Nabé cayacané sitiu jw.org binni nabeza lu guidubi Guidxilayú. Chiguzéʼtedu ni bicaa caadxi binni ra nuu central mundial stiʼ ca testigu stiʼ Jiobá para gudiicaʼ xquíxepeʼ pur sitiu riʼ. Ndiʼ nga bicaacabe ra nuudu dede mayo 2014.

«Dxiqué ora ribiguetaʼ xiiñeʼ de ra guardería redané lápiz, juguete ne lente para gubidxa stiʼ ca xcompañeru. Stale biaje gucaláʼdxidu nusiénedu laabe cabáʼnabe ne malu cuanaʼ binni, peru qué ñanda ñacanedu laabe. Ti dxi gundétedu videu nuu lu jw.org ni láʼ Malu cuanaʼ binni. ¡Nabé racané ni binni! Biáʼsipeʼ laani caquiiñeʼ xiiñidu. Biiyasibe videu riʼ, guniʼbe zudxiguétabe guiráʼ ni gucuaabe que, purtiʼ maʼ nánnabe qué riuulaʼdxiʼ Dios cuanaʼ binni. ¡Aque gucané sitiu nuu lu Internet riʼ laadu!» (D. N., África.)

«Nabé riuulaʼdxiʼ ca xiiñeʼ sitiu riʼ. Rindétecaʼ videu de caricatura ni racané laacaʼ chinándacaʼ ca principiu zeeda lu Biblia, tobi de laacani nga cadi cuánacaʼ. Laaca riziidicaʼ xcaadxi cosa risaca ni zacané laacaʼ ora guiniisicaʼ ne ni zacané laacaʼ gúnicaʼ ni jneza.» (O. W., las Antillas.)

«Nabé nagana guca para naa guneʼ estudiar ne gucalaʼdxeʼ nusaanaʼ de ñaaʼ scuela. Peru ti dxi biindaʼ tema ¿Debería dejar de estudiar? ni zeeda lu sitiu jw.org. Dede dxiqué jma maʼ guyuuladxeʼ chaaʼ scuela. Bisiidiʼ tema ca naa racané scuela binni ora guiniisi ne racané ni laa guni xhiiñaʼ jma jneza.» (N. F., África.)

«Ca conseju rudiicabe cani nahuiiniʼ lu sitiu riʼ maʼ gucané cani naa guzuubaʼ diidxaʼ ra scuela. Maʼ biziideʼ gucaaʼ iqueʼ ni caziideʼ ra scuela ne cadi gudieeʼ lugar chuʼ xiixa ni guchiiñaʼ naa.» (G., África.)

«Ti gunaa runeniáʼ dxiiñaʼ byuiʼné naa nuu ti dxaapahuiiniʼ quiñe xiiñiʼ ra scuela. Nabé cadxibi dxaapahuiiniʼ stibe ne feu biʼniʼ sentir dede maʼ qué niná ñé scuela chupa chonna gubidxa. Gudxeʼ gunaa riʼ nuu ti sección lu jw.org ni láʼ La pizarra animada ne biluéʼ laa xi guiráʼ cusiidiʼ videu Ximodo gudxiiluluʼ tuuxa sin tíndeluʼ. Nabé guyuuláʼdxibe conseju ra na cadi naquiiñeʼ guidxiichi binni ora gúnicabe laa xiixa. Despué bisiene gunaa riʼ xiiñiʼ xi zanda guni ora chuʼ tu gucaalú laa, oraqueruʼ maʼ qué nidxibi ñé scuela. Gudiʼdiʼ si tiempu, maʼ qué niziñe dxaapahuiiniʼ que laabe ne dede guca xhamígacabe.» (V. K., Europa oriental.)

«Xquíxepeʼ laatu saca bicaatu tema ¿Por qué siento el impulso de cortarme? ni nuu lu jw.org. Maʼ xadxí cadideʼ lu guendanagana riʼ. Zácaxaʼ guirútiruʼ runiná laa casi runeʼ que ne pa güeniáʼ ni tuuxa qué ziene xi cayacaʼ. Nabé gucané guiráʼ ni rieeteʼ lu tema riʼ naa. ¡Deruʼ bidieeʼ cuenta nuu tu riene naa!» (Ti baʼdudxaapaʼ de Australia.)

«Nabé maʼ huayacané sitiu jw.org naa guidxelaʼ xiixa tema ni caníʼ de ca guendanagana ridxaagalú ca hombrehuiiniʼ ne ca dxaapahuiiniʼ. Tobi de ca tema stini maʼ gucané naa gannaʼ xi guiráʼ runi binni para gucaa tuuxa gatané laa, bidieeʼ cuenta nguepeʼ nga ni cazaacaʼ ne bieneʼ xi naquiiñeʼ guneʼ para gapaʼ naa.» (T. W., las Antillas.)

«Aque nadxiʼñaʼ hombrehuiiniʼ stinneʼ. Qué ribidxibe ne qué zieʼnuʼ laabe dede rusidxágabe naa. Nga runi, raca nagana para naa güeniáʼ laabe diidxaʼ. Ti dxi guyuaaʼ lu ti sección stiʼ jw.org ra zeeda conseju para guendaxheelaʼ ne cani napa xiiñiʼ, luni bidxelaʼ stale tema ni cusiene de guendanagana napaʼ que. Gucanécani naa güeniáʼ xiiñeʼ diidxaʼ. Ne laaca maʼ gucané sitiu nuu lu Internet riʼ laabe. Yanna huaxa maʼ rábibe naa xipeʼ cayácabe, xi riguu xizaa laabe ne xi rusiecheʼ laabe.» (C. B., África.)

«Sitiu jw.org racané ni binni ganna ximodo gusiidiʼ ca xiiñiʼ sin guireecabe gana. Casi videu ni cusiene ximodo zanda guidxela binni tuuxa ni dxandíʼ gaca xhamigu, ni nuu lu sección La pizarra animada gucané ni ca xiiñidu gánnacaʼ ximodo raca xhamigu chupa binni ne cuicaʼ gaca xhamígucaʼ binni ni dxandíʼ gacané laacaʼ. Nuu tiru órapeʼ cadiʼdiʼ ca xiiñidu lu xiixa guendanagana oraquepeʼ nga guiree ti tema ni caníʼ de laani lu sitiu riʼ. Zeeda stale conseju galán luni.» (E. L., Europa.)

«Naa ne xheelaʼ maʼ nápadu xhoopaʼ iza de bichaganadu. Cásica runi guiráʼ guendaxheelaʼ, gupa xidé bizíʼdidu guiaʼdu laadu, guiénesaadu ne bizíʼdidu güidu diidxaʼ. Nga runi, nabé guyuuladxeʼ tema Aprenda a escuchar ni nuu lu jw.org. Luni zeeda conseju ni gucané laadu gucaadiaga chaahuidu laadu. Biindaʼ guidubi tema riʼ ne despué bidieeʼ ni xheelaʼ guʼndaʼ ni. Cayúnidu stipa gúnidu ni na ca conseju zeeda luni.» (B. B., las Antillas.)

«Maʼ napa ti iza de runebiaʼyaʼ ca testigu stiʼ Jiobá ne nuaaʼ gudieeʼ xquíxepeʼ laacaʼ pur sitiu jw.org. Maʼ stale ni biziideʼ... dede ximodo gucueezaʼ naa ti cadi guidxiicheʼ nagueenda ne biziideʼ gusiniiseʼ ca xiiñeʼ jneza ne guibaneniáʼ xheelaʼ nayecheʼ. Dxandipeʼ zanda guinieeʼ bilá sitiu nuu lu Internet riʼ xquendaxheelaʼ.» (L. G., las Antillas.)

«Bineʼ sentir casi ñaca nibaneʼ sti biaje ora biquiiñeʼ sitiu jw.org. Ca videu nuu lu diidxaʼ seña inglés maʼ gucanécani naa güeniáʼ binni diidxaʼ. Dxiqué guníʼ iqueʼ qué zanda guneʼ xiixa cosa risaca lu xquendanabaneʼ, peru ora biiyaʼ videu Ahora veo la Biblia en mi idioma yendani ndaaniʼ ladxiduáʼ ne gucané ni naa gudieeʼ cuenta zanda guneʼ stale cosa lu xquendanabaneʼ.» (J. N., África.)

«Naca sitiu riʼ ti tesoro. Nuaaʼ lu ti grupu ni racané cani qué runadiaga ne jma nga racanedu ca hombrehuiiniʼ ne ca dxaapahuiiniʼ. Guiráʼ publicación nuu lu diidxaʼ seña maʼ gucanécani naa gannaʼ chaahueʼ diidxaʼ riʼ. Lu sitiu riʼ maʼ bidxelaʼ ximodo gacaniáʼ xcaadxi binni chúʼnecaʼ ca xhamígucaʼ ne ca binnilídxicaʼ galán.» (K. J., las Antillas.)

«Ciegu naa ne nabé maʼ gucané sitiu jw.org naa. Nindaa chupa chonna beeu para ñedandá guiráʼ ni nuu lu sitiu riʼ ra nuaaʼ pa ñaca nuseendacabe ni lu correu stinneʼ. Guiráʼ ni biziideʼ lu sitiu riʼ maʼ gucané cani naa guibaneniáʼ binnilidxeʼ jma nayecheʼ ne maʼ randa racaniáʼ binni xquidxeʼ. Laaca riuuladxeʼ guicaaʼ xiixa publicación óraca ricaa ca xhamiguaʼ ni cadi ciegu ni.» (C. A., Sudamérica.)

«Nabé racané sitiu jw.org ca binni ni qué randa ruundaʼ braille o cani qué randa rizíʼ libru nuu lu braille. Ca grabación nuu luni racanécani ca ciegu guiziidicaʼ stale cosa. Dxandipeʼ guca sitiu riʼ para gacané ni guiráʼ clase binni ne qué runi ni menu guirutiʼ. Rusisaca ni ca ciegu ne racané ni laadu guni sentirdu risácadu para binni.» (R. D., África.)

«Maʼ gadxé sitiu stitu de ca sitiu stiʼ xcaadxi religión purtiʼ zanda guiene tutiica binni cani zeeda luni ne cadi cani napa si religión. Laaca qué zareeluʼ gana gúʼndaluʼ ca tema zeeda luni purtiʼ nachucu cani. Cadi nagana cani zeeda lu sitiu riʼ ne qué rutálecabe diidxaʼ para gusiénecabe xiixa. Puru diidxaʼ risaca zeeda luni ne cadi ni riníʼ ique si binni. Nuu tu riníʼ nagana gapa binni fe, peru sitiu riʼ rusihuinni cadi zacá ni.» (A. G., Asia.)

«¡Gastiʼ qué gannaʼ! Zacá bineʼ sentir ante chuʼ jw.org. Cada biaje chuaaʼ luni, runeʼ sentir casi ñaca nucaaguiéʼ ti foco ndaaniʼ guidxilayú cahui ra nuu stale binni ni qué ganna gastiʼ de Dios. Nagueendaca ruundaʼ o rucaadiagaʼ xiixa tema ni cusiene xi riníʼ ique Dios de caadxi cosa ne lúcani ricábicabe cani racaladxeʼ gannaʼ.» (J. C., las Antillas.)

«Rudieeʼ xquíxepeʼ saca rusiiditu laadu de Dios galaa guiʼxhiʼ stiʼ Sudamérica. Qué nidxelaʼ xi ñuneʼ pa ñaca qué ñuu sitiu riʼ lu Internet.» (M. F., Sudamérica.)