Hermanu Jackson guníʼ: «Lagusisaca dxiiñaʼ nápatu peru cadi guiníʼ íquetu para laasitu cani».

«Ñee zadxíbitu ora xhidxi ti bandaga la?» Zacá lá libana bidii hermanu Kenneth Flodin, tobi de cani racané lu Comité de Enseñanza stiʼ Grupu ni Zaniruʼ. Laabe gúdxibe ca estudiante que zadxaagalucaʼ guendanagana nadipaʼ, casi sanándacabe laacaʼ o gúnicaʼ xiixa dxiiñaʼ nabé nagana. Óraque biquiiñebe chupa chonna diidxaʼ ni zeeda lu Levítico 26:36 para gúdxibe laacaʼ gúʼyacaʼ ca guendanagana que casi ora nixidxi ti bandaga bidxi, ne cadi casi xiixa ni qué zanda gaca chaahuiʼ. De raqué bizeetebe ejemplu stiʼ apóstol Pablu, laa gunda biʼniʼ huantar stale guendanagana purtiʼ gupa confianza Jiobá (2 Corintios 1:8, 10).

«Xi cuyúbitu.» Libana ni bidii Mark Sanderson, tobi de cani nuu lu Grupu ni Zaniruʼ. Laabe bizeetebe ca diidxaʼ zeeda lu Proverbios 13:12: «Ora cueza binni xiixa ne qué gaca ni la? runi huará ni ladxidóʼ». Nabé triste guininu ndiʼ, peru stale binni riguixhe ique guni xiixa ni nabé nagana zaca para laa ugaanda, casi gapa bidxichi o gaca tuuxa.

Ca dxi bibani Jesús, guyuu caadxi binni ni gucuá íquecaʼ ñuni Juan ni Riguunisa caadxi cosa (Lucas 7:24-28). Zándaca nuu tu laa guleza ñácabe ti filósofo ni nusiene laacaʼ de xiixa ni qué rihuinni. Pa nga guníʼ íquecabe la? qué ñaca ni zaqué purtiʼ puru si ni dxandíʼ nga bisiidiʼ Juan. Zándaca laaca guyuu xcaadxi guníʼ íquecaʼ zácube lari risaca, peru laabe gúcube lari casi racu binni pobre. Peru cani cabeza ti profeta la? qué ñuni sentircaʼ zaqué, purtiʼ cadi tutiisi profeta nga guca Juan, laabe nga gúdxibe binni chigueeda Mesías (Juan 1:29).

Biquiiñeʼ hermanu Sanderson ejemplu riʼ para guluu gana ca estudiante que gucaa íquecaʼ gácacaʼ casi Juan. Lugar de gudxiibacaʼ laacaʼ o cuézacaʼ gusisácacabe laacaʼ la? naquiiñeʼ gusiidicaʼ xcaadxi hermanu ni biziidicaʼ ra guyecaʼ Galaad, gacanecaʼ laacabe gápacabe jma fe ne gusihuínnicaʼ nadxiicaʼ laacabe. Laaca guníʼ hermanu Sanderson: «Lagacané ca hermanu sin gudxiibatu laatu, laguni stipa pur gúnitu ni na Jiobá ne qué ziuu dxi guni sentirtu casi ora qué ñaca ni cabézatu gacaʼ».

«Ñee zuyaanatu cani candaana la?» Nga biree lá libana bitiidiʼ James Cauthon, ti instructor stiʼ Departamentu stiʼ ca scuela ni napa xquidxi Dios. Hermanu Cauthon, guníʼ guiranu nga caquiiñenu gannaxhiicabe laanu ne gusisácacabe laanu. Dede né Jesús biquiiñeʼ cani, ne bidii Jiobá cani laabe ora guniʼné laabe né guendarannaxhii dxi guyuunísabe (Mateo 3:16, 17).

Dxi bizáʼ Jiobá laanu bíʼnibe laanu maca para ganda cuʼnu gana sti binni, ne gacanenu laacaʼ gácacaʼ naguidxi pur modo guininu ne racaláʼdxibe iquiiñenu ni bidiibe laanu ca (Proverbios 3:27). Hermanu Cauthon guníʼ: «Laguni stipa pur gúʼyatu ca cosa galán napa xcaadxi». Pa cúʼcabe gana ca hermanu de guidubi ladxidóʼcabe la? zánnacaʼ guizáʼ risaca guiráʼ ni gúnicaʼ lu xhiiñaʼ Jiobá.

«Lagudii dede últimu gota.» Mark Noumair, ni racané lu comité de Enseñanza, bitiidiʼ libana ca. Biquiiñebe ejemplu stiʼ apóstol Pablu para guluube gana ca estudiante que cadi chuʼcaʼ conforme gúnicaʼ huaxiéʼ lu xhiiñaʼ Jiobá. Cásica apóstol ca, zuni sentírcabe zadxá tipa ladxidóʼcabe pa gudiicabe guiráʼ ni gándatiʼ pur xcaadxi (Filipenses 2:17, 18).

Qué ñuu dxi nusaba ique Pablu ora bidxagalú guendanagana. Cumu bidiibe últimu gota o bíʼnibe xhiiñaʼ Jiobá dede dxi gútibe la? gunda guniʼbe: «Bine xhiiña Dios dede biaʼ ra gunda tiʼ» (2  Timoteo 4:6, 7). Hermanu Noumair, guluu gana ca estudiante chinándacaʼ ejemplu stiʼ Pablu ra cadi gusaanacaʼ de gúnicaʼ xhiiñaʼ Reinu lugar ra chindacaʼ.

Experiencia: Michael Burnett, ti instructor stiʼ Departamentu stiʼ ca scuela ni napa xquidxi Dios, laabe bidiibe sti libana riʼ, luni bitiidiʼ ca estudiante que ti escena stiʼ ti experiencia ni gúpacaʼ ora bicheechecaʼ diidxaʼ ca dxi nuucaʼ Patterson.

Laaca guleenduruʼ ca estudiante que xcaadxi cosa galán pur bicheechecabe diidxaʼ ora tiisi ne purtiʼ gunácabe guniʼnécabe binni de Biblia lu diidxaʼ gulené para yendácabe ndaaniʼ ladxidoʼcaʼ. Tobi de ca estudiante que gunna nuu stale binni riníʼ diidxastiá lu territorio ra chigucheechecaʼ diidxaʼ. Ngue runi ante chebe biquiiñebe aplicación JW Language para biziidibe chupa chonna diidxaʼ lu diidxastiá. Dxiqueca biquiiñebe caadxi de cani biziidibe purtiʼ bizulú guníʼnebe ti hombre ni binibiaʼbe lu calle. Yanna maʼ ruundanécabe hombre que Biblia ne stapa de ca binnilidxi.

Entrevista: De raqué, William Turner, tobi de cani racané lu Comité de Serviciu stiʼ Grupu ni Zaniruʼ, biʼniʼ entrevistar tapa estudiante. Gunabadiidxabe laacaʼ de experiencia sticaʼ ante checaʼ Galaad ne de ni biziidicaʼ lu scuela riʼ.

Ca estudiante que bizeetecaʼ caadxi cosa biziidicaʼ lu clase que ni gucané laacaʼ. Tobi de laacabe guníʼ biziidiʼ stale de cani zeeda lu capítulo 10 stiʼ Lucas. Ra cayeeteʼ pabiáʼ nayecheʼ bibiguetaʼ guiráʼ 70 discípulo biseendaʼ Jesús chigucheeche diidxaʼ que. Neca biechené Jesús laacabe la? peru bisiidiʼ laacabe cadi naquiiñeʼ si guiéchecabe pur cani guleendúcabe, sínuque purtiʼ laaca bisiéchecabe Jiobá pur stipa bíʼnicabe. Ndiʼ rusietenalaʼdxiʼ laanu cadi naquiiñeʼ si chuʼnu nayecheʼ pur cani cueendunu, sínuque guiéchenu purtiʼ cayuulaʼdxiʼ Jiobá ni cayúninu.

Hermanu Turner bisietenalaʼdxiʼ ca estudiante que ca diidxaʼ ni zeeda lu Filipenses 1:6, ne gúdxibe laacaʼ maʼ bizulú Jiobá cayuni laacaʼ «nachaʼhuiʼ, ne [...] qué zusaana ndahui be ni».

«Cadi gusaana de guyadxitu Jiobá.» Samuel Herd, tobi de cani nuu lu Grupu ni Zaniruʼ, bitiidiʼ discursu de graduación que. Luni bisiénebe zanda guyadxinu Dios neca qué guidúʼyanu laa.

Ti modo gúninu ni nga guyadxinu guiráʼ ni bizaʼbe ne laacani zanda gusiidiʼ cani laanu stale de laabe. Ne Jiobá maʼ bixheleʼ xquendabiaaninu casi ñaca nuxheleʼ lunu para guidúʼyanu laa (Efesios 1:18). Ra jma guidúʼndanu Biblia, jma rizíʼdinu de Jiobá. Ne ra jma gánnanu de laabe la? zadxíñanu laabe jma.

Naquiiñeʼ guyachaahuinu ni zeeda lu ca evangeliu, purtiʼ racané guiráʼ diidxaʼ guníʼ Jesús ne cani bíʼnibe laanu para gánnanu ximódopeʼ nga Dios. Bisihuinni dxichi Jesús ximodo xpiaʼ Jiobá ora guníʼ: «Ni ma biiya naa la? ma biiya Bixhozeʼ» (Juan 14:9).

Hermanu Herd guluu gana cani cucaadiaga que cadi gúʼyasicaʼ Jiobá pur ejemplu ni bisaana Jesús, sínuque chinándacaʼ ejemplu stibe. Cásica biʼniʼ Jesús stipa pur biyaanaʼ xcaadxi, laanu laaca naquiiñeʼ gúninu stipa pur gusíʼdinu binni guiráʼ ni rizíʼdinu de Dios, ne nga zeeda gaca casi ñaca nuyáʼnanu laacaʼ.

Pa qué gusaana de guyadxinu Jiobá la? ziuʼnu seguru cayúninu cásica biʼniʼ salmista, ni bicaa ca diidxaʼ riʼ: «Nuzuhuaaʼ Jiobá nezaluáʼ guiráʼ ora. Purtiʼ nuube ladu derechu stinneʼ, qué ziuu dxi guniibi dxáchacabe naa» (Salmo 16:8).

Maʼ para guiluxe ni: Gucuaasícabe diploma, biindaʼ tobi de ca estudiante que ti carta nabé sicarú para gudiicabe xquíxepeʼ pur ni biziidicabe. Oraqueruʼ gudxi hermanu Jackson ca estudiante que cadi guiníʼ íquecaʼ puru si ni nacubi ne ni nagana nga güínecaʼ ca hermanu, sínuque chigusietenalaʼdxisícabe cani laacaʼ purtiʼ maca nánnacaʼ stale de laacani. Laaca bizeeteʼ hermanu Jackson pabiáʼ risaca nga gácacabe binni ni qué rudxiibaʼ laa. Lugar de guiníʼ ca graduadu que de laacaʼ ne de cursu gucuaacaʼ Galaad la? jma naquiiñeʼ gusisácacaʼ Biblia ne ca publicación ni nápacabe. Ne guniʼbe lugar de cueecabe gana ca hermanu ni qué zanda cheʼ Galaad, naquiiñeʼ gacanécabe laacaʼ guicaacaʼ guiráʼ ni rudii xquidxi Dios para guiziidicaʼ. Ora biluxe reunión que guizáʼ biecheʼ guiráʼ ni nuu raqué ne guizáʼ maʼ rápacaʼ gana gacanecaʼ ca hermanu.